1. Inoñnaga ni béba, kii bagwélél ba Djob bobasôna ba mbéna nôgda?

“YOO, a me mut me béñi!” (Rôma 7:24) Ngandak bagwélél ba Djob i len ini, ba bi nôgda nlélém jam kiki ñôma Paul. Bés bobasôna di bi kôdôl béba, ni le ngéda i mpam le maboñok més ma nlémél bé Yéhôva, di nla nimis makénd més. Bikristen bipe bi, bi bi boñ béba ikeñi bi bi hoñol le bi bé bé bi kôli ni nwéhél i Nyambe.

2. (a) Lelaa kaat Tjémbi 34:23 i ñunda le bagwélél ba Djob ba nlama bé nwas le kiññem i ke ni bisu i kéés bo? (b) Kii di ga tehe munu yigil ini? (Béñge minkéñég mi matila ni ño le “ Biniigana tole Biyônôl?”)

² Ndi to hala, Bitilna bi nyis bés ntiik le, i bet ba nsolbene yak Yéhôva b’a yoñba bé libua. (Añ Tjémbi 34:23.) Kii i solbene yak Yéhôva i nkobla? Mambe makidik di nlama yoñ inyu kôhna konangoo ni nwéhél i Yéhôva? Di ga kôhna mandimbhe ma mambadga mana mu kiki di mba di nwan bitelbene bi minkoñ (bitison) mi lisolbene ngéda nlômbi Israel. I yé maliga le, liboñok li, li bi tééba i si malômbla ma Mbén, ni le li bi mal i Pentékôt 33 N.Y. Ndi di mbigda le, Mbén i bé lôl ni Yéhôva. Jon, yak i len ini, di nla ôt biniigana mu bitelbene  bi minkoñ mi lisolbene, bi bi ñunda bés lelaa Yéhôva a ntehe béba, baboñbéba, ni i bet ba nhiel ñem ngéda ba mboñ béba. Pog, di tehe ndugi i sem kwep inyuki minkoñ mi lisolbene mi bi tééba, ni lelaa mi bé hôla.

3. Lelaa bon ba Israel ba bé boñ ni mut nu a bé kôôba nol numpe?

³ Jam li manola i nlômbi Israel, li bé bé njôha inyu Yéhôva. I nwet a bé kôôba nol mut, a bé lama nôla ni njel mut lihaa wada i nu ba nol, ba bé sébél nye le “mpun matjél.” (Ñanga bôt 35:19) Ni hala nyen nnol mut a bé saa niñ i mut a bi nol. Ba bé pala nol nye inyu boñ le Hisi hi Likak hi nyogba bañ mahindi, inyule Yéhôva a kal le: “N’a hindis bé hisi i het ni yiine, inyule matjél [ma mut binam ba nol] m’a hindis hisi.”​—Ñanga bôt 35:33, 34.

4. Lelaa bon ba Lôk Israel ba bé boñ ngéda mut a bé nol numpe nye ngi kôôba?

⁴ Lelaa bon ba Israel ba bé boñ ni mut nu a bé nol numpe ngi kôôba? Tolakii a bi kôôba bé i boñ hala, i nya mut i, i bééna pil matjél. (Bibôdle 9:5) Ndi, ni konangoo, a bééna kunde i ke mpun matjél ngwéé. Minkoñ mi lisolbene mi bé minsamal, a bé le a tep wada mu, inyu solop. Nnol mut nu a bé lama yén nyoo i tison i lisolbene, letee ni nyemb i prisi ikeñi.​—Ñanga bôt 35:15, 28.

5. Lelaa bitelbene bi bitison bi lisolbene bi nhôla bés i tibil yi Yéhôva?

⁵ Bitelbene bi minkoñ mi lisolbene bini, bi bé bé mahoñol ma mut binam. Yéhôva nyemede a ti Yôsua oda le: “Pôdôs bon ba Israel, u kal bo le, ‘téa minkoñ mi lisolbene.’” Bitison bi, bi bi tiba kiki ‘bitison bipubhaga.’ (Yôsua 20:1, 2, 7, 8) Kiki Yéhôva nyen a bi yoñ bitelbene i bagal bitison bi lisolbene bini inyu jam li tôbôtôbô, di nla badba le: Lelaa bitelbene bi, bi nhôla bés i tibil nok konangoo i Yéhôva? Ibale di nsômbôl yi lelaa di solbene yak Yéhôva i len ini, kii hala a niiga bés?

6, 7. (a) Kii mimañ mi bé boñ inyu kéés nnol mut nu a bé kôôba bé? (Béñge titii i bibôdle.) (b) Inyuki hala a bé njel pék inyu mut a nke ngwéé le a pôdôs mimañ?

⁶ Mbus a bi nol mut ngi kôôba, nke ngwéé a bé lama ndugi “añal hop wé maôô ma mañ mi bôt mi nkoñ u,” ha lijubul li nwemel nkoñ i het a bi ke ngwéé. (Yôsua 20:4) Mbus ngim ngéda, ba bé ba timbis nye i nkoñ wé, i het matjél ma bi kuba, inyu boñ le mimañ mi mi bé nyoo, mi pémés mbagi. (Añ Ñanga bôt 35:24, 25.) A bé a témb ndigi i nkoñ lisolbene, ngéda ba nléba le a nkôôba bé nol nye.

⁷ Inyuki ba bé lama pôdôs mimañ? Inyule ba bé lama tééda likoda li Israel mapubi, ni hôla nnol mut ngi kôôba i ôt nseñ ni konangoo i Yéhôva. Nyi mam ma Bibel wada a tila le: Ibale nke ngwéé a tjél pôdôs mimañ, “a bé le a nimis niñ yé.” A kônde le: “Matjél mé ma bé le ma kahap i ngii ño wé, inyule a bi noñ bé bitelbene bi Djob inyu péyés niñ yé.” Ñ, mahôla ma bé toi inyu nnol mut ngi kôôba, ndi a bé lama yéñ mo, ni neebe ki mo. Ibale a yéñ bé lisolbene ikété tison yada mu bitison bisamal bi Yéhôva a bi bagal, mut lihaa i nwet a bi nol, a bé kunde i pendee nye.

8, 9. Inyuki kristen i kiññem i nkéés, mbus a mboñ béba keñi, i nlama kôôge mimañ bebee?

 ⁸ I len ini, i kristen i mboñ béba keñi i nlama yéñ mahôla ma mimañ mi likoda inyu témbna mbôô wé i pes mbuu. Inyuki hala a yé nseñ? Pog, Yéhôva nyen a nyoñ bitelbene le mimañ mi kodol béba ikeñi, inoñnaga ni Bañga yé. (Yakôbô 5:14-16) Iba, bitelbene bini, bi nhôla baboñbéba ba ba ntjôô liboñok jap libe i ke ni bisu i ba mawanda ni Djob, ni i tjél ki boñ béba i, lisañ lipe. (Galatia 6:1; Lôk Héber 12:11) Aa, mimañ mi yé ha, nkôôbaga inyu mômôs i bet ba mboñ béba, ni hôla bo i hôyôs njôghe yap, ni mômôs kiñ yap ñem. Yéhôva a nsébél mimañ mi le “homa lisôô ikolba ôôm nop.” (Yésaya 32:1, 2) Baa ni neebe bé le bitelbene bi, bi yé yimbne i konangoo i Djob inyu yés?

⁹ Ngandak bagwélél ba Djob, i bi kôhna hogbe i i nlôl ni mahôla ma mimañ inyule ba bi kwel ni bo. Kiki hihéga, mankéé wada le Daniel a bi boñ béba keñi, a yén ntandaa ngéda ngi tehe mimañ, inyule a bé kon woñi. A nkal le: “Mbus ntandaa ngéda, me bé hoñol le mimañ mi nla ha bé boñ yom inyu yem. Ndi, me bé kon woñi le mut a yi béba yem, me bemek ki bikuu bi bé le bi kwél me inyu maboñok mem mabe. Hiki ngéda me bé soohe Yéhôva, me bé bat ndugi nye nwéhél i bibôdle.” Sôk bi sôk, Daniel a bi bat mahôla ma mimañ. Ngéda a mbigda jam li bi tagbe, a nkal le: “Me bé kon woñi i kôôge bo bebee. Ndi mbus nkwel wem ni bo, a bé wengoñle ba nhéya me mbegee i nyét bituu. Nano, me nôgda le me nla kôôge Yéhôva bebee ibabé le yom yo ki yo i kéñ me njel.” I len ini, Daniel a gwé kiññem i mpôp, a ntip yila nhôla nson likoda jé.

10. Inyu kôhna konangoo, mambe makidik ma ngui nnol mut ngi kôôba a bé lama yoñ?

¹⁰ Nnol mut ngi kôôba a bé lama boñ ngim jam inyu kôhna konangoo. A bé lama hoo ke ngwéé i tison lisolbene.  (Añ Yôsua 20:4.) Di nla bé hégda nke ngwéé a ñôt makôô; ibale a hoo bé ke ngwéé i tison lisolbene inyu yén nyoo, ki a bé le a nimis niñ yé! Hala a bé bat nye sesema ikeñi. A bé yék bôlô yé, ndap yé, ni kunde yé i hiôm​—letee ni nyemb prisi ikeñi. * (Ñanga bôt 35:25) Ndi i nya sesema i bé toi i kôli. Ibale a nyodi i tison lisolbene, ki nke ngwéé a bé unda le a ndiihe bé niñ i mut a bi nol, to niñ yé yomede.

11. Lelaa kristen i i nhiel ñem, i ñunda le i ndiihe konangoo i Djob?

¹¹ Inyu ôt nseñ ni konangoo i Nyambe i len ini, baboñbéba ba ba nhiel ñem, ba nlama yoñ makidik ma ngui. Di nlama tjôô maboñok més mabe momasôna, he ndik bé béba keñi ndi yak disiina di béba, ti di ntinde bés i boñ béba keñi. Mbuu Djob u bi tinde ñôma Paul i toñol minson mi bikristen bi Korintô, bi bi bi hiel ñem. A tila le: “Inyule ndutu ñem kingéda sômbôl Nyambe yon i mboñ mut le a hiel ñem, lelaa ni bi nyamnda, ni sôña ki nyuu; lelaa ñem u bi hénd bé, ni kon ki woñi; lelaa ni bi tôñ ni bés, di kon ki bé ngôñ, ni lelaa nôgôs i bi tina!” (2 Korintô 7:10, 11) Biliya gwés bi ngui inyu tjôô bihiumul bibe, bi ñunda Yéhôva le jam di mboñ li ntééñga bés ngandak, ni le di nhoñol bé le di ga kôs ndik konangoo yé hala yañga.

12. Kii kristen i gwé ngôñ i tjôô, inyu ke ni bisu i kôhna konangoo i Djob?

¹² Kii kristen i nlama tjôô inyu ke ni bisu i kôhna konangoo i Djob? I nlama ba bebee i tjôô yom a ngwés ngandak, i i yé le i bane nye ngok baagene. (Matéô 18:8, 9) Ibale ngim mawanda i ntinde we i boñ mam ma nlémél bé Yéhôva, baa u ga kit maada ni bo? Kiki hihéga, ibale u mboñ biliya inyu nwas lihiua, baa u yé bebee i keñgle bôt ni bahoma ba nla tinde we i hiôô? Ibale u njôs ngôñ i nyega malal, baa u ntjél béñge bisinima tole biliñgeliñge, bisite bi internet, ni mam momasôna ma nla tôdôl mahoñol mabe? Bigda le sesema yosôna u mboñ inyu tééda ndéñbe yoñ ipañ Yéhôva i yé toi nseñ. Jam lipe li nôgha bé bés njôghe kiki i nôgda le Yéhôva a ntjôô bés. Maselna ni hala, jam lipe li nla bé kônha bés maséé kiki i nôgda ‘loñge yé ñem i i nom letee ni boga.’​—Yésaya 54:7, 8.

13. Toñol inyuki nke ngwéé a bé le a ba nwee, ibabé i kon yom yo ki yo woñi, a bak ki maséé.

¹³ Ngéda a bé a bol i tison i lisolbene, nke ngwéé a bé nwee. Yéhôva a kal inyu minkoñ mi le: “nwon nw’a bane bé lisolbene.” (Yôsua 20:2, 3) Yéhôva a bé bat bé le ba tiimba kéés nnol mut inyu nlélém jam; yak mpun matjél a bééna bé kunde i jôp i tison lisolbene inyu nol nke ngwéé. Jon nke ngwéé a bé kon ha bé mapuna woñi. Mu kii a bé mu tison, a bé nwee i si bipapai bi Yéhôva, ibabé i kon yom yo ki yo woñi. Lisolbene li, li bééne bé nye kiki mok. A bé la sal mu tison, hôla bôt bape, ni gwélél Yéhôva ikété nsañ. Ñ, a bé le a bana niñ maséé ni i i yôni!

14. Imbe bôdôl kristen i i ntjôô liboñok jé libe i nlama bana?

¹⁴ Baboñbéba bahogi ba yé ba ke ni bisu i nôgda le kiññem i “nkéés” bo, mbus ba mal hiel ñem, ba nla yak hoñol le Yéhôva a’ hôya bé béba keñi ba bi boñ. Ibale u nôgda nlélém, soho ba nkwoog nkaa le ngéda Yéhôva a  nwéhél we, a mboñ hala ngélé yada inyu yosôna! Daniel nu di mbôk sima, a bi léba le hala a yé maliga. Mbus mimañ mi bi kodol nye, mi hôla ki nye i témbna kiññem i mpôp, a kal le: “Me bi nôgda wengoñle nhébék u ntémb u lo me. Kiññem i bé kéés ha bé me. Ngéda béba i nwéhlana, wee i mal nwéhlana. Kiki Yéhôva a kal, a nyoñ mbegee yoñ, a kena yo nonok (haa) ni we. U ga tehe ha bé ki yo kekikel.” Mbus a bé a ma jôp ikété nkoñ lisolbene, nke ngwéé a bééna ha bé ngôñ i béñge mbus inyu yi too mpun matjél a bé a ngi noñok nye. Nlélém i len ini, ngéda Yéhôva a mal nwéhél béba yés, di nlama ha bé kon woñi le a’ tiimba kéés bés mu béba i.​—Añ Tjémbi 103:8-12.

15, 16. Lelaa tel i Yésu kiki Nti binoñ ni Prisi Keñi i nkwés bés nkaa ni konangoo i Djob?

¹⁵ I yé ntiik le, di gwé njom i i nloo i bon ba Lôk Israel, i bana bôdôl ni konangoo i Yéhôva. Mbus Paul a kal le ngoo yé inyule a bé la bé nôgôl Yéhôva i nya i yôni, a kal le: “Mayéga ma ba ni Nyambe inyu Yésu Kristô, Nwet wés!” (Rôma 7:25) Ñ, tolakii a bé hôya bé sañ yé ni béba, to i mam a bi boñ nye ngi yila kristen​—bi, a kôm mbus​—Paul a bé bôdôl nwéhél i Yéhôva ñem, i a bi kôs ni njel Yésu. Kiki Nti binoñ, Yésu a mpubus kiññem yés, a ti ki bés nsañ ni ñem nwee. (Lôk Héber 9:13, 14) Kiki Prisi Keñi, “a nla ki tohol bañga litohlak bôt ba nkôôge bebee ni Nyambe inyu jôl jé, lakii a yii niñ mba ni mba le a yemhe inyu yap.” (Lôk Héber 7:24, 25) Ibale nson u prisi keñi u bé kwés bon ba Lôk Israel nkaa le bibéba gwap bi bé le bi nwéhlana, bôô ni ngélé yañen nson u Prisi Keñi, le Yésu, u nkwés bés nkaa le di nla kôhna “konangoo, di léba ki karis i hôla bés ngéda mahôla ma nsômbla.”​—Lôk Héber 4:15, 16.

¹⁶ Inyu solbene yak Yéhôva, u nlama unda le u nhémle sesema i Yésu. U nlama ndik bé hoñol le binoñ bi bi tiba inyu ngandak bôt. Ndi, ba nkwoog nkaa le bi mbéñge we tôbôtôbô. (Galatia 2:20, 21) Hémle le binoñ bi yé hikuu hi nwéhél hi bibéba gwoñ. Hémle le binoñ bi nti we botñem i niñ i boga ni boga. Sesema i Yésu i yé likébla li Yéhôva inyu yoñ.

17. Inyuki u gwé ngôñ i solbene yak Yéhôva?

¹⁷ Bitison bi lisolbene bi ñunda le Yéhôva a yé konangoo. Ni njel bitelbene bini, Djob a yigye ndik bé libak li pubhaga li niñ, ndi a bi ti ki bés titii i i ñéba lelaa mimañ mi nla hôla bés, kii i yé toi i hiel ñem, ni inyuki di nla ba nkwoog nkaa ni nwéhél i Yéhôva. Baa u nsolbene yak Yéhôva? Homa lisolbene numpe nu a nloo nu a ta bé! (Tjémbi 91:1, 2) Mu yigil i noñ ha, di ga tehe lelaa bitison bi lisolbene bi nla hôla bés i kôna ndémbél i mbôksôk i telepsép ni konangoo i Yéhôva.