YÉSU a bôk legel le banigil bé ba bé lama yoñ ngaba i libumbul likeñi munu dilo di nsôk tini. (Matéô 9:37; 24:14) Di béñge lelaa bibuk gwé bi nyon i nya i yé tôbôtôbô i mbok i Transcarpathia, i loñ Ukren. Ikété bitison biaa bi yé mu libôga li, batéé likalô ba nloo 5 400, nkabak ikété 50 ma makoda. * Hélha jam le, mut 1 i ngii bôt 4 ikété bôt bobasôna ba nyén mu bitison biaa bini, a yé Mbôgi Yéhôva!

Lelaa bôt ba libôga li ba yé? Mankéé wada nu a niñ nyoo le Vasile a nkal le: “Bôt ba niñ hana ba ndiihe Bibel, ba ndiihe telepsép, mahaa ma ngwéhna ki ngandak, ba yé ki bebee i hôlna wada ni nuu.” A nkônde le: “Ba mbéna bé neebe biniigana gwés. Ndi ngéda u ñunda bo yom Bibel i nkal, ba ntibil emble we.”

Ñ, bilôk bikéé gwés bi bôlôm ni bi bôda bi mboma mandutu mahogi ma di mbéna bé boma, inyule ba ntéé likalô i het nsoñgi batéé likalô u nlôôha ba nkeñi ikolba bôt ba libôga. Kiki hihéga, ngim likoda i gwé letee ni 134 batéé likalô, ndi ba gwé ndigi 50 ma mandap libôga jap li likalô! Lelaa batéé likalô ba mboñ inyu yémbél ndutu i?

Ngandak lôk kéé i nyoñ bitelbene i ke téé likalô i het batéé likalô ba nhañ. Mankéé wada nu jôi jé le Yônas nu a gwé 90 ma nwii, a nkal le: “Libôga jés li likalô, hiki ntéé likalô a nlama koode likôga jada tole ima. Me bé téé likalô munu letee ni ngéda me bi kwo kon, me bi ke liké li 160 kilôméta i het batéé likalô ba bé bé, inyu téé likalô nyoo ni hop u Oñgri. Inyu yoñ mashin, me bé lama tôde i ngeñ 4:00 i kegla, me bé téé ki likalô letee ni ngeñ 6:00 i kôkôa, ngéda mashin a nkahal huu. Me bé boñ hala ngélé iba tole aa hiki sonde.” Batéé likalô ba nlama boñ biliya i ke mambok mape. Baa mankéé Yônas a bi nôgda le biliya gwé bi bé nseñ? A nkal le: “Me bi nok maséé makeñi mu nson u. Me bi bana maséé i hôla lihaa jada li li niñ haa ni batéé likalô, i léba maliga.”

I yé maliga le, bôt bobasôna bé bon ba nla ke mbôñgô liké inyu téé likalô. Ndi bobasôna, yak miñunuk mi batéé likalô, ba nla liya i tihba bôt bobasôna ba libôga jap. Jon, i nwii 2017, bitison bini gwo baa, bi bi pôdna inyu tégbaha Mbigda nyemb Yésu, kayéle nsoñgi bôt u bi kodba, u bi loo u batéé likalô ngélé iba​—bebee le pes nsoñgi u bôt ba loñ bobasôna. Ibabé nkaa, to hee homa di nsal kiki batéé likalô, ‘nson Nwet u yii ngandak i yônôs.’​—1 Korintô 15:58.