1-2. Kii di mbéna tehe i ngéda bôt ba nsôblana, kii di ga tehe munu yigil ini?

 BAA u ma tehe i ngéda bôt ba nsôblana? U ntehe lelaa ba ntimbhe ni makénd momasôna mambadga ima ba mbat bo ilole ba nsôblana. Bôt bap ba lihaa ni mawanda map ba yé maséé. I ngéda bakôs sôble ba mpam i malép, ba yé maséé, bôt ba bambak moo. Hiki sonde dikôô di bôt di nti Yéhôva niñ yap, di kôhôk sôble.

² Ibale yak we u nsômbôl kôhna sôble, yi le makidik moñ ma yé malam ngandak inyule u “nyéñ Yéhôva.” (Tjémbi 14:1, 2) I yigil ini i mbéñge we, to u yé mañge to u yé mañ mut. Ndi yak i bés ba di ma sôblana, di gwé ngôñ i gwélél Yéhôva i boga ni boga. Di béñge mam maa ma ma ntinde bés i gwélél Yéhôva.

3. Inyuki bagwélél ba Yéhôva ba ngwés maliga ni telepsép? (Tjémbi 119:128, 163)

³ Yéhôva a bi kal bagwélél bé le ba “gwés maliga.” (Sakaria 8:19) Yésu a bi kal banigil bé le ba boñ mam ma téé sép. (Matéô 5:6) A bé sômbôl kal bo le ba boñ mam ma téé sép i mis ma Yéhôva. Baa u ngwés maliga ni telepsép? Pééna yo ki yo i ta bé. U ñoo bitembee ni mam mabe momasôna. (Añ Tjémbi 119:128, 163.) I bôt ba ntembee ba mpôna ñane nkoñ ’isi unu le Satan Nsohop. (Yôhanes 8:44; 12:31) Ngôñ yé i yé le a hoo jôl li Yéhôva mahindi. Ibôdôl nu  a bi tinde Adam bo Éva i boñ béba i wom Éden, a nwaa bé pot bitembee inyu hindis jôl li Yéhôva. A ngwés le bôt ba binam ba tehe Yéhôva kiki béba Ñane, nu a nim bés gwom bilam, a lôgôk bés. (Bibôdle 3:1, 4, 5) Bitembee bi Satan bi mboñ le bôt ba pôôs Yéhôva mahoñol mabe. I ngéda bôt ba binam ba mpohol le ba “ngwés bé maliga,” Satan a nla tinde bo i boñ mintén mi mam mabe momasôna.​—Rôma 1:25-31.

4. Lelaa Yéhôva a ñunda le a yé “Nyambe nu maliga”? (Béñge yak titii.)

⁴ Yéhôva a yé “Nyambe nu maliga,” a niiga mo bagwélél bé. (Tjémbi 31:5) I ngéda a niiga bo, a nhôla bo i kobla mu bitembee bi Satan. A niiga yak bagwélél bé le ba ba bôt ba maliga ni bôt ba téé sép. I ngéda ba mboñ hala, ba gwé ét nyuu ni ñem nwee. (Bingéngén 13:5, 6) Baa Yéhôva a bi bôñôl bé we i mam ma ngeñ u bé nnigil Bibel? Yigil i ñunda we le mambén ma Yéhôva ma yé nseñ inyu bôt bobasôna ni inyu yoñ wemede. (Tjémbi 77:13) Inyu hala nyen u gwé ngôñ i boñ mam ma téé sép i mis ma Yéhôva. (Matéô 6:33) U gwé ngôñ i hôla bôt i yi maliga ni i unda le Satan a yé mut bitembee. Kii i nla hôla we i boñ i jam li?

5. Lelaa u nla hôla bôt i yi maliga ni i boñ mam ma téé sép?

⁵ U nla niñ i nya i yé le bôt ba nôgda le u neebe bé bitembee bi Satan ni le u ngwés maliga. Le u gwé ngôñ le Yéhôva nyen a ba Ñane woñ, u boñok “mam ma téé sép.” Kii i nla hôla we i boñ i mam ma? U nla soohe Yéhôva, u kal nye le u nti nye niñ yoñ, i mbus u sôblana. Ibale u ngwés maliga ni telepsép, hala a ga tinde we i sôblana.

6. Lelaa kaat Tjémbi 45:4 i nhôla bés i gwés Yésu Kristô?

⁶ Inyuki u ngwés Yésu Kristô? Ndimbhe i yé i kaat Tjémbi 45:4. (Añ.) I pes kaat i i ñunda bés le Yésu a ngwés maliga, suhulnyuu ni telepsép. Ibale u ngwés maliga ni telepsép, u kôli ndik gwés Yésu Kristô. Hoñol kiki  Yésu a bi sôñ maliga ni telepsép ngéda a bé hana ’isi. (Yôhanes 18:37) Lelaa Yésu a bi unda le a ngwés suhulnyuu?

7. Kii i nlémél we mu ndémbél i suhulnyuu i Yésu?

⁷ Niñ i Yésu i ñéba le a yé suhulnyuu. Kiki hihéga, a ngwés bé le bôt ba ti nye lipém, a nti Yéhôva lipém jolisôna. (Markô 10:17, 18; Yôhanes 5:19) I ngéda u ntehe suhulnyuu i Yésu kii u nôgda? Baa hala a ntinde bé we i gwés nye ni i noñ ndémbél yé? Ibabé pééna! Inyuki Yésu a yé suhulnyuu? Inyule a ngwés Isañ, nu a yé suhulnyuu. (Tjémbi 18:35; Lôk Héber 1:3) Baa i ngéda u ntehe lelaa Yésu a nigle bilem bi Isañ, hala a ntinde bé we i gwés nye?

8. Inyuki di yé maséé i yi le Yésu nyen a yé Kiñe yés?

⁸ Di ngwés Kiñe yés Yésu inyule a nloo baane bobasôna. Yéhôva nyemede mede a bi niiga Man wé, a téé nye kiñe. (Yésaya 50:4, 5) Hoñol ki i bañga gwéha Yésu a bi unda. (Yôhanes 13:1) Di kôli gwés Yésu hala kiki a yé Kiñe yés. A bi kal le i bôt ba ngwés toi nye, ba ñunda hala ngéda ba nôgôl mambén mé. (Yôhanes 14:15; 15:14, 15) Di yé mawanda ma Man Nyambe, kinje bisai!

9. Inyuki di yé le di kal le sôble i bikristen i mpôna i Kristô?

⁹ Mbén Yésu yada i yé le banigil bé ba nlama sôblana. (Matéô 28:19, 20) A bi ti bés ndémbél. Sôble yé i ta bé kiki sôble i banigil bé. (Béñge minkéñék mi matila mini le “ Inyuki di nla kal le sôble i Yésu i ta bé kiki sôble i banigil bé?”) Ndi i ngim likala, di nla kal le sôble yé i mpôna i banigil bé. I ngéda Yésu a bi sôblana, a bi unda le a nyoñ makidik i boñ sômbôl i Isañ. (Lôk Héber 10:7) Hala nyen yak i ngéda banigil bé ba nsôblana, ba ñunda i mbamba le ba nti Yéhôva niñ yap. Sômbôl yap ha bé yon ba mboñ ndi i Yéhôva. I ngéda ba mboñ hala, ba noñ ndémbél i Malét wap Yésu.

10. Inyuki gwéha i Yésu i nlama tinde we i sôblana?

¹⁰ U nyi le Yésu a yé mpom Man Nyambe, ni le Yéhôva a bi téé nye le a ba Kiñe yés. U nyi ki le Yésu a yé suhulnyuu kiki Isañ, ni le a nigle bilem gwé i nya i yôni. Yigil yoñ i bi unda ki we le Yésu a bi jés mamut, a lédés i bet ba bé tomb, a mélés bakokon. (Matéô 14:14-21) U ntehe lelaa a ñéga ntôñ u Djob munu ngéda yés. (Matéô 23:10) Di nyi ki le i ngéda a’ ba Kiñe Ane Djob, a ga boñ mam malam iloo ha. Lelaa u nla éba le u ngwés nye? Nigle ndémbél yé. (Yôhanes 14:21) Jam li bisu u nla boñ inyu nigle nye li yé le u ti Yéhôva niñ yoñ, u sôblana.

11. Kii i nlama tinde bés i sôblana, inyuki?

¹¹ Limbe jam li tôbôtôbô li nlama tinde bés i sôblana? Yésu a bi unda mbén i i nloo mambén momasôna i ngéda a bi kal le: “U nlama gwés Yéhôva Nyambe woñ ni ñem woñ wonsôna, ni niñ yoñ yosôna, ni mahoñol moñ momasôna, yak ni ngui yoñ yosôna.” (Markô 12:30) Baa hala nyen u ngwés Yéhôva?

12. Inyuki di ngwés Yéhôva? (Béñge yak titii.)

¹² Ngandak mam i mboñ le di gwés Yéhôva. Kiki hihéga, di nyi le Yéhôva  nyen a yé lingen li niñ, ni le nyen a nti “hiki likébla lilam” ni “hiki likébla li yé peles.” (Tjémbi 36:9; Yakôbô 1:17) Hiki jam lilam di gwé, Yéhôva nyen a bi ti bés jo.

13. Inyuki binoñ bi yé likébla lilam?

¹³ Binoñ bi yé likébla lilam Yéhôva a bi ti bés. Kii i ñunda hala? Hoñol lelaa Yéhôva bona Man wé ba ngwéhna. Yésu a bi kal le: “Tata a ngwés me,” a kal ki le: “Me ngwés Tata.” (Yôhanes 10:17; 14:31) Ba bi yén ntôñ nwii ndi nwii, ba kônde ki ba mawanda. (Bingéngén 8:22, 23, 30) Hégda lelaa Yéhôva a bé le a nok njôghe i ngéda a bi nwas le Man wé a loo a nok ndutu, a wo. Yéhôva a ngwés bôt ba binam, a ngwés we ngandak jon a bi nwas le Man wé a wo inyu boñ le di kôhna niñ boga. (Yôhanes 3:16; Galatia 2:20) Jam li bisu li, li li ntinde bés i gwés Djob.

14. Mambe makidik malam u nlama yoñ?

¹⁴ Gwéha yoñ inyu Yéhôva i nañ, inyule u nigil i yi nye. Ibabé nkaa, ngôñ yoñ i yé le u ba liwanda jé nano ni i boga ni boga. Hala a nla bôña. Yéhôva nyemede a nkal we le, kônha ñem wé maséé. (Bingéngén 23:15, 16) U nla  kônha ñem wé maséé ni bipôdôl gwoñ yak ni maboñok moñ. Makidik u nyoñ mon ma ga éba too u ngwés toi Yéhôva. (1 Yôhanes 5:3) Jam lipe li tane bé we nseñ kiki lini.

15. Lelaa u nla éba le u ngwés Yéhôva?

¹⁵ Lelaa u nla unda le u ngwés Yéhôva? Jam li bisu u nla boñ li yé le soohe Yéhôva, u ti nye niñ yoñ. (Tjémbi 40:8) I mbus hala, w’a unda i mbamba le u nti nye niñ yoñ, ni njel sôble. Kiki di mbôk di tehe, makidik ma ma yé malam ngandak, ma yé ki nseñ iloo hihéga. I niñ u niñ nano i ta ha bé inyu yoñ, ndi inyu Yéhôva. (Rôma 14:8; 1 Pétrô 4:1, 2) Makidik ma ma ta bé isii jam, ndi ma mboñ le u bana bañga niñ. Lelaa?

16. Inoñnaga ni kaat Tjémbi 41:12, lelaa Yéhôva a mbom i bet ba nôgôl nye?

¹⁶ Mut nye ki nye a nkap bé kiki Yéhôva. I mam momasôna di mbôñôl nye a mbôñôl bés mo hikôô hi ngélé. (Markô 10:29, 30) To munu bôô nkoñ ’isi ini a mboñ le di bana bañga niñ. Ndi di mpamak bé i het di yé ke. I ngéda di nsôblana, liké li mbôdôl mbôdlak. U nla gwélél Yéhôva i boga ni boga. W’a kônde ba liwanda jé. Ntel wonsôna a niñ, yak we w’a niñ hala wee i boga ni boga.​—Añ Tjémbi 41:12.

17. Limbe jam Yéhôva a gwé bé li di yé le di ti nye?

¹⁷ I ngéda u nti Yéhôva niñ yoñ, u sôblana ki, wee u nti nye likébla lilam kiyaga. Mam malam momasôna u ma bana, niñ ilam u gwé, nyen a bi ti we gwo. U nla ti Nhek ngii ni hisi ngim yom a gwé bé, hala wee i gwélél nye ni ñem woñ wonsôna letee ni nyemb. (Hiôb 1:8; 41:11; Bingéngén 27:11) Ibale u mboñ hala, wee u ntibil gwélél niñ yoñ. Gwéha u ngwés Yéhôva yon i nlama tinde we i sôblana.

18. Mambe mambadga di nlama badba?

¹⁸ Baa u yé bebee i kôs sôble? Ndik wetama nyen u nla timbhe i mbadga i. Ndi noode badba le: ‘Kii me mbem?’ (Minson mi baôma 8:36) Bigda mam maa di ntehe munu yigil ini. Pog, u ngwés maliga ni telepsép. Badba le: ‘Baa me gwé ngôñ i ba ha i ngéda bôt bobasôna hana nkoñ ’isi ba ga pot maliga, ba boñok mam ma téé sép?’ Iba, u ngwés Yésu Kristô. Badba le: ‘Baa me gwé ngôñ le Man Nyambe a ba Kiñe yem? Baa me gwé ngôñ i noñ ndémbél yé?’ Aa, di ngwés Yéhôva. Badba le: ‘Baa me nsômbôl gwélél Yéhôva inyu kônha ñem wé maséé?’ Ibale hala nyen i yé, inyuki u nsôblana bé? Kii u mbem?​—Minson mi baôma 16:33.

19. Inyuki di nlama bé kon woñi i sôblana? Ti hihéga. (Yôhanes 4:34)

¹⁹ Ibale u nkon woñi i sôblana hoñol hihéga hiada Yésu a bi gwélél. (Añ Yôhanes 4:34.) Yésu a bi kal le, i boñ sômbôl i Isañ i yé kiki bijek. Inyuki? Inyule bijek bi yé nseñ inyu loñge yés. Yésu a bé yi le mam momasôna Yéhôva a nkal bés le di boñ, ma yé inyu loñge yés. Yéhôva a ta bé bat bés le di boñ jam li li nla lona bés ndutu. Ikété mam Yéhôva a nsômbôl le u boñ baa sôble i yé mu? Ñ. (Minson mi baôma 2:38) Yi le ibale u nsôblana, w’a kôhna ngandak bisai. Ibale ba nti we bijek u ngwés ngandak, baa w’a kon woñi i je gwo? Inyuki u nkon ni woñi i sôblana.

20. I yigil i noñ ha i ga pôdôl kii?

²⁰ Ngandak bôt i yé le, i ngéda ba mbat bo le inyuki u yé ngi sôblana, ba ntimbhe le: “Ngéda i yé ngi kola.” I pot maliga, makidik mape ma ta bé nseñ iloo i ti Yéhôva niñ yoñ ni kôs sôble. Jon u kôli yoñ ngéda i ôt pék ilole u nyoñ makidik ma. Ndi ibale u gwé toi ngôñ i yoñ makidik ma, kii i nla hôla we? Yigil i noñ ha i ga timbhe mbadga i.