1-2. Inyuki u nlama bé tomb ibale ngéda i yé ngi kola le u kôs sôble? (Béñge titii i lipep li bisu.)

 IBALE u nsômbôl kôs sôble, hala a yé loñge. Ndi baa u yé bebee i kôs sôble? Ibale wemede u ntehe le u yé bebee, yak mimañ mi neebe hala, u nimis bañ ngéda. Yéhôva a’ kôp we bisai.

² Baa mimañ mi nkal we le u nlama kônde hol ilole u nkôs sôble? Tole wemede u ntehe le ngéda i yé ngi kola? U tomb bañ. U nla hol ikepam i sôble too u yé mañge too u yé mañ mut.

3. Kii ñane wada nu a bé man Étiôpia a bi bat Filipô, imbe mbadga di nlama badba? (Minson mi baôma 8:36, 38)

³ Añ Minson mi baôma 8:36, 38. Ñane wada nu a bé man Étiôpia a bi bat Filipô le: “Kii i nkéñ me njel i kôhna sôble?” Mut Étiôpia nu a bééna ngôñ i kôhna sôble, ndi baa ngéda i bé i ma kola?

4. Lelaa nwak Étiôpia a bi unda le a bé ke ni bisu i nigil Bibel?

⁴ Nwak Étiôpia u “bé i Yérusalem inyu bégés Nyambe.” (Minson mi baôma 8:27) Jon i mpôna le a bi jôp i base i Lôk Yuda, a bi lama nigil bikaat bi  Lôk Héber inyu yi Yéhôva. Ndi a bi telbene bé ha. I ngéda Filipô a bi boma nye, baa ni ngi hoñlak i jam a bé boñ? A bé añ nhôôk kaat u mpôdôl Yésaya. (Minson mi baôma 8:28) I kaat i i mpôdôl njip mam i mbuu. Nwak Étiôpia u bi telbene ndik bé i biniigana bi bisu bi Bibel, ndi u bééna ngôñ i kônde nigil mam mape.

5. Kii man Étiôpia a bé boñ ni i mam a bé nigil?

⁵ Man Étiôpia a bé ñane nkeñi isi ane i kandaké kiñemuda i Étiôpia, nyen “a bé tééda ki nkus wé wonsôna.” (Minson mi baôma 8:27) Jon i nene le a bééna bôlô ngandak, ndi to hala a bi ti ngéda yé i nson u Yéhôva. A bi yoñ ndik bé ngéda i nigil maliga, a bé nôgôl i mam a bé nigil. Jon a bi habi nyoo i loñ yé i Étiôpia, a ke i bégés Yéhôva i Yérusalem. Liké li li bi lama yoñ nye ngéda ni moni. Ndi kiki a bééna ngôñ i bégés Yéhôva, a bé ke i témpel.

6-7. Kii i ñéba le man Étiôpia a bi ke ni bisu i hol?

⁶ Filipô a bi niiga man Étiôpia ngandak mam, a yis nye le Yésu a yé Mésia. (Minson mi baôma 8:34, 35) Ibabé pééna, i ngéda a bi nok i mam Yésu a bi bôñôl nye hala a bi tihba nye. Kii a bi boñ? A bé le a ke ni bisu i ba ngwañ mut u ba bé ti lipém ikété base i Lôk Yuda. Ndi kiki a bi kônde gwés Yéhôva bona Yésu, a yoñ makidik i sôblana. Filipô a bi sôble nye inyule a bi tehe le ngéda i nkola.

⁷ Ibale u nigle ndémbél i man Étiôpia, yak we w’a ba nkôôbaga i kôs sôble. W’a la kal kiki nye le: “Kii i nkéñ me njel i kôhna sôble?” Di béñge lelaa di nla boñ i mam mana a bi boñ: A bi kônde nigil, a boñ i mam a bé nigil, a kônde gwés Yéhôva.

8. Kaat Yôhanes 17:3 i ñunda le u nlama boñ kii?

⁸ Añ Yôhanes 17:3. Baa bibañga bi Yésu bini bi bi boñ le u yoñ makidik i nigil Bibel? Ngandak ikété yés i nla timbhe le ñ. Ndi baa bi ñunda ki le di nlama ke ni bisu i nigil? Ñ. Niñ yés yosôna “d’a waa bé yi bañga Nyambe.” (Ñañal 3:11) D’a boñ hala i boga ni boga. Kiki d’a ba di nyi nye, hala nyen d’a kônde ba mawanda mé.​—Tjémbi 73:28.

9. I ngéda di mal yi biniigana bi bisu bi Bibel, kii di nlama boñ?

 ⁹ Inyu yi Yéhôva di nlama bôdôl ni biniigana ñôma Paul a sébél i kaat Lôk Héber le: “Biniigana bi bisu.” A bé yan bé biniigana bi, jon a bi kal le bi yé kiki milik ba nyus nkéñéé man. (Lôk Héber 5:12; 6:1) Ndi a bi kal le bikristen bi nlama ndik bé sugul mu biniigana bi bisu, bi nlama yak nigil njip mam i i yé mu i Bañga i Djob. Baa u ngwés u nigil njip mam i Bibel? Baa ngôñ yoñ i yé le u kee ni bisu i nigil inyu yi sômbôl i Yéhôva ni i hol?

10. Inyuki yigil i nlédél ngim bôt?

¹⁰ Yigil i nlédél ngandak ikété yés. Baa yak we? Baa u bé yoñ ngéda i nigil i ngéda u bé i suklu? Baa u bé gwés nigil, tole u bi kal le jam joñ bé li? Ibale hala, ngandak bôt i yé kiki we. Ndi Yéhôva a nla hôla we. A yé Malét nu a nloo balét bobasôna.

11. Kii i ñunda le Yéhôva a yé “Nniiga Nunkeñi”?

¹¹ Yéhôva nyemede a nkal le a yé “Nniiga woñ Nunkeñi.” (Yésaya 30:20, 21) A yé Nniiga nu a nok bôt, a ñunda bo loñgeñem, a hônbaga bo. A mbéñge bilem bilam bi bôt a niiga. (Tjémbi 130:3) A ta bé le a bat bés le di boñ jam li nloo bés. U hôya bañ le nyen a bi hek likébla lilam lini le boña. (Tjémbi 139:14) Bôt ba binam ba ngwés ba nigil. Yéhôva a gwé ngôñ le di kee ni bisu i nigil i boga ni boga, di konok maséé. Jon di nlama bana “ngôñ ikeñi” i Bañga i Djob ibôdôl nano. (1 Pétrô 2:2) Téé ngim mam u nla yônôs i pes mbuu, yoñ ki makidik i añ Bibel hiki ngéda u niglak ki yi. (Yôsua 1:8) Yéhôva a nla hôla we i gwés yigil ni i tehe lelaa u nla boñ mam u nigil.

12. Inyuki di nlama hoñol ndémbél i Yésu i ngéda di nigil?

¹² Di yoñ ngéda i nigil i mam Yésu a bi boñ ngéda a bé hana ’isi. Inyu boñ le di laa gwélél Yéhôva munu mangéda mabe mana, di nlama noñ mabal ma Yésu. (1 Pétrô 2:21) Yésu a bi sôô bé bés mandutu ma mbem bés. (Lukas 14:27, 28) Ndi a bé yi le d’a téñbe kiki nye. (Yôhanes 16:33) Nigil i mam Yésu a bi boñ i ngéda a bé hana ’isi, u yoñ ki makidik i kôna nye mu niñ yoñ.

13. Kii di nlama bat Yéhôva ibabé waa, inyuki?

¹³ Yi yotama i kôli bé. I nhôla ndik bés i yi lelaa di nla kôôge Yéhôva bebee, i nhôla ki bés i bana bilem kiki bo hémle ni gwéha. (1 Korintô 8:1-3) Kiki w’a ba u nigil, u waa bañ bat Yéhôva le a kônde we hémle. (Lukas 17:5) A ngwés a ntimbhe i nya masoohe i. Ibale u gwé bañga yi i Nyambe, u ga bana hémle i ngui, ha nyen w’a hol.​—Yakôbô 2:26.

14. Lelaa ñôma Pétrô a bi unda le di nlama boñ i mam di nigil? (Béñge yak titii.)

¹⁴ Ñôma Pétrô a bi éba le banigil ba Kristô ba nlama boñ i mam ba nigil. Inyu hala nyen a pôdôl ñañ u Nôa. Yéhôva a kal Nôa le a ga tjé bibéba bi bôt bi bé ngéda yé ni ntida malép. Kiki Nôa ni lihaa jé ba bé yi le ntida  malép u nlo, hala a bé bé a kôli inyu boñ le ba pei. I ngéda Pétrô a nkal le “i ngéda nkuu u bé ôña,” a mpôdôl i mam ma bi tagbe nwaa le ntida malép u mbôdôl. (1 Pétrô 3:20) Nôa ni lihaa jé ba bi nôgôl Nyambe, ba oñ soso nkuu. (Lôk Héber 11:7) Ha nyen Pétrô a bi unda le i bôlô Nôa a bi sal i yé kiki sôble i ngéda a kal le: “I jam lini li yé yimbne i sôble, yo ki yon i yé i tohol bé nano.” (1 Pétrô 3:21) Di yé le di kal le i bôlô u nsal nano, inyu kôôba sôble i yé kiki bôlô Nôa a bi sal ni lihaa jé nwii ndi nwii inyu oñ nkuu. Kii u nlama boñ nwaa le u nkôs sôble?

15. Kii di nlama boñ inyu unda le di ntam toi béba yés?

¹⁵ Jam jada di nlama boñ ilole di nkôs sôble li yé le, di tam bibéba gwés. (Minson mi baôma 2:37, 38) Ba nkal le mut a ntam toi béba yé i ngéda a nhéñha héñha yosôna. Baa u nwas mam ma ma nlémél bé Yéhôva kiki bo malal ma nyega, i ôt hibañga, ni pot bijôñ? (1 Korintô 6:9, 10; 2 Korintô 7:1; Éfésô 4:29) Ibale u nwahak bé i mam ma, u waa bañ jo sañ. Bat mut a niiga we Bibel mahôla tole mimañ mi likoda joñ. Ibale u yé mañge ni le u nginda yii i ndap bagwal boñ, kal bo le ba hôla we i nwas bilem bibe bi bi nkéñ we i sôblana.

16. Kii di nlama boñ ibale di nsômbôl bégés Yéhôva hiki ngéda?

¹⁶ Di nlama ki bégés Yéhôva hiki ngéda, hala wee di kenek makoda, di timbhege. (Lôk Héber 10:24, 25) I ngéda ba ga neebe le u ba ntéé likalô, bôdôl ke i likalô hiki ngéda. Kiki w’a ba u nke i likalô, hala nyen w’a pam i gwés jo. (2 Timôtéô 4:5) A mañge, ibale u ngi niñik ni bagwal boñ, badba le: ‘Baa bagwal bem bon ba nkal me le me kee i makoda ni i likalô? Tole me mbéna boñ  i mam ma ibabé le ba kal me?’ I ngéda u mboñ hala, u ñunda Yéhôva le u nhémle nye, u ngwés nye, u tinak nye mayéga. I mam ma mon ba nsébél le “maboñok ma ndéñbe i gwés Nyambe.” (2 Pétrô 3:11; Lôk Héber 13:15) I ngéda u mboñ mo, wee u nti Yéhôva makébla. (Hégha ni 2 Korintô 9:7.) I mam mana momasôna, di mboñ mo inyule di yé maséé i sélél Yéhôva ni ñem wés wonsôna.

17-18. Imbe lem ilam i ga hôla we i hol ikepam i sôble, inyuki? (Bingéngén 3:3-6)

¹⁷ Kiki u mba u nhol inyu kôs sôble, u ga boma mandutu. Ngim bôt i yé le i nol we hiol inyule u yé nnigil Kristô, ba yé yak le ba kolba we. (2 Timôtéô 3:12) Ibale u njo sañ inyu yémbél bilem bibe, ngim mangéda u nla kwo, ndi i mbus u telep. Tole u nla yodop inyule u mpam bé i boñ i jam u nsômbôl boñ. Kii y’a hôla we ha ngéda i? Gwéha u ngwés Yéhôva.

¹⁸ Gwéha inyu Yéhôva i yé lem ilam kiyaga. (Añ Bingéngén 3:3-6.) Ibale u ngwés Djob ngandak, u ga pam i yémbél mandutu ma niñ. Bibel i mbéna unda le Yéhôva a nwaa bé gwés bagwélél bé. Hala a nkobla le Yéhôva a ngwés bés bañga bañga, a yé mbén i tjôô bés. (Tjémbi 100:5) Di bi héga i pôna Nyambe. (Bibôdle 1:26) Lelaa yak we u nla unda bape gwéha kiki Yéhôva?

19. Lelaa u nla kônde ti Yéhôva mayéga inyu mam momasôna a ma bôñôl we? (Galatia 2:20)

¹⁹ Jam li bisu, ti Yéhôva mayéga. (1 Tésalônika 5:18) Hiki kel badba le: ‘Lelaa Yéhôva a ñunda me gwéha?’ I ngéda u nsoohe Yéhôva, ti nye mayéga inyu mam a ma bôñôl we. I mam gwéha i ntinde Yéhôva i bôñôl bagwélél bé, yoñ mo kiki bo le wen a mbôñôl mo tôbôtôbô, ndik kiki ñôma Paul a bé tehe mo. (Añ Galatia 2:20.) Badba le: ‘Lelaa yak me me nla unda nye gwéha?’ Ibale u ngwés Yéhôva, w’a kwo bé i manoodana, w’a hônba ki  mandutu. Ha nyen w’a bégés Yéhôva hiki ngéda, u undga nye hiki kel le u ngwés nye.

20. Lelaa u nla ti Yéhôva niñ yoñ, inyuki makidik ma ma yé nseñ?

²⁰ Kiki ngéda i mba i ntagbe, gwéha u ngwés Yéhôva i ga tinde we i ti nye niñ yoñ. U hôya bañ le i ngéda u nti wemede nkikip yak Yéhôva, u nla ba ngwélél wé i boga ni boga. I ngéda u nti nye niñ yoñ, u nlama gwélél nye to u ntégbaha mangéda malam to mabe. U gwé bé le u tiimba kal nye mbônga u hiki ngéda. Bebek makidik ma ma nla kônha we woñi. Ndi yi le ikété makidik momasôna u nla yoñ i niñ yoñ, mana mon ma nlôôha ba nseñ. (Tjémbi 50:14) Satan a ga noode tômbôs we inyu boñ le u waa gwélél Yéhôva. U néhne bañ Satan njel! (Hiôb 27:5) Gwéha u ngwés Yéhôva i ga hôla we i gwélél nye kiki u bi bôn nye, w’a kônde ki yila liwanda jé.

21. Inyuki di yé le di kal le i ngéda mut a nsôblana a mbôdôl mbôdlak?

²¹ I ngéda u mal ti Yéhôva niñ yoñ, kal mimañ mi likoda joñ le u nsômbôl sôblana. Ndi yi le i ngéda u nsôblana, u mbôdôl mbôdlak. W’a gwélél Yéhôva i boga ni boga. Jon kônde gwés Yéhôva ibôdôl nano. Hiki kel, yoñ makidik ma ma nla boñ le u kônde gwés Yéhôva. Ibale u mboñ hala, w’a kôs sôble. Yokel, a ga ba hilo i tôbôtôbô. Ndi u mbolok bé i homa u nke. Kee ni bisu i gwés Yéhôva bo Yésu i boga ni boga!