YÉSU a kal kel yada le: “Ti i nlona maséé iloo kôhna.” (Minson mi baôma 20:35, MN.) Maliga ma ma ntihba maada més ni Yéhôva. Inyuki? Di nkôs ngandak makébla i nlôl bés ni Yéhôva, ni i i nti bés maséé, ndi di nla bana ki maséé ma nloo ma, ibale di nti Yéhôva likébla. Limbe likébla di nla ti Yéhôva? Bingéngén 3:9 a nkal le: “Ti Yéhôva lipém ni nkus woñ.” Ngéda Bibel i nkal le “nkus woñ,” wee ngéda yés, likeñge jés, ngui yés, yak ni gwom gwés bi mahee. Ngéda di ngwélél nya gwom i, inyu bugus bañga bibégés, wee di yé ti Yéhôva likébla, i boñ hala i nlona toi bés maséé makeñi.

Ngéda i mpam le di ti nkus wés, kii i ga boñ le di ngeñee bañ? Ñôma Paul a kal lôk kéé i Korintô le ba “kôhlege yéñe ba bi kôs” inyu ti yo kiki makébla. (1 Korintô 16:2) Kii u nla boñ ibale u nsômbôl yi manjel mape u nla gwélél inyu ti makébla homa u yéne? Soho béñge minkéñég mi matila mi noñ ha isi.

Ba nla bé ti makébla i biloñ gwobisôna ni njel internet. Ndi to hala, biniigana bi ntiba inyu ti makébla ni manjel mape i internet. Biloñ bipe, kaat yada i gwé ño le “Questions fréquentes” i nti mandimbhe inyu mambadga bôt ba mbéna bat inyu jam li makébla.