1. Kii hiémbi hi nhôla bés i boñ?

NTILA tjémbi nunkeñi wada a kal kel yada le: “Ni bibuk, ni nhoñol mam. Ni nsik, ni nôgda mam. Ndi ni hiémbi, ni nôgda mam ni nhoñol.” Mambe mahoñol ma nlôôha malam di yé le di “nôgda,” iloo ma ma mpahal bibégés gwés ni gwéha yés inyu Isañ wés Nungigii, le Yéhôva? Hala a nhélés bé bés le hiémbi hi ba jam li mahee ikété bibégés bi di nti Djob, to ibale di yé tôp bés botama, tole ni likoda.

2, 3. (a) Lelaa bahogi ba ntehe ntuba lôñni likoda? (b) Mambe mambadga di ga wan munu i yigil ini?

² Lelaa u nôgda ngéda u ntôp ntôñ ni likoda ni kiñ ngii? Baa hala a nwéha we nyuu? Bahoma bahogi, bôlôm ba nwo nyuu i tôp i mbamba. Litehge li mam li, li nla tééñga likoda jolisôna, téntén ibale mimañ mi likoda mi nyoñ bé ngaba i tôp, tole mi pégi i boñ mam mape ngéda likoda li yé tôp.​—Tjémbi 30:13.

³ Ibale di ntehe toi ntuba kiki jam li mahee ikété bibégés, di ga yéñ bé i nimis liboñ li bibégés li, tole di pam itan ha yo ngéda. Jon, hiki wada wés a nlama badba le: ‘Lelaa me ntehe jam li ntuba i makoda més? Lelaa me nla yémbél woñi wo ki wo u u nla sôñga me i tôp tjémbi ni  maséé? Ni le, kii me nla boñ inyu nôgda i nya i yôni, mahoñol ma tjémbi di ntôp?’

4, 5. Bimbe bitelbene bi ngui bi bi yôña i nlômbi Israel inyu tôp tjémbi di bibégés?

⁴ Ibôdôl behee, bôt ba tiñi ni Yéhôva ba ngwélél nsik inyu bégés nye. I nyiba le ngéda bon ba nlômbi Israel ba bé ba tiñi ni Yéhôva, ntuba tjémbi u bé mahee ikété bibégés gwap. Kiki hihéga, mu kii a bé kôôba nson u témpel, Kiñe David a bi tjek 4 000 di Lôk Lévi inyu tuk nsik u bibégés. Ikété yap, 288 batuk ba bé “yi tubul Yéhôva tjémbi, bobasôna ba [ban-ga] likeñge.”​—1 Miñañ 23:5; 25:7.

⁵ I mayibil ma témpel, nsik ni ntuba bi bééna mahee ngandak. Bibel i nkal bés le: “I léña le, bahem sép ni batôp ba kwo kiñ yada i bégés Yéhôva ni i ti nye mayéga, ba paak kiñ yap i ngii lôñni sép ni bibeñde bi mamuna, ni bikôkôda bipe, ba béghak Yéhôva, . . . lipém li Yéhôva li yon mu ndap Yéhôva.” Hégda lelaa jam li, li bé le li lédés hémle i bôt!​—2 Miñañ 5:13, 14; 7:6.

6. Toñol bitelbene bi tôbôtôbô Néhémia a bi yoñ inyu ntuba, ngéda a bé ngomin i Yérusalem.

⁶ Ngéda Néhémia a bé éga bon ba Israel i tiimba oñ mapénd ma Yérusalem, a tjek ki batôp tjémbi ba Lôk Lévi inyu éga ntuba ni bikôkôda. I mayibil ma ndiimba maoñ ma mapénd, nsik u tôbôtôbô u u bi kuda, u bi lôôha kônha bôt maséé. Ha ngéda i, ba bi téé “mintôñ minkeñi ima i ti mayéga ngem yada.” Hiki ntôñ u bé yé pes, mbus mi bomna ngola témpel, mi tôp makeñi kayéle hala a nôga haa. (Néhémia 12:27, 28, 31, 38, 40, 43) Ibabé pééna, Yéhôva a bé maséé i nok bagwélél bé ba ntubul nye tjémbi di bibégés ni mahak.

7. Lelaa Yésu a bi yigye mahee ma hiémbi ikété bibégés bi bikristen?

⁷ Ngéda likoda li bikristen li bi bôda, nsik u bé ki jam li mahee ikété bañga bibégés. I u, u nlôôha ba mahee ikété ñañ u bôt ba binam, Yésu a bi tôp tjémbi di bibégés ni banigil bé mbus a téé Bilôp bi Nwet.​—Añ Matéô 26:30.

8. Imbe ndémbél bikristen bi hiai bisu, bi bi yigle bés inyu ntuba tjémbi di bibégés?

⁸ Bikristen bi hiai bisu bi bi yék ndémbél i ntuba tjémbi di bibégés inyu Djob. Tolakii ba bé béna kodba i mandap ma lôk kéé yap, hala a bi suhus bé makénd map inyu tubul Yéhôva tjémbi. Ñôma Paul ni njel mbuu mpubi a tilna lôk kéé yé le: “Kena ni bisu i niiga, ni i tina makénd wada ni nuu, ni njel mingen mi tjémbi, bibégés ni nti Nyambe, ni tjémbi di mbuu ni ntôp ni ñem mayéga.” (Kôlôsé 3:16, MN.) I tjémbi di yé ikété kaat yés tjémbi, di yé toi “tjémbi di mbuu ti di ntôp ni ñem mayéga.” Yak tjo di yé mukété bijek bi mbuu “nkol maliga ni u pék” u nti bés.​—Matéô 24:45.

9. (a) Kii i nla sôñga bahogi i tôp tjémbi ni maséé i makoda ma sonde ni makoda makeñi? (b) Lelaa di nla tubul Yéhôva tjémbi di bibégés, bonjee ba nlama ki ba babôgna? (Béñge titii i bibôdle.)

⁹ Kii ni u nla boñ ibale ntuba u ta bé lem i lihaa joñ, lem i litén joñ tole  i libôga joñ? Ni njel i bisélél bilam di gwé i len ini, u nla emble bôt ba nyi ntuba. Bebek le hala a nla tééñga we tole hala a nla wéha we nyuu, ngéda u nhégha kiñ yoñ ni batôp tjémbi ba nkoñ isi. Ndi, hala a nlama bé sôñga we i ti Yéhôva bibégés. Maselna ni hala ngéda u ntôp, paa kaat yoñ tjémbi, u téé ño, ndi u loñge ni ñem woñ wonsôna! (Esra 3:11; añ Tjémbi 147:1.) I len ini, ba ngwélél nkuu biliñgeliñge i libim li makoda inyu tôp tjémbi ni kiñ ngii. Hala a yé jam li mahee le bitelbene bi bi yôña, le tjémbi di Ane di tuba i Suklu i nson u Ane, inyu mimañ. Hala a ñunda le mimañ mi nlama ba bôt ba bisu i yoñ ngaba ni ntuba i likoda.

10. Kii di nlama bigda ibale woñi u nsôñga bés i loñge?

¹⁰ Jam jada li ntuga bôt i tôp ni kiñ keñi li yé woñi. Di nla kon woñi le kiñ yés i nlôôha nôga kayéle bôt bape ba nôgda le di tôp wés ntén, tole ba nôgda le di ntôp bé loñge. Ndi, di nlama tééda i mahoñol le to ngéda di mpot, “bés bobasôna di mbaage ngandak.” (Yakôbô 3:2) Ndi, hala a nsôñga bé bés i pot. Inyuki ni di nwas le, bikwéha gwés bi makiñ bi sôñga bés i bégés Yéhôva ni tjémbi?

11, 12. Mambe maéba mahogi ma nla hôla i lémés ntuba wés?

¹¹ Bebek di nkon woñi inyule di nyi bé lelaa ba ntôp ngim tjémbi. Ndi, di nla lémés ntuba wés ibale di mbii maéba mana i bisélél. *

¹² U nla nigil tôp ni ngui, ni kiñ ngii ngéda u nhép loñge. Kiki malétric ma mbéyés lambe, mbebi i di nhép i nti kiñ yés ngui ngéda di mpot tole di ntôp. U nlama tôp ni kiñ keñi kiki  ngéda u mpot tole iloo ha. (Béñge maéba ma di nléba i kaat ni Pulasi le Tirez profit de l’École du ministère théocratique, mapep 181-184, i si man ño nkwel le “Utilisez correctement votre provision d’air.”) I yé ntiik le, inyu ntuba tjémbi di bibégés, Bitilna bi mbéna kal bagwélél ba Yéhôva le “ba séék inyu Yéhôva.”​—Tjémbi 33:1-3.

13. Toñol lelaa di nla boñ le makénd més inyu ntuba ma kônde bet.

¹³ Ngéda u mbégés Yéhôva ni lihaa joñ, tole ngéda u nigil wetama, noode noñ maéba mana: Pohol hiémbi hiada mu tjémbi u ngwés ikété kaat yés tjémbi. Añ bibuk bi hiémbi hi, ni kiñ ngii, ni ngui, ni makénd. Mbus, gwélél nlélém kiñ inyu pahal ngim nlôñ u hiémbi, ni nhébék wada. Nano, tôp nlôñ u, u gwéélak nlélém kiñ. (Yésaya 24:14) Ni hala, kiñ yoñ ntuba i ga ke ni bisu i ba ngui; kinje loñge jam. U nwas bañ le woñi, tole wonyuu u tômbôs we!

14. (a) Lelaa i nahal nyo loñge i nhôla bés i loñge tjémbi? (Béñge minkéñég mi matila ni ño le “Lelaa u nla lémés ntuba woñ.”) (b) Ibale u nôgda le u gwé béba kiñ, mambe maéba ma nla hôla we?

¹⁴ Inyu tôp ni ngui, u nlama nwas le mbebi i tagbe i nyo woñ. Jon maéba mape ma yé le, nahal nyo woñ iloo kii ngéda u yé u mpot. Kii u ga boñ ibale u nôgda le u nla bé tôp makeñi, ibale u gwé kiñ sép tole kiñ i nlond? U nla léba maéba malam i kaat ni hop Pulasi le Tirez profit de l’École du ministère théocratique, lipep 184, i minkéñég mi matila mi mi gwé ño le “Quelques problèmes particuliers à surmonter.”

15. (a) Umbe nlegla u bi tiba i likoda li nwii 2016? (b) Mambe manjom ma bi tinde i pémés kaat tjémbi mondo?

¹⁵ Kinje maséé ma bé i likoda li nwii 2016 li Watch Tower Bible and Tract Society of Pennsylvania, ngéda mankéé Stephen Lett nu a nsal i Juu li  Bakena ntôñ a bi legel le kaat tjémbi i mondo i bé lama pam ni ño nkwel le Di tubul Yéhôva tjémbi ni maséé, i di bé lama gwélél i makoda. Mankéé Lett a bi toñol le njômbi yada i tjémbi di mondo i bé le di kiha ni ngobol Bibel i ntip pam ni hop Ngisi le New World Translation of the Holy Scriptures. Hala a bi bat le ba héya tole ba héñha bibuk bi bi bé ha bé ikété ini ngobol Bibel i mondo ni Ngisi, i nwii 2013. Ni ki le, ba bi kônde tjémbi di mondo inyu nson wés likalô, ni ti di nti mayéga inyu binoñ. Jam lipe li yé le, kiki ntuba u njôp ikété bibégés di nti Djob, Juu li Bakena ntôñ li bé gwés pémés loñge kaat tjémbi, i kôgôô i mpôôna kôgôô i Bibel mondo ni hop Ngisi le New World Translation.

16, 17. Mambe mahéñha ma mbôña i kaat tjémbi mondo?

¹⁶ Inyu boñ kaat yés tjémbi le Di tubul Yéhôva tjémbi ni maséé i ba jam li ntomb i gwélél, tjémbi di yé ntjegek inoñnaga ni miño mi minkwel. Kiki hihéga, tjémbi 12 ti di mbôdôl, di mpôdôl Yéhôva, ti 8 di noñ ha, di mpôdôl Yésu ni binoñ, hala ni hala. Kiki hihéga, lipep li miño mi minkwel li nla hôla bés ngéda di nsômbôl pohol hiémbi inyu nkwel mbamba.

¹⁷ Inyu hôla hiki mut i tôp ni ñem wé wonsôna, ba bi héñha bibuk bihogi inyu boñ le bi nôga loñge, ba héya ki bibuk bi, bôt ba ngwélél ha bé. Ba nhéñha gwo ni bibuk bi, ngandak bôt i ngwélél i len ini, ni bi bi ntomb i nok. Inyuki? Inyule ngéda mut a bé tôp minlômbi mi tjémbi, i bé wengoñle nyen a bé niiga bôt bape. Ndi ki le, libim li bôt li li nlo makoda més ma sonde, makoda més makeñi ni ma ndôn, li gwé bé kunde i niiga bôt bape. Ikété yap, di gwé bôt ba ntip jôp ntôñ, boñge ba wanda, ni bisita. Jon miño mi tjémbi ni bibuk bi nhéñha.

18. Inyuki di nlama bana lem i nigil i tôp tjémbi tjés di mondo? (Béñge matila i si lipep.)

¹⁸ Ngandak tjémbi i kaat yés tjémbi le Di tubul Yéhôva tjémbi ni maséé, di yé ntilga kiki masoohe. Ni njel tjémbi ti, u nla pahlene Yéhôva mahoñol moñ. Tjémbi dipe d’a hôla i “nyégha [bés ni bés] nyuu i kôna gwéha ni minson minlam.” (Lôk Héber 10:24) I yé ntiik le di nlama meya nsik, maboñ ma nsik, ni bibuk bi tjémbi tjés. U nla ki emble nsik lôñni makiñ i site yés le jw.org. Ngéda u mbéna tôp i ndap, u nla nigil i tôp tjo ni makénd, yak ni ñem wonsôna. *

19. Lelaa likoda jolisôna li nla bibégés Yéhôva ntôñ?

¹⁹ Bigda le ntuba u yé jam li mahee ikété bibégés gwés. U yé ki njel i tôbôtôbô yada i ñunda le di ngwés Yéhôva, ni i ti nye mayéga inyu mam a mbôñôl bés. (Añ Yésaya 12:5.) Ngéda u ntôp ni maséé, u ntinde yak bape i tôp ni makénd. Bigda le, bôt bobasôna ikété likoda​—kiki bo boñge ba wanda, mimañ mi bôt, ni ba ba ntip jôp ntôñ​—ba nla pôdna makiñ inyu bégés Yéhôva ni njel ntuba. Jon, u kon bañ woñi i tôp ni ñem. Maselna ni hala, noñ mana maéba ma ntôp tjémbi nu a kal le: “Tublana Yéhôva hiémbi!” Ñ, tôp ni maséé!​—Tjémbi 96:1.