1-2. Kii mut a nlama boñ ilole a nkôs sôble?

 MUNU nwii mintan mi ntip tagbe, iloo hidun hiada hi bôt hi nkôs sôble. Kiki Timôtéô i hiai hi bisu, ngandak ipôla yap i bi yi maliga i ngéda i bé “minkéñéé mi bon.” (2 Timôtéô 3:​14, 15) Bahogi ba bi nigil maliga i ngéda ba bi nañ, bape ki, i ngéda ba bi un. Muda wada nu a bi nigil ni Mbôgi Yéhôva a bi sôblana a ban-ga 97 nwii!

² Ibale u nigil Bibel tole bagwal boñ ba yé Mbôgi Yéhôva, baa u nhoñol i kôs sôble? Ibale hala wee loñge jam i! Ndi, ilole u nsôblana, u nlama ndugi ti wemede nkikip yak Yéhôva. I yigil ini i ga toñle bés kii i yé i ti wemede nkikip yak Djob. I ga éba ki we le yom yo ki yo i nlama bé kéñ we i ti wemede nkikip ni i kôs sôble i ngéda w’a ba bebee i boñ i jam li.

KII I YÉ I TI WEMEDE NKIKIP?

3. Ti dihéga di bôt Bibel i mpôdôl ba ba bi ti bomede nkikip yak Yéhôva.

³ Inoñnaga ni Bibel, i ngéda mut a nti nyemede nkikip yak Yéhôva, wee a mpohlana inyu ngim nson u tôbôtôbô. Litén li Israel li bé ntinak nkikip yak Yéhôva. Ndi u héya hala, bahogi mu ba bé ntinak nkikip yak Yéhôva  i nya i tôbôtôbô. Kiki hihéga, Arôn a bé a gwé “hibambha hi gôl hipubhaga,” hi hi bé bai i mbom yé. Hibambha hi gôl hi, hi bé unda le a bé gwel ngim nson u tôbôtôbô, a bé prisi keñi. (Lôk Lévi 8:9) Yak bôt ba Nazir ba bi ti bomede nkikip i nya i tôbôtôbô. I buk ini le “mut Nazir” i nlôl ni buk i Lôk Héber le nazir i i nkobla le “Mut a yé mbaglak,” tole “Mut a ntiba nkikip.” Bôt ba Nazir ba bé lama noñ ngim bikila i tôbôtôbô i i bé ikété mbén Môsi.​—Ñañga bôt 6:​2-8.

4. (a) Ni imbe njel i bet ba bi ti bomede nkikip ba mbii sômbôl i Djop kiki jam li bisu i niñ yap? (b) I ngéda Bibel i nkal le mut “a nlama ha bé niñ inyu yé nyemede,” kii hala a nkobla? (Béñge yak titii.)

⁴ I ngéda u nti wemede nkikip yak Yéhôva, wee u neebe le u nyila nnigil Yésu Kristô ni le, i boñ sômbôl yé i yé jam li nlôôha nseñ i niñ yoñ. Kii i ti wemede nkikip i nkobla? Yésu a kal le: “Ibale mut a nsômbôl noñ me, a nlama ha bé niñ inyu yé nyemede.” (Matéô 16:24) Bibañga bini le “a nlama ha bé niñ inyu yé nyemede,” hop u Grikia u nla ki kobol ha le “i tjél boñ yom yosôna i i nlémél bé Yéhôva.” Kiki u bi ti wemede nkikip inyu gwélél Yéhôva, u nlama tjél yom yosôna i i nkolba sômbôl yé. (2 Korintô 5:​14, 15) Hala a nkobla le i tjél “minson mi minsôn” kiki bo malal ma nyega. (Galatia 5:​19-21; 1 Korintô 6:18) Baa i nya mambén i, i nlet i noñ? To, ma ga lédél bé we ibale u ngwés Yéhôva, u bak nkwoog nkaa le mambén mé ma yé inyu loñge yoñ. (Tjémbi 119:97; Yésaya 48:​17, 18) Mankéé nu munlôm wada le Nicolas a nkal le: “U nla tehe matiñ ma Yéhôva kiki mapénd ma ndap mok ma ma nkéñ we i boñ i yom i nlémél we, tole kiki  lipénd li li nkéñ le mbondo njéé i boñ bañ we béba.”

5. (a) Lelaa u nla ti wemede nkikip yak Yéhôva? (b) Mambe maselna ma yé ipôla i ti wemede nkikip ni sôble? (Béñge yak titii.)

⁵ Lelaa u nti wemede nkikip yak Yéhôva? U mbôn nye ikété masoohe bé bo iba le nyetama nyen w’a gwélél, ni le sômbôl yé yon y’a ba jam li bisu i niñ yoñ. U mbôn nye le w’a gwés nye “ni ñem woñ wonsôna, ni niñ yoñ yosôna, ni mahoñol moñ momasôna, yak ni ngui yoñ yosôna.” (Markô 12:30) I ngéda u nti wemede nkikip, u yé ndik wetama ni Yéhôva. Ki le sôble yo i mbôña i mbamba; i ñunda i bôt ba yé ha le u bi ti wemede nkikip. Makidik u bi yoñ i ti wemede nkikip ma ta bé minjôha, Yéhôva a gwé ngôñ le u yônôs mo.​—Ñañal 5:​4, 5.

KII I NTINDE MUT I TI NYEMEDE NKIKIP YAK YÉHÔVA?

6. Kii i ntinde mut i ti nyemede nkikip yak Yéhôva?

⁶ Njom i bisu i i ntinde we i ti wemede nkikip yak Yéhôva i yé le u ngwés nye. Gwéha ba mpôdôl hana i ta ndik bé i yom u nôgda mu ñem woñ. Mam u bi nigil inyu Yéhôva ma bi boñ le u bana “bañga yi” ni “nôgna i mam ma mbuu” kayéle gwéha yoñ i kahal nañ, nañ ni nañ. (Kôlôsé 1:9) Yigil yoñ i Bibel i bi hôla we i ba nkwoog nkaa le, (1) Yéhôva a yé toi, (2) le Bibel i nlôl ni Nyambe, ni (3) le Yéhôva a ngwélél ntôñ wé inyu yônôs sômbôl yé.

7. Kii u nlama boñ ilole u nti wemede nkikip yak Yéhôva?

⁷ I bet ba nti bomede nkikip yak Yéhôva, ba nlama yi biniigana bi bisu bi Bibel  loñge loñge, ba niñik ki inoñnaga ni matiñ mé. Ba nyis bôt bape i yom ba nigil ikété Bibel inoñnaga ni la yap. (Matéô 28:​19, 20) Gwéha yap inyu Yéhôva i bi nañ ngandak, jon ba nyoñ makidik le ndik nyetama nyen ba ngwélél. Baa hala a ta bé nlélém jam inyu yoñ? Ibale i nya gwéha i yon u gwé, u ga yoñ bé makidik i ti wemede nkikip ni i sôblana inyu lémél i nwet a niiga we, bagwal boñ, tole mawanda moñ.

8. Lelaa i ti mayéga i nla hôla we i yoñ makidik i ti wemede nkikip yak Yéhôva? (Tjémbi 116:​12-14)

⁸ I ga ba jam li ntomb i yoñ makidik i ti wemede nkikip yak Yéhôva ibale u nhoñol i mam momasôna a ma bôñôl we. (Añ Tjémbi 116:​12-14.) Bibel i ñunda le Yéhôva nyen a nti “hiki likébla lilam ni hiki likébla li yé peles.” (Yakôbô 1:17) Ikété makébla momasôna Yéhôva a bi ti bés, li li nlôôha likeñi li yé sesema i Man wé Yésu. Hoñol ki! Binoñ gwon bi mboñ le di bana maada malam ni Yéhôva. Bi nti ki bés botñem i niñ i boga ni boga. (1 Yôhanes 4:​9, 10, 19) Makidik di nyoñ i ti bésbomede nkikip yak Yéhôva ma ñunda le di yé maséé ni sesema i Yésu, ni le di nti mayéga inyu bisai gwobisôna Yéhôva a nkôp bés. (Ndiimba Mbén 16:17; 2 Korintô 5:15) I jam li jon ba mpôdôl i yigil 46 litode 4 i kaat yés le Niñ ilam i boga ni boga! i het u ga léba i vidéô i manut maa ini le Ti Nyambe makébla moñ.

BAA U YÉ NKÔÔBAGA I TI WEMEDE NKIKIP NI I SÔBLANA?

9. Inyuki mut a nlama bé nôgda wee ba nyégsa nye i ti nyemede nkikip?

⁹ U nla hoñol le u ta bé nkôôbaga i ti wemede nkikip ni i kôs sôble. Bebek u ngi gwé ngôñ i boñ ngim mahéñha i niñ yoñ tole u nginda gwé ngôñ i lédés hémle yoñ. (Kôlôsé 2:​6, 7) Banigil Bibel ba nhol bé nya yada, yak boñge ba wanda ba nyoñ bé makidik i ti bomede nkikip ni i sôblana ni nlélém nwii. Noode hégha mahol moñ i pes mbuu inoñnaga ni i yom u nla boñ, u hégha bañ wemede ni bôt bape.​—Galatia 6:​4, 5.

10. Kii u nlama boñ ibale wemede u nôgda le u ta bé nkôôbaga i ti wemede nkikip ni i kôs sôble nano? (Béñge yak minkéñék mi matila le “ Inyu i bet ba bi néñél maliga.”)

¹⁰ To ibale u nôgda le u ta bé bebee i ti wemede nkikip yak Yéhôva nano, kee ni bisu i sal ni ngui inyu yônôs i njômbi i. Soohe Yéhôva le a sayap biliya gwobisôna u mboñ inyu lona mahéñha ma kôli i niñ yoñ. (Filipi 2:13; 3:16) U nla ba nkwoog nkaa le a ñemble masoohe moñ ni le a ga timbhe ki mo.​—1 Yôhanes 5:14.

INYUKI BÔT BAPE BA NKON WOÑI

11. Lelaa Yéhôva a ga hôla bés i téñbe ni nye?

¹¹ Ngim bôt i i yé nkôôbaga i ti bomede nkikip ni i sôblana i nkon woñi i boñ hala. Ba nla kalba le: ‘Kii i ga tagbe ibale me nsôblana, ndi me boñ béba ikeñi i mbus ba pémés me i ntôñ?’ Ibale u gwé i nya woñi i, ba nkwoog nkaa le Yéhôva a ga ti we i mam momasôna u gwé ngôñ inyu boñ le u “boñ mam i nya i kôli ni Yéhôva, le ndi [u] lémél nye i nya i yôni.” (Kôlôsé 1:10) A ga hôla yak we i bana ngui i boñ mam ma téé sép. A ma bôñôl ngandak lôk kéé ipe i mam ma. (1 Korintô 10:13) Inyu hala nyen ndék bôt ndik yon ba yé ba pémés i ntôñ. Yéhôva a nhôla bagwélél bé i téñbe ni nye.

12. Kii u nla boñ inyu boñ le u kwo bañ béba ikeñi?

¹² Mahoñol mabe ma nla tééñga hiki  kwéha i mut. (Yakôbô 1:14) Ndi bés bon di nkit too di ga nwas le mahoñol ma, ma nyuu bés tole heni. Ñ, makidik ma yé moñ, wen u nkit lelaa u ga niñ. Ngandak bôt i nkal le mut a ta bé le a gwelba, ndi hala a ta bé maliga. U yé le u nigil i gwel wemede. Jon yak i ngéda mahoñol mabe ma nlo we, u nla tjél boñ i yom ma ntinde we i boñ. Inyu pam i boñ hala, soohe hiki kel. Boñ biliya i nigil Bibel hiki kel, kee makoda, u téénege bôt bape likalô. Ibale u mboñ i mam ma hiki ngéda, u ga pam i bana ngui i yônôs mbônga woñ. U hôiga bañ kekikel le Yéhôva a ga hôla we i pamba.​—Galatia 5:16.

13. Imbe ndémbél ilam Yôsep a bi yigle bés?

¹³ I ga ba we jam li ntomb i téñbe ni Yéhôva ibale u nhoñol i bisu bi ngéda mambe makidik u ga yoñ i ngéda u ga boma manoodana. Bibel i yé nyonok ni miñañ mi bôt ba ba bi boñ hala, to hala kiki ba bé bikwéha bi bôt. Kiki hihéga, nwaa Pôtifar a bi yéñ ngandak ngélé le Yôsep a lal ni nye. Ndi Yôsep a bé yi i yom a bé lama boñ. Bibel i nkal le: “A bé tjél,” a kal le, “lelaa me nla boñ i béba ikeñi ini, me boñ ki béba i mis ma Nyambe?” (Bibôdle 39:​8-10) Ilole nwaa Pôtifar a noode nye, Yôsep a bé yi i bisu bi ngéda kii a nlama boñ. Hala a bi hôla nye i yoñ makidik malam i bisu bi manoodana.

14. Lelaa di nla nigil tjél boñ mam mabe?

¹⁴ Kiki Yôsep, lelaa yak we u nla téñbe i bisu bi manoodana? Nano nyen u nla nkit kii u ga boñ ibale u yé i bisu bi manoodana. Nigil i pala tjél i mam momasôna Yéhôva a ñoo, u hoñol bañ to mo. (Tjémbi 97:10; 119:165) Ibale u mboñ hala, u ga baage bé i bisu bi manoodana. U ga yi lelaa u timbhe bisu bi ngéda.

15. Lelaa mut a nla unda le a “nyéñ toi” Yéhôva? (Lôk Héber 11:6)

¹⁵ Bebek u nyi le u nléba maliga, u gwé ki ngôñ i gwélél Yéhôva ni ñem woñ wonsôna, ndi ngim jam i ngi kéñék we i ti wemede nkikip yak Nyambe ni i sôblana. U nla kôna ndémbél i Kiñe David. U nla soohe Yéhôva le: “A Nyambe, wan me, u yi ki ñem wem. Wan me, u yi ki mam ma ntééñga me. Béñge too jam libe jo ki jo li yé ikété yem, éga ki me i njel i nkena  i niñ boga.” (Tjémbi 139:​23, 24) Yéhôva a nsayap i bôt ba “nyéñ toi nye.” Biliya u mboñ inyu ti wemede nkikip ni i kôs sôble bi ñunda Nyambe le u nyéñ toi nye.​—Añ Lôk Héber 11:6.

KÔÔGE BEBEE NI YÉHÔVA

16-17. Lelaa Yéhôva a ñôt i bôt ba bi néñél maliga? (Yôhanes 6:44)

¹⁶ Yésu a bi kal le Yéhôva nyen a ñôt banigil bé. (Añ Yôhanes 6:44.) Di béñge lelaa i jam lini li nlôôha ba nseñ, ni lelaa u nla boñ hala. Yéhôva a ntehe jam lilam yak mut, ndi a ôt nye i nyeni. A ntehe i mut nu kiki “tik yé yom” tole “yom yé i tôbôtôbô.” (Ndiimba Mbén 7:6; buk isi lipep.) Hala nyen a ntehe yak we.

¹⁷ Bebek le u yé njohok mut, u néñél ki maliga. U nla hoñol le u ngwélél Yéhôva ndik inyule bagwal boñ ba yé Mbôgi Yéhôva, he inyu bé le Yéhôva nyemede nyen a ñôt we. Bibel i nkal le: “Kôôgana bebee ni Nyambe, ndi yak nye a’ kôôge bé bebee.” (Yakôbô 4:8; 1 Miñañ 28:9) I ngéda u mbôdôl kôôge Yéhôva bebee, yak nye a nkôôga we bebee. Yéhôva a ntehe bé we kiki mut wada mu ikété limut li bôt. Ndi a ñôt hiki wada wés, hala wee yak mut nu a néñél i ngim lihaa li Mbôgi Yéhôva. I ngéda i nya mut i i mbôdôl kôôge Yéhôva bebee, yak nye a mbôdôl kôôge nye bebee, kiki di ntehe i kaat Yakôbô 4:8.​—Hégha ni 2 Tésalônika 2:13.

18. Kii di ga tehe i yigil noñ? (Tjémbi 40:8)

¹⁸ I ngéda u nti wemede nkikip yak Yéhôva, u kôs sôble, u nkôna Yésu. Yésu a bi ti nyemede yak Isañ inyu boñ kii yosôna a mbat nye. (Añ Tjémbi 40:8; Lôk Héber 10:7) I yigil i noñ, di ga tehe kii i ga hôla we i téñbe ni Yéhôva yak i mbus sôble yoñ.