1. (a) Ni sima ngim bioda di nléba ikété Bibel? (b) Lelaa i nôgôl mo i nla bane bés nseñ?

YÉHÔVA a nti bés ngim mambén ma tôbôtôbô ni njel Bañga yé le Bibel. Kiki hihéga, a nsôña ndéñg, i bégés bisat, wip, ni lihiua. (1 Korintô 6:9, 10) Jam lipe ki li yé le, Man Djob le Yésu a bi ti banigil bé oda ini le: “Kenana, yilhana biloñ gwobisôna banigil, ni sôblege bo i jôl li Tata, ni li Man, ni li mbuu mpubi; ni niigaga bo i tééda mam momasôna me bi kal bé. Ndi nuna-ki, me yé ni bé dilo tjodisôna i pam lisuk li ’isi.” (Matéô 28:19, 20) Kinjee jam lilam le mambén ma Djob ma ntat bés! I nôgôl mambén ma, i mboñ le di kônde ti bésbomede lipém, le di ba mbôô, ni le maséé ma ndap yés lihaa ma kônde keñep. Jam lipe li nlôôha ba nseñ li yé le, ndéñbe yés i gwés mambén ma Yéhôva, yak ni noñ oda i yoñ ngaba i téé likalô, bi mboñ le di lémél Djob, di kôs ki bisai gwé.

2, 3. (a) Inyuki Bibel i nti bé bés ngim mambén inyu hiki jam? (b) Mambe mambadga di ga wan munu yigil ini? (Béñge titii i bibôdle.)

² Ndi, ngandak mam i yé le Bibel i nti bé mbén i tôbôtôbô. Kiki hihéga, Bitilna bi gwé bé mambén ma tôbôtôbô ma ma ñunda mintén mi mambot bikristen bi  nlama haba. Lelaa hala a ñunda pék i Yéhôva? Ikété nkoñ isi wonsôna kiki ñwii mi ntagbe, mahabga ma nhéñha inoñnaga ni bilem biloñ, ni bi matén i het bôt ba nlôl. Ibale Bibel i sima ngim mambot ma tôbôtôbô ni bieñg kristen i nlama bana, ki i gwé ha bé mahee i len ini. Inyu manjom ma nyen, Bañga i Djob i nti bé mambén ma tôbôtôbô ma ma nlama éga makidik ma kristen inyu pohol ntén bôlô a nlama sal, ntén matibla a nlama neebe, tole ntén ntuk a nlama pohol. Basañ mbai ni bôt ba niñ botama ba yé kunde i yoñ makidik mu mam ma.

³ Baa hala a nkal bé Yéhôva jam ngéda di gwé ndutu i yoñ makidik ma ngui, ma ma nla héñha niñ yés? Baa Tata wés nu ngii a yé maséé ni makidik més mo ki mo ibale ma mbôk bé mambén mé? Ngéda mbén yo ki yo i ta bé inyu ngim jam, kii i yé le i yis bés ibale makidik més ma nlémél Yéhôva?

4, 5. Lelaa makidik di nyoñ ma ntihba bés ni bôt bape?

⁴ Bôt bahogi ba nhoñol le makidik di nyoñ ma gwé bé nseñ. Inyu yoñ makidik ma ma nlémél Yéhôva, di nlama wan mambén ni matiñ ma di nkoba ikété Bibel ni nôgôl mo. Kiki hihéga, inyu lémél Djob, di nlama niñ inoñnaga ni mbén Djob inyu matjél. (Bibôdle 9:4; Minson mi baôma 15:28, 29) Masoohe ma ga hôla bés i yoñ makidik ma ma nkiha ni matiñ, ni mbén i Bibel.

⁵ Makidik més makeñi ma nla tihba mbôô wés i pes mbuu. Makidik mo ki mo di nyoñ ma ga tihba maada més ni Yéhôva​—inyu loñge tole inyu béba. Makidik malam ma ga lédés maada més ni Djob, ndi ngéda ma yé mabe, ma ga ôbôs mo. Jam lipe ki li yé le, ibale di nyoñ makidik mabe, hala a nla babaa bôt bape i libak li mbuu tole a boñ yak le di yila ngokbagene inyu yap, tole di ôbôs adna i likoda. Ntiik, i yé toi nseñ le di nyoñ makidik malam.​—Añ Rôma 14:19; Galatia 6:7.

6. Kii i nlama éga bés ngéda di nyoñ makidik?

⁶ Kii di nlama boñ inyu ngim jam le Bibel i nti bé mbén i tôbôtôbô? Ha mangéda ma, di nlama ndik bé boñ yom i nlémél bés. Ndi, di nlama wan makas momasô ma jam li, mbus, di yoñ makidik ma nlémél Yéhôva ni ma ma nlona bés bisai gwé.​—Añ Tjémbi 37:5.

7. Ngéda mbén Bibel i tôbôtôbô i ta bé, lelaa di nla yimbe kii Yéhôva a mbémél bés inyu ngim jam?

⁷ Hala a nla hélés we le: ‘Lelaa di ga yi i jam i nlémél Yéhôva ibale Bañga yé le Bibel i nti bé mbén yo ki yo mu jam li?’ Kaat Efésô 5:17 i nkal le: “Tiblana yi sômbôl Nwet [Yéhôva].” Ngéda Bibel i nti bé mbén i tôbôtôbô inyu ngim jam, lelaa di nla yimbe kii Djob a ngwés le di mboñ mu jam li? Di nla yimbe yo ngéda di mbat ikété masoohe le Yéhôva a éga bés ni njel mbuu mpubi wé.

8. Lelaa Yésu a bé yimbe kii Yéhôva a bé sômbôl le a boñ? Ti hihéga.

⁸ Di wan lelaa Yésu a bé yimbe kii Isañ a bé sômbôl le a boñ. Ikété mam ima a bi boñ le Bibel i nsima, Yésu a bi bôk a soohe, mbus a boñ hélha jam inyu jés limut li bôt. (Matéô 14:17-20; 15:34-37) Ngéda a sôga je i ñoñ, Nsohop a lo noode nye le a yilha ngok bikoga inyu mélés njal yé. Ndi, a  bi tjél. (Añ Matéô 4:2-4.) Inyule a bé yi mahoñol ma Isañ loñge loñge, Yésu a bé yi le a nlama bé hielel ngok koga. Ñ, Yésu a bi sôk a tehe le sômbôl Djob i bé bé le a gwélél nya ngui i inyu yéñe yé nyemede. Ni makidik ma, Yésu a bi unda le a bé bôdôl Yéhôva ñem le nyen a éga nye, ni le a jés ki nye.

9, 10. Kii i ga hôla bés i yoñ makidik ma pék? Ti hihéga.

⁹ Ibale di nlama yoñ makidik ma pék kiki Yésu a boñ, di nlama bat Yéhôva le a éga bés. Di nlama noñ maéba mana le: “Bôdôl Yéhôva ñem ni ñem woñ wonsôna, u nigbene bañ bañga yoñ yi wemede. Neebe nye manjel moñ momasôna, ndi a’ téé dinjela tjoñ. U kadba bañ ni wemede le u gwé pék; Kon Yéhôva woñi, u bagba béba.” (Bingéngén 3:5-7) Liyi mahoñol ma Yéhôva ni njel yigil i Bibel li nla hôla bés i yi kii Yéhôva a ngwés le di boñ inyu ngim jam li tôbôtôbô. Mu kiki di ga ke ni bisu i meya ni mahoñol ma Yéhôva, la nyen ñem wés w’a ba bebee i hoo yimbe kii i yé sômbôl yé.​—Tjémbi 119:11, 12.

¹⁰ Di yoñ hihéga: Hégda le mbiibaga sista u yé hiôm i bisabe. A tehe loñge tamb i a yé le a gwés bana, ndi i nhee diye ngandak. Ndi, a mbadba le: ‘Kii nlô wem a yé le a nôgda ibale me mpémés ngandak moni hala?’ I nene le, a mal yi ndimbhe, tolakii nlô wé a ta bé ni nye. Kii i nyis nye hala? Kiki a ma tégbaha ntandaa ngéda ni nlôm, a meya mahoñol ma nlôm inyu ligwéélak li ndék moni ba gwé. Jon a nsôk a yi kii nlôm a yé le a hoñol. Ni nlélém njel nyen, mu kiki di ga meya mahoñol ni manjel ma Yéhôva ndék ni ndék, di ga nañ ikété ngap yés i yimbe kii Tata wés nu ngii a ngwés le di boñ ikété ngandak mam.

11. Mambe mambadga di nla badba ngéda di ñañ tole di nigil Bibel? (Béñge nkéñég matila le: “ Ngéda u nigil Bañga i Djob, badba le.”)

¹¹ Inyu boñ le di meya ni mahoñol ma Yéhôva, di nlama diihe yigil yés i Bibel. Ngéda di ñañ tole di nigil Bañga i Djob, di nla badba le: ‘Kii yigil ini i niiga me inyu Yéhôva, inyu manjel mé ma telepsép, ni inyu mahoñol mé?’ Di nlama bana nlélém libak li ntôp tjémbi David, nu a loñge le: “A Yéhôva, unda me manjel moñ; Niiga me dinjela tjoñ. Éga me mu maliga moñ, u niiga ki me, inyule u yé Nyambe nu tohi yem; Me mbem we nkôm kel.” (Tjémbi 25:4, 5) Mu kiki u nsoñda ngim nlôñ kaat u Bibel, u nla badba le: ‘Lelaa me nla bii biniigana bini i bisélél i niñ yem? Hee homa me nla bii gwo i bisélél? I ndap yem lihaa? I homa wem bôlô? I suklu? I likalô?’ Ngéda di mal yi hee homa di nla bii biniigana bi i bisélél, i nla yila ntombok jam i yimbe lelaa di nla bii gwo i bisélél.

12. Lelaa bikaat gwés ni makoda més, ma nhôla bés i yi kii i yé mahoñol ma Yéhôva inyu ngandak mam?

¹² Njel ipe inyu kônde yi kii Yéhôva a nhoñol, i yé le di wan maéba ma mpémél i bikaat bi ntôñ wé. Kiki hihéga, bikaat bini ni hop pulasi le: Index des publications des Témoins de Jéhovah ni Guide de recherche pour les Témoins de Jéhovah bi nhôla bés i nigil mahoñol ma Yéhôva inyu ngandak mam di nlama yoñ makidik ni bésbomede. Di nlôôha ki ôt nseñ ngéda di ñemble loñge loñge i makoda, di yoñok ki ngaba mu. I soñda i ngii mam ba yé niiga bés, i ga hôla bés i  yi loñge loñge kii i yé mahoñol ma Yéhôva ni i bana minlélém mi mahoñol kiki nye. Mu kiki di ga ligip i boñ biliya i gwélél bijek bi mbuu gwobisôna Yéhôva a nti bés, di ga meya mahoñol mé ndék ni ndék. Sôk i nsôk, di ga ba bebee i yoñ makidik ma ma nlona bés bisai bi Djob jés li gwéha.

13. Ti hihéga hi ñunda lelaa di nla yoñ makidik ma pék ngéda di wan kii Yéhôva a nhoñol.

¹³ Di wan hihéga hiada hi hi ñunda lelaa liyi mahoñol ma Yéhôva li nla nhôla bés i yoñ makidik malam. Kiki di yé batéé likalô, di nla bana ngôñ i bôdôl bôlô i nsañal i ngéda yosôna. Inyu pam i boñ hala, di mbôdôl yoñ bitelbene i suhus likala jés li niñ. I nlélém ngéda, di nla bôdôl tôñ ni bésbomede lelaa di yé le di ba toi maséé ni ndék bigwel moo. I yé maliga le, mbén yo ki yo i nkal bé le di yila nsañal inyu sélél Yéhôva; di yé le di ke ni bisu i sélél nye kiki baañal ñañ nlam. Ndi, Yésu a bôn bés le, ibabé pééna, i bet ba mboñ bisesema inyu Ane ba ga kôhna bisai bikeñi. (Añ Lukas 18:29, 30.) Iloo hala, ngéda di nti nye ‘makébla ma ngôñ ma ma nlôl i nyo wés,’ di boñok ki i jam di nla inyu nit bañga base, Bitilna bi ñunda le hala a nlémél Yéhôva. (Tjémbi 119:108; 2 Korintô 9:7) Inoñnaga ni mahoñol ma Bitilna ma, ni ngéda di mbat mahôla ikété masoohe, baa di ta bé le di yimbe mahoñol ma Yéhôva? I yoñ ngéda i hek pék mu mam ma di ntehe i nla hôla bés i yoñ makidik ma ma ntibil kiha ni bésbomede ni ma ma ga lona bés bisai bi Tata wés nu ngii.

14. Lelaa u nla yi ibale ngim ntén haba u nlémél Yéhôva?

¹⁴ Di wan hihéga hipe: Hégda le ngim mintén mi mahabga ma ma nlémél we, ma yé le ma tééñga bilôk bikéé bihogi ikété likoda. Ndi, i nla ba le u nyi bé mbén i tôbôtôbô i i nsôña mahabga ma. Kii Yéhôva a nhoñol mu jam li? Ñôma Paul a bi ti maéba mana le: “Hala ki nyen inyu bôda, ba engep mbot nya i kôli, ba ba mamoma, ba hôdôk ki manyuu, ha i bak tjôñ bé, to keep gwom bi gôl, to minsañ mi perl, to haba mbot i nhe ngandak ndamba, ndi ba engep ndigi minson minlam, inyule hala a kôli ni bôda ba nsinge Nyambe miñem.” (1 Timôtéô 2:9, 10)  Ntiik, maéba mana ma mbéñge yak bilôk bikéé bi bôlôm. Kiki bôt ba ba tiñi ni Yéhôva, ngôñ yés i ta ndik bé le di boñ i jam i nlémél bés, ndi di ntôñ yak lelaa bôt bape b’a nôgda ngéda ba ga tehe haba wés ni bieng gwés bi ño. Inyule di yé mamoma, di ntôñ ni i jam bilôk bikéé gwés bi nla nôgda ibale ba ntehe mahabga ma. Inyu gwéha di gwé inyu yap, di ga keñgle i babaa bo tole i tééñga bo. (1 Korintô 10:23, 24; Filipi 3:17) I tééda i jam Bitilna bi nkal i nla hôla bés i yimbe mahoñol ma Yéhôva mu jam li, i nla ki éga bés ngéda di nyoñ makidik inyu lémél nye.

15, 16. (a) Kii Yéhôva a nôgda ibale di nkeñgle mahoñol ma ndéñg? (b) Ngéda di mpohol ngim mintuk di nsômbôl béñge tole yoñ ngaba, lelaa di nla yi kii i nlémél Yéhôva? (c) Lelaa di nla yoñ makidik ma ngui?

¹⁵ Bibel i nyelel le, hala a bi siidaha Yéhôva ñem ngéda bôt ba bé boñ mam mabe, ni ‘le hégda yosôna i mahoñol ma ñem wap i ba ndik béba ngéda yosôna.’ (Añ Bibôdle 6:5, 6.) Hala a nhôla bés i nok le ibale di ñemel mu mahoñol més le di yé nke i ndéñg, hala a nla tinde bés i boñ béba ikeñi i Bibel i nsôña, i i nkiha bé to ni mahoñol ma Yéhôva. Nnigil Yakôbô a tila le: “Ndi pék i nlôl ngii, kii jam li bisu, i yé pubi, i yé ki nwee, i gwé loñgeñem, yak ni tomba ñem; i yôni ki ni konangoo ni matam malam; i gwé bé nhiômôk, to malôga.” (Yakôbô 3:17) I yi jam lini, i nlama tinde bés i tjél mintuk mi nlôñôs mahoñol ma ndéñg ikété miñem nwés. Kristen i i yé mut yihe i gwé bé ngôñ i bat too a nlama béñge mintuk, bisinima tole añ ngim kaat i i ñunda i gwom Yéhôva a ñoo. Mahoñol ma Yéhôva ma nene loñge loñge ikété Bañga yé le Bibel.

¹⁶ I nla pam le ikété ngandak mam, di yoñ makidik ma ma yé maselna, ndi momasôna ma lémél Yéhôva. Ngim mangéda, inyu makidik ma ngui, njel pék i nla ba le, di bat mimañ tole minhôôlak mi bikristen bipe maéba. (Titô 2:3-5; Yakôbô 5:13-15) Ntiik, hala a ga ba bé loñge le di bat bôt bape le bon ba kit inyu yés. Bikristen bi nlama sélés ngap yap i yi bagal jam lilam ni jam libe. (Lôk Héber 5:14) Bés bobasô di nlama niñ inoñnaga ni bini bibañga bi Paul le: “Hi mut a’ begee yé yé mbegee.”​—Galatia 6:5.

17. Umbe nseñ di gwé i yoñ makidik ma nlémél Yéhôva?

¹⁷ Ngéda makidik més ma niñne i ngii mahoñol ma Yéhôva, di nkôôge nye i pañ. (Yakôbô 4:8) Di nlémél nye, di nkôs ki bisai gwé. Mbus, hala a nlédés hémle yés inyu Tata wés nu a yé i ngii. Jon, di nwas le mambén ni matiñ ma Bibel mon ma éga bés, inyule ma nyelel mahoñol ma Djob inyu ngim mam. Maliga ma yé le, di ga bana hiki ngéda ngim jam li mondo i nigil inyu Yéhôva. (Hiôb 26:14) Ibale di mboñ biliya bi ngui, di nla kôhna pék, yi, ni ngap i yi bagal jam lilam ni jam libe inyu yoñ makidik malam. (Bingéngén 2:1-5) Mahoñol ni bipék bi bikwéha bi bôt bi nlo, bi kenek; ndi ntôp tjémbi a nhôñlaha bés loñge le: “Pék Yéhôva i umi siñ mba ni mba, mahoñol ma ñem wé letee ni tjai tjodisôna.” (Tjémbi 33:11) Ibabé nkaa, di nla yoñ makidik ma nlôôha ba malam ngéda mahoñol més ni maboñog més ma nkiha ni mahoñol ma Djob jés nu pék yosôna le, Yéhôva.