YIGIL 10
U nla “héya nlômbi mut”
“Ni héya nlômbi mut lôñni bilem gwé.”—KÔLÔSÉ 3:9.
HIÉMBI 29 Di niñ inoñnaga ni jôl jés
DINYO MALÉP *
1. Ilole u bé bôdôl yigil Bibel, niñ yoñ i bé lelaa?
ILOLE u bé bôdôl yigil Bibel ni Mbôgi Yéhôva, niñ yoñ i bé lelaa? Ngandak ikété yés i ngwés bé i mpôdôl i jam li. Bebek le di bééna mahoñol ni libak li nkoñ ’isi unu. Ibale hala, wee di ‘bééna bé botñem, di bééna bé to Nyambe munu nkoñ ’isi.’ (Éfésô 2:12) Ndi ngéda di bi kahal nigil Bibel, niñ yés i héñha!
2. Kii u bi nok mu yigil yoñ i Bibel?
2 Yigil yoñ i Bibel i bi hôla we i nok le Tata wés nu a yé i ngii a ngwés we ngandak. U bi nigil le inyu lémél Yéhôva ni jôp i lihaa jé, u nlama héñha libak joñ ni mahoñol moñ héñha yosôna. U nlama nôgôl mambén mé.—Éfésô 5:3-5.
3. Inoñnaga ni Kôlôsé 3:9, 10, kii Yéhôva a nsômbôl le di boñ, kii di ga tehe munu yigil ini?
3 Yéhôva nyen a bi hek bés, a yé ki Tata wés, jon a kôli kal bés lelaa di nlama niñ. A nsômbôl le nwaa le di nsôblana, di joo sañ inyu “héya nlômbi mut lôñni bilem gwé.” * (Añ Kôlôsé 3:9, 10.) I yigil ini y’a hôla i bet ba nsômbôl kôs sôble i timbhe mambadga maa: (1) Kii i yé “nlômbi mut”? (2) Inyuki Yéhôva a nsômbôl le di héya nlômbi mut? (3) Kii i nla hôla bés i boñ i jam li? Inyu bés ba di yé nsôblege, i yigil ini i ga éba bés kii i nla hôla bés le di bana ha bañ bilem bi nlômbi mut.
KII I YÉ “NLÔMBI MUT”?
4. Maboñok ma “nlômbi mut” ma yé lelaa?
4 “Nlômbi mut” u yé mahoñol ni maboñok ma ma nlémél bé Nyambe. I mut a gwé maboñok ma, a nla ba mut a ntôñ ndigi nyemede, a nhoo unup, a nyi bé ti mayéga, a bak ki ngôk. A nla ki ba mut a ngwés a mbéñge bititii bi malal, biliñgeliñge bi ndéñg ni bi bisañ. A gwé ngim bilem bilam, bebek kiññem i nkéés yak nye inyu mam mabe a mboñ ni ma a mpot. Ndi a mpam bé i héñha mahoñol mé ni bilem gwé.—Galatia 5:19-21; 2 Timôtéô 3:2-5.
I ngéda di nhéya “nlômbi mut,” béba i ñane ha bé bés (Béñge liben 5) *
5. Kii di nlama bé hôya i ngéda di nsômbôl héya nlômbi mut? (Minson mi baôma 3:19)
5 Kiki di yé bikwéha bi bôt, di ta bé le di pam i héya bilem bibe gwobisôna bi nlômbi mut i ñem wés ni mahoñol més. Ngim mangéda, di yé le di boñ jam tole di pot jam ndi di yik tam. (Yérémia 17:9; Yakôbô 3:2) Ndi i ngéda di nhéya nlômbi mut, béba i ñane ha bé bés. Di gwé ha bé bilem bibe di bééna behee.—Yésaya 55:7; añ Minson mi baôma 3:19.
6. Inyuki Yéhôva a nsômbôl le di nwas mahoñol mabe ni bilem bibe bi nlômbi mut?
6 Yéhôva a nsômbôl le di nwas mahoñol mabe ni bilem bibe bi nlômbi mut inyule a ngwés bés ngandak, a nsômbôl ki le di ba maséé. (Yésaya 48:17, 18) A nyi le i bôt ba gwé bilem bibe ba mboñ bomede béba yak ni i bôt ba yé bo ipañ. Yéhôva a ta bé maséé i ngéda a ntehe bés di mboñ nyuu yés yomede béba, di boñok ki bôt bape béba.
7. Inoñnaga ni kaat Rôma 12:1, 2, mambe manjel ima di gwé?
7 Mawanda més mahogi tole bôt bés ba lihaa ba nla nol bés hiol i ngéda di nyoñ makidik le di nhéñha bilem gwés. (1 Pétrô 4:3, 4) Ba yé le ba kal bés le di gwé kunde i boñ kii yosôna di ngwés, di nwas bañ le mut a kal bés i yom di nlama boñ. Ndi i pot maliga, i bôt ba ntjél nôgôl mambén ma Yéhôva ba yé i mok. Ba nwas le nkoñ ’isi u Satan won u éga bo. (Añ Rôma 12:1, 2.) Di nlama pohol njel yada munu manjel mana mo ima: Too di ga nwas le nlômbi mut hala wee maboñok ma nkoñ ’isi u Satan mon ma éga bés. Tole di nwas le Yéhôva a hôla bés i héñha bilem gwés.—Yésaya 64:8.
LELAA DI NLA “HÉYA” NLÔMBI MUT?
8. Kii i nla hôla bés i nwas mahoñol mabe ni bilem bibe?
8 Yéhôva a nyi le i mbéda bés ngandak ngéda ni biliya bi ngui inyu nwas mahoñol mabe ni bilem bibe. (Tjémbi 103:13, 14) Ndi Yéhôva a ngwélél Bañga yé, mbuu wé mpubi ni ntôñ wé inyu ti bés ngui, pék, ni mahôla inyu boñ le di héñha bilem gwés. Ibabé pééna a ma hôla we. Nano di béñge ngim mam u nla boñ inyu boñ le u kee ni bisu i héya nlômbi mut, u kôs ki sôble.
9. Bañga i Djob i nla hôla bés i boñ kii?
9 Gwélél Bibel inyu wan wemede. Bañga i Djob i yé kiki léman; i nla hôla bés i wan mahoñol més, bibuk gwés ni maboñok més. (Yakôbô 1:22-25) I mut a niiga we Bibel ni ini lôk kéé ipe ba nla ti we maéba. Kiki hihéga, ba nla gwélél Bibel inyu éba we bilem bilam u gwé ni bibomb gwoñ. Ba nla unda we lelaa u nla léba maéba ma ma nla hôla we i nwas bilem bibe. Yéhôva a yé ki bebee i hôla we hiki ngéda. A nyi kii i mbéda toi we, a nyi kii i yé we ñem. (Bingéngén 14:10; 15:11) Jon u waa bañ soohe nye, u niglak Bañga yé hiki kel.
10. Kii ndémbél i Élie i niiga bés?
10 Yi le mambén ma Yéhôva ma yé inyu loñge yoñ. Hiki yom Yéhôva a nkal bés le di boñ i yé inyu loñge yés. I bet ba noñ mambén mé ba gwé ét nyuu, niñ ilam, ni bañga maséé. (Tjémbi 19:8-12) Ndi i bôt ba ntjél nôgôl mambén ma Yéhôva ba nkôs bikuu bi bi nlôl mu minson mi minsôn. Di béñge i yom mut wada le Élie nu a bi nôgôl bé mambén ma Djob a nkal. Bagwal bé ba yé Mbôgi Yéhôva. Ndi i ngéda Élie a bi kahal nañ a bi bôdôl bana bilôñ bibe. A bi bôdôl ôt hibañga, a jôp ki malal ma nyega ni wip. Élie a nkal le a bi bôdôl unup ngandak, a jok bisañ. A nkal le: “Me bé boñ i mam momasôna bagwal bem ba bi niiga me le me nlama bé boñ.” Ndi Élie a bi hôya bé i mam bagwal bé ba bi niiga nye. I mbus ngéda, a bi témb a bôdôl nigil Bibel. A bi jo sañ inyu nwas bilem gwé bibe, a sôblana i nwii 2000. Kiki a bi yoñ makidik i nôgôl mambén ma Yéhôva, bimbe bisai a bi kôs? Élie a nkal le: “Nano me yé nwee, me gwé ki kiññem i mpop.” * Ñañ unu u ñéba le i bôt ba ntjél nôgôl Yéhôva ba boñ bomede béba. Ndi to hala Yéhôva a yé bebee i hôla bo i héñha.
11. Kii Yéhôva a ñoo?
11 Joo sañ inyu oo i mam Yéhôva a ñoo. (Tjémbi 97:10) Bibel i nkal le Yéhôva a ñoo “mis ma ngôk, hilémb hi bitembee ni moo ma nkôp matjél ma ngi nsohi.” (Bingéngén 6:16, 17) Yak “nkôp matjél ni mut mandon ba nsuñgaha Yéhôva ñem.” (Tjémbi 5:7) Kiki Yéhôva a ñoo i mam mana, jon a bi tjé bibéba bi bôt gwobisôna i dilo di Nôa, inyule bi bi yônôs hisi ni njôô. (Bibôdle 6:13) Di yoñ hihéga hipe. Yéhôva a bi pôdôs mpôdôl Malaki inyu kal bagwélél bé le a ñoo i bôt ba ñôô jimb inyu bos sobiina wap. Yéhôva a neebe bé bibégés gwap, a ga kéés ki bo inyu maboñok mam mabe.—Malaki 2:13-16; Lôk Héber 13:4.
Di nlama tehe mam Yéhôva a ñoo kiki bijek bi bi ñôbi (Béñge maben 11-12)
12. ‘I oo jam li yé béba’ hala wee kii?
12 Yéhôva a nsômbôl le di “oo i jam li yé béba.” (Rôma 12:9) I buk ba bi gwélél munu nlôñ unu i nkobla le mut a nlôôha ‘oo’ ngim jam; jam li li nsuñgaha ñem. Hégda kii u yé le u boñ ibale ba nkal we le u je bibôô bi bijek. Nyuu yosôna i yé le i sagla we. Nlélém jam, i ngéda di nhoñol ndik le di nsômbôl boñ jam li nlémél bé Yéhôva, hala a nlama suñgaha bés ñem.
13. Inyuki di nlama yoñ yihe ni mahoñol més?
13 Yoñ yihe ni mahoñol moñ. Ilole di mboñ jam di yé di ôt ndugi pék. Inyu hala nyen Yésu a bi kal le di tjél mahoñol ma ma nla tinde bés i boñ béba. (Matéô 5:21, 22, 28, 29) Ngôñ yés i yé le di lémél Tata wés nu a yé i ngii. Inyu hala nyen i mbéda le i ngéda di nkahal bana mahoñol mabe di hoo héñha mo!
14. Kii bibuk gwés bi nyelel, mambe mambadga di ga timbhe?
14 Yoñ yihe ni bibuk gwoñ. Yésu a kal le: “Hiki yom i mpam mut i nyo i nlôl i ñem.” (Matéô 15:18) Bibuk gwés bi nyelel i yom i yé bés mahoñol. Jon di badba mambadga mana: ‘Baa me mpot maliga to ibale hala a yé le a lona me ndutu? Ibale me yé mbiibaga baa me nyoñ yihe le me tuk bañ ni bôda bape tole ni bôlôm bape? Baa me ngwés me mpôt mpuñgu? I ngéda mut a ñunbaha me, baa me yé me timbhe nye ni bibuk bilam?’ Ibale di ñôt pék mu mambadga ma, hala a ga bane bés nseñ. Bibañga gwés bi yé kiki bôñgô ba ngwélél inyu kôñôl mbot. I ngéda di nwas bibuk bibe, bitembee ni mpuñgu, a yé wee di yé i pat i bôñgô i, inyu héya nlômbi mut.
15. I tômôl nlômbi wés mut “i kék” wee kii?
15 Yoñ makidik ma ngui. Ñôma Paul a bi gwélél loñge titii inyu éba bés inyuki i yé nseñ le di héñha bilem gwés. A bi kal le di nlama tômôl nlômbi wés mut “i kék.” (Rôma 6:6) Hala a nkobla le di nlama noñ ndémbél i Kristô. Di nlama ba bebee i nwas bilem ni maboñok Yéhôva a ñoo. Ibale di mboñ i mam ma, ha nyen di ga bana loñge kiññem, di ga bana ki botñem i niñ boga. (Yôhanes 17:3; 1 Pétrô 3:21) Di hôya bañ le Yéhôva a ta bé le a héñha mambén mé inyu lémél bés. Bés bon di nlama héñha bilem gwés inyu lémél nye.—Yésaya 1:16-18; 55:9.
16. Inyuki di nlama bé waa jo sañ inyu nwas bilem bibe?
16 U waa bañ jôs bilem bibe. Yak i ngéda di mal sôblana, di nlama bé waa jôs bilem bibe. Di yoñ hihéga hi mut wada le Maurício. A bi bôdôl lal ni bôlôm a bak mañge. I mbus, i ngéda a bi kwel ni Mbôgi Yéhôva a bôdôl nigil Bibel. A bi héñha bilem gwé, a sôblana i nwii 2002. Tolakii Maurício a ngwélél Yéhôva hala a yé ngandak nwii, a nkal le: “I pot maliga, ngim mangéda me yé me jo sañ inyu boñ le me kwo bañ i béba.” Ndi a nsomol bé, a nkal le: “Me yé maséé inyule me nyi le i ngéda me ntjél boñ mam mabe, me nlémél Yéhôva.” *
17. Kii i nlédés we mu ñañ u Nabiha?
17 Bat Yéhôva mahôla, bôdôl mbuu mpubi wé ñem, he ngui yoñ wemede bé. (Galatia 5:22; Filipi 4:6) Ibale di nsômbôl héya nlômbi mut héya yosôna, di nlama jo sañ. Di yoñ le hihéga hi muda wada le Nabiha. Isañ a bi yôi nye a ban-ga ndik nwii minsamal. A nkal le: “I jam li, li bi lôôha nôgha me ndutu.” I ngéda Nabiha a bi kahal nañ, a bi bôdôl lôôha unup, a jok bisañ. A bi bôdôl nuñul hibañga, ba gwel nye, ba ha nye i mok inyu ngim ngéda. Mbôgi Yéhôva i bi ke i añal ñañ nlam i ndap mok, i niiga nye Bibel. Nabiha a bi bôdôl héñha bilem gwé. A nkal le: “Me bi bana bé ndutu i nwas ngim bilem bibe. Ndi inyu boñ le me nwas siga, njee bo njee.” Nabiha a bi jo sañ iloo nwii wada, sôk i nsôk a nwas siga. Kii i bi hôla nye? A nkal le: “Me bé waa bé soohe Yéhôva le a hôla me i nwas siga.” Nano a nkal bôt bape le: “Ibale me Nabiha me bi la héñha bilem gwem bibe inyu lémél Yéhôva, wee bôt bobasôna ba nla boñ hala!” *
U NLA HOL IPAM I SÔBLE!
18. Inoñnaga ni kaat 1 Korintô 6:9-11, kii ngandak bagwélél ba Djob i bi boñ?
18 I hiai hi bisu, bôda ni bôlôm bahogi Yéhôva a bi pohol inyu ke i ane ni Kristô, ba bééna ndugi bilem bibe. Kiki hihéga, bahôgi ba bé ke ndéñg, bôlôm ba lalnaga bôlôm, bape ba nibik, ndi ni mahôla ma mbuu mpubi u Yéhôva, ba bi héñha bilem gwap. (Añ 1 Korintô 6:9-11.) Yak i len ini, Bibel i nhôla didun di bôt i héñha bilem gwap. * Ba bi nwas ngandak bilem bibe. Ndémbél yap i ñéba le yak we u nla héñha, u nwas bilem gwoñ bibe, u hol ipam i sôble.
19. Kii di ga tehe mu i yigil i noñ?
19 I bôt ba nsômbôl kôs sôble, ba nlama ndik bé héya nlômbi mut, ndi ba nlama yak jo sañ inyu haba mut yondo. Mu i yigil i noñ ha, di ga tehe lelaa di yé le di haba mut yondo, ni lelaa bôt bape ba nla hôla bés i boñ i jam li.
HIÉMBI 41 Soho emble masoohe mem
^ liboñ 5 Ilole mut a nkôs sôble, a nlama ndugi héñha bilem gwé. I yigil ini, y’a éba bés kii i yé maboñok ma nlômbi mut, inyuki di nlama héya nlômbi mut, ni lelaa di yé le di pam i boñ hala. I yigil i noñ ha, d’a tehe lelaa di yé le di ke ni bisu i haba mut yondo yak i ngéda di mal sôblana.
^ liboñ 3 NDOÑI BIBUK: I “héya nlômbi mut” hala wee di nlama nwas mam mabe ma ma nkon bés ngôñ ni bilem bi bi nlémél bé Yéhôva. Di nlama bôdôl boñ hala ilole di nsôblana.—Éfésô 4:22.
^ liboñ 10 Inyu tehe mam mape munu ñañ unu, béñge i yigil ini le “La Bible transfome les vies—‘Il fallait que je revienne vers Jéhovah,’” i Nkum Ntat nu 1er avril 2012.
^ liboñ 16 Inyu tehe mam mape munu ñañ unu, béñge i yigil ini le “La Bible tranforme les vie—‘Ils m’ont parlé avec boñté,’” i Nkum Ntat nu 1er mai 2012.
^ liboñ 17 Inyu tehe mam mape munu i yigil ini, béñge i yigil ini le “La Bible transforme les vies—‘J’étais une jeune femme coléreuse et agressive,’” i Nkum Ntat nu 1er octobre 2012.
^ liboñ 18 Béñge minkéñék mi matila mini le “ Bibel i nhéñha niñ i bôt.”
^ liboñ 64 NDOÑI BITITII: I nwas bilem bibe i yé kiki i héya mbot i ñôbi.
