1-2. Bimbe bisai mut a yé a kôs i ngéda a nsôblana?

 KINJE maséé di nôgda i ngéda di nsôblana, di jôp ki ikété lihaa li Yéhôva. I bet ba gwé nsima u, ba nôgda nlélém jam ni ntôp tjémbi le David, nu a kal le: “I mut u [Yéhôva] mpohol, u tiigaha ki nye bebee, le a yén i bikotoo bi ndap yoñ, a yé kimasoda.”​—Tjémbi 65:4.

² Yéhôva a mpohol bé tonjee inyu lona nye bikotoo bi ndap yé. Kiki di ntehe i yigil i ntip tagbe, a mpohol i kôôge bebee ni i bet ba ñunda le ba gwé ngôñ i bana maada malam ni nye. (Yakôbô 4:8) I ngéda u nti wemede nkikip yak Yéhôva, u kôs ki sôble, u nkôôge nye bebee i nya i tôbôtôbô. U nla ba nkwoog nkaa le i mbus sôble yoñ, a ga ‘umbe we bisai kayéle yom to yada i héñél bañ we.’​—Malaki 3:10; Yérémia 17:​7, 8.

3. I bet ba nti bomede nkikip, ba kôs ki sôble ba nlama boñ kii ibabé i jôha? (Ñañal 5:​4, 5)

³ U hôya bañ le sôble i yé ndik bibôdle bi nson u Yéhôva. I mbus sôble yoñ u nlama boñ kii yosôna u nla inyu niñ inoñnaga ni makidik u bi yoñ i téñbe ni Yéhôva to ibale manoodana ma téé we i bisu, tole u ntégbaha mangéda mabe. (Añ Ñañal 5:​4, 5.) Kiki u nyila nnigil Yésu, u ga noñ ndémbél yé, u boñ ki kii yosôna u nla inyu nôgôl mambén mé. (Matéô 28:​19, 20; 1 Pétrô 2:21) I yigil ini i ga hôla we i boñ hala.

 DI ‘NOÑ YÉSU IBABÉ WAA’ TO I BISU BI MANOODANA

4. Ni imbe njel banigil ba Yésu ba mbegee ‘kék yap njiiha’? (Lukas 9:23)

⁴ U hoñol bañ le i mbus sôble u ga bana ha bé ndutu yo ki yo. Yésu nyemede a bi kal le banigil bé ba ga begee ‘kék yap njiiha.’ Ni ki le ba bé lama boñ hala “hiki kel.” (Añ Lukas 9:23.) Ndi baa Yésu a bé gwés kal le niñ i banigil bé i ga ba ndik mandutu ni mandutu? Heni. A bé gwés ndik kal le u héya bisai b’a kôs, ba ga boma mandutu. Mandutu mape mu ma bé lama nôgha bo njôghe bañga bañga.​—2 Timôtéô 3:12.

5. Bimbe bisai Yésu a bi bôn i bet ba mboñ bisesema?

⁵ Bebek le u ma boma ngolba i bôt boñ ba lihaa tole nyiña nkus won u bi tjôô inyu bii Ane i Djob kiki yom i bisu i niñ yoñ. (Matéô 6:33) Ibale hala, yi le Yéhôva a nyi i mam momasôna u ma boñ inyu yé. (Lôk Héber 6:10) Bebek le u bi nôgda le Yésu a bé pot maliga i ngéda a kal le: “Mut nye ki nye a ta bé, nu a bi yék to ndap, to lôkisañ i bôlôm tole i bôda, to nyañ, to isañ, to bon, to nwom, inyu yem ni inyu ñañ nlam, nu a’ kôhna bé 100 ngélé nano munu ngéda ini, to mandap, to lôkisañ i bôlôm ni i bôda, to banyañ, to bon, to nwom, ni ndééñga; ndi mu nkoñ ’isi u nlo, a kôhna ki niñ boga.” (Markô 10:​29, 30) Ñ, bisai u ma kôs bi nloo bisesema u ma boñ huum!​—Tjémbi 37:4.

6. I mbus sôble yoñ inyuki u nlama ke ni bisu i jôs “minheña mi minsôn”?

⁶ Yak i mbus sôble yoñ, u nlama ke ni bisu i jôs “minheña mi minsôn.” (1 Yôhanes 2:16) Inyule u nginda yii kwéha mut. Ngim mangéda, u nla nôgda nlélém jam ñôma Paul a bé nôgda. A tila le: “Ni maliga, i mut me yé ikété a nkon maséé ni mbén Nyambe, ndi me ntehe ikété nyuu yem le mbén ipe yon i njôs mbén i mahoñol mem sañ, i ken-ga ki me kiki nkol le me ba isi mbén béba i i yé ikété nyuu yem.” (Rôma 7:​22, 23) Hala a nla tééñga we le u ngi jôhôg mahoñol mabe. Ndi ibale u mbigda mbônga u bi bôn Yéhôva i ngéda u bé ti wemede nkikip, hala a ga kônde lédés makidik moñ le u kwo bañ ikété manoodana. Maliga ma yé le, i mbônga u u ga hôla we i ngéda u ga ba i bisu bi manoodana. Lelaa?

7. Kiki u bi ti wemede nkikip yak Yéhôva lelaa hala a nhôla we i téñbe ni nye?

⁷ I ngéda u nti wemede nkikip yak Yéhôva, u niñ ha bé inyu yoñ wemede. Hala a nkobla le ibôdôl ha, u boñ ha bé mam ma nkon we ngôñ, ma ma nlémél bé Yéhôva. (Matéô 16:24) Inyu hala nyen i ngéda u yé bisu bi manoodana u mbadba ha bé kii u nlama boñ? Inyule makidik ma mon u bi yoñ behee, le u ntéñbe ni Yéhôva. U mboñ ndik i yom i nlémél Yéhôva. Di nla kal ha i ngéda i le u nyila kiki Hiôb. Tolakii a bi tégbaha mangéda mabe kiyaga, a bi kal le: “M’a tjôô bé libak jem li ngi nsohi!”​—Hiôb 27:5.

8. Lelaa i ôt pék mu masoohe u bi soohe Yéhôva i ngéda u bé ti wemede nkikip i nla hôla we i yémbél manoodana?

⁸ Ibale u nyoñ ngéda i ôt pék mu masoohe u bi boñ i ngéda u bé ti wemede nkikip yak Yéhôva, hala a ga ti we ngui i yémbél to mambe manoodana. Kiki hihéga, baa u yé u bana maboñok ma ma ñunda le u ntjak wañan nwaa tole wañan nlôm? Heni! Inyule u nyi le u bi mal  nôgla ni Yéhôva le w’a boñ bé i nya jam i. U ga nok bé njôghe mut a nok i mbus a nwas le bibéba bi mahoñol bi oo minkañ i ñem wé. U ga “keñgle” “njel i bibéba bi bôt.”​—Bingéngén 4:​14, 15.

9. Lelaa i hoñol masoohe u bi boñ i ngéda u bé ti wemede nkikip, i nla hôla we i ke ni bisu i bii mam ma mbuu kiki jam li bisu i niñ yoñ?

⁹ Kii u ga boñ ibale u nkôhna bôlô, i i mboñ le u nla ha bé ke makoda momasôna? Ibabé set, u ga yi i yom u boñ. Ilole u nléba i nya bôlô i, u ma kit le u nla bé sal i nya bôlô i. Jon, w’a yoba bé le u neebe i bôlô i, i mbus u kahal jo sañ le u bii mam ma mbuu kiki jam li bisu i niñ yoñ. Kiki Yésu nu a bi yoñ makidik i lémél Isañ, u ga pala yoñ makidik i tjél mam momasôna ma ma yé le ma bébél Nyambe.​—Matéô 4:10; Yôhanes 8:29.

10. Lelaa Yéhôva a ga hôla we i ‘noñ Yésu ibabé waa’ i mbus sôble yoñ?

¹⁰ Maliga ma yé le, manoodana ni mandutu u mboma, ma nti we pôla i unda le, u ga “noñ” Yésu ibabé waa. U nla ki ba nkwoog nkaa le Yéhôva a ga nit we mu makidik ma. Bibel i nkal le: “Nyambe a yé maliga, a ga nwas bé le ni kôhna manoodana iloo kiki ni nla nihbe, ndi ikété manoodana, a ga néhne bé njel le ni pam i hônba mo.”​—1 Korintô 10:13.

KII DI NLA BOÑ INYU NOÑ YÉSU IBABÉ WAA

11. Imbe njel i nlôôha ilam u nla gwélél inyu noñ Yésu ibabé waa? (Béñge yak titii.)

¹¹ Yésu a bi gwélél Yéhôva ni ñem wé wonsôna, a ban-ga lem i soohe. (Lukas 6:12) Ñ, njel yada inyu noñ Yésu ibabé waa i mbus sôble yoñ i yé le, u bana lem i boñ mam ma ma ga hôla we i kôôge Yéhôva  bebee. Bibel i nkal le: “Ndi to ibale mahol més ma mpam to limbe likala, wee di kilak ndigi ikété oda mu nlélém njel.” (Filipi 3:16) Ngim mangéda, w’a ba u nok miñañ mi bilôk bikéé bi bi nyoñ makidik i kéñbaha nson wap. Bebek ba bé i suklu i baañal ñañ nlam, tole ba bi ke i ti mahôla i het ngôñ i batéé likalô i yé ikeñi. Ibale u nôgda le yak we u gwé i pôla i, boñ kii yosôna u nla inyu noode. Bagwélél ba Yéhôva ba nyamnda ni ngôñ i kéñbaha nson wap likalô. (Minson mi baôma 16:9) Ndi kii u yé le u boñ, ibale u nla bé yoñ makidik ma nano? U hoñol bañ le i bet ba ma yoñ makidik ma, ba nloo we. I jam li yé nseñ ngandak, li yé ndik le di hônba ikepam lisuk. (Matéô 10:22) U hôya bañ le Yéhôva a yé maséé ngandak i tehe we u ngwélél nye kiki la yoñ. Ñ njel yada i, inyu ke ni bisu i noñ Yésu ibabé waa i mbus sôble yoñ.​—Tjémbi 26:1.

12-13. Kii u nla boñ ibale u nôgda le makénd moñ ma nkahal sôs? (1 Korintô 9:​16, 17) (Béñge yak minkéñék mi matila le “ Téñbe i ke ngwéé.”)

¹² Kii u ga boñ ibale u nôgda le likalô li nlémél ha bé we kiki i bibôdle, ni le i ngéda u nsoohe, a yé ndik wee u nyéñ pala suha ngim mbegee? Kii u nla boñ ibale lisoñgol joñ li Bibel li nél ha bé we kiki i ngéda kôba? Ibale i nya mam i i mpémél we i mbus sôble yoñ, u pala bañ sugus le u nimis mbuu u Yéhôva. Kiki di yé bikwéha bi bôt, mahoñol més ma nla héñha. Ibale makénd moñ ma mbôdôl sôs, hoñol ndémbél i ñôma Paul. Tolakii a bé noode kôna ndémbél i Yésu, a bé yi le ngim mangéda, i nla pam le makénd mé ma sôs. (Añ 1 Korintô 9:​16, 17.) A kal le: “Ndi to ibale me ngwés  bé boñ hala, Nyambe a bi mal yaa ti me nson u kindak.” A yé ndik wee Paul a bé sômbôl kal le, a bi yoñ makidik i yônôs nson wé likalô to nyuu i nti nye, to i nti bé nye.

¹³ Nlélém ni bés, di nwas bañ le mahoñol més ma énél bés. Di yoñ makidik i boñ mam ma téé sép, too hala a nlémél bés, tole a nlémés bé bés. Hala a ga boñ le sôk i nsôk, maboñok més malam ma hôla bés i témbna mahoñol malam. Ñ ibale di nke ni bisu i téé likalô, i ke makoda, i nigil Bibel ni i soñda yo, d’a waa bé noñ Yésu i mbus sôble yés. I ngéda lôk kéé i bôda ni i bôlôm i ga tehe hônba yés nson Yéhôva, hala a ga ti bo makénd.​—1 Tésalônika 5:11.

“KENA NI BISU I WANBA”

14. Kii di nlama wan hiki ngéda, inyuki? (2 Korintô 13:5)

¹⁴ I nla ba loñge i bana lem i wanba i mbus sôble yoñ. (Añ 2 Korintô 13:5) Ngim mangéda u nla badba le: Baa me nsoohe hiki kel? Baa me gwé lem i soñgol Bibel ni i nigil yo? Baa me nke makoda? Baa me nyoñ ngaba i nson likalô? Yéñ manjel i kon maséé i gwel minson mi. U nla ki badba le: Baa me nla toñle bôt bape biniigana bi bisu bi Bibel? Baa me nla kônde lémés nson wem likalô? Baa i ngéda me nsoohe, me ñañle Yéhôva ngim mam i tôbôtôbô? Baa masoohe mem ma ñunda le me mbôdôl Yéhôva ñem ni ñem wem wonsôna? Baa me nke makoda momasôna? Kii me nla boñ inyu kônde ba péé makoda, ni i kônde lémés mandimbhe mem?’

15-16. Kii u nigil mu ndémbél i mankéé wada inyu i yémbél manoodana?

¹⁵ U nlama yak wanba inyu yi bibomb gwoñ. Mankéé wada le Robert a ñañle bés ngim jam i i bi pémél nye, i i nhôla bés i nok nseñ i wanba. A nkal le: “Ngéda me bééna 20 ma nwii, me bé sal bôlô i pes ngéda. Kel yada i mbus bôlô, muda wada nu me ni nye di bé sal, a naña me i mbai yé. A bi kal me le di ga ba ndik bés bo iba, ni le di ga ‘tégbaha loñge ngéda.’ I bibôdle, me bi noode ngeñee, ndi sôk i nsôk, me kal nye le to, me toñle ki nye inyuki.” Robert a bi yémbél manoodana ma, kinje loñge jam! Ndi i mbus, i ngéda a bi kahal wan i jam li bi tagbe, a hoñol le a bé le a boñ mam nya ipe. A nkal le: “Me bi kôna bé Yôsep nu a bi timbhe nwaa Pôtifar kunda yada, a yén ki mu  makidik ma ngui a bi yoñ. (Bibôdle 39:​7-9) Hala a bi hélés me i tehe le i bi ba me ndutu i pamba. I jam li li bi hôla me i nok le, me bé lama kônde lédés maada mem ni Yéhôva.”

¹⁶ Yak bés di nla nôgda nlélém jam ibale di nwanba kiki Robert. To ibale di nyémbél manoodana, di nla badba le: ‘Baa hala a nyoñ me ngandak ngéda inyu kal le, to?’ Ibale di nôgda le di nlama kônde boñ biliya, di tomb bañ? Ndi di ba maséé i yi le nano, di gwé ngim bomb i jôs. Di soohe Yéhôva le a hôla bés i yémbél i bomb i, di yoñ ki ngim bitelbene i i ga lédés makidik més i ke ni bisu i nôgôl nye.​—Tjémbi 139:​23, 24.

17. Mambe maada ma bé ipôla i jam Robert a bi boma ni jôl li Yéhôva?

¹⁷ Ñañ u Robert u nsôk bé ha, a nkônde le: “I ngéda me bi timbhe i mañge muda nu le to, a kal me le: ‘U net makégse!’ Me bat nye le, kii u nsômbôl kal? A timbhe me le, liwanda jé li munlôm jada, li li bé Mbôgi Yéhôva, li bi kal nye le, boñge ba wanda bobasôna ba ba yé Mbôgi Yéhôva, ba nene loñge i bitéé bi mis, ndi i mbus ni mbus, ba mboñ mam mabe ibale pôla i nene. Jon a bi kal liwanda jé li le, a ga noode me inyu tehe too yak me me yé hala. Maséé ma bé le ma nol me, i ngéda me bi yi le me nti jôl li Yéhôva lipém.”

18. Mambe makidik u nlama yoñ i mbus sôble yoñ? (Béñge yak minkéñék mi matila le “ Gwigil bi bi noñna bi bi ga lémél we.”)

¹⁸ I ngéda u nti wemede nkikip yak Yéhôva, u kôs ki sôble, u ñunda le u ngwés pubus jôl jé, to kii leñek. Ba nkwoog nkaa le Yéhôva a nyi mandutu u mboma, ni manoodana u nyémbél. A ga sayap biliya u mboñ inyu téñbe ni nye. U nlama bana botñem le a ga ti we mbuu mpubi u u ga ti we ngui i ke ni bisu i téñbe ni nye. (Lukas 11:​11-13) Ni mahôla ma Yéhôva, w’a pam i noñ Yésu ibabé waa i mbus sôble yoñ.