1. Mambe mahoñol ma nla tééñga bagwélél ba Yéhôva ba ba tiñi ni nye?

 KINJE makénd di nkôs i yi le, Yéhôva a yé maséé ni litén jé jolisôna! Bibel i nkal le: “Yéhôva a ngwés litén jé.” (Tjémbi 149:4) Ndi i yé i pam ngim mangéda le, bagwélél ba Djob bahogi ba ba ntomb, ba badba le: ‘Baa me nlémél toi Yéhôva?’ Ngandak bagwélél ba Yéhôva ba ngéda kôba ba bi tégbaha i nya mangéda i.​—1 Samuel 1:​6-10; Hiôb 29:​2, 4; Tjémbi 51:11.

2. Bonjee ba nlémél Yéhôva?

² Bibel i ñunda le bikwéha bi bôt bi nla lémél Yéhôva. Lelaa? Inyu pam i boñ hala, di nlama unda le di nhémle Yésu Kristô, di kôs ki sôble. (Yôhanes 3:16) Ha i ngéda i, di ñunda i mbamba le, di ntam bibéba gwés, di bôn ki Yéhôva le di ga boñ sômbôl yé. (Minson mi baôma 2:38; 3:19) Yéhôva a yé maséé i ngéda di mboñ i mam ma, inyu yila mawanda mé. Ntel ngéda wonsôna di ntéñbe i yônôs mbônga di bi boñ i ti bésbomede nkikip i nyeni, Yéhôva a yé maséé ni bés, a nyoñ ki bés kiki mawanda mé ma ñem nyuu.​—Tjémbi 25:14.

3. Kii di ga tehe nano?

³ Kii i yé i tinde ngim bôt i hoñol le, i nlémél bé Nyambe? Lelaa Yéhôva a ñunda le mut a nlémél nye, tole a yé maséé ni nye? Lelaa kristen i nla kônde ba nkwoog nkaa le i nlémél Nyambe?

 INYUKI NGIM BÔT I NLA HOÑOL LE I NLÉMÉL BÉ YÉHÔVA

4-5. Di nla ba nkwoog nkaa ni kii, to ibale di njôs mahoñol le, di nhee bé to yom?

⁴ Ibôdôl bés boñge, ngandak ikété yés i njôs mana mahoñol le, di nhee bé to yom. (Tjémbi 88:15) Mankéé wada le Adrián a nkal le: “Me yé me hoñlak le me ta bé to yom. I ngéda me bé isii mañge munlôm, me ngi bigdaga le me bé soohe le lihaa jem li niñ i Paradis, tolakii me bé kalba le me kôli bé ba i nsoñgi u bôt ba ga niñ nyoo.” Tony, nu a bi nañ bé lihaa li Mbôgi Yéhôva a nkal le: “Bagwal bem ba mah kal bé me le, ba ngwés me, le ba yé maséé ni me. Hala a boñ le me hoñol le, me ta bé le me boñ yom yo kiki yo i i nla lémél bo.”

⁵ Ibale di mbéna bana mahoñol ma, di bigda le Yéhôva a bi ôt bés i nyeni. (Yôhanes 6:44) A ntehe bilem gwés bilam bi bésbomede di ta bé le di tehe, a nyi ki loñge loñge njee di yé toi. (1 Samuel 16:7; 2 Miñañ 6:30) Jon di nla neebe le maliga mon a mpot i ngéda a nkal le di yé tik i mis mé.​—1 Yôhanes 3:​19, 20.

6. Kii ñôma Paul a bé nôgda inyu bibéba a bi boñ behee?

⁶ Ilole ngandak ikété yés i nlo maliga, di bi boñ mam ma bebek, ma ngi tééñgaga bés. (1 Pétrô 4:3) Yak bilôk bikéé bi bi tiñi ni Yéhôva, bi njôs bibomb gwap. Baa yak we u nôgda le ñem woñ u ñôm we nsohi? Ibale hala, bebek i yi le yak bagwélél ba Yéhôva ba kôba ba bi bana minlélém mi mahoñol, i ga lédés we. Kiki hihéga, ñôma Paul a bé nôgda le a yé ngoo ngandak, ngéda a bé bigda bibomb gwé. (Rôma 7:24) Maliga ma yé le, Paul a bi tam bibéba gwé, a kôs ki sôble. Ndi to hala, i ngéda a bé pôdôl nyemede, a kal le a yé “ñôma nuntitigi ikété baôma”, le a yé yak “mboñbéba nu bisu.”​—1 Korintô 15:9; 1 Timôtéô 1:15.

7. Kii di nlama bé hôya inyu bibéba di bi boñ kôba?

⁷ Tata wés nungingii a mbôn le, a ga nwéhél bés ibale di ntam bibéba gwés. (Tjémbi 86:5) Jon ibale bibéba di bi boñ bi ntééñga bés, di nla hémle i yom Yéhôva a nkal, le a bi nwéhél bés.​—Kôlôsé 2:13.

8-9. Lelaa di nla jôs mana mahoñol le, di ta bé le di boñ mam ma nlémél Yéhôva?

⁸ Bésbobasôna di gwé ngôñ i boñ kii yosôna di nla inyu gwélél Yéhôva. Bôt bahogi ba nla hoñol le, to ba mboñ biliya lelaa, b’a lémél bé nye. Sita yada le Amanda, a nkal le: “Me mbéna hoñol le i ti Yéhôva i yom i nlôôha ilam me gwé i nkobla le, me nlama ndik kônde boñ biliya, kônde ni kônde. Jon ngim mangéda, me ngwés boñ iloo kiki me nla. I ngeñ me ‘mpam bé i boñ ngim jam,’ me nhoñol le kiki me ta bé maséé ni memede, hala nyen yak Yéhôva a tane bé me maséé.”

⁹ Lelaa di nla jôs mahoñol mana le, to di mboñ biliya lelaa, di ga lémél bé Yéhôva? Di bigda le Yéhôva a ta bé ndéñ ndéñ. A mah bat bé bés iloo kiki di nla boñ. A nkon maséé ni i yom di nla boñ inyu yé ni ngap yés yosôna. Hoñol yak ndémbél i bôt Bibel i mpôdôl, ba ba bé gwélél Yéhôva ni ñem wap wonsôna. Di yoñ le hihéga hi Paul. Nwii ndi nwii, a bi sal ni ngui yé yosôna, a kena hônd yé likalô haa ngandak, a bodok makoda. Ndi i ngéda mam ma bé kéñ nye i téé likalô, baa hala a bé kobla le a nlémél ha bé Nyambe? Heni. A bé ke ni bisu i boñ i yom a nla, Yéhôva a bé sayap ki nye.  (Minson mi baôma 28:​30, 31) Nlélém ni bés, i nla pam le mam ma héñha i niñ yés, di laa ha bé gwélél Yéhôva kiki di bé boñ behee. I yom i nlôôha nseñ i mis mé, i yé manjom ma ma ntinde bés i gwélél nye. Nano di tehe manjel Yéhôva a ngwélél inyu unda bés le, di nlémél nye.

LELAA YÉHÔVA A ÑUNDA LE DI NLÉMÉL NYE?

10. Lelaa di nla “nok” Yéhôva a nkal bés le di nlémél nye? (Yôhanes 16:27)

¹⁰ Ni njel Bibel. Yéhôva a ngwés a nkal bagwélél bé le a ngwés bo, ni le ba nlémél nye. Bibel i mpôdôl bahoma iba i het a bi kal Yésu le, a yé Man wé nu gwéha, nu a nlémél nye. (Matéô 3:17; 17:5) Baa yak we u gwé ngôñ i nok Yéhôva a nkal we le u nlémél nye? A mpot ha bé len le di nogok, ndi a ngwélél Bibel. Di nla “nok” Yéhôva a nyis bés le di nlémél nye, i ngéda di ñañ bibuk bi Yésu i kaat i Matéô, Markô, Lukas ni Yôhanes. (Añ Yôhanes 16:27.) Yésu a bi kôna bilem bi Isañ i nya i yôni. I ngéda di ñañ le Yésu a kal banigil bé le a bé gwés bo, tolakii ba bé hôs, hala a mboñ le di hégda Yéhôva a nkal bés nlélém jam.​—Yôhanes 15:​9, 15.

11. Inyuki i tégbaha mangéda mabe i nkobla bé le di nlémél ha bé Yéhôva? (Yakôbô 1:12)

¹¹ Ni njel maboñok mé. Yéhôva a yé bebee i hôla bés, ñ, a nti bés i mam ma nkon bés ngôñ i pes minsôn. I nla pam le Yéhôva a nwas le di nok ndutu, kiki a boñ ni i mut a téé sép nunu le Hiôb. (Hiôb 1:​8-11) Mandutu ma ta bé yimbne le di nlémél ha bé Nyambe. Ndi ma nti bés pôla i unda le di ngwés Nyambe iloo hihéga, ni le di mbôdôl nye ñem. (Añ Yakôbô 1:12.) Mu mandutu ma, di ga nôgda lelaa a nyoñ ndun ni bés, a hôlga ki bés i hônba mo.

12. Kii ndémbél i Dmitrii i niiga bés?

¹² Di yoñ hihéga hi mankéé wada nu a yé Asia le Dmitrii. A bi nimis bôlô yé, a yén ki ngandak sôñ ibabé i léba bôlô ipe. Ha nyen a bi yoñ makidik ma ma bé unda le a mbôdôl Yéhôva ñem, le a nkéñbaha nson wé likalô. Ngandak sôñ i bi tagbe, ndi to hala, a bé léba bé bôlô. I mbus, a kwo kon kayéle a bé la ha bé to telep. A bi bôdôl badba too a ngi yii loñge nlôm ni loñge papa, a badbaga ibale Yéhôva a ñunbene nye. Ha nyen kôkôa yada, ngond yé i bi tila bibuk di nléba i kaat  Yésaya 30:15 i man lipep: “Ngui nan y’a ba le ni yén nwee, ni bôdôl ki me ñem.” A lona lipep li i het isañ a bé a niñi, a ti nye jo, a kal nye le: “Papa, i ngéda u nok njôghe, soho bigda nlôñ unu.” Dmitrii a bi nôgda toi ngui i nlôñ Bibel u. A bigda le, Yéhôva a ngi yoñok ndun ni lihaa jé, a tinak bo bijek, mambot ni homa liyééne. A nkal le: “I yom yosôna me bééna ngôñ i boñ, i bé le, me yén nwee, me kee ni bisu i bôdôl Djob jem ñem.” Ibale yak we u mboma minlélém mi mandutu, u nla ba nkwoog nkaa le Yéhôva a ntôñ we, ni le a ga hôla we.

13. Bonjee Yéhôva a ngwélél inyu unda bés le di ngi lémlak nye, lelaa a mboñ hala?

¹³ Ni njel bilôk bikéé gwés. Yéhôva a ngwélél bilôk bikéé gwés inyu unda bés le di ngi lémlak nye. Kiki hihéga, a nla tinde bo i lédés bés ni bibuk i ngéda di ntomb. Hala a bi pémél sita yada i i yé i Asia, i ngéda a bé boma ngandak mandutu. A bi nimis bôlô yé, a kwo yak kon béba ngandak. I mbus, nlôm a kwo i béba ikeñi, ba héya yak nye mañ u likoda. A nkal le: “A bé boñ ndik me wee me yé emel. Me bé hoñol le bebek, me mboñ béba i i ñunbaha Yéhôva.” Sita yés i bi soohe Yéhôva le a nyis nye too a ngi lémlak nye. Lelaa Yéhôva a bi timbhe nye? A nkal le: “Mimañ mi bi kwel ni me, mi nôgha me ntiik le Yéhôva a ngwés me.” I mbus ngéda, a bi témb a bat Yéhôva mahôla. A nkal le: “Nlélém kel, me bi kôs kaat bilôk bikéé bi bôda ni bi bôlôm bi likoda bi bi tilna me. Kiki me bé añ yo, me nôgda le Yéhôva a ñemble me.” Ñ, ngim mangéda, Yéhôva a ñunda bés le di ngi lémlak nye ni njel bibuk bi makénd bi bôt bape.​—Tjémbi 10:17.

14. Kii ipe Yéhôva a ngwélél inyu unda bés le di ngi lémlak nye?

 ¹⁴ Yéhôva a ngwélél yak maéba bilôk bikéé bi nti bés inyu unda bés le di ngi lémlak nye. Kiki hihéga i hiai hi bisu, Yéhôva a bi gwélél ñôma Paul inyu tilna lôk kéé letee ni 14 bikaat. Mu bikaat bi, Paul a bé ti bo maéba ma ngui, nyonok ni gwéha. Inyuki Yéhôva a bi tinde Paul i ti bo maéba ma ngui ma? Inyule Yéhôva a yé Tata nu gwéha, nu a nkodol bon bé ba ba “nlémél nye.” (Bingéngén 3:​11, 12) Jon ibale ba nti bés maéba ma ma nlôl i Bibel, di tehe mo kiki yimbne le di ngi lémlak Nyambe, he bé le a ñunbene bés. (Lôk Héber 12:6) Mambe mam mape ma ñunda le di nlémél Yéhôva?

MAM MAPE MA MA ÑUNDA LE DI NLÉMÉL YÉHÔVA

15. Bonjee Yéhôva a nti mbuu mpubi wé, u ga kônde kwés we nkaa ni kii?

¹⁵ Yéhôva a nti i bôt ba nlémél nye mbuu mpubi. (Matéô 12:18) Di nla badba le: ‘Baa me ma hôlôs ngim bilem bi mbuu mpubi i niñ yem?’ Baa u ma yimbe le u nlôôha hônba bôt nano iloo kiki u bé boñ ilole u nyi Yéhôva? Kiki u nke ni bisu i hôlôs litam li mbuu, hala nyen w’a kônde nôgda le u nlémél Yéhôva!​—Béñge minkéñék mi matila ni ño le “ Litam li mbuu li yé . . . ”

16. Bonjee Yéhôva a ngwélél inyu téé likalô, kii u nôgda? (1 Tésalônika 2:4)

¹⁶ I bi lémél Yéhôva le a ti bés nsima i añal ñañ nlam. (Añ 1 Tésalônika 2:4.) Béñge lelaa sita yada le Jocelyn, a bi ba nkwoog nkaa le a nlémél Nyambe i ngéda a bé añle bôt ñañ nlam. Jocelyn a bi bep tôde kel yada. A nkal le: “Me bé nwaak, me nôgdaga wee me nhee bé to yom. Ndi kiki me bé nsañal, yokela a bé hilo hiem hi likalô. Me bi soohe, me pam.” I kegla i, Jocelyn a bi boma Mary, muda minyaô nu a bi neebe yigil i Bibel. Ndék sôñ i mbus, Mary a kal le a bé bat Nyambe mahôla i ngéda Jocelyn a bi koode likôga jé. I ngéda Jocelyn a bi yoñ ngéda i ôt pék mu, a kal le: “Me bi nôgda ndik wee Yéhôva a bé kal me le, ‘u nlémél me’” Maliga ma yé le, bôt bobasôna bé bon ba ga neebe likalô jés. Ndi di nla ba nkwoog nkaa le Yéhôva a yé maséé i ngéda di mboñ kii yosôna di nla inyu añle bôt bape ñañ nlam.

17. Kii i yom Vicky a bi kal inyu binoñ, i niiga we? (Tjémbi 5:12)

 ¹⁷ Yéhôva a mboñ le binoñ bi bane i bet ba nlémél nye mahee. (1 Timôtéô 2:​5, 6) Ndi kii di nla boñ ibale ñem u ngi tin-ge bés i hoñol le di nlémél bé Yéhôva, tolakii di bi hémle binoñ, di sôblana ki? Di bigda le, di nla bé bôdôl mahoñol més ñem hiki ngéda, ndi di nla bôdôl Yéhôva ñem. A ntehe i bet ba nhémle binoñ kiki bôt ba téé sép, a mbôn yak le a ga sayap bo. (Añ Tjémbi 5:12; Rôma 3:26) Sita Vicky a bi ôt nseñ ngandak i ôt pék mu binoñ. Kel yada, i mbus a bi soñda ngandak mu binoñ, a bi kal le: “Yéhôva a nhônba me ibôdôl behee . . . Ndi a bé ndik wee me yé me timbhege nye le: ‘Gwéha yoñ i kôli bé me. Sesema i Man woñ i yé ngi ba ikeñi jôga inyu hô bibéba gwem.’” I ngéda a bé yoñ inyu ôt pék mu binoñ, i bi boñ le a bôdôl nôgda gwéha i Yéhôva. Yak bés di ga pam i nôgda gwéha i Yéhôva, le di nlémél nye, ibale di ñôt pék mu binoñ.

18. Di ga ba nkwoog nkaa ni kii ibale di nke ni bisu i gwés Tata wés nungingii?

¹⁸ To ibale di noode noñ maéba ba nti munu yigil ini, i nla pam le di nimis makénd, kayéle di badba too di ngi lémlak Yéhôva. Ibale hala a mpémél we, bigda le i “bôt ba tiñi i gwés nye,” ba nlémél nye. (Yakôbô 1:12) Jon, di kee ni bisu i kôôge Yéhôva bebee, di yimbge manjel momasôna a ngwélél inyu unda bés le di nlémél nye. Di hôiga bañ kekikel le, Yéhôva “a ta bé haa ni hiki wada wés.”​—Minson mi baôma 17:27.