1-2. Umbe “nson nlam” mimañ mi ngwel?

 IBALE nano a yé ndék nwii le u yé nhôla nson, bebek u nsal ni ngui inyu hôlôs bilem bi mbéda inyu yila mañ u likoda. Baa u yé le u kônde boñ biliya inyu gwel i “nson nlam” u?​—1 Timôtéô 3:1.

² Imbe bôlô mimañ mi nsal? Mimañ mi nti lôk kéé yap ndémbél inyu likalô, mi nyuuga bo inyu ti bo maéba, mi niigaga bo ni njel bipôdôl ni maboñok map. Di nla nok inyuki Bibel i nsébél i lôk kéé ini i i nsal ni ngui le ‘bôt ba nti kiki makébla.’​—Éfésô 4:8.

3. Kii mankéé nu munlôm a nla boñ inyu yila mañ? (1 Timôtéô 3:​1-7; Titô 1:​5-9)

³ Kii u nla boñ inyu yila mañ? I boñ biliya i yila mañ i ta bé kiki i boñ biliya inyu bana ngim bôlô i i ga ti we koga kel. Inyu bôlô, u nlama bana makeñge ma mbéda inyu boñ le ba yoñ we. Ndi inyu yila mañ, u nlama ndik bé yi téé likalô ni niiga. U nlama yak bana bilem bi mbéda inyu yila mañ di nléba i kaat 1 Timôtéô 3:​1-7 ni Titô 1:​5-9. (Añ.) Munu yigil ini, di ga tehe ngim bilem mimañ mi nlama bana, di nkap gwo môga maa: Mañ u nlama bana jôl lilam ikété likoda ni i mbégdé, u nlama ti lihaa jé ndémbél ilam, u bak ki bebee i ti womede inyu hôla likoda.

A NLAMA BANA JÔL LILAM

4. I “ba nginsohi” i nkobla le kii?

⁴ Inyu yila mañ, u nlama ba “mut nu a yé nginsohi,” hala wee mut nu a gwé jôl lilam inyule maboñok mé ma yé  malam. Handugi hala, bôt ba mbégdé ba nlama “bok mbôgi ilam” inyu yoñ. I yé maliga le i bôt ba ngwélél bé Yéhôva ba nla ôm bés nsohi inyule ba nok bé biniigana gwés, ndi ba nlama bé ôm bés nsohi le di ta bé maliga tole di yé béba mut. (Daniel 6:​4, 5) Jon badba le: ‘Baa me gwé jôl lilam ikété likoda ni i mbégdé?

5. Lelaa u nla unda le u “ngwés mam malam”?

⁵ Ibale u yé “mut a ngwés mam malam,” u ga tehe bilem bilam bi bôt bape, u bégés ki bo inyu bilem gwap bilam. U ga ba maséé i bôñôl bôt bape loñge, yak i mam ba bemek bé le u nla bôñôl bo. (1 Tésalônika 2:8) Inyuki i lem ini i yé nseñ inyu mimañ? Inyule ba ga gwélél libim li ngéda yap i hôla lôk kéé i bôda ni i bôlôm, ni i gwel minson mimpe. (1 Pétrô 5:​1-3) Tolakii hala a mbat ngandak bôlô, maséé ba nkôs ma nloo i bôlô i huum.​—Minson mi baôma 20:35.

6. Lelaa di nla unda le di yé mut a nyi “leege bakén”? (Lôk Héber 13:​2, 16; béñge yak titii.)

⁶ U ñunda le u yé mut a nyi “leege bakén” i ngéda u bôñôl bôt bape mam malam, yak i bet ba ta bé mawanda moñ ma ñemnyuu. (1 Pétrô 4:9) Ndoñi bibuk i nlôñ unu i ñunda le: “I mut a nyi leege bakén a yé liyômba ni bôt bobasôna yak ni i bet a nyi bé, a yé yak maséé i naña bo i mbai yé.” Badba le: ‘Baa me nyiba kiki mut nu a nyi leege bakén?’ (Añ Lôk Héber 13:​2, 16.) Mut nu a nyi leege bakén a ñunda bôt bobasôna loñgeñem, kiki hihéga diyeyeba, lôk kéé i i nlôl makoda mape inyu ti minkwel, yak bagwélél ba makiiña.​—Bibôdle 18:​2-8; Bingéngén 3:27; Lukas 14:​13, 14; Minson mi baôma 16:15; Rôma 12:13.

7. Lelaa mañ u nla unda le u ta bé “mut a ngwés moni”?

⁷ A ba bañ “to mut a ngwés moni.” Hala a nkobla le moni ni nkus bi ba bañ jam li bisu i niñ yoñ. To u yé ngwañ mut tole u nyep, i gwélél Yéhôva i yé jam li nlôôha nseñ i niñ yoñ. (Matéô 6:33) Gwélél ngéda yoñ, ngui yoñ, ni bigwel gwoñ bi moo inyu bégés Yéhôva, inyu tééda lihaa joñ ni inyu hôla lôk kéé i bôda ni  i bôlôm. (Matéô 6:24; 1 Yôhanes 2:​15-17) Badba le: ‘Lelaa me ntehe moni? Baa me nkon maséé ni i ndék mam me gwé? Tole mahoñol mem momasôna ma yé ndik le moni ni ngandak nkus?’​—1 Timôtéô 6:​6, 17-19.

8. Lelaa u nla unda le u yé mut a gwé “hôtnyuu ikété maboñôk mé”?

⁸ Ibale u yé mut a gwé “hôtnyuu ikété maboñok” mé, u nyi minwaa nwoñ. Hala wee, u ta bé mut mbina je, to mut lihiua, u nyi ki pohol mahabga moñ, bieñg gwoñ ni mintuk nwoñ. U nkôna bé béba niñ i bôt ba ba ngwélél bé Yéhôva. (Lukas 21:34; Yakôbô 4:4) U yé nwee yak i ngéda bôt ba nyumbla we. U ta bé “to mut lihuia,” u nyiba bé to kiki mut a nyo ngandak. Badba le: ‘Baa niñ yem i ñunda le me gwé hôtnyuu ikété maboñok mem?’

9. Lelaa mut a nla unda le a “nyi hek pék” ni le a “mboñ mam lôñni oda”?

⁹ Ibale u yé mut a “nyi hek pék,” u ntibil wan mam inoñnaga ni matiñ ma Bibel, u ñôt ki pék inyu tibil tehe kii Bibel i niiga inyu ngim jam. Hala a nhôla we i tibil nok mam, u nyoñ ki makidik malam. U pala bé sugus ngim jam we ngi nok mam momasôna. (Bingéngén 18:13) Sôk i nsôk, u nyoñ makidik ma ma nkiha ni sômbôl i Yéhôva. Ibale u yé “mut a mboñ mam ni oda,” u ntjek mam moñ loñge, u mboñ ki mam i ngeñ. U nyiba kiki mut ba nla bôdôl ñem, ni nu a ñemble maéba. Ibale u nhôlôs bilem bini gwobisôna di ntip pôdôl, bi ga hôla we i bana jôl lilam. Nano di pôdôl le bilem Bibel i nkal le mimañ mi nlama bana inyu ba ndémbél ilam ikété mahaa map.

BA LOÑGE ISAÑ MBAI

10. Lelaa isañ mbai a nla “éba le a ñéga ndap yé lihaa loñge”?

¹⁰ Ibale u yé mbiibaga, ndi u nsômbôl yila mañ, yak lihaa joñ li nlama bana jôl lilam. U nlama ba mut a “ñéga ndap yé lihaa loñge.” U nlama yiba kiki mut nu a nyoñ makidik malam inyu lihaa jé ni gwéha, a yoñok ndun ni jo. Hala a nkobla ki le, inyu bibégés bi ndap lihaa, makoda ni likalô wen u nlama ti ndémbél. Inyuki hala a nlôôha ba nseñ? Ñôma Paul a bat le: “Ibale mut a nyi bé lelaa a éga ndap yé lihaa nyemede, lelaa a’ yi tééda likoda li Nyambe?”​—1 Timôtéô 3:5.

11-12. Lelaa maboñok ma bon ma nla boñ le isañ wap a yila bañ mañ? (Béñge yak titii.)

¹¹ Ibale u yé isañ mbai, ndi u ban-ga bon ba ba yé batitigi, “ba nlama ba manôgla ba ban-ga bilem bilam.” U nlama niiga bo, u uñgus ki bo ni gwéha. I maliga, kiki boñge bobasôna, ba ga gwés le ba nolok, ba tuguk ki. Ndi kiki u niiga bo loñge, ba ga ba manôgla, ba tinak bôt bape lipém, ba ban-ga ki bihiumul bilam. Iloo mam momasôna, u nlama hôla bon boñ i bana maada malam ni Yéhôva, i niñ inoñnaga ni matiñ ma Bibel, ni i hol ikepam i sôble.

¹² A “ban-ga bon ba nhémle, ba bôt ba ñôm bé nsôhi le ba niñ ikété mpuñgu tole ba yé ndok.” Ibale mañge nu a yé nsôblege a yii i ndap isañ ndi a boñ béba ikeñi, baa ba kôli téé isañ mañ tole nhôla nson? Ibale isañ a bi niiga bé man wé ndi to kodol nye, a kôli bé le ba téé nye mañ.​—Béñge Nkum Ntat nu 15 Biôôm, 1996, lipep 21, maben 6-7.

 MUT NU A NYOÑ NDUN NI LIKODA

13. Lelaa mankéé a nla unda le “a nai bé ni litehge jé li mam” ni le a ta bé “mut ño mbe”?

¹³ Lôk kéé i bôlôm i i gwé bilem bi mbuu i nlôôha ba nseñ inyu likoda. I mut a “nai bé ni litehge jé li mam” a nhôlôs nsañ. Ibale u nsômbôl yiba kiki mut nu a nai bé ni litehge jé li mam, u nlama ba bebee i emble bôt bape ni i neebe mahoñol map. Kiki hihéga, ibale mimañ mi nkodba, mi yoñ ngim makidik, baa u ga neebe makidik ma ibale ma mbôk bé mambén ni matiñ ma Yéhôva? “A ba bañ mut ño mbe,” hala wee u ba bañ ndéñ ndéñ, le bôt ba boñ ndik kiki u ngwés. U nyi le i yé loñge i emble mahoñol ma bôt bape. (Bibôdle 13:​8, 9; Bingéngén 15:22) U ba “bañ mut jomol,” tole “mut nu a mpala unup.” Iloole u yahal bôt, pôdôs bo ni loñgeñem, u tinak bo lipém. U mboñ biliya bi ngui i yéñ nsañ, yak i ngéda mam ma nke bé loñge. (Yakôbô 3:​17, 18) Bibuk gwoñ bilam bi nsuhus hiun, yak hi baoo bés.​—Bakéés 8:​1-3; Bingéngén 20:3; 25:15; Matéô 5:​23, 24.

14. I ngéda Bibel i nkal le “a ba bañ mut a ntip jôp i ntôñ” ni le a ba “mut ndéñbe” kii hala a nkobla?

¹⁴ I mankéé ba nsômbôl téé mañ a ba “bañ mut a ntip jôp i ntôñ.” To hala kiki i mbéda ndik bé le u ba nsôblege behee, ndi i mbéda ngim ngéda inyu yila nhôôlak u kristen. Kiki Yésu, i mankéé ba nsômbôl téé mañ, a nlama unda le a yé suhulnyuu, a bemek Yéhôva inyu kôhna minson i likoda. (Matéô 20:23; Filipi 2:​5-8) A nla unda le a yé mut “ndéñbe” i ngéda a niñ inoñnaga ni matiñ ma Yéhôva ni i ngéda a noñ biniigana bi ntôñ u Yéhôva.​—1 Timôtéô 4:15.

15. Baa mankéé nu a yé mañ a nlama ndik ba mut a nlôôha yi ti minkwel? Toñol.

¹⁵ Bitilna bi ntibil unda le mimañ mi nlama “yi niiga.” Ndi baa hala a nkobla le  u nlama ndik ba mut nu a nyi ti minkwel mi mbamba? To jam. Mimañ nwominsôna bé nwon mi nlôôha yi ti minkwel. Ndi i ngéda mi ntéé likalô, ni i ngéda mi nyuuga lôk kéé inyu ti bo makénd, mimañ mi nlama yi gwélél Bibel inyu niiga. Ndi to ibale u nlôôha bé yi ti minkwel, u nlama ke ni bisu i lémés likeñge joñ inyu niiga. Kii u nla ni boñ inyu lémés likeñge joñ i niiga?

16. Lelaa u nla hôlôs likeñge joñ inyu ba loñge niiga? (Béñge yak titii.)

¹⁶ “Mut nu a ntéñbe ni bañga i maliga i ngéda a niiga.” Inyu yiba kiki mut a nyi niiga, biniigana gwés ni maéba més bi nlama pémél ikété Bañga i Djob. Inyu pam i boñ hala, di nlama nigil Bibel ni bikaat bi ntôñ loñge. (Bingéngén 15:28; 16:23) I ngéda di nigil, di nlama yoñ ngéda i tehe lelaa bikaat bi ntôñ bi ntoñol minlôñ mi Bibel di yé i añ inyu tibil gwélél nwo. I ngéda di niiga, di nlama hôla bôt i gwés Yéhôva ni i bii i mam ba nigil i bisélél. U nla hôlôs likeñge joñ i niiga ibale u mbat mimañ mi mi gwé pék maéba, u biak ki mo i bisélél. (1 Timôtéô 5:17) Mimañ mi nlama ti lôk kéé i bôlôm ni i bôda “makénd,” ndi ngim mangéda, mi nlama ti bo maéba tole mi “kodol” bo. Mimañ mi nlama boñ hala ni loñge ñem. Ibale u ñunda bôt bape loñgeñem ni gwéha, u yoñok biniigana gwoñ ikété lipôdôl li Djob, w’a ba loñge niiga, inyule u nkôna ndémbél i Niiga Nunkeñi le Yésu.​—Matéô 11:​28-30; 2 Timôtéô 2:24.

KEE NI BISU I HÔLÔS BILEM BI MBÉDA

17. (a) Bimbe bilem bahôla nson ba nlama hôlôs inyu yila mañ? (b) Kii mimañ mi nlama yi i ngéda mi nsômbôl téé ngim mankéé mañ? (Béñge yak minkéñék mi matila le “ U ba bañ ndéñ ndéñ i ngéda u nwan bôt bape.”)

¹⁷ Ngim bahôla nson i nla nôgda le i nla bé yila mañ kekikel i ngéda ba nwan bilem  bi mbéda inyu yila mañ. Ndi bigda le Yéhôva ni ntôñ wé ba mbem bé le u hôlôs bilem bini i nya i yôni. (1 Pétrô 2:21) Jam lipe li yé le mbuu mpubi u Yéhôva won u nhôla bôt i hôlôs bilem bini. (Filipi 2:13) Baa u gwé ngim lem i tôbôtôbô u gwé ngôñ i hôlôs? Soohe Yéhôva inyu i jam li. Wan bikaat bi ntôñ bi bi mpôdôl i lem i, bat yak mañ wada u likoda joñ mahôla inyu hôlôs yo.

18. Kii bahôla nson bobasôna ba nlama ke ni bisu i boñ?

¹⁸ Bésbobasôna yak mimañ, di nlama ke ni bisu i hôlôs bilem di mpôdôl munu i yigil ini. (Filipi 3:16) Baa u yé nhôla nson? Kee ni bisu i hôla lôk kéé yoñ! Soohe Yéhôva le a niiga we inyu boñ le u kee ni bisu i gwélél nye, u kônde ki ba nseñ inyu likoda. (Yésaya 64:8) Yéhôva a ga sayap biliya u mboñ i hôlôs bilem inyu yila mañ.