1. Kii i ntinde bés i boñ mam?

 TOO di ntip sôblana, too di bi sôblana behee, bésbobasôna di nlama bana maboñok ma ma nlémél Yéhôva. Inyu pam i boñ hala, di nlama yoñ yihe ni mahoñol més. Inyuki? Inyule mahoñol més mon ma ntinde bés i boñ mam. Ibale di mbéna hoñol mam mabe, d’a bana bibuk bibe, ni maboñok mabe. (Éfésô 4:17-19) Ndi ibale di nhoñol mam malam, ha nyen di ga pot, di boñok ki mam ma nlémél Tata wés le Yéhôva.—Galatia 5:16.

2. Mambe mambadga d’a timbhe munu yigil ini?

² Kiki di ntehe i yigil i ntagbe, di nla bé tjél hoñol mam mabe. Ndi di nla tjél boñ mam mabe. Ilole di nsôblana, di nlama nwas bipôdôl ni maboñok ma nlémél bé Yéhôva. Jam li bisu di nlama boñ inyu héya nlômbi mut, jo li. Ndi inyu boñ le di lémél toi Yéhôva, di nlama yak nôgôl maéba mana le: “Ni haba mut yondo.” (Kôlôsé 3:10) Munu yigil ini, di ga timbhe mambadga mana: Kii i yé “mut yondo”? Lelaa di nla haba mut yondo ngélé yada inyu ngélé yosôna?

3. Inoñnaga ni kaat Galatia 5:22, 23, kii i yé “mut yondo,” lelaa mut a nla haba “mut yondo”?

³ “Mut yondo” a yé mahoñol ni maboñok ma ma nlémél  Yéhôva. I mut a nhaba mut yondo, a gwé bilem bi litam li mbuu mpubi u Djob, a nwas le mbuu mpubi won u éga mahoñol mé ni maboñok mé. (Añ Galatia 5:22, 23.) Kiki hihéga, a ngwés Yéhôva, a gwéhék lôk kéé. (Matéô 22:36-39) Yak i ngéda a mboma mandutu, a yé maséé. (Yakôbô 1:2-4) A ngwés a nkôp nsañ. (Matéô 5:9) A gwé wongut ni loñgeñem. (Kôlôsé 3:13) A ngwés a mboñ loñge. (Lukas 6:35) Maboñok mé ma ñéba le a gwé hémle i ngui. (Yakôbô 2:18) I ngéda ba nyumbla nye a nlôôha bé unup, a gwé ki hôtnyuu ngeñ a mboma manoodana.—1 Korintô 9:25, 27; Titô 3:2.

4. Inyu haba mut yondo, baa lem yada mu bilem bi yé i kaat Galatia 5:22, 23 i kôli? Toñol.

⁴ Inyu haba mut yondo, di nlama bana bilem gwobisôna bi yé mu kaat Galatia 5:22, 23 ni bilem bilam bipe bi yé i Bibel. * I bana ndigi lem yada mu i kôli bé inyu kal le di nhaba mut yondo. Lem yada mu i nla bana maada ni bini bilem bipe. Kiki hihéga, ibale u ngwés toi mut, w’a hônba nye, u unda ki nye loñgeñem. I mut a gwé toi loñgeñem, a gwé ki ñemlima ni hôtnyuu.

5. I ‘bana mahoñol ma Kristô’ wee kii, inyuki di nlama nigil ndémbél i Yésu? (1 Korintô 2:16)

⁵ Añ 1 Korintô 2:16. Inyu haba mut yondo, i mbéda le di ‘bana mahoñol ma Kristô.’ Hala a nkobla le di nlama ôt pék mu ndémbél i Yésu, di nigle ki nye. Yésu a gwé bilem bi litam li mbuu gwobisôna. A yé kiki loñge léman i i ñéba bés bilem bi Yéhôva gwobisôna. (Lôk Héber 1:3) Kiki di ñôt pék mu ndémbél i Yésu, hala nyen di ga nigle nye, di bana ki bilem gwé.—Filipi. 2:5.

6. I ngéda di nsômbôl haba mut yondo, kii di nlama bigda?

⁶ Baa di nla toi nigle ndémbél i Yésu? Di yé le di kal le: ‘Yésu a yé peles. Di ta bé le di nigle nye!’ Ibale u gwé i nya mahoñol i, bigda le: Pog, di yé i pôna i Yéhôva bo Yésu. Jon, di yé le di nigle bo, di noode ba kiki bo. (Bibôdle 1:26) Iba, mbuu mpubi u Yéhôva u nlel ngui  yosôna i ngii ni hisi. U nla hôla we i boñ mam u hégdaga bé le u nla boñ. Aa, kiki di yé bikwéha bi bôt, Yéhôva a mbat bé bés le di bana bilem gwobisôna bi litam li mbuu nano kiki nye. Ikété gwéha yé, Yéhôva a ga ti bôt ba ba gwé botñem i niñ hana ’isi hikôô hi nwii inyu boñ le ba yila peles. (Masoola 20:1-3) Yéhôva a nsômbôl ndigi le di boñ kii yosôna di nla, di bôdôl ki nye ñem.

7. Kii di ntehe hanano?

⁷ Lelaa di yé le di nigle Yésu? Di yoñ le ngéda i wan bilem bina mu litam li mbuu. Mu kiki di mba di nwan bilem bi, di béñge lelaa di nla nigle ndémbél i Yésu. D’a badba ngim mambadga i y’a hôla bés i tehe too di yé ke ni bisu i haba mut yondo.

8. Lelaa Yésu a bi unda gwéha?

⁸ Yésu a ngwés Yéhôva ngandak, jon a bi boñ bisesema inyu Isañ ni inyu yés. (Yôhanes 14:31; 15:13) Niñ i Yésu hana ’isi i bi éba le a ngwés toi bôt ba binam. Hiki kel, a bé unda gwéha ni konangoo yak i ngéda ngim bôt i bé kolba nye. Nlôm jam wada a bi boñ inyu éba bôt gwéha yé, a yé le a bé niiga bo mam ma mbéñge Ane Djob. (Lukas 4:43, 44) Yésu a bi éba ki bañga gwéha inyu Nyambe ni bôt ba binam, i ngéda a bi neebe le baboñbéba ba kép nye mbai, ba nol ki nye. Hala nyen a bi yible bés njel niñ i boga.

9. Lelaa di nla nigle gwéha i Yésu?

⁹ Di bi ti Yéhôva niñ yés di sôblana inyule di ngwés nye. Jon di ñunda le di ngwés Yéhôva i ngéda di nigle Yésu mu maada més ni bôt bape. Ñôma Yôhanes a kal le: “I mut a ngwés bé maasañ nu a ntehe, a ta bé le a gwés Nyambe nu a ntehe bé.” (1 Yôhanes 4:20) Di yé le di badba le: ‘Baa me ngwés toi bôt bem ba libôk? Baa me ñunda bôt konangoo yak i ngéda ba ñunbaha me? Baa gwéha i ntinde me i ti ngéda yem ni nkus wem inyu hôla bôt i yi Yéhôva? Baa me yé maséé i boñ i man mana yak i ngéda bôt ba nti bé me mayéga tole i ngéda ba nkolba me? Baa me yé le me kônde ti ngéda yem i nsoñ i yilha bôt banigil?’—Éfésô 5:15, 16.

10. Kii Yésu a bé boñ inyu kôp nsañ?

¹⁰ Yésu a bé gwés nsañ. I ngéda bôt ba bé boñ nye béba, a bé timbhe bé bo béba. Ndi a bé sugul bé ha. A bé kôp nsañ, a kalak yak bôt bape le ba sañgal mindañ. Kiki hihéga, a bi kal i bôt a bé niiga le ibale ba nsômbôl le Yéhôva a kônôl bo maséé, ba sañgla ni lôk kéé yap. (Matéô 5:9, 23, 24) Hiki ngéda, a bé sañgal baôma bé i ngéda ba bé pééna inyu yi njee a yé nunkeñi ipôla yap.—Lukas 9:46-48; 22:24-27.

11. Lelaa di yé le di kôp nsañ?

¹¹ Inyu kôp nsañ, di nlama ndik bé keñgle mindañ. Di nlama yéñ manjel i kôp nsañ, di kalak ki lôk kéé yés le i sañgal mindañ. (Filipi 4:2, 3; Yakôbô 3:17, 18) Di nla badba le: ‘Baa me nla neebe le men me gwé njom inyu boñ le nsañ u ba? Baa me yé me nai le me nwéhél bé mankéé i ngéda a mbabaa me? Baa me yé me bem ndigi le mut mumpe nyen a bat me nwéhél, tole men me yé me ba mut bisu i bat nwéhél to ibale i nene le mut numpe nyen a gwé njom? I ngéda  hala a nla bôña, baa me yé me kal i bôt ba gwé mindañ le ba sañgla?’

12. Lelaa Yésu a bi unda loñgeñem?

¹² Yésu a bééna loñgeñem. (Matéô 11:28-30) A bééna ñem nlam, a bé nai bé to ni litehge jé li mam yak i ngéda a bé ikété ndutu. Kiki hihéga, i ngéda muda Fénikia a bi yemhe nye le a mélés man wé, a bi bôk a kal le a mélés bé ngond yé, ndi i ngéda muda nu a bi unda hémle i ngui, Yésu a bi unda nye loñgeñem, a mélés ngond yé. (Matéô 15:22-28) Tolakii Yésu a bééna loñgeñem, a bé tjél bé kal bôt maliga i ngéda hala a bé nseñ. Ngim mangéda, loñgeñem i bé i tinde nye i kal bôt maliga inyule a bé gwés bo. Kiki hihéga, i ngéda Pétrô a bé sômbôl sôña nye le a boñ sômbôl i Yéhôva, Yésu a bi kodol nye bisu bi bana banigil bape. (Markô 8:32, 33) A bi boñ bé hala inyu wéha Pétrô nyuu, ndi inyu niiga nye ni bana bape le i ngéda jam li mbéñge bé bo ba nlama bé pot jo. Pétrô a bi lama wo nyuu, ndi maéba ma Yésu ma bi lama hôla nye.

13. Lelaa di nla toi unda loñgeñem?

¹³ Inyu boñ le di unda toi bôt loñgeñem, ngim mangéda di nlama kal bo maliga. I ngéda di mpôdôs bo di nlama nigle Yésu, di gwélél Bibel inyu ti bo maéba. Di pôdôs bo ni bibuk bilam, di bôdôl bo ñem di yik le kiki ba ngwés Yéhôva ba gwéhék bés ba ga emble maéba més. Di badba le: ‘Baa me yé me ban ñem me kal mut maliga i ngéda me ntehe le a yé boñ béba? Ibale me nsômbôl ti mut maéba, baa me yé me pôdôs nye ni loñgeñem, tole me yé me gwélél bibuk bibe? Kii i ntinde me i ti maéba? Baa me nti mut maéba inyule a ñunbaha me, tole me nsômbôl toi hôla nye?’

14. Lelaa Yésu a bi unda ñem ilam?

¹⁴ Yésu a bé yi i yom i yé loñge a boñok yo. Yésu a ngwés Isañ, inyu hala nyen a mboñ loñge hiki ngéda ni mahoñol malam. I ngéda u gwé ñem ilam, bôt bape ba ntehe hala. Ñem ilam u ntinde bés i hôla bôt. I ngéda di gwé i lem i, di yi le di nlama boñ loñge, di mboñ ki hala ni mahôñol malam. Ndi di yé le di bat le: ‘Lelaa mut a yé le a boñ loñge ni mahoñol mabe?’ Ndi hala a nla bôña. Kiki hihéga, Yésu a bi pôdôl bôt ba ba bé ti diyeyeba makébla. Ba kahal bép nkéñ inyu boñ le bôt ba yi le ba nti makébla. I nya makébla i, i bé hee bé to yom i mis ma Yéhôva.—Matéô 6:1-4.

15. Lelaa di nla unda ñem ilam?

¹⁵ I ngéda di mboñ loñge ni mahoñol malam, wee di gwé toi ñem ilam. Jon di yé le di badba le: ‘Baa me nyi i yom i yé loñge me boñok ki yo? Kii i ntinde me i boñ loñge?’

16. Kii di nlama boñ hiki kel, inyuki?

¹⁶ Di hoñol bañ le i ngéda di nsôblana wee di mal haba mut yondo. Mut yondo a yé kiki loñge mbot i di nlama bôñgôl. Di nla bôñgôl mut yondo i ngéda di nyéñ manjel i unda bilem bi litam li mbuu hiki kel. Inyuki? Inyule Yéhôva ngwélél mbuu wé inyu sal. (Bibôdle 1:2) Jon, hiki lem mu litam li mbuu i nlama tinde bés i sal. Kiki hihéga, Yakôbô a  kal le: “Hémle ngi minson i yé nwok.” (Yakôbô 2:26) Yak bini bilem bipe bi litam li mbuu mpubi u Djob bi yé nwok ngi minson. Hiki ngéda di ñunda bilem bi, hala a ñéba le mbuu mpubi u yé sal ikété yés.

17. Kii di nlama boñ ibale di nla bé unda bilem bilam bi litam li mbuu?

¹⁷ Yak lôk kéé i i bi sôblana bebee, i yé i pam ngim mangéda le ba laa bé unda bilem bi litam li mbuu. Ndi di nlama bé somol. Di yoñ le hihéga: Ibale u ngwés mbot yoñ ngandak ndi i wéhi, baa w’a lep yo? To. W’a yéñ manjel le u kôñôl yo ibale hala a nla bôña. W’a yoñ ki yihe le i wéhi ha bañ. Hala nyen ibale u nla bé unda loñgeñem, wongut tole gwéha, u nlama bé tomb. Ibale u mbat nwéhél u yé le u sañgla ni i mut u ñunbaha. U nlama ki jo sañ le u tiimba ha bañ boñ i jam li.

18. Kii di nyi?

¹⁸ Di nti mayéga inyu ndémbél ilam i Yésu! I ngéda di nigle mahoñol ni maboñok ma Yésu, ha nyen di nkônde ba kiki nye. I ngéda di mboñ kiki Yésu, ha nyen di nhaba toi mut yondo. Munu i yigil ini, di ntehe bilem bina mu litam li mbuu u Djob. U yé le u yoñ ngéda inyu nigil bini bilem bipe bi litam li mbuu inyu tehe too u gwé gwo. Gwigil bi mpôdôl bilem bi, bi yé i Ñéga inyu nyiña u bikaat bi Mbôgi Yéhôva i si ño nkwel le “Niñ i kristen” i mbus kee i homa le “Litam li mbuu.” Yi le ibale u njo sañ inyu haba mut yondo ngélé yada inyu ngélé yosôna, Yéhôva a ga hôla we.