1-2. Njee a nla hôla nnigil Bibel i hol ikepam i sôble?

AMY nu a niñ i biôn bi Fiji a nkal le: “Me bé gwés yigil Bibel ngandak. Me bé yi ki le maliga ma. Ndi me bi bôdôl hol ikepam i sôble i ngéda me bi kahal tégbaha ngéda ni bilôk bikéé bi bôlôm ni bi bôda bi likoda.” I jam li bi pémél Amy li ñunda le, nnigil Bibel a yé le a pala hol ikepam i sôble ngéda lôk kéé ipe i likoda i nhôla nye.

² Hiki ntéé likalô a nla hôla nnigil Bibel i yila nsôblege mankéé. (Éfésô 4:16) Nsañal wada le Leilani, nu a yé i loñ Vanuatu, a nkal le: “Man a ta bé man mut wada. Me nhoñol le nlélém jam won u ntagbe i ngéda di nyilha mut nnigil; likoda jolisôna li nlama yoñ ngaba i hôla mut i jôp maliga.” Bôt ba lihaa, mawanda ni balét, bobasôna ba nyoñ ngaba i hôla hisii mañge i hol letee a yila mut. Ba nhôla nye ni biniigana, ni makénd ba nti nye. Nlélém inyu banigil Bibel, batéé likalô bobasôna ba nla ti bo maéba, ba ti ki bo ndémbél ilam inyu hôla bo i hol ikepam i sôble.​—Bingéngén 15:22.

3. Kii di nigil mu jam Ana, Dorin ni Leilani ba bi kal?

³ Inyuki ntéé likalô nu a gwé yigil Bibel a nlama kon maséé ni mahôla bilôk bikéé bipe bi likoda bi nti nnigil Bibel wé? Ana nu a yé nsañal nu tôbôtôbô i Môldawa, a nkal le: “Hala a ta bé jam li ntomb inyu ntéé likalô wada i yônôs ngôñ i nnigil Bibel nu a nkahal hol.” Nsañal nu tôbôtôbô numpe le Dorin, nu yak nye a yé loñ  i Môldawa, a nkal le: “I yé i pam ngim mangéda le, batéé likalô bape ba kal ngim jam i i ntihba mut me ni nye di nigil, jam le me bak bé to le me hégda.” Leilani a nti njom ipe, a nkal le: “I gwéha bilôk bikéé bi bôlôm ni bi bôda bi ñunda nnigil Bibel i nla hôla nye i nôgda le a yé toi ntôñ u Yéhôva.”​—Yôhanes 13:35.

4. Kii di ga tehe munu yigil ini?

⁴ U yé le u badba le: ‘Kii me nla boñ inyu hôla nnigil Bibel i hol, ki le me bé me nyen me ntégbaha yigil yé?’ Nano di tehe i yom di nla boñ i ngéda mankéé a nkena bés i tégbaha yigil yé, ni i yom di nla boñ i ngéda nnigil Bibel a mbôdôl lo makoda. Di ga tehe ki i jam mimañ mi nla boñ inyu hôla banigil Bibel i hol ikepam i sôble.

5. Kii u nlama boñ ngéda ba nkena we i tégbaha yigil i Bibel?

⁵ Mbegee i bisu i mankéé a ñéga yigil Bibel i yé le a hôla nnigil i nok Bañga i Djob. Ibale i mankéé a gwé yigil i Bibel a nkena we i tégbaha yigil yé, u yé ha inyu nit nye. (Ñañal 4:9, 10) Ndi kii u nla boñ inyu tibil hôla nye i ngéda a ntégbaha yigil i Bibel?

6. I ngéda ba nkena we i tégbaha yigil i Bibel, lelaa u nla gwélél litiñ di nléba i kaat Bingéngén 20:18?

⁶ Kôôba yigil i Bibel. Bôk ndugi bat i nwet a ñéga yigil le a pôdôl we ndék inyu nnigil Bibel. (Añ Bingéngén 20:18.) U nla bat nye le: “Nnigil Bibel a gwé nwii nwañen, a yé imbe base, a nlôl limbe litén? Yigil i ga pôdôl kii? Kii u gwé ngôñ le nnigil Bibel a tééda? Baa ngim jam i yé le me nlama bé kal tole me nlama bé boñ ngéda yigil i mba i ntagbe? Lelaa me nla ti nnigil Bibel makénd i ke ni bisu i hol?” I yé maliga le, i mankéé a nkena yigil a ga kal bé we mam u kôli bé yi, ndi mam a ga kal we ma ga bane we nseñ. Nsañal nu tôbôtôbô le Joy nu a nsal i biloñ bipe, a yé a bana i nya minkwel i ni i bôt a nkena i yigil yé Bibel. A nkal le: “Nkwel u, u nhôla i nwet me nkena i yigil i Bibel i éba le a ntôñ nnigil Bibel, u nhôla ki nye i yi kii a kal i ngéda a nyoñ ngaba i yigil.”

7. Inyuki u nlama kôôba ibale u nke yéga mankéé i tégbaha yigil yé i Bibel?

⁷ Ibale ba nkena we i tégbaha yigil i Bibel, i yé le i ba loñge le u kôôba yo. (Ésra 7:10) Dorin, mankéé di mbôk di sima, a nkal le: “Me yé maséé i ngéda i mankéé a nke yéga me i yigil i Bibel a nkôôba yo. Hala a nhôla nye i yoñ ngaba i nya i i  nhôlôs nnigil Bibel.” U héya hala, nnigil Bibel a ga yimbe le bé bo iba ni nkôôba loñge, hala a ga ba ki loñge ndémbél inyu yé. Ibale u gwé bé ngéda inyu tibil kôôba, yoñ ndék manut inyu yi balôm ba matode yigil i ga pôdôl.

8. Kii u nla boñ inyu tihba ñem u nnigil Bibel i ngéda u nsoohe?

⁸ Masoohe ma yé nseñ i ngéda ba ntégbaha yigil i Bibel, jon ôt pék i bisu bi ngéda inyu yi yom u ga kal ikété masoohe. Ha nyen masoohe moñ ma ga tihba ñem u nnigil Bibel. (Tjémbi 141:2) Hanae, nu a niñ i Yapan, a ngi bigdaga masoohe ma sita yada i i bé yéga i nwet a bé kena yigil yé i Bibel. A nkal le: “Masoohe mé ma bé éba le a yé toi liwanda li Yéhôva, yak me me bé sômbôl kôna nye. Me bé nôgda le me yé nseñ ngéda a bé sima jôl jem mu masoohe mé.”

9. Inoñnaga kaat Yakôbô 1:19, kii u nla boñ inyu hôla i mankéé a nkena yigil i Bibel?

⁹ Hôla i nwet a ntégbaha yigil. Mankéé Omamuyovbi nu a yé nsañal nu tôbôtôbô i loñ Najéria, a nkal le: “I mankéé a yé ni we a nlama tibil emble i ngéda yigil i ntagbe. A nla timbhe, ndi a nlama bé lôôha pot, a bigdaga le we nyen u nkena yigil.” Lelaa u nla yi imbe ngéda u nlama pot ni kii u kal? (Bingéngén 25:11) Yoñ ngéda i emble bo i ngéda ba nkwel. (Añ Yakôbô 1:19.) Ha nyen u ga ba bebee i yoñ hop ibale pôla i nene. Ñ, bôk ndugi hek pék ilole u mpot. Kiki hihéga, u nlama bé pot ngandak, u nlama bé kit mankéé a nkena yigil hop, tole u héñha nkwel nye ngi mal ti mahoñol mé. Ndi ni ndék bibuk ndigi, u nla ti hihéga, u nla bat mbadga, tole u nla kônde lémés ndoñi mankéé a nti. Ngim mangéda, u nla nôgda wee u gwé bé bañga jam i kônde. Ndi, ibale u mbégés nnigil Bibel, u unda nye le u ntôñ nye, u ga hôla nye i hol.

10. Lelaa ndémbél yoñ i nla hôla nnigil Bibel?

¹⁰ Añle nnigil Bibel mam u mboma mu niñ yoñ. Ibale hala a nla hôla nnigil Bibel, añle nye lelaa u bi yi maliga, lelaa u bi yémbél ngim ndutu, tole lelaa u ma tehe woo u Yéhôva mu niñ yoñ. (Tjémbi 78:4, 7) Ndémbél yoñ i nla bane nnigil Bibel nseñ ngandak. I nla lédés hémle yé tole i nla tinde nye i hol ikepam i sôble. Ndémbél yoñ i nla ki hôla nye i yémbél ngim ndutu a mboma. (1 Pétrô 5:9) Mankéé Gabriel nu a niñ i Brésil ni nu a yé nsañal nu ngéda yosôna, a mbigda i yom i bi hôla nye ngéda a bé nigil Bibel. A mbigda le: “I ngéda lôk kéé i i bé  i lo i tégbaha yigil yem i bé añle me mandutu ba bé boma mu niñ yap, me bi nok le Yéhôva a ntehe mandutu di mboma. Ibale ba bi pam i yémbél mandutu ma, wee yak me me nla yémbél mo.”

11-12. I ngéda nnigil Bibel a mbôdôl lo makoda, inyuki di nlama leege nye loñge?

¹¹ Inyu boñ le nnigil Bibel a hol ikepam i sôble, a nlama bana lem i ke makoda, a ôdôk ki nseñ mu. (Lôk Héber 10:24, 25) I ngéda mankéé a ñéga yigil yé a naña nye i ndap Ane, ndi a lo inyu ngélé yé bisu, di nlama leege nye loñge inyu boñ le a tôl ha bañ i ndap Ane. Kii di nla boñ?

¹² Leege nnigil Bibel loñge. (Rôma 15:7) Ibale nnigil Bibel a nôgda le di nleege nye loñge i makoda, bebek hala a nla boñ le a tôl ha bañ i ndap Ane. I ngéda a nlo, yéga nye ni makénd, u boñ le bilôk bikéé bipe bi yéga nye, ibabé le ni wéha nye nyuu. Kwel ni nye, inyule i nla pam le i mankéé a ñéga yigil yé a yé ngi lo tole a pégi i boñ minson mimpe. Tibil emble nye i ngéda a mpot, u unda ki nye le u ntôñ nye. Lelaa maleege ma, ma nla hôla nnigil Bibel? Mankéé Dmitrii nu a bi sôblana hala a yé ndék nwii nano ni nu a yé nhôla nson, a mbigda i ngéda a bi ke likoda inyu ngélé yé bisu, a nkal le: “Mankéé wada a bi tehe me me yii bingoo bingoo i mbégdé ndap Ane, ni minyaô a yoñ me, a jôbna me i ndap Ane. Ngandak lôk kéé i bi lo i yéga me. Hala a bi hélés me ngandak. Hala a bi lôôha lémél me kayéle me hoñol le, ibale likoda li bak hiki kel, ki hala a yé le a ba loñge. Me mah ngi nôgda i nya jam i hala.”

13. Lelaa ndémbél yoñ ilam i nla hôla nnigil Bibel?

¹³ Ti ndémbél ilam. Maboñok moñ ma nla kwés nnigil Bibel nkaa le a nléba maliga. (Matéô 5:16) Vitalii, nu a yé nsañal i Môldawa, a nkal le: “Me bi tehe lelaa bôt bape ba niñ ikété likoda, mahoñol map, ni maboñok map. Hala a bi kwés me nkaa le Mbôgi Yéhôva i yé base i maliga.”

14. Lelaa ndémbél yoñ i nla hôla nnigil Bibel i ke ni bisu i hol?

¹⁴ Ilole a nkôs sôble, nnigil Bibel a nlama gwélél i mam a nigil. Ndi hala a ta bé jam li ntomb. I ngéda nnigil Bibel a ntehe bisai u nkôhna ngéda u mbii matiñ ma Bibel i bisélél, hala a ntinde nye i kôna we. (1 Korintô 11:1) Hanae nu di mbôk di sima a nkal le: “Lôk kéé i bôlôm  ni i bôda i bé bii i mam me bé nigil i bisélél. Ndémbél yap i bi hôla me i yi lelaa me nla ti bôt bape makénd, lelaa me nla nwéhél ni lelaa me nla éba gwéha. I ngéda lôk kéé i bé pôdôl bôt bape, i bé pot ndik loñge ni loñge. Yak me me bé me gwé ngôñ i kôna bo.”

15. Inoñnaga ni kaat Bingéngén 27:17, inyuki di nlama bot liwanda ni nnigil Bibel nu a nlo makoda?

¹⁵ Bot liwanda ni nnigil Bibel. Mu kii nnigil Bibel a nlo makoda, u waa bañ unda le u ntôñ nye. (Filipi 2:4) U nla kwel ni nye inyu tibil yi nye. U nla kal nye le u yé maséé ni mahol a mboñ masañ mana. U nla bat nye lelaa yigil yé Bibel i nke. Baa lihaa jé li yé mbôô? Baa a nkena bôlô yé i moo ni bisu? Minkwel mi, mi ga lédés maada moñ ni nye. Ngéda u mbot liwanda ni nnigil Bibel, u nhôla nye i hol ikepam sôble. (Añ Bingéngén 27:17.) Nano, Hanae a yé nsañal nu ngéda yosôna. I ngeñ a nhoñol makoda mé ma bisu, a nkal le: “Mu kiki me bé bot mawanda ni bôt ikété likoda, me bi kahal gwés makoda ngandak, me bé ke mo yak ngéda me bé nwaak. Me bé maséé i tégbaha ngéda ni mawanda mem ma mondo, hala a bi hôla me i tjôô mawanda ma ma bé gwés bé Yéhôva. Me bé me gwé ngôñ i yila liwanda li Yéhôva ni li bilôk bikéé bi bôda ni bi bôlôm. Jon, me bi yoñ makidik i sôblana.”

16. Kii ipe u nla boñ inyu hôla nnigil Bibel i ba maséé ngéda a yé ni lôk kéé?

¹⁶ Mu kiki nnigil Bibel a nhol, hôla nye i kon maséé i ba ni bilôk bikéé. Inyu pam i boñ hala, u nlama leege nye loñge. (Lôk Héber 13:2) Mu kiki a mbigda i ngeñ a bé nnigil Bibel, mankéé Dénis nu a yé i Môldawa, a mbigda le: “Bilôk bikéé bi likoda bi bi naña me ni nwaa wem ngandak ngélé inyu tégbaha loñge ngéda. Ba bi añle bés lelaa Yéhôva a bi hôla bo. Hala a bi ti bés makénd. Hala a bi kwés bés nkaa le di bé lama gwélél Yéhôva ni le niñ ilam i bé bem bés ibale di nyoñ makidik ma.” I ngéda nnigil Bibel a nyila ntéé likalô, u nla naña nye i pam likalô ni we. Diégo, nu a yé ntéé likalô i Brésil, a nkal le: “Ngandak lôk kéé i bi naña me i pam likalô ni bo. Hala a bi hôla me i yi bo loñge loñge. Mu kiki me bé tégbaha ngéda ni bo, me bi nigil ngandak mam ma ma bi hôla me i yila liwanda li Yéhôva bo Yésu.”

17. Lelaa mimañ mi nla hôla banigil Bibel?

¹⁷ Tégbaha ngéda ni banigil Bibel. I ngéda mimañ mi ñéba le mi ntôñ  banigil Bibel, hala a nhôla bo i hol ikepam i sôble. Baa u gwé lem i kwel ni banigil Bibel makoda? Ba ga nôgda le u ntôñ bo i ngéda u nsébél bo ni môl map, téntén ngéda ba nsômbôl timbhe. Baa u nla léba ngéda inyu yéga ntéé likalô i yigil yé Bibel? U ta bé le u hégda mahôla u ga lona nnigil Bibel. Nsañal wada le Jackie, nu a yé i Najéria, a nkal le: “Hala a nhélés ngandak banigil Bibel i nok le i nwet a yé ni me a yé mañ u likoda. Nnigil Bibel wada a bi kal le: ‘Pastô yem i yé mbén i boñ hala. A nyuuga ndik mingwañ mi bôt mi mi nla ti nye moni!’” Nnigil Bibel nu a nlo nano makoda.

18. Inoñnaga ni kaat Minson mi baôma 20:28, lelaa mimañ mi nla yônôs nson Yéhôva a bi ti bo?

¹⁸ Niiga batéé likalô, u ti ki bo makénd. Mimañ mi gwé mbegee ikeñi i hôla batéé likalô i tibil gwel nson wap ni i tégbaha gwigil bi Bibel loñge. (Añ Minson mi baôma 20:28.) Ibale ntéé likalô a nkon woñi i tégbaha yigil i ngéda u yé ha, bat nye ibale u nla tégbaha yo. Jackie nu di mbôk di pôdôl, a nkal le: “Mimañ mi mbéna bat me lelaa i bôt me ni bo di nigil Bibel ba nke. I ngéda me mboma ndutu ni ngim nnigil Bibel, ba nti me maéba.” Mimañ mi nla boñ ngandak mam inyu ti i bet ba ñéga gwigil bi Bibel makénd. (1 Tésalônika 5:11) Jackie a nkônde le: “Hala a nlémél me i ngéda mimañ mi nti me makénd, ni i ngéda mi nkal le mi yé maséé inyu bôlô ngui me nsal. Bibuk gwap bi yéne me kii tômblô i malép ma nsune ngéda lék i yé. I bégés ba mbégés me, i nhôla me i nôgda le me nsal loñge bôlô, i nkéñbaha ki maséé me nkôhna i tégbaha gwigil bi Bibel.”​—Bingéngén 25:25.

19. Mambe maséé bésbobasôna di nla bana?

¹⁹ To ibale u ñéga bé yigil Bibel nano, u nla hôla mut i hol ikepam i sôble. U nla hôla i nwet a ñéga yigil i Bibel ibale u nkôôba loñge, to u mpot bé ngandak. Di nla bot mawanda ni banigil Bibel ba ba nlo i ndap Ane, di ti ki bo ndémbél ilam. Mimañ mi nla ti banigil Bibel makénd ngeñ mi ntégbaha ngéda ni bo. Ba nla ki niiga batéé likalô i tégbaha gwigil bi Bibel i ngéda ba mbégés bo. Kinje maséé di nôgda i ngéda di nyoñ to hisii ngaba ndigi i hôla mut i gwés ni i gwélél Tata wés le Yéhôva!