1. Kii Yésu a bi kal inyu nkus u u yé i ngii?

NKUS wonsôna bé won u nene i mis. I pot maliga, i mam ma nlôôha mahee ma ntéa bé. Mu Nkwel wé a bi ti i ngii hikôa, Yésu a bi unda le nkus u u yé i ngii, u nloo nkus u yé hana ’isi. I mbus a kônde le: “I homa nkus woñ u yéne, nyoo nyen yak ñem woñ w’a ba.” (Matéô 6:19-21) I mam ma yéne bés nseñ, mon di mbéna yéñ. Di ñunda le di ntééda “nkus i ngii” ngéda di mboñ biliya i bana jôl lilam bisu bi Djob. Yésu a bi kal le i nkus u, u nla bé tjiba, to bôt ba wip ba nla bé yoñ wo.

2. (a) Inoñnaga ni kaat 2 Korintô 4:17, 18, mambe maéba Paul a nti bés? (b) Kii di ga tehe munu yigil ini?

² Ñôma Paul a nti bés mana maéba le: “Di mbéñge . . . i mam ma nene bé i mis.” (Añ 2 Korintô 4:17, 18.) Mu nkus u nene bé, di nla sima bisai bi bi mbem bés i mbok yondo. Munu yigil ini, di ga tehe mam ma-na ma ma nlôôha mahee di nla bana nano: Maada malam ni Djob, masoohe, mahôla ma mbuu mpubi, ni mahôla Yéhôva, Yésu ni biañgel ba nti bés i nson likalô. Di ga tehe ki i mam di nla boñ inyu unda le, di nti Yéhôva mayéga inyu makébla ma ma nene bé.

3. Umbe nkus u nloo minkus nwominsôna, lelaa di nla kôs wo?

³ Nkus u nloo minkus nwominsôna, u yé liwanda ni Yéhôva Djob. (Tjémbi 25:14) Lelaa Djob a nla ba  liwanda li bikwéha bi bôt ibabé le a nimis libak jé li pubhaga? Hala a nla bôña inyule sesema i Yésu i ‘nhéya béba i nkoñ ’isi.’ (Yôhanes 1:29) Ilole Yésu a nlo hana ’isi, Yéhôva a bé yi le a’ téñbe letee ni i nyemb, a tohol ki nkoñ ’isi. Jon Yéhôva a bé le a ba liwanda li bôt ba bi niñ ilole Kristô a nti sesema yé.​—Rôma 3:25.

4. Ti dihéga di bôt ba kôba ba ba bé mawanda ma Djob.

⁴ Di pôdôl le ngim bôt i kôba i i bi yila mawanda ma Djob. Abraham a bééna hémle i ngui. Iloo hikôô hi nwii i mbus nyemb yé, Yéhôva a bi sébél nye le “liwanda jem.” (Yésaya 41:8) Hala a ñunda le to nyemb i nla bé mélés liwanda jés ni Yéhôva. Inyu Yéhôva, Abraham a yé niñ. (Lukas 20:37, 38) Di gwé ki ndémbél i Hiôb. Ngéda biañgel gwobisôna bi bi kodba nyoo ngii, Yéhôva a bi bégés Hiôb bisu gwap. A bi sébél nye le: “Mut ngi nsohi, a téé ki sép, a konok Nyambe woñi, a kômôk ki béba mbus.” (Hiôb 1:6-8) Lelaa Yéhôva a bé tehe Daniel nu a bi téñbe ni nye jam kiki 80 nwii, tolakii a bé ipôla bôt ba bé gwélél bé Djob? Biañgel bi bi yis nye letee ni ngélé aa le a bé mut nu a “nlôôha ba nseñ” i mis ma Djob. (Daniel 9:23; 10:11, 19, MN.) Di yé nkwoog nkaa le Yéhôva a nyamnda ni ngôñ i tugul mawanda mé ma ma bi wo.​—Hiôb 14:15.

5. Kii di nlama boñ inyu ba mawanda ma Yéhôva?

⁵ Bikwéha bi bôt gwañen i len ini bi yé mawanda ma Yéhôva? Didun. Kii i nyis bés hala? I nkoñ ’isi wonsôna ngandak bôlôm, bôda ni boñge ba ñunda ni bihiumul gwap le ba yé toi mawanda ma Djob. Yéhôva “a yé liwanda li bôt ba yé sép.” (Bingéngén 3:32) Kiki ba nhémle sesema i Yésu, jon ba yé mawanda mé. Binoñ bi gwon bi nti bés pôla i ti bésbomede sesema inyu boñ sômbôl i Djob, ni i sôblana. Ngéda di mboñ i mam mana, di njôp i ntôñ u bikristen bi bi yé ‘mawanda ma ñem nyuu’ ma Ñane ngiinda yosôna!

6. Lelaa di nla unda le di yé maséé i ba mawanda ma Djob?

⁶ Lelaa di nla unda le, i ba liwanda ni Nyambe i yé kiki nkus inyu yés? Ngeñ di ntéñbe ni nye niñ yés yosôna kiki Abraham bo Hiôb, ba ba bi téñbe ni nye iloo mbôgôl nwii. Kiki Daniel, di nlama diihe maada malam di gwé ni Djob iloo niñ yés. (Daniel 6:7, 10, 16, 22) Ni mahôla ma Yéhôva, di nla yémbél mandutu momasôna di mboma, kayéle di ba mawanda mé ma ñem nyuu niñ yés yosôna.​—Filipi 4:13.

7. (a) Inoñnaga ni kaat Bingéngén 15:8, lelaa Yéhôva a ntehe masoohe més? (b) Lelaa Yéhôva a ntimbhe masoohe més?

⁷ Nkus umpe di ntehe bé u yé masoohe. Bañga mawanda i ngwés tégbaha ngéda i kwel. Baa yak bés di mbéna kwel ni Yéhôva? Ñ! Yéhôva a mpôdôs bés ni njel Bañga yé, mu nyen a nyeelene bés mahoñol mé. Di mpôdôs nye ni njel masoohe, di nyible ki nye ñem. Yéhôva a yé maséé i emble masoohe més. (Añ Bingéngén 15:8.) Kiki bañga Liwanda, Yéhôva a ñemble ndik bé masoohe més, ndi a ntimbhe yak mo. Ngim mangéda a nhoo timbhe. Ndi mangéda mape, di nlama ke ni bisu  i bat nye i jam di nsômbôl. To hala, di nyi ntiik le, a ga timbhe i loñge ngéda. I yé maliga le, i nla pam le Yéhôva a timbhe bé bés kiki di bemek. Kiki hihéga, i nla pam le a mélés bé ndutu yés, ndi a ti bés ngui ni pék i ‘hônba yo.’​—1 Korintô 10:13.

8. Lelaa di nla unda le di nkon maséé ni likébla li masoohe?

⁸ Lelaa di nla unda le di nkon maséé ni likébla lini li mbuma ñañ le masoohe? Njel yada i yé le, di noñ mana maéba ma Nyambe le: “Soohana hiki ngéda.” (1 Tésalônika 5:17) Yéhôva a nyégsa bé bés i soohe. A nwas le bésbomede di yoñ makidik i soohe, a nti ki bés makénd le di “téñbe ikété masoohe.” (Rôma 12:12) Jon di nla unda le di nkon maséé ni likébla li, ngéda di nsoohe ngandak ngélé hiki kel. Di nlama bé hôya ti Yéhôva mayéga ni bibégés mu masoohe més.​—Tjémbi 145:2, 3.

9. (a) Kii mankéé Chris a nôgda inyu masoohe? (b) Kii we u nôgda?

⁹ Kiki di ngwélél Yéhôva, di tehge nye a ntimbhe masoohe més, hala nyen di nke ni bisu i ti nye mayéga inyu likébla lini le masoohe. Di yoñ hihéga hi mankéé Chris, nu a ma boñ 47 nwii i nson nsañal, a nkal le: “Me nlôôha kon maséé i tôde kegla tutu inyu soohe. Kinje jam lilam i pôdôs Yéhôva bikekela i ngéda hiañgaa hi ntip pam, mbok yosôna i bayak! Bilama bi, bi ntinde me i ti nye mayéga inyu mam malam momasôna a nti bés, yak inyu likébla li masoohe. Mbus, i ngéda me nsoohe kôkôa, me yé maséé i nañal ni kiññem i mpôp.”

10. Inyuki di nlama diihe mbuu mpubi?

¹⁰ Likébla li Djob lipe li li nene bé li yé mbuu mpubi. Yésu a bi kal le  di waa bañ yagal mbuu mpubi. (Lukas 11:9, 13) Ni njel mbuu wé mpubi, Yéhôva a nti bés ngui, hala wee “lipémba li li nloo li mut binam.” (2 Korintô 4:7; Minson mi baôma 1:8) Ni mahôla ma mbuu mpubi, di nla yémbél to mambe manoodana di yé le di boma.

11. Lelaa mbuu mpubi u nhôla bés?

¹¹ Mbuu mpubi u nla hôla bés i gwel minson mi ntôñ. U nla kéñbaha ngap yés. Bésbomede di nyi le, ngui yés bé yon i mboñ le di sal minson mi nwominsôna, ndi mbuu Djob won u nhôla bés.

12. Inoñnaga ni kaat Tjémbi 139:23, 24, inyuki di nlama bat Yéhôva mbuu wé mpubi?

¹² Njel ipe di nla gwélél inyu unda le di yé maséé ni likébla li mbuu mpubi i yé le, di soohe Yéhôva le a hôla bés i wan miñem nwés inyu yi too di gwé mahoñol mabe. (Añ Tjémbi 139:23, 24.) Ibale di mbat nye i jam li, a yé le a gwélél mbuu mpubi wé inyu yeelene bés mahoñol mabe di gwé. Ni ki le, ibale di nléba le di gwé mahoñol mabe, di nlama bat Nyambe mbuu wé inyu boñ le di jôs mahoñol ma. Ni njel i, di ñunda le di njo sañ inyu keñgle mam ma nla boñ le Yéhôva a ti ha bé bés mbuu wé.​—Éfésô 4:30.

13. Kii i nla tinde bés i kônde ti Yéhôva mayéga inyu mbuu mpubi?

¹³ Di nla ki unda le di yé maséé ni likébla li mbuu mpubi ngéda di nhek pék mu mam mbuu mpubi u mboñ i len ini. Ilole Yésu a mbet i ngii, a kal banigil bé le: “Ndi n’a kôhna ngui ngéda mbuu mpubi w’a lo i ngii nan, ha nyen n’a ba mbôgi yem . . . letee ni masuk ma hisi.” (Minson mi baôma 1:8) Bibañga bini bi yé yon i nya i mbuma ñañ. Ni mahôla ma mbuu mpubi, jam kiki bo didun juem ni pes di Mbôgi Yéhôva di yé ntjamak ni nkoñ ’isi wonsôna. Di yé ki ikété paradis i mbuu inyule mbuu u Djob u nhôla bés i hôlôs bilem bilam  kiki bo gwéha, nsañ, wongut, loñgeñem, ñem nlam, hémle, ñemlima ni hôtnyuu. Bilem bilam bini gwon bi yé “litam li mbuu.” (Galatia 5:22, 23) Kinje likébla lilam!

14. Mambe mahôla ma nene bé di nkôs ngéda di yé likalô?

¹⁴ Di gwé nkus umpe u u nene bé, di “ngwel nson lôñ yada” ni Yéhôva, Yésu ni biañgel. (2 Korintô 6:1) Di nsal ni bo hiki ngéda di nyoñ ngaba nson likalô. Paul a kal inyu yé ni inyu i bet ba nyoñ ngaba likalô le: “Di yé baso bagwelnson ba Nyambe.” (1 Korintô 3:9) Ngéda di nyoñ ngaba nson likalô, di yé yak baso bagwelnson ba Yésu. Bigda le, ngéda Yésu a bi kal banigil bé le ba “yilha bôt ba biloñ gwobisôna banigil,” a bi kônde le: “Me yé ni bé.” (Matéô 28:19, 20) Kii di nla kal inyu biañgel? Kinje bisai i sal ni biañgel ngéda di ñañle ‘i bôt ba nyééne hana ’isi ñañ nlam u boga’!​—Masoola 14:6.

15. Umbe ñañ u Bibel u ñunda le Yéhôva a nyoñ ngaba i nson likalô?

¹⁵ Kii di mpam i boñ ni mahôla mana ma nlôl i ngii? Ngéda di nwes mbôô i Ane, mbôô ipe i nkwo miñem minlam, i nañ ki. (Matéô 13:18, 23) Njee a néñés i mbôô i, a boñok ki le i num matam? Yésu a bi kal le mut nye ki nye a nla bé yila nnigil wé ibale “Tata . . . a ñôt bé nye.” (Yôhanes 6:44) Ñañ u Bibel wada u nhôla bés i nok i jam li. Hoñol i ngéda Paul a bé añle bôda ñañ nlam, ba bak i mbus nwemel u tison i Filipi. Béñge i jam Bibel i nkal inyu muda wada ipôla bôda ba, le Lidia: “Yéhôva a yibil ñem wé wonsôna le a tibil nok i mam Paul a bé pot.” (Minson mi baôma 16:13-15) Ibôdôl ha ngéda i, Yéhôva a ma ôt didun di bôt dipe kiki Lidia.

16. Njee di nlama ti lipém inyu matam malam di nkôs likalô?

¹⁶ I pot maliga, njee a mboñ le nson likalô u séla loñge? Paul a bi timbhe i mbadga i, ngéda a bi tilna likoda li Korintô le: “Me bi bel, Apôlô a kôp malép, ndi Nyambe nyen a mboñ le i nañ, kayéle nu a mbel a ta bé to jam, to nu a nkôp malép, ndik Nyambe nu a mboñ le i nañ.” (1 Korintô 3:6, 7) Kiki Paul, Yéhôva nyen di nlama ti lipém inyu matam malam di nkôs likalô.

17. Lelaa di nla unda le di yé maséé i ba “baso bagwelnson” ba Nyambe, ba Kristô, ni ba biañgel?

¹⁷ Lelaa di nla unda le di nti mayéga inyu nsima di gwé i ba “baso bagwelnson” ba Nyambe, ba Kristô, ni ba biañgel? Di nlama yéñ manjel i añle bôt bape ñañ nlam. Di nla gwélél manjel kiki bo likalô li “mbamba ni li mandap ni mandap.” (Minson mi baôma 20:20) Ngandak lôk kéé i ntééne i bôt ba mboma hiki kel likalô. Ngéda ba mboma nkén mut, ba nyéga nye ni minyaô, ba bôdôl nkwel. Ibale i mut nu a yé bebee i emble bo, ba ñañle nye ñañ nlam u Ane ni likeñge.

18-19. (a) Lelaa di nkôp malép mu i mbôô i maliga? (b) Ti hihéga hi hi ñunda lelaa Yéhôva a bi hôla nnigil Bibel wada.

¹⁸ Kiki di yé “baso bagwelnson ba Nyambe,” di nlama ndik bé bel mbôô, ndi di nlama ki kôp yo malép. Ngéda mut a ñunda le a ngwés ñañ nlam,  di nlama boñ kii yosôna di nla inyu témb i yuuga nye ni njômbi i bôdôl yigil Bibel, ibale di pégi, di nla bat mankéé numpe le a kee i yuuga nye. Ngéda di ntehe lelaa Yéhôva a nhôla nnigil Bibel i hol ndék ni ndék, hala a nkônha bés maséé.

¹⁹ Di yoñ hihéga hi Rafalalani, mut makañ nu a mboñ matibla ma nkoñ i Afrika Nwelmbok. I mam a bi nigil i Bibel ma bi lémél nye ngandak. Ndi i bi lôôha bane nye ndutu i neebe i jam Bibel i niiga inyu nkwel ni basôgôsôgôl ba ba bi wo. (Ndiimba Mbén 18:10-12) Ndék ni ndék, a bi nwas le Yéhôva a hôla nye i héñha mahoñol. Sôk i nsôk, a nwas bôlô yé i matibla ma nkoñ, to hala kii yon i bé ti nye koga kel. I len ini, Rafalalani a gwé 60 nwii, a nkal: “Me nti Mbôgi Yéhôva mayéga inyule ba bi hôla me i ngandak manjel; kiki hihéga, ba bi lébna me bôlô. Jam li nloo mam momasôna li yé le, Yéhôva a bi hôla me i héñha niñ yem kayéle i len ini, me yé Mbôgi Yéhôva.”

20. Kii di nlama boñ?

²⁰ Munu yigil ini, di ntehe minkus mina mi mi nene bé. Mu minkus mi, u u nlôôha nkeñi u yé nsima di gwé i ba mawanda ma ñem nyuu ma Yéhôva. Maada ma, ma nti bés pôla i kôs mini minkus mimpe, hala wee masoohe, mahôla ma mbuu mpubi, ni nsima i sal ni Yéhôva, Yésu ni biañgel. Di kee ni bisu i ti mayéga inyu minkus mini mi nene bé. Di nti ki Yéhôva mayéga niñ yés yosôna inyule a yé Liwanda li mbuma ñañ.