BAA u njo sañ inyu nigil Bibel hiki sonde? Baa yigil yoñ i nlémél we? Bésbobasôna di nôgda hala ngim mangéda. Ndi hoñol le mam mape di mboñ hiki ngéda, kiki bo jogop. Jogop li mbat ngéda ni biliya, ndi i mbus, di yé di nok loñge ngandak. Yigil yés i Bibel, i nla ba kiki jogop ni “malép ma bañga i Nyambe” i i mboñ le di nok loñge. (Éfésô 5:26) Di wan ndék maéba ma ma nla hôla bés:

• Boñ ntjega. Yigil yés i Bibel i yé ikété “mam ma nlôôha nseñ” di nlama boñ. (Filipi 1:10) Inyu boñ le u hôya bañ hilo hioñ hi yigil, tila hio i lipep, u éde jo i ngim homa i het u nla hoo tehe jo, kiki bo i likôga li frigô. Tole u nla boñ le téléfôn yoñ i hôñlaha we ngéda yoñ yigil.

• Boñ le yigil yoñ i kiha ni ngôñ yoñ. Lelaa u ngwés u nigil? Baa hala a yéne we jam li ntomb i yoñ ngandak ngéda inyu nigil? Tole u ngwés u nigil ndék ni ndék, ndi ngandak ngélé? Pohol kii i nlémél we. Jon boñ ntjega woñ u tééda ki wo. Ibale u nôgda le u nla bé nigil i ngeñ u ntéé le u nlama nigil, boñ biliya i nigil to jôm li manut. Yigil i jôm li manut i nloo yañga. Bebek i mbus jôm li manut, u ga nok line li yigil kayéle u bana ngôñ i kena yigil yoñ ni bisu.​—Filipi 2:13.

• Pohol kii u ga nigil. Ibale u mbem le ngéda yoñ yigil i kola ndi u pohol kii u ga nigil, w’a ‘tibil bé gwélél ngéda yoñ’ i yigil. (Éfésô 5:16) Noode tila ngim miño mi minkwel u gwé ngôñ i nigil. Kiki hihéga, ibale u gwé ngim mbadga i nlo we mahoñol, tila yo. I mamélél ma hiki yigil, u nla kônde mam mape u ga bana ngôñ i nigil.

• U ba bañ ndéñ ndéñ. Noode boñ mahéñha ma mbéda mu ntjega woñ, kiki bo ngéda u ntégbaha i yigil, tole nsoñgi u miño mi minkwel u mpohol i nigil. Jam li nlôôha ba nseñ​—li ta bé ngéda, ngeñ yañen, tole kii u nigil​—ndi le u nigil hiki sonde.

Yigil yés i ga bane bés nseñ ibale di nigil hiki sonde. Di ga lédés maada més ni Yéhôva, di ga nigil i yoñ makidik malam i niñ yés, iloo mam momasôna, di ga bana ñem ngui.​—Yôsua 1:8.