1. Mambe mandutu bagwélél ba Yéhôva ba mboma?

BAA u mboma ngim ndutu i tôbôtôbô mangéda mana? Kiki hihéga, bebek i likoda joñ, mankéé wada a ñunbaha we. (Yakôbô 3:2) Mawanda moñ ma suklu tole solôñ yoñ i bôlô i nol we inyule u yé Mbôgi Yéhôva. (1 Pétrô 4:3, 4) I nla ki ba le, bôt boñ ba lihaa ba ngwés bé le u kee makoda tole u téé likalô. (Matéô 10:35, 36) Ibale u mboma ngolba ikeñi, hala a nla tinde we i waa gwélél Yéhôva. Ndi u nlama ba nkwoog nkaa le Yéhôva a ga ti we pék ni ngui i mbéda we inyu hônba to imbe ndutu u mboma.

2. Inoñnaga ni kaat Rôma 15:4, lelaa lisoñgol li Bibel li nla hôla bés?

² Yéhôva a bi yoñ bitelbene le ba tila miñañ mi bikwéha bi bôt bi bi bi hônba mandutu ikété Bibel. Inyuki? Inyu boñ le di ôt biniigana mu. Inyu hala nyen Yéhôva a bi tinde ñôma Paul i tila. (Añ Rôma 15:4.) Miñañ mi, mi nla hôgbaha bés, mi ti ki bés botñem. Inyu boñ le di ôt nseñ ni nwo, di nlama ndik bé añ. Ndi di nlama nwas le i yom di ñañ i Bibel i tihba ñem wés ni mahoñol més. Kii di nla boñ ibale di nyéñ maéba ma ma nla hôla bés i yémbél ngim ndutu? Di nla gwélél mana manjel ma-na: (1) Soohe, (2) Hégda le u yé i mut ba mpôdôl mu ñañ, (3) Soñda, ni (4) Bii i yom u nigil bisélél. Nano di béñge lelaa di nla boñ i mam mana mo ma-na * mu kiki di ba di wan i mam ma bi pémél Kiñe David ni ñôma Paul.

3. Ilole di mbôdôl soñgol Bibel, kii di nlama ndugi boñ, inyuki?

 ³ (1) Soohe. Ilole u mbôdôl lisoñgol li Bibel, bat Yéhôva mahôla inyu ôt nseñ ni lisoñgol joñ. Kiki hihéga, ibale u nyéñ maéba ma ma nla hôla we i hônba ngim ndutu, bat Yéhôva le a hôla we i léba matiñ ma Bibel ma ma nla hôla we i yi yom u boñ.​—Filipi 4:6, 7; Yakôbô 1:5.

4. Kii u nla boñ inyu boñ le ñañ u nsoñgol u lémél we?

⁴ (2) Hégda le u yé i mut ba mpôdôl mu ñañ. Yéhôva a bi ti bés ngap i tôbôtôbô i hégda mam. Inyu boñ le ñañ u Bibel u yé soñgol u tihba we, noode hégda le u niñ ha ngéda i, le we nyen ba yé pôdôl mu ñañ u. Noode tehe mam kiki nwet ba mpôdôl mu ñañ u, ni nôgda mam kiki nye.

5. I soñda wee kii, lelaa u nla boñ hala?

⁵ (3) Soñda. I soñda i yé i ôt pék mu mam u ñañ ni tehe lelaa u nla bii mo bisélél. I nhôla we i tibil nok lelaa mam ma bi tagbe. Ibale u ñañ Bibel ndi u soñda bé, u mpôna mut a nsômbôl kôñôô mbot yé libii, a nsomb libadô, a kit jo bipes bipes, a nwas jo hala ibabé i at gwo. I soñda i yé kiki i at bipes bi mabadô u nkit inyu tehe kiki mbot yoñ y’a ba. To ibale pes yada i yii, u badbaga hee u ga ha yo, u mal yi lelaa mbot yoñ i ga ba. I ngéda u ñôt pék, u nla badba le: ‘Kii mut ba mpôdôl munu ñañ unu a mboñ inyu hônba ndutu a mboma? Lelaa Yéhôva a bi hôla nye? Bimbe biniigana me ñôt bi bi nla nhôla me i hônba ndutu me mboma?’

6. Inyuki di nlama bii i yom di nigil bisélél?

⁶ (4) Bii i yom u nigil bisélél. Yésu a bi kal le ibale di nigil, ndi di bii bé i yom di nigil i bisélél, di mpôna mut a ñoñ ndap yé i ngii lisege. A nsal ni ngui, ndi biliya gwé bi yé yañga. Inyuki? Inyule i ngéda nop a no ni ngui, mbuk mbebi a hôñôk, malép ma mbet, ma kumul i ndap i, i bep kwo. (Matéô 7:24-27) Nlélém ni bés, ibale di nsoohe, di hégda le bés bon ba mpôdôl mu ñañ, di yoñ ki ngéda i soñda ndi di bii bé i bisélél, wee di nimis ngéda yés yañga. I ngéda mandutu ma nyiga lo tole ndééñga, di ga bana bé hémle i ngui inyu hônba. Ndi i ngéda di mbii i yom di nigil i bisélél, di ga yoñ makidik malam, di bana ñem nwee, ni hémle ngui. (Yésaya 48:17, 18) Inyu yi lelaa di nla gwélél manjel ma-na mana di nigil munu, di béñge biniigana di nla ôt mu jam li bi pémél Kiñe David.

7. Umbe ñañ u Bibel di ga tehe nano?

⁷ Baa liwanda joñ jada tole mut woñ lihaa a ma liibana we? Ibale hala, w’a ôt nseñ ni ñañ u Absalôm man Kiñe David, nu a bi liibana isañ, a noode ki kadal nye ane.​—2 Samuel 15:5-14, 31; 18:6-14.

8. Kii u nla boñ inyu kôhna mahôla ma Yéhôva?

⁸ (1) Soohe. Ni ñañ u mahoñol, añle Yéhôva i yom u nôgda ibôdôl nu ba bi liibana we. (Tjémbi 6:7-10) Tibil yaga toñle nye i yom i ntééñga we. I mbus u bat nye le a hôla we i léba matiñ ma Bibel ma ma nla hôla we i yémbél ndutu i.

9. I sem kwep, kii i bi tagbe ipôla David bo Absalôm?

⁹ (2) Hégda le u yé Kiñe David. Ôt mahoñol mu mam ma bi pémél Kiñe David, u noode ki hégda i yom a bi nôgda.  Absalôm man David a bi tégbaha ngandak ngéda i tinde litén i gwés nye iloo isañ. (2 Samuel 15:7) I ngéda a bi nôgda le libim li bôt li yé i mbus yé, a ep bôt ba mbep ni Israel nyensôna inyu kôôba litén i leege nye kiki kiñe. A bi pam yak i tinde Ahitôfel, liwanda li ñem nyuu li isañ li li bé ti nye maéba i lo i pes yé. Absalôm a bi telep nyemede kiñe, tolakii isañ a bé kon ngandak a bi noode gwel nye inyu nol nye. (Tjémbi 41:2-10) Kiki David a nyi hala, a nyodi Yérusalem a ke ngwéé. Sôk i nsôk, bisônda bi Absalôm bi bi jo gwét ni bisônda bi David. Ndi bisônda bi Absalôm bi bi biba, Absalôm nyemede a wo mu gwét bi.

10. Kii Kiñe David a bé le a boñ?

¹⁰ Nano, noode hégda i yom Kiñe David a bé le a nôgda i ngéda ba bi liibana nye. A bé gwés man wé Absalôm ngandak, a bôdlak Ahitôfel ñem. Ndi, bo iba ba bi liibana nye. Ba bi lôôha unbaha David, ba yéñ yak njel i nol nye. Hala a bé le a tinde David i nimis botñem a bééna ipañ mana mawanda mé mape, ni i hoñol le bebek yak bo ba nit Absalôm. Hala a bé le a tômbôs David kayéle a nyodi Yérusalem, a ke ngwéé. Ndi David a bi boñ bé hala. Maselna ni hala, a bi yémbél i ndutu i. Kii i bi hôla nye i yémbél yo?

11. Kii David a bi boñ ngéda a bé tégbaha mangéda mabe?

¹¹ (3) Soñda. Bimbe biniigana di ñôt mu ñañ u? U nla ki badba le: “Kii David a bi boñ inyu kôs mahôla?” David a bi sehla bé, hala a bi tinde bé nye i yoñ makidik mabe ibabé i hek pék. A bi yén bé to ha i kiiña, a badbaga le kii me boñ? Ndi, a bi bat Yéhôva mahôla. A neebe yak mahôla ma mawanda mé. David a bi pala yoñ makidik, a yônôs ki mo. Tolakii ba bi bep unbaha nye, hala a bi tinde bé nye i nimis bôdôl a bééna ipañ mawanda mé, a bi oo bé to bo. A bi ke ni bisu i bôdôl Yéhôva ñem yak ni mawanda mé.

12. Kii Yéhôva a bi boñ inyu hôla David?

¹² Lelaa Yéhôva a bi hôla David? Ibale u mboñ nyiña, w’a tehe le Yéhôva a bi ti David ngui i hônba ndutu i. (Tjémbi 3:2-9) Yéhôva a bi sayap makidik David a bi yoñ. A nit ki mawanda mé ngéda ba bé jo gwét inyu sôñ nye.

13. Lelaa u nla kôna David ibale mut a mbep unbaha we? (Matéô 18:15-17)

¹³ (4) Bii i yom u nigil bisélél. Badba le: ‘Lelaa me nla kôna David?’ U nlama hoo yoñ bitelbene inyu sañgal ndañ. U nla noñ maéba ma Yésu ma ma yé i kaat Matéô pes 18. (Añ Matéô 18:15-17.) U pala bañ yoñ makidik ngéda u yé ñunbak. Bat Yéhôva le a ti we ñem nwee, a hôla ki we i yi i yom u boñ. U waa bañ bôdôl mawanda moñ ñem. Ndi, neebe mahôla ba nti we. (Bingéngén 17:17) Jam li nlôôha nseñ, noñ maéba Yéhôva a nti we ikété Bibel.​—Bingéngén 3:5, 6.

14. Imbe ngéda kaat 2 Timôtéô 1:12-16; 4:6-11, 17-22 i nla ti we makénd?

¹⁴ Baa u mboma ngolba i bôt boñ ba lihaa ba ba ta bé Mbôgi Yéhôva? Baa u niñ i ngim loñ i het ba bi sôña nson u Mbôgi Yéhôva? Ibale hala, kaat 2 Timôtéô 1:12-16 ni 4:6-11, 17-22 i nla  ti we makénd. * Paul a bi tila minlôñ mini ngéda a bé mok.

15. Kii u nla bat Yéhôva?

¹⁵ (1) Soohe. Ilole u mbôdôl soñgol minlôñ mi Bibel mi, añle Yéhôva ndutu yoñ ni yom u nôgda. Tibil yaga toñle nye i yom i ntééñga we. I mbus, bat nye le a hôla we i léba matiñ ma Bibel mu ñañ Paul, matiñ u nla gwélél inyu hônba ngolba.

16. I sem kwep kii i bi pémél Paul?

¹⁶ (2) Hégda le u yé ñôma Paul. A yé mok i Rôma, ba ma kañ nye ni minsañ mi bikei. Ngélé bisu bé i le a kee i mok, ndi lini lisañ, a nyi ntiik le b’a nol nye. Mawanda mé mahogi ma ntjôô nye, a yé ki ntombok kiyaga.​—2 Timôtéô 1:15.

17. Kii Paul a bé le a boñ?

¹⁷ Paul a bé le a hoñol le ibale a yila bé nsañal, ki ba bi gwel bé nye. A bé le a unbene lôk kéé i bôlôm i Asia i i bi tjôô nye, a kit yak le a ga bôdôl ha bé mana mawanda mé mape ñem. Ndi Paul a bi boñ bé hala. Inyuki a bé nkwoog nkaa le mana mawanda mé mape ma ga tjôô bé nye, ni le Yéhôva a ga kôp nye bisai?

18. Kii Paul a bé boñ mu ndutu a bé boma?

¹⁸ (3) Soñda. Badba le: “Kii Paul a bi boñ inyu kôs mahôla?” Tolakii a bé yi le a ga les bé nyemb lini lisañ, Paul a bi hôya bé jam li nlôôha nseñ​—i ti Yéhôva lipém. A bi waa bé to ti lôk kéé yé ipe makénd. A bé soohe Yéhôva hiki ngéda. (2 Timôtéô 1:3) Iloole a lôôha yodop inyu mawanda mé ma ma bi tjôô nye, a bi ti i bet ba bi hôla nye mayéga. U héya hala, Paul a bi ke ni bisu i nigil Bañga i Djob. (2 Timôtéô 3:16, 17; 4:13) Jam li nlôôha nseñ li yé le, a bé nkwoog nkaa le Yéhôva bo Yésu ba ngwés nye ngandak. Ba bi tjôô bé nye, ñ, ba bi bom nye inyu nson wé ilam.

19. Lelaa Yéhôva a bi hôla Paul?

¹⁹ Yéhôva a bi béhe Paul le kiki a bé kristen, a bé lama kôs ndééñga. (Minson mi baôma 21:11-13) Lelaa Yéhôva a bi hôla nye? A bi timbhe masoohe ma Paul, yak ngim mangéda a bé ti nye ngui i hônba. (2 Timôtéô 4:17) Yéhôva a bi yis Paul le ibabé set a ga kôs bom inyu bôlô yé ngui. A bi tinde ki mawanda mé i ti nye mahôla a bééna ngôñ.

20. Inoñnaga ni kaat Rôma 8:38, 39, lelaa di nla nigle Paul?

²⁰ (4) Bii i yom u nigil bisélél. Badba le: ‘Lelaa me nla nigle Paul?’ Kiki Paul, di nlama ba nkwoog nkaa le yak bés di ga kôs ndééñga inyule di yé bikristen. (Markô 10:29, 30) Inyu ke ni bisu i gwélél Yéhôva to ikété ndééñga, di nlama bana lem i soohe nye ni i nigil Bañga yé hiki ngéda. Di nlama bigda le i jam li nlôôha nseñ ikété mam momasôna li yé le di ti Yéhôva lipém. Di nlama ba nkwoog nkaa le Yéhôva a ga tjôô bé bés kekikel, ni le yom yo ki yo i nla bé mélés i gwéha a gwééne bés.​—Añ Rôma 8:38, 39; Lôk Héber 13:5, 6.

21. Kii i bi hôla Aya ni Hector i hônba mandutu ba bé boma?

²¹ To kii i mpémél bés, ini ndémbél ipe Bibel i mpôdôl i nla hôla bés i bana  ngui i hônba mandutu di mboma. Kiki hihéga, mankéé Aya, nu a yé nsañal i loñ Yapan a nkal le, ndémbél i Yôna i bi hôla nye i yémbél woñi a bééna i yoñ ngaba i likalô li mbamba. Hector, mañge wanda nu a yé loñ Indônésia ni nu bagwal ba ta bé Mbôgi Yéhôva a nkal le, ndémbél i Ruth yon i bi hôla nye i yoñ makidik i gwélél Yéhôva.

22. Lelaa di nla tibil ôt nseñ ni miñañ mi bôt ba mpôdôl i bisinima bi ntôñ ni mu i jw.org, isi homa le “Ni kôna hémle yap”?

²² Hee u nla léba ndémbél i Bibel i i nla lédés we? Bisinima, mintuk ba ñemble ni minkwel mi mpam hiki ngéda i jw.org isi homa le “Ni kôna hémle yap” bi nhôla bés i jôp mu ñañ di yé soñgol. * Ilole u mbéñge, u ñemble, tole u ñañ miñañ mi, bat Yéhôva le a hôla we i léba biniigana bilam u nla bii bisélél. Hégda le we nyen ba mpôdôl mu ñañ. Mu kii u ñañ, ôt pék inyu yi kii bagwélél ba Yéhôva ba ba bi boñ ni lelaa Yéhôva a bi hôla bo i yémbél mandutu ma. I mbus bii biniigana u ñôt i bisélél. Ti Yéhôva mayéga inyu mahôla a yé a nti we. Inyu unda le u yé maséé ni mahôla a nti we, yéñ manjel i ti bôt bape makénd ni i nit bo.

23. Inoñnaga ni kaat Yésaya 41:10, 13, kii Yéhôva a mbôn bés?

²³ Niñ i let ngandak munu nkoñ ’isi u Satan unu, i yé i pam ngim mangéda le di yi bé to kii di boñ. (2 Timôtéô 3:1) Ndi di nlama bé kon woñi. Yéhôva a nyi mandutu di mboma. A mbôn le a ga gwel bés ni mpémba wé woo walôm i ngéda di mboma mandutu. (Añ Yésaya 41:10, 13.) Ibabé nkaa, Yéhôva a ga nit bés. Bañga yé le Bibel i nla hôla bés i yémbél to imbe ndutu di mboma.