Inyuki i mut ba nsébél hana le “a mut” a bi kal le a ga “tjé” bum yé ibale a mbiiba ni Ruth? (Ruth 4:1, 6)

I ngéda kôba, i ngeñ mut a nwo ndi a yék bé bon, bôt ba bé badba le: Njee a ga yégla ngababum yé? Baa jôl jé li ga lém mba ni mba? Mbén Môsi i bé timbhe i nya mambadga i.

Kii i bé i tagbe i ngéda ba bé nuñiul hisi hi mut a nwo tola hi nu a nkwo liyep? Manyañ tole mut wada mu lihaa jé a bé le a témb a somb hisi hi. Hala a bé boñ le hisi hié hi yégle inyu lihaa jé.​—Lôk Lévi 25:23-28; Ñañga bôt 27:8-11.

Ndi kii i bé unda le jôl li mut li ga lém toi bé? Inoñnaga ni Mbén, manyañ mut nu a bé lama bii nwaa wé, a gwal man ni nye, a ti i man nu jôl li manyañ nu a bi wo. Hala nyen i bi bôña ni Ruth. I man a bé gwal ni yik i manyañ nyen a bé lama kôdôl bum i isañ. Bitelbene bini bi bé sôñ yak yik muda.​—Ndiimba Mbén 25:5-7; Matéô 22:23-28.

Di béñge le hihéga hi Naômi. A bé nwaa Élimélek. I ngéda nlôm ni bon bé bo iba ba bi wo, munlôm nye ki nye a bé ha bé lihaa jé inyu yoñ ndun ni nye. (Ruth 1:1-5) I ngéda a bi témb i Yuda, Naômi a bi ti nkiya wé Ruth maéba le a ke i tehe Bôas inyu boñ le a témb a somb hisi hiap. A bé mut lihaa nu Élimélek. (Ruth 2:1, 19, 20; 3:1-4) Ndi Bôas a bé yi le mut numpe a bééna i kunde i i bisu gwé, nyen Bibel i nsébél le: “A mut.” Nyen a bé mut nu bisu nu a bééna kunde i somb hisi hi.​—Ruth 3:9, 12, 13.

I “mut” nu a bé sômbôl somb hisi hi. (Ruth 4:1-4) A bé yi le i ga béda le a pémés ngandak moni, a bi nôgda yak le Naômi a bé ñunuk ni le a nla ha bé gwal man nu a bé lama kôdôl hisi hi. Jon hisi hi bé lama jôp ikété ngababum i mut nu, hala a bé le a ba loñge inyu yé.

Ndi i mut nu a bi nhéñha mahoñol mé i ngéda a bi tehe le Ruth nye a bé ki le a ke libii a gwal ki man. A kal le: “Me ta bé le me kobol i bum i, tiga le me tjé bum yem.” (Ruth 4:5, 6) Inyuki a bi yik tjél?

Ibale i mut nu tole mut numpe a bii Ruth, a gwal ki man ni nye, man nu a bé lama kôdôl bum i Élimélek. Lelaa i mut nu a bé le a “tjé bum” yé? Bibel i nkal bé bés, ndi bebek manjom ma bé le ma ba ma ma noñ.

• Njom i bisu i bé le ibale a nsomb hisi hi, a ga nimis moni nwé, ki le hisi hi ga ba bé hié. Inyule hi ga ba inyu lok i Ruth.

• Njom i yônôs iba i yé le nyen a bé lama jés Naômi ni nkiya wé Ruth, a yoñ ki ndun ni bo.

• Njom i yônôs aa, ibale Ruth a gwal bon bape ni nye, i bon ba ba bé lama kôs ngaba mu bum yé ni bon a bi bana i bisu bi ngéda.

• Njom i yônôs ina, ibale i mut nu a gwé bé bon bape, ni le a ngwal ndik man wada ni Ruth, i man nu a bé lama kôdôl ngababum yé ni ngababum i Élimélek. Jon a bé lama nimis ngababum yé inyu man ba bé lama ti jôl li Élimélek. I mut nu a bé bé bebee i nimis ngababum yé ndik inyu hôla Naômi. Jon a bi nwas le Bôas nyen a kobol bo. Bôas a bi boñ hala inyule a bé sômbôl “timbis jôl li lôñ mut i ngababum yé.”​—Ruth 4:10.

I mut nu a bé lôôha tôñ inyu ngababum yé. Maboñok mé ma ñunda le a bé gwés ndik nyemede. Ndi tolakii i mut nu a bi boñ biliya le jôl jé li lém bañ, bôt ba bi sôk ba hôya nye. A nimis yak bisai bi tôbôtôbô Bôas a bi bana. Ba nsima nye ikété ndaye i Yésu Kristô. Kinje ngoo le i mut nu a bi nimis bisai ndik inyule a bé mut wim, a tôñôk ndik nyetama, a tjél hôla hiyeyeba hi mut!​—Matéô 1:5; Lukas 3:23, 32.