Bôt bahogi ba ba hoo soñgol i ñañ u, ba bi bat i mbadga i. Ndi mu i minlôñ mi, bôt iba ba gwé jôl le Méfibôset. Ibale di nkônde wan ñañ u, di nla ôt biniigana mu.

Kiñe Saulô a bééna bon bôlôm basaambok ni bon bôda iba. Yônatan a bé man Saulô nu bisu. I mbus ngéda, Saulô a bi gwal man ni mbok wé Rizpa nu ba bé sébél le Méfibôset. Ndi, yak Yônatan a bééna man munlôm nu ba bé sébél le Méfibôset. Jon, Kiñe Saulô a bééna lok ni nlal ba ba bééna jôl le Méfibôset.

Ngim ngéda i bi pam le Kiñe Saulô a bi bôdôl oo Lôk Gibéôn, a yéñ yak le a nol bobasôna. I nene le ngandak yap i bi nôla. Hala a bé béba jam. Inyuki? Inyule i dilo di Yôsua, baéga litén li Israel ba bi boñ malômbla ma nsañ ni Lôk Gibéôn.—Yôsua 9:3-27.

Malômbla ma ma bé ma ngi yii i dilo di Kiñe Saulô. Saulô a bi bôk malômbla ma, a yéñ le a nol Lôk Gibéôn. Hala a ba “inyu Saulô ni ndap yé matjél.” (2 Samuel 21:1) Sôk i nsôk, David a bi yila kiñe. Lôk Gibéôn i i bi pei i bi pôdôs David inyu béba jam i bi tagbe. David a bi bat bo lelaa bikwak bi bé le bi tina inyu liboñok libe li Saulô inyu boñ le Yéhôva a sayap loñ. Iloole Lôk Gibéôn i bat moni, i bi bat David bon bôlôm basaambok ba mut ‘a bi hégél bo béba le ba tjiba’ inyu boñ le ba nôla. (Ñañga bôt 35:30, 31) David a bi neebe.—2 Samuel 21:2-6.

Ha ngéda i, Saulô bo Yônatan ba bé ba ma wo i gwét, ndi lok i Yônatan le Méfibôset a bé a yii i niñ. A bi yoñ bé ngaba i kolba Lôk Gibéôn inyule a bi kwo bôk nye mañge. David a bi boñ malômbla ni Yônatan, malômbla ma ma bé tihba ndaye i Yônatan, yak lok i Yônatan le Méfibôset. (1 Samuel 18:1; 20:42) Bibel i nkal le: “Kiñe [David] a bañal Méfibôset, man Yônatan, man Saulô, inyu kumsoñ i Yéhôva i i ba ipôla yap.”—2 Samuel 21:7.

Ndi, David a boñ jam Lôk Gibéôn i bat nye. A bi ti bo bon bôlôm ba Saulô iba, ba bé sébél wada wap le Méfibôset, ni balal ba Saulô batan. (2 Samuel 21:8, 9) Liboñok li David li bi mélés pil matjél i loñ Israel.

I jam lini li ta ndik bé nso ñañ. Mbén Djob i bi bagal i jam li. I bé kal le: “Bon ba nôlga bañ inyu basañ.” (Ndiimba Mbén 24:16) Yéhôva a bé bé le a neebe le bon bôlôm iba ni balal batan ba Saulô ba nôla ibale ba bana bé nsohi wo ki wo. Mbén i bé kônde le: “Hi mut a’ nôla inyu béba yé nyemede.” I nene le i bon bôlôm iba ni balal batan ba Saulô ba ba bi nôla ba bi nit Saulô i ngéda a bé yéñ nol Lôk Gibéôn. Inyu hala nyen, bo basaambok ba bi saa inyu liboñok jap libe.

Ñañ u u niiga bés le ba nla bé nwéhél liboñok libe li mut nu a nkal le a bé noñ ndik oda. Ngén yada i nkal le: “Tibil hinjela hi makôô moñ, manjel moñ momasôna ma ba ki ntéébaga.”—Bingéngén 4:24-27; Éfésô 5:15.