Sara * a nkal le: “Me yé nsut, me nwo ki nyuu i pot i ti bôt. Jon i ngéda me yé ni bôt ba ba nyai, ba ban-ga makénd iloo héga, me nla nyoi. Ndi me yé maséé i ngéda me yé ni bôt ba gwé ñemlima, ba bak suhulnyuu. Me nla kwel ni i nya bôt i, me yible bo ñem wem, me kal ki bo mam ma ntééñga me. I nya bôt i yon i yé mawanda mem.”

Bibañga bi Sara bi ñunda le, i ngéda di gwé ñemlima, bôt ba nkon maséé i ba mawanda més. Ni ki le, ñemlima u nlémél Yéhôva. Bañga yé i nkal le: “Ni haba . . . ñemlima.” (Kôlôsé 3:12) Kii i yé ñemlima? Lelaa Yésu a bi unda ñemlima? Lelaa lem ini i nla hôla bés i kônde ba maséé?

Ñemlima u yé lem i mut nsañ. Mut a gwé ñemlima a yé minyaô ni bôt bape, a ñunup bé i ngéda ba mboñ nye béba, a yé ki mut hôtnyuu.

I ngéda mut a gwé ñemlima, hala a nkobla bé le a mbomb kii bôt bape ba nla hoñol. I buk Grikia Bibel i ngwélél inyu pôdôl “ñemlima” i bé gwéélana inyu pôdôl hosi i bikai i ba mbémbe. Hosi i ngi gwé ngui ndi ba niiga yo i hôt nyuu. Nlélém ni bés, ngéda di gwé ñemlima, di mbémbe bibomb gwés, di kahal niñ ikété nsañ ni bôt bape.

Di yé le di kal le: ‘Me bi gwééna bé me ñemlima.’ Munu nkoñ ’isi unu, bôt ba nyai ni bôt ba nyi bé hôt nyuu bon ba nkéña bés, jon i ta bé bun i bana ñemlima. (Rôma 7:19) I pot mbale, i mbéda biliya bi ngui inyu bana ñemlima, ndi mbuu mpubi u Yéhôva u ga hôla bés i bana i lem ilam i. (Galatia 5:22, 23) Inyuki di nlama boñ biliya i bana ñemlima?

Ñemlima u ñôt bôt ipañ yés. Kiki Sara nu di mbôk pôdôl a nkal, di yé maséé i ba ni bôt ba gwé ñemlima. Yésu a yé ndémbél ikeñi i ñemlima ni loñgeñem. (2 Korintô 10:1) Yak boñge batitigi ba ba mbéna bé adbe bakén ba bôt ba bé kwo nye nyuu.​—Markô 10:13-16.

Ñemlima u yé nseñ inyu yés ni inyu bôt ba nkéña bés. Ngéda di gwé ñemlima, di  nhoo bé unup, di nyéyéi bé to bôt. (Bingéngén 16:32) Hala a mboñ le kiññem i ga kéés bé bés inyule di mbep pôdôs mut, téntén mut di ngwés. Ñemlima u mboñ ki le i bôt ba nkéña bés ba nok bañ ndutu, inyule di ngwelba bé.

To hala kii Yésu a bé a pégi ngandak, a bééna ñem nwee. Ngandak bôt ha ngéda yé i bé boma mandutu, ba bak ba bééga mambegee, jon ba bééna ngôñ ni hogbe. Kinje hogbe ba bi lama kôs ngéda Yésu a bi kal bo le: “Lona i meeni, . . . inyule me gwé ñem nwee ni suhulnyuu”!​—Matéô 11:28, 29.

Lelaa di nla boñ inyu bana ñemlima kiki Yésu? Di nlama nigil Bañga i Djob inyu tehe lelaa Yésu a bé boñ i ngéda ba bé suu nye ni ngéda a bé tégbaha mangéda mabe. I mbus, i ngeñ mut a ñunbaha bés, di mboñ biliya i kôna Yésu. (1 Pétrô 2:21) Di béñge mam maa ma bi hôla Yésu i bana ñemlima.

Yésu a bé mut suhulnyuu. Yésu a kal le a gwé ‘ñem nwee, a bak suhulnyuu.’ (Matéô 11:29) Bibel i mbéna sima bilem bini ntôñ, inyule maada ma yé ipôla ñemlima ni suhulnyuu. (Éfésô 4:1-3) Lelaa?

Suhulnyuu i nkéñ bés i hoñol libak likeñi, i ba mut a nhoo unup. Lelaa Yésu a bi boñ ngéda bôt ba bi kal nye le a yé “mbéna je ni mut nyôba wai”? A bi nwas le maboñok mé mon ma ñunda le hala a ta bé maliga, a kal ki ni ñemlima le: “Pék i nene ikété minson nwé.”​—Matéô 11:19.

Ibale mut a nleñ we bibuk bibe inyu kôgôô yoñ, inyule u yé muda tole inyule u yé munlôm, tole inyu libak joñ, boñ biliya i timbhe nye ni ñemlima. Peter, nu a yé mañ i Afrika nwelmbok, a nkal le: “Ngéda mut a mbabaa me ni bibuk gwé, me mbadba le: ‘Ibale Yésu nyen ba pôdôs hala, ki a mboñ lelaa?’” A nkônde le: “Me mbéna bigda le me ta bé nseñ iloo bôt bape.”

Yésu a bé yi bibomb bi bôt ba binam. Banigil ba Yésu ba bééna mahoñol malam, ndi ngim mangéda, bibomb gwap bi bé bi nkéñ bo i boñ loñge. Kiki hihéga, u u nsôk ilole Yésu a nwo, Pétrô, Yakôbô, ni Yôhanes ba bi yén bé péé kiki a bi kal bo. Ndi Yésu a bi nok le hilo hi bi yuu bo, jon a kal le: “Mbuu u nyamnda yaga ni ngôñ, ndi minsôn mi mbomb.” (Matéô 26:40, 41) Kiki Yésu a bé nok baôma bé, inyu hala nyen a bi unbene bé bo.

Sita yada le Mandy a bééna lem i kéés bôt, ndi i len ini a mboñ biliya bi ngui i kôna ñemlima u Yésu. A nkal le: “Me noode nihbe bibomb bi bôt bape, me béñgege bilem gwap bilam kiki Yéhôva.” Ñ, di kôna ñem ngôô u Yésu mu kii di ñunda bôt bape ñemlima.

Yésu a bé bii mam momasôna i moo ma Nyambe. Ngéda Yésu a bé hana ’isi, a bi boma ngitelepsép. Bôt ba bi nok bé nye, ba oo nye, ba kép ki nye mbai. To hala, a bééna ñem nwee inyule a bi “ti nyemede i moo ma Nu a nkéés ni telepsép.” (1 Pétrô 2:23) Yésu a bé yi le Yéhôva a ntôñ nye, le a ga hôla nye i hônba ngitelepsép, a kogse ki i bet ba bé tééñga nye.

Ibale di ñunup ngéda di mboma ngitelepsép, ndi di noode sôñ bésbomede, mam ma yé le ma ôbi. Jon Bitilna bi hoñlaha bés le: “Hiun hi mut binam hi nlona bé telepsép i Nyambe.” (Yakôbô 1:20) To ibale mut a mboñ bés béba, kiki di yé bikwéha bi bôt, di yé le di bep timbhe.

Sita yada le Cathy nu a yé loñ Jaman a bé hoñol le: ‘Ibale u nsôñ bé wemede, njee a ga sôñ we?’ Ndi ngéda a bi kahal bôdôl Yéhôva ñem a bi héñha mahoñol. A nkal le: “Nano me nyéñ ha bé sôñ memede. Me ntimbhe bôt ni ñemlima me yik le Yéhôva a ntehe mam momasôna i nya i yôni.” Ibale u ma boma ngitelepsép, bôdôl Nyambe ñem kiki Yésu a bi boñ, hala a ga hôla we i unda ñem nwee.

Yésu a bi kal le ibale di nsômbôl ba maséé, di nlama bana ñemlima. A kal le: “Maséé ni bôt ba gwé ñem nwee.” (Matéô 5:5) Di béñge kiki di nla unda ñemlima munu mam mana ma noñ.

Ñemlima u nhôla i sañgal mindañ ipôla babiina. Mankéé wada le Robert nu a yé loñ Ôstrélia a nkal le: “Me bi lôôha leñ nwaa wem bibuk bibe. Ndi ngéda u nleñ mut bibuk bibe, u ta ha bé le u sas gwo. Hala a bi tééñga me ngandak i ngéda me bi nôgda le me mbabaa nye.”

“Bés bobasôna di mbaage ngandak ngélé” ngéda di mpot, jon ibale babiina ba nyoñ bé ngéda ni bibuk gwap, ba nla bana mindañ. (Yakôbô 3:2) Mu mangéda ma, ñemlima u nla hôla bés i mom nwee, ni i tibil pohol bibuk gwés.​—Bingéngén 17:27.

Robert a bi boñ biliya bi ngui inyu bana ñem nwee ni hôtnyuu. Mam ma bi sôk lelaa? A nkal le: “I len ini, ngéda me ni nwaa wem di nôgla bé, me nyoñ ngéda i emble nye, me mpôdôs nye ni ñemlima, me mboñ ki biliya le me unup bañ. Hala a bi boñ le libii jés li kônde lama.”

Ñemlima u nhôla bés i nôgla ni bôt bape. I bet ba mpala unup ba gwé bé ngandak mawanda. Ndi ñemlima u nhôla bés “i tééda. . . maada ma nsañ.” (Éfésô 4:2, 3) Cathy nu di mbôk pôdôl a nkal le: “Ñemlima u nhôla me i nôgla ni mintén mi bôt nwominsôna, yak i bet ba yé ndutu.”

Ñemlima u nlona nsañ. Bibel i ñunda le maada ma yé ipôla “pék i nlôl i ngii” lôñni ñemlima ni nsañ. (Yakôbô 3:13, 17) Mut ñemlima a gwé “ñem nwee.” (Bingéngén 14:30) Martin nu a bi boñ biliya bi ngui inyu bana ñemlima a nkal le: “I len ini me nyégsa ha bé bôt i neebe i yom me nkal, nano me niñ ikété maséé ni nsañ.”

I pot mbale, i ta bé bun i bana ñemlima. Mankéé wada a nkal le: “Me nsôô bé kal bé le, yak i len ini i yé i pam le me bep unup.” Ndi Yéhôva nu a nti bés makénd i ke ni bisu i bana ñemlima a ga hôla bés mu sañ i. (Yésaya 41:10; 1 Timôtéô 6:11) ‘A ga mélés yigil yés; a ga ti bé ngui.’ (1 Pétrô 5:10) I mbus ngéda, di ga pam i kôna “ñemlima ni loñgeñem i Kristô” kiki ñôma Paul.​—2 Korintô 10:1.