1, 2. (a) Imbe bom bagwélél ba Djob ba nyamnda ni ngôñ i bem? (b) Kii i nhôla bés i bok mis més i bom? (Béñge titii i bibôdle.)

KIKI ñôma Paul, minhook mi bikristen i len ini, mi gwé botñem ilam i “kôs bom inyu nsébla Nyambe u nlôl ngii.” (Filipi 3:14) Mi nyamnda ni ngôñ i sal ni Yésu i Ane yé, inyu hôla bôt ba binam i tébna libak jap li peles. (Masoola 20:6) Kinje botñem ilam Djob a naña bilôk bikéé bini i kôs! Mintômba mimpe mi gwé botñem ipe. Mi nyamnda ni ngôñ i kôs bom i niñ boga, hana isi​— kinje jam lilam!​—2 Pétrô 3:13.

² Inyu hôla minhook mi bikristen i téñbe ni Djob ni i kôhna bom, Paul a yigye nwo le: “Mahoñol manan ma bane ndigi inyu mam ma ngii.” (Kôlôsé 3:2) Mi bé lama bigda botñem yap ilam i kôdôl Ane ngii. (Kôlôsé 1:4, 5) I yé ntiik le, i memle bisai Yéhôva a nti bagwélél bé, i nhôla bobasôna i bok mis map i bom, too ba gwé botñem i niñ i ngii, tole isi.​—1 Korintô 9:24.

3. Mambe mabéhna Paul a bi ti bikristen?

 ³ Paul a bi béhe ki bikristen bi ngéda yé inyu mam mabe ma ma bé le ma nimha bo bom yap. Kiki hihéga, a tilna likoda li Kôlôsé inyu bikwéha bikristen, bi bi bé yéñ lémél Djob ni njel biliya gwap inyu noñ Mbén iloo le bi hémle Kristô. (Kôlôsé 2:16-18) Paul a bi podôl yak mam mabe ma ma ngi yii len, ni ma ma nla boñ le di nimis bom yés. Kiki hihéga, a bi toñol lelaa di nla yémbél mahoñol ma ndéñg, lelaa di nla sañgal mindañ ni lôk kéé yés, ni lelaa lihaa li nla yémbél mandutu. Maéba mé ma ngi yii nseñ i len ini. Jon, di wan ngim mabéhna malam ma Paul, ma di nléba i kaat i Kôlôsé.

4. Inyuki mahoñol ma nyega malal ma nla boñ le di nimis bom yés?

⁴ Mbus a bi hôñlaha lôk kéé inyu loñge yap botñem, Paul a tila le: “Nola ni bijô binan bi yé hana ’isi [inyu] ndéñg, ni nyega, ni nkañ minheña, ni ngôñ be, ni hép.” (Kôlôsé 3:5) Mahoñol ma nyega malal ma nla ba ngui ngandak kayéle ma boñ le di nimis nkus wés mbuu. Mankéé wada nu bisômble bibe bi bi kena haa ni likoda, a kal ngéda a témb likoda le: “A bé wengoñle ngui i tôbôtôbô i bi yapna me ilole me ntôde ’ilo.”

5. Lelaa di nla tat bésbomede ngéda di yé bebee ni kwo i hiandi?

⁵ Di nlama ba péé téntén ngéda di mboma mam, ma nla tinde bés i bôk matiñ ma Yéhôva inyu loñge ni béba. Kiki hihéga, njel pék i mbat le, ibôdôl yaga bibéé, bayegna libii ba nlama tiba minwaa inyu jam li matihbana, masohna, tole i yén boba ndigi. (Bingéngén 22:3) I nla pam le kristen yada, i i yé haa ni sobiina wé inyu mam ma bôlô, i ba bebee i kwo i hiandi hi ndéñg, ngéda i nsal ni muda tole munlôm nu a ta bé sobiina wé. (Bingéngén 2:10-12, 16) Ibale jam li li mpémél we, hoo yis bôt le u yé Mbôgi Yéhôva, bana bihiumul bilam, u bigda ki le, i neebe le we ni mut ni tondna i nla lona bikuu. Di nlama ki yoñ yihe ngéda di nôgda binyuu tole ngéda di kônha ngoo. Ha ngéda i, di nla bana ngôñ ni mut nu a nhôla bés i nôgda le di yé nseñ. Di nla lôôha bana ngôñ ni hogbe, ni mahôla, kayéle di ba bebee i kwo i moo ma to numbe mut. Ibale hala a mpémél we, bat Yéhôva ni bagwélél bé mahôla inyu boñ le u nimis bañ bom yoñ.​—Añ Tjémbi 34:19; Bingéngén 13:20.

6. Kii di nlama hoñol ngéda di mpohol mintuk?

⁶ Inyu nol mahoñol ma nyega malal, di nlama keñgle mintuk mi nyega. Ngandak mintuk i len ini, i mpôna mi Sôdôm ni Gômôra. (Yuda 7) Bapémés bisinima ba nhôñôs mahoñol map mu kii ba ñunda nyega malal kiki yom i yé kunde, tole kiki yom i nlona bé bés bikuu. Di nlama yén péé, di neebe bañ to mimbe mintuk ba mpémés. Di nlama pohol mintuk, mi mi ga boñ bé bés le di waa bok mis i bom yés i niñ.​—Bingéngén 4:23.

7. Mambe mandutu di nla boma ikété likoda?

⁷ Di neebe bés bobasôna le i ba Mbôgi Yéhôva i yé nsima nkeñi. Yigil  Bañga i Djob i makoda més, yak ni mahôla di ntina wada ni nuu ikété loñgeñem ni gwéha, bi nhôla bés i ke ni bisu i bok mis i bom yés. To hala, i yé pam le ngimanôgla i boñ le hiun hi ba ipôla bilôk bikéé. Ibale di nsañgal bé i nya mindañ i, i nla tinde bés i tééda hiun.​—Añ 1 Pétrô 3:8, 9.

8, 9. (a) Bimbe bilem bi ga hôla bés i kôhna bom? (b) Kii i nla hôla bés i tééda nsañ i likoda ibale mankéé wada a ñunbaha bés?

⁸ Lelaa di nla boñ le, i téédana mut hiun i bane bañ bés njom i les bom? Paul a yigye bôt ba Kôlôsé le: “Jon, lakii Nyambe a tep bé kiki bapubhaga ni ba a ngwés, wee eñgbana ni ñem yôni ni konangoo, ni loñgeñem, ni suhulnyu, ni ñemlima, ni u wongut, ni hônbanaga bé ni bé, ni nwéhlaga ki bé ni bé, to ibale mut a ntogha inyu maasañ; kiki Yéhôva a bi nwéhél bé, yak bé boña hala. Ndi ngii mam mana momasôna, eñgbana ki gwéha, inyule yon i ñat mo loñge nya i yôni.”​—Kôlôsé 3:12-14.

⁹ Gwéha ni loñgeñem bi nla hôla bés i nwéhlana. Kiki hihéga, ibale di nôgda le mankéé wés ikété ntôñ a mbabaa bés ni bibuk, tole ni maboñok mé, di nla bigda mangéda mape yak bés di bi boñ mut numpe nlélém jam. Baa di ta bé maséé ngéda lôk kéé yés i bôda ni i bôlôm i nyan mahôha més inyu gwéha, ni loñgeñem i gwééne bés? (Añ Ñañal 7:21, 22.) Di nti mayéga téntén inyu loñgeñem i Kristô i i ntinde nye i kot bañga bagwélél ba Djob ikété adna. (Kôlôsé 3:15) Di ngwés Djob jada, di ñañal nlélém nwin, di bom-ga ki minlélém mi mandutu. Ngéda di nwéhél wada ni nuu ni gwéha, lôñni loñgeñem, di nyoñ ngaba i adna i likoda, di kenek ni bisu i bok mis i bom i niñ.

10, 11. (a) Inyuki njôñ i nlôôha be? (b) Lelaa di nla boñ le njôñ i kéñ bañ bés i kôhna bom?

¹⁰ Dihéga dibe, ti di yé ikété Bibel, di nhôñlaha bés le njôñ i nla boñ le di nimis bom yés. Kiki hihéga, Kain a bi kil manyañ Abel njôñ, a nol ki nye. Kôra, Datan, ni Abiram ba bôdôl kil Môsi njôñ, ba kolba ki nye. Yak Kiñe Saulô a kil David njôñ inyu mam malam a bé boñ, a noode ki mélés ni niñ yé. Hala a nhélés bé bés i nok Bañga i Djob i nkal le: “Ngo homa njôñ ni pééna ba yé, ha ki nyen lisanda ni hi jam libe ba yéne.”​—Yakôbô 3:16.

¹¹ Ibale di nsélés gwéha ni loñgeñem i miñem nwés, di ga kil bé mut njôñ. Bañga i Djob i nkal le: “Gwéha i nwéha ngut, i gwé ki loñgeñem. Gwéha i nkila bé njôñ.” (1 Korintô 13:4) Inyu boñ le njôñ i ôm bañ minkañ i miñem nwés, di nlama boñ biliya i bana litehge li mam li Djob, hala wee di tehe lôk kéé yés i bôda ni i bôlôm kiki bôt le bés ni bo, di yé bijô bi nyuu yada. Bibel i nkal le: “To jô yada i nkôs lipém, bijô gwobisôna bi nkon maséé lôñ.” (1 Korintô 12:16-18, 26) Ngéda bilôk bikéé bipe bi kôhna bisai, iloo le di nkil bo njôñ, di ga ba maséé inyu yap. Di nyoñ hihéga hi Yônatan, man Kiñe Saulô. A kil bé David njôñ ngéda Djob a hoo nye Kiñe. Maselna ni hala, a bi ti David makénd. (1 Samuel 23:16-18) Baa yak bés di nla bana loñgeñem ni gwéha kiki Yônatan?

12. I noñ mambe maéba ma Bibel i nla hôla bés ni lihaa jés i kôhna bom?

¹² I bii matiñ ma Bibel i bisélél i nla lona lihaa nsañ ni maséé, i hôla ki jo i kôhna bom. Mambe maéba ma Bitilna inyu mahaa Paul a bi ti bikristen bi Kôlôsé? A bi kal le: “A bôda, suhlana bébomede isi balôm banan, kiki i kôli i Nwet. A balôm, gwéha baa banan, ndi ni bana bañ bo miñem mi njôñlô. A bon, nôglana bagwal banan ikété mam momasôna, inyule hala a nlémél Nwet. A bé basañ, ni unbaha bañ bon banan, miñem mi tiga hoi bo.” (Kôlôsé 3:18-21) Ibabé pééna, ni nyi le i bii maéba ma ñôma Paul i bisélél, ma ma nlôl ni mbuu mpubi, i nla ki bane balôm, baa, ni bon mahee.

13. Lelaa sita i nla yoña nlô wé nu a ta bé Mbôgi Yéhôva?

¹³ Lelaa u nlama boñ ibale we muda, u yé mbiibaga ni mut nu a ta bé ntôñ, ngéda u nôgda wee a ntééda bé we loñge? Baa u ga héñha mam ibale u ñunup, u kahal nôôma nye? To ibale u nla tinde nye i boñ mam we u ngwés, baa u ga tinde nye i neebe maliga? Bebek le to. Ndi ibale u nti nlô woñ lipém kiki ño ndap lihaa, u nla boñ le nsañ u ba ikété ndap lihaa, u ga ti ki Yéhôva  lipém, libak joñ li nla ôt nlô woñ i maliga; Hala a mboñ le, bé boba ni laa kôs bom i niñ.​—Añ 1 Pétrô 3:1, 2.

14. Lelaa kristen i i gwé nwaa nu a ta bé Mbôgi Yéhôva i nlama boñ, ibale a nti bé nye lipém?

¹⁴ Ibale u yé munlôm, ndi u nôgda le nwaa woñ a nti bé we lipém, w’a boñ lelaa? Baa u ga tinde nye i ti we lipém ibale u nyéyéi nye inyu unda nye le wen u ñénél ndap? To jam! Djob a mbem le u éga ndap yoñ lihaa ni gwéha, kiki Yésu. (Efésô 5:23) Yésu, a ñéga ntôñ wé ni gwéha ni hônba. (Lukas 9:46-48) Ngéda a nkôna ndémbél i Yésu, munlôm nu a yé mbiibaga ni muda nu a ta bé kristen, a nla ôt nye maliga.

15. Lelaa kristen i nla unda le i ngwés nwaa wé?

¹⁵ Bibel i niiga balôm le: “A balôm, gwéha baa banan, ndi ni bana bañ bo miñem mi njôñlô.” (Kôlôsé 3:19) Nlôm nu gwéha a ti nwaa lipém ngéda a ñemble jam a gwéé i kal nye, a kwéhék ki nye nkaa le a ndiihe jam a nkal. (1 Pétrô 3:7) Tolakii a nla bé boñ hiki ngéda yom nwaa a mbat, i nla pam le a yoñ makidik ma kôli ngéda a mbat nye mahoñol mé. (Bingéngén 15:22) Nlôm nu gwéha a mboñ mam ma ntinde nwaa i ti nye lipém ilole a bat ndik nye jo. Hala a nla ba jam li ntomb inyu munlôm nu a ngwés nwaa ni bon, le lihaa jé li gwélél Yéhôva ni maséé, ni le bobasôna ba kôhna bom i niñ.

16, 17. A mañge wanda, lelaa u nla keñgle i bana hiun hi nlôôha inyu bagwal boñ?

¹⁶ Kii u nla boñ ibale u yé mañge wanda, ndi u nôgdaga le bagwal boñ ba nok bé we, tole ba nlôôha ti we mambén? Hala a nla boñ le u unup, u badba too i yé nseñ i gwélél Yéhôva. Ndi ibale u nwas le njôô i tinde we i tjôô Yéhôva, u ga léba le mut to wada a ta bé le a tôñ toi we iloo bagwal boñ, ba ba nkon Yéhôva woñi, yak ni likoda joñ.

¹⁷ Ibale bagwal boñ ba mah kodol bé we, baa u ga badba bé too ba ntôñ toi we? (Lôk Héber 12:8) Bebek le, i njel bagwal boñ ba ngwélél inyu kodol we, yon i ñunbaha we. Iloole u yéñ so njel ba ngwélél inyu kodol we, noode bigda le, ngim njom i nla ba, i i ntinde bo i boñ hala. Jon, yén nwee, u boñ ki biliya le u unup bañ, to yahal u yahal bañ bo. Bañga i Djob i nkal le: “Nu a mbañal bibañga gwé a gwé yi, Yak nu a gwé mbuu nwee a ntibil yi.” (Bingéngén 17:27) Njômbi yoñ i nlama ba le u yila nhôôlak mut i pes mbuu, u u neebe maéba ikété nwee nyensô, ibabé béñge lelaa ma ntina nye. (Bingéngén  1:8) I bana bagwal ba ba ngwélél Yéhôva, hala a yé bisai. Ba gwé ngôñ i hôla we i kôhna bom i niñ.

18. Inyuki u nyoñ makidik i bok mis moñ i bom?

¹⁸ Bom i yé bés bisu​—hala wee botñem i niñ i ngii tole hana isi i boga ni boga ikété paradis​—i nlôôha ba lam i memle. Botñem i i yé ntiik, inyule i umne i ngii mbônga u Nhek nyemede. Inyu Paradis i i mba hana isi, Djob a nkal le: “Hisi hiosôna hi’a yon ni yi i Yéhôva.” (Yésaya 11:9) Hiki mut nu a ga niñ mu, Djob nyen a’ niiga nye. Di kôli toi boñ biliya inyu kôhna bom i. Jon, bok mis moñ i mbônga u Yéhôva, u nwas bañ ki to yom yo ki yo le i kidha we bom yoñ!