1-2. Mambe maada ma yé ipôla kaat Ñañal 11:6 ni nson wés likalô?

I NGIM biloñ, bôt ba mpala neebe ñañ nlam. I yé wengoñle i yom ba bé bem yo i! Biloñ bipe, bôt ba ngwés bé ñañ nlam. Mam ma yé laa i loñ yoñ? To kii leñek, sômbôl i Yéhôva i yé le di kee ni bisu i añal ñañ nlam letee nyemede a kal le nson u mal.

² Ngéda ngeñ Yéhôva a bi téé i ga kola, nson likalô u ga telep ndi tole “lisuk li nlo.” (Matéô 24:14, 36) Ilole i ngéda i i nkola, lelaa di nla unda le di noñ mana maéba le: “U nôyôs bañ ki to woo woñ”? *​—Añ Ñañal 11:6.

3. Kii di ga tehe munu yigil ini?

³ I yigil i ntip tagbe, di ntehe mam ma-na di nla boñ inyu boñ le nson wés u “balop bôt” u num matam malam. (Matéô 4:19) I yigil ini i ga pôdôl manjel maa di nla gwélél inyu yônôs makidik més i ke ni bisu i añal ñañ nlam, to di mboma imbe ndutu. Di ga tehe inyuki i yé nseñ le (1) nson likalô won u ba jam li bisu i niñ yés, (2) di yi hônba, (3) di kônde lédés hémle yés.

4. Inyuki di nlama boñ le nson likalô won u ba jam li bisu i niñ yés?

⁴ Yésu a bi legel mam ma bé lama ba yimbne i dilo di nsôk, ma ma bé le ma yoña banigil bé kayéle  nson likalô u ba ha bé jam li bisu i niñ yap. A kal banigil bé le: “Yéna péé.” (Matéô 24:42) I len ini, di mboma minlélém mi mam mi bé kéñ bôt ba ngéda Nôa i emble mabéhna mé. (Matéô 24:37-39; 2 Pétrô 2:5) Inyu hala nyen, di nlama boñ le nson Yéhôva a bi bééga bés won u ba jam li bisu i niñ yés.

5. Inoñnaga ni kaat Minson mi baôma 1:6-8, ñañ nlam u nlama añlana letee ni hee?

⁵ I len ini, nson likalô won u nlama ba jam li bisu i niñ yés. Yésu a bi legel le, i mbus nyemb yé nson likalô w’a ke ni bisu i séla ni nkoñ ’isi wonsôna. (Yôhanes 14:12) I mbus nyemb Yésu, banigil bé bahogi ba bi témb i bôlô yap i lop tjobi. I mbus bitugne gwé, Yésu a bi boñ hélha jam, a hôla banigil bé i gwel ngandak tjobi. Ni i njel i, a bi unda banigil bé le nson a bi bééga bo u yé nseñ iloo mini minson nwominsôna. (Yôhanes 21:15-17) Ndék ngéda ilole Yésu a mbet i ngii, a bi kal banigil bé le nson a bi bôdôl u bé lama ndik bé séla i Israel, ndi yak bahoma bape. (Añ Minson mi baôma 1:6-8.) I mbus ngéda, ikété yiinda, Yésu a bi unda ñôma Yôhanes i yom i bé lama bôña “i hilo hi Nwet.” * Ikété mam Yôhanes a bi tehe, hélha jam yada i bé le, a bi tehe añgel i ñéga bôt ba ñañal “ñañ nlam u boga” ikété “hiki loñ, hiki litén, hiki hilémb ni hiki lihaa.” (Masoola 1:10; 14:6) Ñ, sômbôl i Yéhôva i len ini i yé le, di yoñ ngaba i nson nkeñi unu letee ni lisuk.

6. Kii i nla hôla bés i ke ni bisu i tehe likalô kiki jam li bisu i niñ yés?

 ⁶ Inyu boñ le nson likalô u ba jam li bisu i niñ yés, di nlama ôt pék mu mam Yéhôva a mboñ inyu hôla bés. A nti bés ngandak bijek bi mbuu kiki bo bikaat, bikaat bi mpam internet, minkwel ba ñemble, bividéô, ni JW.Nkuu Biliñgeliñge. Hoñol ki, site yés internet i mpémés bikaat ikété iloo 1 000 dilémb! (Matéô 24:45-47) Iloo didun juem di bagwélél ba Djob di nsal ikété adna, ki le mam ma m’bô, ma base, ni mam ma nyuñga ma mbagal nkoñ ’isi. Kiki hihéga, i ngwa koo hilo 19 hi sôñ Matôp, i nwii 2019, Mbôgi Yéhôva i nkoñ ’isi wonsôna i bi emble nlélém buk kel. I kôkôa i, 20 919 041 ba bi kodba inyu Mbigda nyemb Yésu. Ngéda di nyoñ ngéda i ôt pék bihélha bi mam Yéhôva a mboñ i len ini, ni nsima di gwé i yoñ ngaba mu, hala a ntinde bés i bii nson likalô kiki jam li bisu i niñ yés.

7. Bimbe biniigana di ñôt mu ndémbél i Yésu?

⁷ Yom ipe i nla hôla bés i ke ni bisu i bii likalô kiki yom bisu i niñ yés, i yé i noñ ndémbél i Yésu. A bi nwas bé le yom yo ki yo i kéñ nye i bok mbôgi inyu maliga. (Yôhanes 18:37) A bi nwas bé le Satan a yoña nye ngéda a bi unda nye “biane bi nkoñ ’isi gwobisôna ni lipém jap,” a nwas bé to le bôt bape ba yilha nye kiñe. (Matéô 4:8, 9; Yôhanes 6:15) Nkus u bé kal bé nye to jam, to ngolba i bi tômbôs bé nye. (Lukas 9:58; Yôhanes 8:59) To di mboma manoodana, di ga téñbe ni nson wés ibale di mbigda maéba ma ñôma Paul. A bi kal bikristen le ba noñ ndémbél i Yésu inyu boñ le ba “tomb bañ,” ba ‘nimis bañ to makénd’!​—Lôk Héber 12:3.

8. Hônba we kii, inyuki i yéne bés nseñ, téntén nano?

⁸ Ba nkal le mut a nhônba ngéda a nihbe ngim jam ibabé i tjelel letee mam ma héñha. I nla ba le ibôdôl behee u gwé ngim ndutu u mbem le i mal, tole u mbem jam lilam, i mbéda we hônba. Mpôdôl Habakuk a bé bem le Yéhôva a loo i mélés béba i bé bôña i loñ Yuda. (Habakuk 1:2) Banigil ba Yésu ba bé hoñol le Ane i bé lama “lo kunda yada” i ngéda Yésu a bé hana ’isi, inyu sôñ bo i moo ma Lôk Rôma. (Lukas 19:11) Di nyamnda ni ngôñ i tehe i kel Ane i Djob y’a héya béba yosôna hana ’isi, i jubus bés i mbok yondo. (2 Pétrô 3:13) Ndi i mbéda bés hônba mu kii di mbem hilo hi Yéhôva. Di béñge ngim manjel Yéhôva a ngwélél inyu niiga bés hônba.

9. Dimbe dihéga di ñunda le Yéhôva a nhônba?

⁹ Yéhôva a yé ndémbél i mbôk ni nsôk i hônba. A bi ti Nôa ngéda inyu bañ nkuu ni inyu sal “kiki ñañal telepsép.” (2 Pétrô 2:5; 1 Pétrô 3:20) Yéhôva a bi yoñ ngéda i emble Abraham ngéda a bé bat nye mambadga mu makidik mé i tjé bitison bi Sôdôm ni Gômôra. (Bibôdle 18:20-33) Nwii ndi nwii, Yéhôva a bi lôôha hônba bon ba Israel  ba ba bé ndogbene nye. (Néhémia 9:30, 31) Hônba i Yéhôva i nene i len ini, mu kii a nti i bet a ñôt i nyeni ngéda le “ba pam i hiel miñem.” (2 Pétrô 3:9; Yôhanes 6:44; 1 Timôtéô 2:3, 4) Ndémbél i Yéhôva i ntinde bés i hôlôs hônba mu kii di nke ni bisu i añal ñañ nlam ni i niiga bôt. A niiga ki bés hônba ni njel hihéga hiada di nléba mu i Bañga yé.

10. Inoñnaga ni Yakôbô 5:7, 8, kii ndémbél i nsalwom i niiga bés?

¹⁰ Añ Yakôbô 5:7, 8. Ndémbél i nsalwom i niiga bés i bana hônba. Ngim bibebela i nhoo nañ. Ndi libim, téntén bi bi num matam, bi nyoñ ngéda inyu hôlôl. I nlômbi Israel, nwom mi bé hôlôl i mbus sôñ isamal. Nsalwom a bé bel i mbus banop ba bisu, a bumblak i mbus banop ba nsôk. (Markô 4:28) Di kôli toi noñ ndémbél i hônba nsalwom a nti bés. Ndi hala a ta bé jam li ntomb.

11. Lelaa i yi hônba i nhôla bés i nson likalô?

¹¹ Bikwéha bi bôt bi mbéna bem le bo ngi sal, ba bumbul. Ndi ibale di ngwés le wom u num matam, di nlama boñ dikuu, di bel, di nup bikai, di kôp malép. Yak nson i yilha bôt banigil u mbat biliya bi ngui. I mbéda ngandak ngéda inyu hôla i bet di niiga i nup mahoñol ma mbagla, ma diyana, ndi i gwés bôt bobasôna. Ibale di nyi hônba, di ga tomb bé to di mboma mandutu. To ngéda bôt ba nleege ñañ nlam, i mbéda bés hônba. Di nla bé nyégsa nnigil Bibel i bana hémle. Ngim mangéda i bé i pam le banigil ba Yésu ba hoo bé nok ngim jam a bé niiga bo. (Yôhanes 14:9) Di hôiga bañ le bés di mbel, di kôbôk  malép, ndi Nyambe nyen a mboñ le i nañ.​—1 Korintô 3:6.

12. Lelaa di nla unda le di nyi hônba ngéda di ntééne bôt bés ba lihaa likalô?

¹² I yé le i bane bés ndutu i hônba, ngéda di ntééne bôt bés ba lihaa likalô. Kaat Ñañal 3:1, 7 i nla hôla bés. I nkal le: ‘Ngim ngéda i yé inyu mom nwee, ni ngéda inyu pot.’ Ngim mangéda di nla nwas le maboñok més mon ma pot, ndi hiki ngéda pôla i nene, di nlama yéñ manjel i añal ñañ nlam. (1 Pétrô 3:1, 2) Di nlama hônba bôt bobasôna di ntééne likalô, yak bôt bés ba lihaa.

13-14. Imbe ndémbél i hônba di nlama kôna?

¹³ Ndémbél i bagwélél ba Djob ba kôba ni ba len i nla hôla bés i bana hônba. Habakuk a bé bem le Yéhôva a pala tjé bibéba bi bôt, ndi ni wongut a bi kal le: “M’a yégle me téé i homa wem litédél.” (Habakuk 2:1, MN.) Ñôma Paul a bi kal le a bé nyamnda ni ngôñ i “mélés” nson wé. Ndi ni wongut a kônde le, a bé ke ni bisu i “bok mbôgi i nya i yôni inyu ñañ nlam.”​—Minson mi baôma 20:24.

¹⁴ Di yoñ hihéga hi babiina ba ba bi pam i Giléad. Ba bi ep bo i ngim loñ i het bôt ba bé neebe bé biniigana bi Bibel, to Mbôgi Yéhôva i bé tôl bé nyoo. Libim li bôt li bé top bé nigil Bibel. Ndi mawanda map ma suklu ma ma bé biloñ bipe, ma bé añle bo le ba ntégbaha ngandak gwigil bi Bibel. Tolakii mam ma bé tagbe bé loñge libôga jap, babiina ba, ba bi ke ni bisu i gwel nson wap ni wongut. I mbus nwii juem mi nson mu libôga li, ba bi kon maséé i tehe wada ikété banigil bap a nyila Mbôgi Yéhôva. Bimbe biniigana di ñôt mu ndémbél i bôt ba kôba ni bôt ba len? To wada wap a bi tomb bé, a bi nôyôs bé to woo wé, Yéhôva a bi sayap bo inyu hônba yap. Di kee ni bisu i “nigle i bôt ba nkôhna mimbônga ni njel hémle ni wongut.”​—Lôk Héber 6:10-12.

15. Jam li bisu li ñunda le hémle i nlédés makidik més i téé likalô li yé le kii?

¹⁵ Di nhémle nwin Ane di ñañal, jon di yé maséé i añle wo ngandak bôt. Di nhémle mimbônga mi Djob mi mi yé ikété Bañga yé. (Tjémbi 119:42; Yésaya 40:8) Di ntehe mbañ i Bibel i nyon i ngéda yés. Di ntehe lelaa bôt ba nhéñha ngéda ba nkahal nigil Bibel. Hala a ñunda bés le ñañ nlam u Ane u yé inyu bôt bobasôna.

16. Kiki kaat Tjémbi 46:2-4 i ñunda, lelaa hémle di gwé inyu Yéhôva ni Yésu i nlédés makidik més i añal ñañ nlam?

¹⁶ Di nhémle ki Yéhôva, nu a yé Nwet u nwin di ñañal, ni Man wé Yésu, Kiñe Ane yé. (Yôhanes 14:1) To imbe ndutu di mboma, Yéhôva a yé lisolbene jés, ni ngui yés. (Añ Tjémbi 46:2-4.) Di yé nkwoog nkaa le Yésu a ñéga nson likalô ni i ngui Yéhôva a bi ti nye.​—Matéô 28:18-20.

17. Ti hihéga hi ñunda inyuki di nlama ke ni bisu i añal ñañ nlam.

¹⁷ Hémle i nkwés bés nkaa le Yéhôva a ga sayap biliya gwés, i nla pam le a boñ hala i nya di bemek bé. (Ñañal 11:6) Kiki hihéga, hiki kel ngandak bôt i nlo i kak yés bikaat. Baa likalô li kak bikaat li num matam malam? Ñ! Le Ministère du Royaume nu novembre  2014, a bé pôdôl mañge wanda nu a bé ñudu suklu ikeñi, a bé kôôba makégse i het a bé lama pôdôl Mbôgi Yéhôva. A bi la bé léba ngim ndap Ane, ndi a bi yoñ ngim kaat i kak bikaat i bé ipañ suklu, i i bi hôla nye i kôôba makégse mé. Sôk i nsôk, a bi yila Mbôgi Yéhôva, nano a yé nsañal nu ngéda yosôna. I nya miñañ i i ntinde bés i ke ni bisu i añal ñañ nlam, di yik le ngandak bôt i yii i i gwé ngôñ i emble ñañ nlam.

18. Kii nkwés bés nkaa le nson likalô u ga mal i ntéak ngéda?

¹⁸ Di yé nkwoog nkaa le nson likalô u ga mal i ntéak ngéda. Di béñge yom i bi bôña dilo di Nôa. Dilo di, Yéhôva a bi unda le a mboñ mam i ntéak ngéda. Jam kiki bo 120 nwii bisu bi ngéda, Yéhôva a bi téé hilo Ntida malép u bé lama bôdôl. Nwii ndi nwii mbus, Yéhôva a bi kal Nôa le a oñ nkuu. Nôa a bi sal ni ngui jam kiki bo 40 tole 50 ma nwii ilole Ntida malép u mbôdôl. Tolakii ba bé emble bé nye, a bi ke ni bisu i béhe bo letee Yéhôva a kal nye le a jôbna binuga i nkuu. Ngéda ngeñ i bi kola, “Yéhôva a yip likôga.”​—Bibôdle 6:3; 7:1, 2, 16.

19. Bimbe bisai bi mbem bés ibale di nôyôs bé woo wés?

¹⁹ Ndék ngéda, wee Yéhôva a nkal le nson likalô u mal; a ga “yip likôga” li nkoñ ’isi u Satan, a jôbna bés i mbok yondo i het telepsép y’a ba. Ilole ngéda i i nkola, di nigle Nôa, Habakuk ni bape ba ba bi nôyôs bé woo wap. Nson likalô u kee ni bisu i ba jam li bisu i niñ yés, di yi hônba, di kônde ki lédés hémle yés inyu Yéhôva ni mimbônga nwé.