1-2. Kii i nla boñ le di kônde nok ngim minlôñ mi Bibel?

 KEL libii jap, nwaa bo nlôm ba ñemble nkwel u u mpôdôl libii. Minlôñ mi Bibel mi ñéña yokel, ba nyi nwo. Ndi ibôdôl ha ngéda i, ba nkônde nok nwo. Inyuki? Inyule mi ga hôla bo mu libii jap.

² Hala nyen i yé i ngéda babiina ba ngwal. Bebek ba ma emble ngandak minkwel mi mi ñunda lelaa ba nla néñés bon. Ndi nano, ba nkônde nok minlôñ mi Bibel mi, inyule ba nlama niiga man wap. Hala a yé mbegee ikeñi! Dihéga dini di ñéba le, ngim mam i nla boñ le di kônde nok minlôñ mi Bibel mihogi. Inyu hala nyen di nlama añ Bibel di ôt ki pék mu, ‘dilo di niñ yés tjodisôna’ kiki Yéhôva a bi kal bikiñe bi Israel.​—Ndiimba Mbén 17:19.

3. Kii d’a pôdôl munu yigil ini?

³ A bagwal, i niiga bon banan sômbôl i Yéhôva i yé bisai bikeñi ngandak. Ndi ni nlama ndik bé niiga bo mambén ma Djob, ni nlama hôla bo i gwés Yéhôva. Lelaa ni nla niiga bon banan i gwés Yéhôva? Munu yigil ini, di ga tehe matiñ ma Bibel ma-na, ma ma nla hôla bagwal i niiga bon bap. (2 Timôtéô 3:16) Di ga tehe ki lelaa matiñ ma Bibel ma bi hôla bagwal i niiga bon bap.

4. Jam li bisu li li nla hôla bagwal i niiga bon bap i gwés Yéhôva li yé le kii? (Yakôbô 1:5)

⁴ Jam li bisu: Bat Yéhôva maéba. Soohe Yéhôva le a ti we pék inyu niiga bon boñ i gwés nye. (Añ Yakôbô 1:5.) Maéba mé ma nloo maéba momasôna. Inyuki di nkal hala? Pog, inyule Yéhôva a yé Isañ bôt bobasôna. (Tjémbi 36:10) Iba, maéba a nti bés ma yé inyu loñge yés.​—Yésaya 48:17.

5. (a) Lelaa ntôñ Yéhôva u nhôla bagwal? (b) Kiki di ntehe mu vidéô, kii i bi hôla mankéé Amorim bo nwaa i néñés bon bap?

⁵ Ntôñ u Yéhôva u gwé ngandak bikaat ni bividéô bi bi nhôla bagwal i niiga bon bap i gwés Yéhôva. (Matéô 24:45) Kiki hihéga, i gwigil bini le “De l’aide pour les familles” bi nla hôla bé. Bi bé pam ndugi i Réveillez-vous ! nu mapep, nano bi mpam mu jw.org. Ngandak bividéô i yé ki mu jw.org, i i gwé mbôgi ni ndémbél. Bi nla hôla bagwal i niiga bon bap sômbôl i Yéhôva. *​—Bingéngén 2:4-6.

6. Kii isañ mbai wada a nkal inyu mahôla bo nwaa ba bi kôs i ntôñ u Yéhôva?

⁶ Ngandak bagwal i bi ti mayéga inyu mahôla ba bi kôs i ntôñ u Yéhôva. Isañ mbai wada le Joe a nkal le: “I niiga bon baa sômbôl i Yéhôva i ta bé hisii jam. Me ni nwaa wem di nwaa bé soohe Yéhôva le a hôla bés. Di bi léba le i ngéda di gwé ndutu, ha nyen ngim yigil tole ngim vidéô i mpam, i hôla bés. Di mbat Yéhôva mahôla hiki ngéda.” Joe bo nwaa ba bi yimbe le gwigil ni bividéô ntôñ u Yéhôva u mpémés, bi nhôla bo i niiga bon bap i gwés Yéhôva.

7. Inyuki bagwal ba nlama unda bon bap ndémbél ilam? (Rôma 2:21)

⁷ Mam ma nyônôs ima: Unda bon boñ ndémbél ilam. Boñge ba mbéna béñge mam bagwal bap ba mboñ, ba niglege bo. I yé maliga le bagwal  ba ta bé peles. (Rôma 3:23) Ndi, ba nlama boñ kii yosôna ba nla inyu unda bon bap ndémbél ilam. (Añ Rôma 2:21.) Isañ mbai wada nyen a kal le: “Boñge ba yé kiki éponge. Ibale u nyube hio liboo, hi mpam mahindi; u yube hio malép ma mpôp, hi mpam mapubi.” A kal ki le: “Ibale di mboñ bé mam di niiga bo, ba ga kal bés hala.” Jon ibale di nsômbôl le bon bés ba gwés Yéhôva, bomede ba nlama yimbe le di ngwés Yéhôva bañga bañga.

8-9. Bimbe biniigana di nla ôt mu yom Andrew ni Emma ba bi kal?

⁸ Ngandak mam i yé le bagwal ba nla boñ inyu niiga bon bap i gwés Yéhôva. Di béñge i yom mankéé wada le Andrew nu a gwé 17 nwii a nkal: “Hiki ngéda, bagwal bem ba bé kal me le masoohe ma yé nseñ ngandak. Papa yem a bé soohe ni me hiki u, yak i ngéda me bé me ma soohe. Bagwal bés ba bé kal bés hiki ngéda le: ‘Ni nla soohe Yéhôva ngandak ngélé.’ Maéba ma, ma bi tihba me ngandak, nano me ngwés me nsoohe Yéhôva, me ntehe nye kiki Tata.” A bagwal, ibale ni ngwés Yéhôva, hala a ga tinde yak bon banan i gwés nye.

⁹ Di béñge yak ndémbél i Emma. Isañ a bi yôi bo, a yék nyañ ni ngandak mapil. Emma a nkal le: “Liyep li bé tééñga mama ngandak, ndi a bé waa bé kal bés le Yéhôva a ntjôô bé bagwélél bé. Niñ yé i bé unda me le a mbôdôl toi Yéhôva ñem. I yom mama a bé niiga bés yon a bé boñ.” Hala a niiga bés le, yak i ngéda ndutu, bagwal ba nla unda bon bap ndémbél ilam.​—Galatia 6:9.

10. Imbe ngéda Lôk Israel i bé le i kwel ni bon bap? (Ndiimba Mbén 6:6, 7)

¹⁰ Mam ma nyônôs maa: Kwel ni bon boñ hiki ngéda. Yéhôva a bi kal Lôk Israel le ba niiga bon bap mambén mé hiki ngéda. (Añ Ndiimba Mbén 6:6, 7.) Ba bé le ba niiga bon bap ngandak ngélé hiki kel. Kiki hihéga, mañge munlôm a bé le a lôôs ngandak ngéda ni isañ i sal wom tole i bumbul. Manyañ nu muda a bé le a lôôs ngandak ngéda ni nyañ i mbañgô, i bak gwom, tole i sal bibôlô bi ndap bipe. Kiki bagwal ba bé sal ni bon bap, ba bé le ba pôdôl ngandak mam. Kiki hihéga, ba bé le ba pôdôl loñgeñem i Yéhôva, ni lelaa Yéhôva a nhôla bo mu lihaa jap.

11. Imbe ngéda bagwal ba nla kwel ni bon bap?

¹¹ Niñ i ta ha bé kiki i ngéda kôba. I ngandak bahoma i nkoñ ’isi, bagwal ba nla bé ba lôñni bon bap ngim kel yosôna. Bagwal ba yé le ba ba i bôlô, boñge ba bak i suklu. Jon bagwal ba nlama yéñ manjel i kwel ni bon bap. (Éfésô 5:15, 16; Filipi 1:10) Ba nla kwel ni bo i bibégés bi ndap lihaa. Mañge wanda wada le Alexander a nkal le: “Papa yem a nkôôba bibégés bi ndap lihaa hiki ngéda, a nwas bé le jam jo ki jo li sôña bés i ba ntôñ yokel. I ngéda yigil i mal, di nkwel.”

12. Kii isañ mbai a nlama bigda i bibégés bi ndap lihaa?

¹² Ibale u yé isañ mbai, kii u nla  boñ inyu boñ le bibégés bi ndap lihaa bi lémél bon boñ? U yé le u nigil ni bo munu i kaat yés i mondo ini le Niñ ilam i boga ni boga! Ibale u nigil ni bo mu kaat i, n’a ba ni nkwel loñge. Ngôñ yoñ i yé le bon boñ ba kal we i yom i yé bo mahoñol ni i yom i ntééñga bo. Jon, i ngéda ni yé i bibégés bi ndap lihaa, u kéés bañ bo, u kodol bañ to bo. U unup bañ to, ibale ba mpot jam li li nkiha bé ni Bitilna. U nlama yak kon maséé le ba nkal we maliga, kal ki bo le ba kon bañ woñi i pot. I ngéda u nyi kii i yé bon boñ mahoñol, ha nyen u nla toi hôla bo.

13. Kii ipe bagwal ba nla boñ inyu hôla bon bap i ba mawanda ma Yéhôva?

¹³ A bagwal, hiki ngéda, ni yéñ manjel i hôla bon banan i yila mawanda ma Yéhôva. To ni ta bé i nigil Bibel ni bo, ni nla hôla bo i yi Yéhôva. Nyañ mbai wada le Lisa a nkal le: “Di yé di ngwélél bihégél inyu unda bon bés le Yéhôva a yé. Kiki hihéga, i ngéda ngwo yés i mboñ mam ma nôlha bo, di nkal bo le hala a ñéba le Yéhôva a yé Nyambe nu maséé, ni le a nsômbôl le di ba maséé, di nolok.”

14. Inyuki bagwal ba nlama hôla bon bap i bana mawanda malam? (Bingéngén 13:20)

¹⁴ Jam li nyônôs ina: Hôla bon boñ i bana mawanda malam. Bibel i ñéba le mawanda més ma nla tinde bés i boñ loñge, tole i boñ béba. (Añ Bingéngén 13:20.) A bagwal, baa ni nyi mawanda ma bon banan? Baa ni ma tehe bo, ni lôôs ki ngéda ni bo? Lelaa ni nla hôla bon banan i bana mawanda ma ma ngwés Yéhôva? (1 Korintô 15:33) Inyu hôla bon banan i bana mawanda malam, ni nla naña lôk kéé i i gwé bilem bilam i boñ ngim mam i ndap ni bé lôñni bon banan.​—Tjémbi 119:63.

15. Lelaa bagwal ba nla hôla bon bap i bana mawanda malam?

¹⁵ Di béñge le ndémbél i isañ mbai  wada le Toni. A ntoñol kii bona nwaa wé ba bi boñ inyu hôla bon bap i bana mawanda malam a nkal le: “Me ni nwaa wem di bé naña ngandak lôk kéé i bôda ni i bôlôm i mbai yés, boñge ni mimañ mi bôt. Ba bé je ni bés, ba bak ki bibégés bi ndap lihaa ni bés. Hala a nhôla i yi lôk kéé yés i i ngwés Yéhôva, i bak maséé i gwélél nye. Di bi kôs bisai i leege bagwélél ba makiiña, missionaires, ni lôk kéé ipe i mbai yés. Miñañ nwap, makénd map, ni bisesema ba bi boñ i nson u Yéhôva, bi bi hôla bon bés ngandak i yila mawanda ma Yéhôva.” A bagwal, ni hôla bon banan i bana mawanda malam.

16. Ibale man woñ a ntjél gwélél Yéhôva, kii u nlama boñ?

¹⁶ Ibale u mboñ kii yosôna i bédga, ndi mam woñ wada a kit le a ngwélél bé Yéhôva, kii u nlama boñ? U hoñol bañ le u nkwo makégse. Yéhôva a bi ti bésbobasôna kunde i yoñ makidik too d’a gwélél nye, too d’a gwélél bé nye. Ibale man woñ a nkit le a ngwélél bé Yéhôva, u lehel bañ ñem, kel yada, a nla témb a kahal gwélél Yéhôva. Bigda hihéga hi man nnimlaga. (Lukas 15:11-19, 22-24) I mañge wanda nu a bi yôm, ndi i mbus ngéda, a témb yak isañ. Ndi mut a yé le a kal le: “A yé ndik hihéga! Baa yak man wem a nla témb?” Ñ, a nla! Hala nyen mañge wanda wada le Elie a bi boñ.

17. Kii i nlémél we mu ndémbél Elie?

¹⁷ Elie a nkal le: “Bagwal bem ba bi boñ kii yosôna i bé béda inyu niiga me i gwés Yéhôva ni bañga yé. Ndi i ngéda me bi kahal nañ, me bôdôl ndogbene bo.” Elie a bi kahal boñ mam mabe, bagwal bé ba noode hôla nye, a tjél emble bo. I ngéda a bi nyodi i ndap, a kônde bana bihiumul  bibe. Ndi to hala yaa, a bé kwel mam ma Bibel ni liwanda jé jada. Elie a nkal le: “Kiki me bé kwel mam ma Bibel ni liwanda jem, hala nyen me bé hoñol Yéhôva. Ndék ni ndék me bi témb me bôdôl hoñol maliga bagwal bem ba bi niiga me.” I mbus ngéda, Elie a bi témb i ntôñ. * Di hégda le maséé bagwal bé ba bi nok, lakii ba bi boñ kii yosôna i bé béda inyu niiga nye i gwés Yéhôva ngéda a bé mañge!​—2 Timôtéô 3:14, 15.

18. Lelaa u ntehe bagwal ba ba njo sañ i ngui inyu niiga bon bap?

¹⁸ A bagwal, Yéhôva a mbééga bé loñge bôlô, le ni néñés boñge ba ba ga ba bagwélél bé yani ni noma. (Tjémbi 78:4-6) I bôlô i i ntomb bé, jon di nti bé mayéga inyu bôlô ngui ni nsal inyu hôla bon banan! Ibale ni nke ni bisu i niiga bon banan i gwés Yéhôva ni i nôgôl nye, Yéhôva a ga kônôl bé maséé.​—Éfésô 6:4.