YIGIL 48
Di bok mis bisai bi yé bés bisu
“Mis moñ ma nunuk ndik bisu, bikôkôp gwoñ bi mis bi nunuk ndigi sép bisu gwoñ.”—BINGÉNGÉN 4:25.
HIÉMBI 77 Mapubi ma njôp i nkoñ ’isi u jiibe
DINYO MALÉP *
1-2. Lelaa di nla noñ maéba ma yé i kaat Bingéngén 4:25? Ti hihéga.
DI YOÑ le dihéga daa dini. Ñunuk sita i nhoñol mangéda malam a bi tégbaha. Tolakii a mboma mandutu i len ini, a nke ni bisu i boñ kii yosôna a nla i nson Yéhôva. (1 Korintô 15:58) Hiki kel a ntehe nyemede i paradis loñni lihaa jé ni mawanda mé. Sita ipe i mbigda kiki mankéé numpe a bi babaa nye, ndi a kit le a nhôya i jam a bi boñ nye. (Kôlôsé 3:13) Mankéé nu munlôm a nyi i mam mabe a bi boñ, ndi a mbok mahoñol mé i mam a nla boñ inyu téñbe ni Yéhôva i len ini.—Tjémbi 51:12.
2 Kii di nyimbe munu dihéga daa dini? Le bilôk bikéé baa bini bi mbigda i mam ma bi tagbe, ndi ba mbok bé mahoñol map mu. Maselna ni hala, ba ‘bok mis bisai bi yé bo bisu.’—Añ Bingéngén 4:25.
3. Inyuki di nlama bok mis bisai bi yé bés bisu?
3 Inyuki i yé nseñ i bok mis bisai bi yé bés bisu? Kiki mut a nla bé noñ njel i téé nye i bisu ibale a nhélél i béñge mbus, yak bés di nla bé ke ni bisu i gwel nson u Yéhôva ibale di nkida i béñge mam ma bi tagbe.—Lukas 9:62.
4. Kii di ga tehe munu i yigil ini?
4 Munu yigil ini, di ga tehe tjandi daa di di nla boñ le di béñge i mam ma bi tagbe. (1) I hoñol mangéda malam di bi tégbaha, (2) i téédana mut hiun, (3) i nwas le kiññem i lôôha tééñga bés. Inyu hiki hiandi, di ga tehe lelaa matiñ ma Bibel ma nla hôla bés i bok mis ‘i mam Filipi 3:13.
ma yé bés bisu’ he bé ‘i mam ma yé bés i mbus.’—I HOÑOL MANGÉDA MALAM DI BI TÉGBAHA
Kii i nla kéñ bés i bok mahoñol bisai bi mbem bés? (Béñge maben 5, 9, 13) *
5. Mambe mabéhna di nléba i kaat Ñañal 7:10?
5 Añ Ñañal 7:10. Yimbe le, nlôñ unu u nkal bé le i yé béba i badba le: “Inyuki dilo di mbus di bé loñge?” I bigda mangéda malam di bi tégbaha i yé likébla li nlôl yak Yéhôva. Ndi nlôñ unu, u nkal le: “U bat bañ le: ‘Inyuki dilo di mbus di bé loñge iloo dini?’” Hala a nkobla le, ibale di nhégha niñ yés i kôba ni i len, ndi di hoñol le niñ yés i len i yé ndik béba ni béba, di nkwo i hiandi. Ngobol i Bibel ipe i nkal ha homa nu le: “U kal bañ le, ‘Inyuki dilo di kôba di bé dilam iloo dini?’ Hala a ta bé njel pék, inyule pék bé yon i ntinde we i bat hala.”
I mbus le ba bi nyodi Égiptô, himbe hihôha Lôk Israel i bi boñ? (Béñge liben 6)
6. Inyuki hala a ta bé njel pék i hoñol le niñ yés i ngéda kôba i bé loñge ngandak iloo i len? Ti hihéga.
6 Inyuki hala a ta bé njel pék i hoñol le niñ yés i ngéda kôba i bé loñge ngandak iloo i len? I ke ni bisu i bok mis ndik mangéda malam di bi tégbaha kôba, i nla boñ le di yan mandutu di bi boma mu mangéda ma. Di yoñ hihéga hi bon ba Israel. I ngéda ba bi nyodi Égiptô, ba bi pala hôya niñ i nlet ba bi bana nyoo. Ndi ba bi bok mahoñol map ndik bijek bilam ba bé je nyoo. Ba kalak le: “Di mbigda tjobi di bé je i loñ Égiptô ibabé somb; yak ni ngond, ni môk, ni bikoe, ni malañ, ni hiomi!” (Ñanga bôt 11:5) Ndi baa ba bé je toi “ibabé somb”? Heeni. Hala a bi héé bo diye ngandak; ha ngéda i, ba bé minkol Égiptô, ba salak bôlô i njok. (Manyodi 1:13, 14; 3:6-9) Ndi ba bi yéñ témb Égiptô ba hôya mandutu ba bi kôs nyoo. Ba bi kida i hoñol “niñ ilam” ba bééna nyoo, iloole ba kon maséé ni i mam malam Yéhôva a mbôñôl bo. Libak jap li bi lémél bé Yéhôva.—Ñanga bôt 11:10.
7. Kii i bi hôla sita yada le a kwo bañ i hiandi i bok mis i mangéda malam a bi tégbaha?
7 Lelaa di nla keñgle hiandi i bok mis mangéda malam di bi tégbaha? Di yoñ hihéga i sita yada i i bi bôdôl sal i Bétel i Brooklyn i nwii 1945. Ndék nwii i mbus, a bi biiba ni mankéé a bé sal i Bétel. Bo iba ba bi sal i Bétel ngandak nwii. Ndi i nwii 1976, nlôm a kwo kon. Sita a nkal le i ngéda nlôm a bi nôgda le nyemb yé i yé bebee, a bi ti nye maéba ma ma bé lama hôla nye mu kii a ga yégle nyetama. A bi kal nye le: “Di mbana libii lilam. Ngandak bôt i ma bana bé masoda ma.” I mbus a béhe nye le: “U ga hôya bé mangéda malam di bi tégbaha, ndi u bok bañ mahoñol moñ mu. Ndi u tôñ bañ, kii ngéda i ga tagbe, hala nyen njôghe i ga sôs. U tomb bañ, to modop u modop bañ. Ba maséé ni mangéda malam di bi tégbaha i nson u Yéhôva. . . . I bigda mam ma bi tagbe, i yé loñge likébla Djob a nti bés.” Baa ni ntehe bé le maéba malam ma?
8. Lelaa sita yés i bi ôt nseñ ni maéba malam a bi kôs?
8 I sita i, i bi noñ maéba ma nlô wé. A bi gwélél Yéhôva letee ni i nyemb yé, a ban-ga 92 nwii. Ndék nwii ilole a nwo, a kal le: “I ngéda me mbéñge 63 nwii me bi tégbaha i nson u nsañal, me bi bana niñ ilam kiyaga.” Inyuki? A nkal le: “I jam li nlona bés bañga maséé, li yé lihaa jés li bilôk bikéé bi bôlôm ni bi bôda i nkoñ ’isi wonsôna ni botñem i niñ ntôñ i paradis, i het di ga gwélél Yéhôva, Nhek wés ni Djob li maliga i boga ni boga.” * Kinje ndémbél ilam i mankéé nu, a bé bok mis mu bisai bi bé bem nye!
I TÉÉDANA MUT HIUN
9. Inoñnaga ni kaat Lôk Lévi 19:18, imbe ngéda i nla ba ndutu i hôya i béba mut a bi boñ bés?
9 Añ Lôk Lévi 19:18. Ngim mangéda i nla ba ndutu i hôya i béba mankéé wés nu likoda, liwanda jés tole mut wés lihaa a mboñ bés. Kiki hihéga, sita yada i bi soman numpe le a nibil nye moni. I mbus ngéda, i sita i bi soman i bat nwéhél, ndi nuu numpe a bi ke ni bisu i téédana nye hiun. Baa u ma nôgda nlélém jam? To ibale nlélém jam i yé ngi pémél we, libim ikété yés li ma téédana bôt hiun, bebek li hoñol ki le li ga hôya bé i jam li.
10. Kii i nla hôla bés i ngéda di ntéédana mut hiun?
10 Kii i nla hôla bés i ngéda di ntéédana mut hiun? Di hôya bañ le Yéhôva a ntehe mam momasôna. A nyi yak i mam momasôna ma mpémél bés ni ngitelepsép di mboma. (Lôk Héber 4:13) I ngéda di nok njôghe yak nye a nok njôghe. (Yésaya 63:9) A mbôn ki le a’ mélés ndutu yosôna di mboma.—Masoola 21:3, 4.
11. Umbe nseñ di ñôt i ngéda di ntéédana bé bôt hiun?
11 Di bigda ki le i ngéda di ntéédana bé bôt hiun di gwé ñem nwee. I sita ba bi ôm nsohi yañga i bi nôgda hala. Kii ngéda i bé tagbe a bi nwéhél sita i bi ôm nye nsohi. A bi nok le i ngéda di nwéhél bôt bape yak Yéhôva a nwéhél bés. (Matéô 6:14) A bi yan bé i yom i sita i i bi boñ nye, ndi a bi kit le a nwéhél nye. Sôk i nsôk, i sita i, i bi yik ba maséé, i ke ki ni bisu i gwélél Yéhôva.
I NWAS LE KIÑÑEM I LÔÔHA TÉÉÑGA BÉS
12. Kii di nigil i kaat 1 Yôhanes 3:19, 20?
12 Añ 1 Yôhanes 3:19, 20. I ma pémél bésbobasôna le kiññem i lôôha tééñga bés. Kiki hihéga, kiññem i nlôôha kéés bahogi inyu mam ba bi boñ ilole ba nigil maliga. Kiññem i nlôôha tééñga bape inyu mam mabe ba bi boñ i mbus sôble yap. (Rôma 3:23) I yé maliga le bésbobasôna di nyéñ boñ mam ma téé sép. Ndi, “bésbobasôna di mbaage ngandak ngélé.” (Yakôbô 3:2; Rôma 7:21-23) To hala kii i nla tééñga bés le kiññem i kéés bés, hala a nla ba loñge jam. Inyuki? Inyule kiññem i nkéés i nla hôla bés i kodol maboñok més, ni i yoñ makidik le di ntiimba ha bé boñ mahôha ma.—Lôk Héber 12:12, 13.
13. Inyuki di nlama yoñ yihe le kiññem i lôôha bañ kéés bés?
13 Maselna ni hala, di yé le di nwas le kiññem i lôôha kéés bés inyu béba di bi tam, Yéhôva a nwéhél ki bés. I nya kiññem i, i nla kena bés haa ni Yéhôva. (Tjémbi 31:11; 38:4, 5) Lelaa? Di yoñ hihéga hi sita yada i kiññem i bé tééñga inyu mam a bi boñ ilole a nyila kristen. A kal le: “Me nôgda wee i ta bé nseñ le me boñ biliya i gwélél Yéhôva inyule a ta ha bé le a nwéhél me inyu bibéba me bi boñ.” Ngandak ikété yés i nôgda kii i sita i. I yé nseñ le di yoñ yihe ni kiññem i i nlôôha tééñga bés. Inyuki? Inyule Satan a mba maséé i tehe bés di nwaa gwélél Yéhôva ki le a ngi gwéhék bés!—Béñge yak 2 Korintô 2:5-7, 11.
14. Kii i nla kwés bés nkaa le Yéhôva nwéhél bés?
14 To hala, di nla badba le: ‘Kii i nla kwés me nkaa le Yéhôva a nwéhél me?’ I mbadga i yomede i ñunda le Yéhôva a nla nwéhél bés. Nano a yé ngandak nwii le Nkum Ntat a bé kal le: “I nla *
bane bés ndutu i nwas ngim lem ibe di bééna ilole di nyila kristen. . . . Di tomb bañ, di hoñol bañ ki to le di mboñ béba i ba nla bé nwéhél. Hala nga nyen Satan a gwé ngôñ le di hoñol. I ngéda u nok ndutu inyu mahôha u bi boñ, hala a ñunda le u ta bé béba mut ni le Yéhôva a nla nwéhél we. Ni suhulnyuu, di waa bañ bat Djob mahôla, nwéhél, ni le a ti bés kiññem i mpôp. Di kee nye bebee kiki mañge a nyéñ mahôla ma isañ i ngéda a mboma ndutu, to ibale i nsômbla le di boñ hala ngandak ngélé inyu nlélém béba. Ni konangoo Yéhôva a ga nwéhél bés.”15-16. Kii ngim lôk kéé i bi nôgda i ngéda ba bi pam i nok le Yéhôva a bi tjoo bé bo?
15 Ngandak bagwélél ba Yéhôva ba bi kôs hogbe mu kii ba bi pam i nok le Yéhôva a bi tjoo bé bo. Kiki hihéga, hala a yé ndék nwii nano le mankéé wada a bi soñgol ñañ u sita yada i Nkum Ntat ni Pulasi i homa le “La Bible change des vies.” I sita i, i nkal le i bééne nye nledek jam i neebe le Yéhôva a ngwés nye inyu mam mabe a bi boñ. Hala a bi tééñga nye ngandak nwii i mbus sôble yé. Ndi i ngéda a bi ôt pék i sesema i Yésu, a bôdôl héñha liteghe jé li mam. *
16 Lelaa ñañ wé u bi hôla i mankéé nu? A tila le: “I ngéda me bé mañge wanda, me bi bana ndutu i nwas lem i béñge bititii bi malal. Masañ mana, me bi témb me bôdôl béñge gwo. Me bi bat mimañ mahôla, i mbus me boñ biliya kayéle me pam i yémbél i lem i. Mimañ mi bi hôla me i nok le Djob a ngwés me ni le a nwéhél me. Ndi ngim mangéda, me yé me nôgda wee me nhee bé to jam ni le Yéhôva a ta bé le a gwés me. Ñañ u sita i, u bi hôla toi me. Nano me nok le, i ngéda me nhoñol le Djob a ta bé le a nwéhél me, a yé wengoñle me nkal le sesema i Man wé i nlôôha bé ba ikeñi
inyu hô bibéba gwem. Me bi tééda ñañ u inyu boñ le me añak wo me ôdôk ki pék mu hiki ngéda mahoñol ma, ma ntémb ma bôdôl yuu me.”17. Lelaa ñôma Paul a bi yémbél i hiandi hi?
17 Miñañ kiki mi, mi nhôñlaha bés u ñôma Paul. Ilole a nyila kristen, a bi boñ ngandak mam mabe. Paul a bé bigda i mam a bi boñ, ndi a bé bok bé mahoñol mé mu. (1 Timôtéô 1:12-15) A bé hémle le Yésu a bi wo inyu yé tôbôtôbô. (Galatia 2:20) Paul a bi nwas bé le kiññem i lôôha tééñga nye, ndi a bé a pégi i boñ kii yosôna a nla i nson u Yéhôva.
BOK MIS BISAI BI MBEM WE I MBOK YONDO!
Di yoñ makidik i bok mis i mam ma mbem bés (Béñge maben 18-19) *
18. Kii di nigil munu i yigil ini?
18 Bimbe biniigana di ñôt mu i tjandi i yigil ini i mpôdôl? (1) Ngap i hoñol mangéda malam di bi tégbaha i nlôl yak Yéhôva; ndi di hôya bañ le bisai bi bem bés i mbok yondo bi nloo i mam malam momasôna di ma kôs. (2) Bôt ba nla unbaha bés, ndi di nlama nwéhél. I ngéda di mboñ hala, di mbok mahoñol més i nson u Yéhôva. (3) Kiññem i nlôôha kéés bés i nla boñ le di nimis maséé més i gwélél Yéhôva. Jon, kiki Paul di nlama hémle le Yéhôva a nwéhél toi bés.
19. Lelaa di nyi le i mbok yondo i mam mabe di bi kôs m’a lo ha bé bés mahoñol?
19 Di gwé botñem i niñ i boga ni boga. I mbok yondo, i mam mabe di bi kôs i niñ yés m’a lo ha bé bés mahoñol. Inyu pôdôl i ngéda i, Bibel i nkal le: “B’a hoñol ha bé i mam ma bi tagbe.” (Yésaya 65:17, MN) Hoñol ki: Lôk kéé ihogi i ñunul i nson Yéhôva, ndi i mbok yondo, d’a témb di yila njohok. (Hiôb 33:25) Jon iloole di hoñol mangéda malam di bi tégbaha, di bok mahoñol més bisai bi mbem bés i mbok yondo!
HIÉMBI 142 Di tibil téñbe ni botñem yés
^ liboñ 5 I ta bé béba i hoñol mangéda di bi tégbaha. Ndi, ibale di nlôôha hoñol i mam ma bi tagbe, di yé le di waa boñ i mam Yéhôva a mbémél bés i len ini, di hôya ki i mam malam a bôn bés i paradis. I yigil ini, i ga pôdôl tjandi daa di di nla tinde bés i kida béñge mbus. Di ga tehe matiñ ma Bibel ni ndémbél i bilôk bikéé i ngéda yés i i nla hôla bés i keñgle i tjandi di.
^ liboñ 14 Béñge i La Tour de Garde du 15 juin 1954, page 185 paragraphe 16.
^ liboñ 58 NDOÑI I BITITII: I hoñol mangéda malam di bi tégbaha, i téédana mut hiun, ni i nwas le kiññem i lôôha kéés bés, bi yé kiki mambegee makeñi di ñôt mu kii di nkil i njel niñ.
^ liboñ 65 NDOÑI I BITITII: Ibale di nsuha mambegee ma, di ga nok hogbe ni maséé mu liké jés, di témbna ki ngui yés. Ni i njel i nyen di ga pam i bok mis i mam ma yé bés bisu.