1. Kii Yéhôva a mbat le bagwélél bé ba boñ? (Béñge yak titii.)

 NJEE di nla tehe i ngéda di gwé ngôñ ni maéba tole ni hogbe? Bésbobasôna di nyi ndimbhe. Di nla soohe Yéhôva Nyambe. Yéhôva nyemede a nti bés makénd i boñ hala. A gwé ngôñ le di bana lem i soohe, a nkal bés le: “Soohana hiki ngéda.” (1 Tésalônika 5:17) Di nla kôôge nye bebee ni njel masoohe ibabé i kon woñi, di bat ki nye maéba inyu mandutu momasôna di mboma i niñ yés. (Bingéngén 3:5, 6) Kiki Yéhôva a nlôôha likap, a ntéé bé bés ngim minwaa inyu nsoñgi masoohe.

2. Kii di ga tehe munu yigil ini?

² Di nlôôha diihe nsima di gwé i soohe. Jon tolakii di gwé ngandak mam i boñ, di mboñ biliya i léba ngéda inyu soohe. Di nlama yak lémés masoohe més. Di yé maséé i yi le di nla yak léba ngandak mam ikété Bitilna i i nla hôla bés i lémés masoohe més. Munu yigil ini, di ga tehe lelaa Yésu a bé léba ngéda inyu soohe, ni lelaa di nla nigle nye. Di ga tehe ki mam matan di nla pôdôl mu masoohe més inyu kônde lémés mo.

3. Kii Yésu a bé yi inyu masoohe?

³ Yésu a bé yi le masoohe més ma nlémél Yéhôva iloo hihéga. Ntandaa ngéda ilole a nlo hana ’isi, a bi tehe Isañ a ntimbhe masoohe ma bôlôm ni ma bôda ba hémle. Kiki hihéga, a bi tehe Isañ a ntimbhe masoohe ma bagwélél bé ba ba bé soohe nye ni ñem wap wonsôna,  kiki bo Hana, David, Éliya, ni bôt ba hémle bape. (1 Samuel 1:10, 11, 20; 1 Bikiñe 19:4-6; Tjémbi 32:5) Di nla nok inyuki a bi ti banigil bé makénd le ba bana lem i soohe, ba bak nkwoog nkaa le, Nyambe a ga timbhe bo!​—Matéô 7:7-11.

4. Kii di nigil mu masoohe ma Yésu?

⁴ Masoohe Yésu a bé soohe hana ’isi, ma bé ndémbél inyu banigil bé. Ntel ngéda wonsôna nson wé u bi nom hana ’isi, Yésu a bé soohe hiki ngéda. Kiki libim li ngéda a bé a pégi, nkéñgaga ni ngandak bôt, i bé béda nye le a tjek ngéda inyu masoohe. (Markô 6:31, 45, 46) A bé tôde bikegla tutu inyu ba nyetama i soohe Isañ. (Markô 1:35) Bitilna bi ñunda le, i bé i pam le a soohe ngim u wonsôna i ngéda a gwé makidik ma ngui i yoñ. (Lukas 6:12, 13) Yésu a bi soohe ngandak ngélé u wé u nsôk hana ’isi, inyule a bé yi le a yé tégbaha manut mé ma nsôk ilole a nwo.​—Matéô 26:39, 42, 44.

5. Lelaa di nla kôna Yésu i ngéda di nsoohe?

⁵ Ndémbél i Yésu i ñunda bés le, to di pégi ngandak di nlama bana ntjegek ngéda inyu masoohe. Kiki Yésu, di nlama bana ntéak ngéda inyu masoohe: Di nla pule tôde inyu soohe, tole di tiñha nañal bikôkôa inyu bana ngéda i soohe. I ngéda di mboñ hala, di ñunda Yéhôva le di ndiihe nsima di gwé i soohe. Sita yada le Lynne, a ngi bigdaga i yom a bi nôgda i ngéda ba bi niiga nye inyu ngélé bisu le, a nlama diihe nsima nkeñi a gwé i soohe. A nkal le: “I ngéda ba bi niiga me le me nla kwel ni Yéhôva to imbe ngéda, hala a bi hôla me i tehe nye kiki liwanda jem li ñem nyuu, me ngwés ki le me kônde lémés masoohe mem.” Ibabé nkaa, bebek le ngandak ikété yés i bi nôgda nlélém jam. Jon di tehe mam matan ma nlôôha nseñ di nla pôdôl mu masoohe més.

6. Inoñnaga ni Masoola 4:10, 11, Yéhôva a kôli kôs kii?

⁶ Bégés Yéhôva. Ikété yiinda i hélha, Yôhanes a bi tehe 24 ma mimañ i ngii mi mbégés Yéhôva. Mi bé béghak Djob mi  kalak le: “A kôli kôhna lipém ni bibégés ni lipémba.” (Añ Masoola 4:10, 11.) Biañgel bi bi tiñi ni Djob, bi gwé ngandak manjom i bégés nye ni i ti nye lipém. Ba nyi nye loñge loñge inyule ba yé lôñni nye i ngii. Ba ntehe bilem gwé mu mam a mboñ, i mam ma mon ma ntinde bo i bégés nye.​—Hiôb 38:4-7.

7. Inyu mambe mam di nla bégés Yéhôva?

⁷ Yak bés di nlama bégés Yéhôva i ngéda di nsoohe, di kal nye inyuki di ngwés nye ni mam ma nlémél bés i nyeni. I ngéda u ñañ Bibel u niglak yo, noode yimbe bilem bi Yéhôva bi bi nlémél we tôbôtôbô, bi ôdôk we i nyeni. (Hiôb 37:23; Rôma 11:33) I mbus añle nye i yom u nôgda inyu bilem bi. Di nla yak bégés Yéhôva inyu mam a mbôñôl bés, ni inyu mam a mbôñôl bilôk bikéé bi nkoñ ’isi wonsôna. A nyoñ ndun ni bés hiki kel, a tadak bés.​—1 Samuel 1:27; 2:1, 2.

8. Mambe manjom di gwé i ti Yéhôva mayéga? (1 Tésalônika 5:18)

⁸ Ti Yéhôva mayéga. Di gwé ngandak manjom i ti Yéhôva mayéga ikété masoohe més. (Añ 1 Tésalônika 5:18.) Di nla ti nye mayéga inyu mam malam momasôna di gwé; inyule hiki likébla lilam li nlôl i nyeni. (Yakôbô 1:17) Kiki hihéga, i ngéda u ntehe bilama bi hisi yak ni bihégél bilam, di nla ti nye mayéga. Di nla yak ti nye mayéga inyu niñ di niñ, lihaa jés, mawanda més, ni botñem a bi ti bés. Di nlama ki ti Yéhôva mayéga, inyu nsima u tôbôtôbô di gwé i ba mawanda mé.

9. Inyuki di nlama bana lem i ti Yéhôva mayéga?

⁹ I nla ba le i tane bé bés jam li ntomb i yi manjom ma ma nlama tinde bés i ti Yéhôva mayéga. Di niñil nkoñ ’isi i het bôt ba nyi bé ti mayéga. Ba nlôôha tôñ inyu gwom ba gwé ngôñ i bana iloo i ti mayéga inyu bi ba gwé. Ibale di yoñ bé yihe ndi libak li li nyoña bés, masoohe més ma mba ndigi mayagal ni mayagal. Inyu mboñ le i nya jam i i mpémél bañ bés, di nlama ke ni bisu i bana lem i ti Yéhôva mayéga, inyu mam momasôna a mbôñôl bés.​—Lukas 6:45.

10. Lelaa lem i ti mayéga i bi hôla sita yada i hônba béba kon? (Béñge yak titii.)

¹⁰ Lem i ti mayéga i nla hôla bés i hônba mandutu. Ñañ u sita Kyung-sook u di nléba Nkum Ntat nu hilo 15, sôñ Kondoñ, nwii 2015, u ñunda hala. Ba bi léba le, a bééna kon pos bisaha. A nkal le: “A bé ndigi wengoñle ngii i nkuubana me. Me bi nôgda wee me nimis mam momasôna, me konok woñi iloo hihéga.” Kii i bi hôla sita yés i pamba? A nkal le, hiki u ilole a ke i nañal, a bé a pam i mbégdé nyetama, a soohe Yéhôva inyu mam matan a mbôñôl nye i kel i. Hala a bé a boñ le, nduña yé i sôs, le a unda ki  i pam limbe likala a ngwés Yéhôva. Ni njel i, a bi pam i tehe lelaa Yéhôva a nhôla bagwélél bé i ngéda ba ntégbaha mangéda mabe, a nok ki le bisai di nkôs bi yé ngandak iloo mandutu di mboma. Kiki Kyung-sook, di gwé ngandak manjom i ti Yéhôva mayéga, yak i ngéda ndutu i nai. I ti Yéhôva mayéga i nla hôla bés i hônba mandutu ni i bana i ñem nwee.

11. I mbus le Yésu a bi témb i ngii, inyuki banigil bé ba bééna ngôñ ni makénd?

¹¹ Bat Yéhôva le a ti we makénd inyu gwel nson likalô. Ndék ngéda ilole a ntémb i ngii, Yésu a bi bigdaha banigil bé le ba ba mbôgi yé “i Yérusalem, i Yudéa yosôna ni i Samaria, letee ni masuk ma hisi.” (Minson mi baôma 1:8; Lukas 24:46-48) Ndék ngéda i mbus le baéga base i Lôk Yuda, ba bi gwel ñôma Pétrô ni Yôhanes, ba kena bo i bisu bi ntôñ bakéés bakeñi, ba téé bo mbén le ba añal ha bañ ñañ nlam, ba nyéyéi yak bo. (Minson mi baôma 4:18, 21) Lelaa Pétrô bo Yôhanes ba bi boñ?

12. Inoñnaga Minson mi baôma 4:29, 31, kii banigil ba bi boñ?

¹² I ngéda baéga base ba Lôk Yuda ba bi mal nyéyéi bo, Pétrô bo Yôhanes ba kal bo le: “Ibale hala a yé loñge i mis ma Nyambe i nôgôl bé iloo Nyambe, bébomede kééhana i jam li. Ndi inyu yés, di nla bé waa pot i mam di bi tehe, di nok ki.” (Minson mi baôma 4:19, 20) I ngéda ba bi was Pétrô bo Yôhanes, banigil ba bi soohe Yéhôva ni kiñ i ngii, ba badak le a nhôla bo i ke ni bisu i boñ sômbôl yé. Ba bi soohe le: “Ti yak minkol nwoñ ngui i kônde añal bañga yoñ ni makénd momasôna.” Yéhôva a bi timbhe masoohe map.​—Añ Minson mi baôma 4:29, 31.

13. Kii di nla nigil munu ndémbél Jin-hyuk?

¹³ Di nla kôna ndémbél i banigil i ngéda di nke ni bisu i téé likalô, yak ngéda ngomin a nti oda di téé ha bañ jo. Di tehe ndémbél Jin-hyuk, mankéé wada nu a bi ke mok inyule a bi tjél yoñ ngaba i mam ma m’bô. Ba bi bat nye le a yoñ ndun ni bôt ba mok ba ba bé i tuñ yap botama, ndi a bé lama bé kal bo jam lipe jo ki jo, ndi to añle bo minkwel mi Bibel. A bi soohe Yéhôva le a hôla nye i tééne bo likalô ni makénd momasôna ibabé i babaa bo. (Minson mi baôma 5:29) A nkal le: “Yéhôva a bi timbhe masoohe mem, a nti me ñem ngui ni pék inyu bôdôl gwigil bi Bibel bi bi bé nom ndigi manut matan. Ni juu me bé tila bikaat bi me bé lama ti bôt ba mok i hilo hi noñ ha.” Kiki mankéé Jin-hyuk, yak bés di nla soohe inyu bana makénd ni pék, di bak nkwoog nkaa le Yéhôva a ga hôla bés i yônôs nson wés.

14. Kii i nla hôla bés i ngéda di mboma mandutu? (Tjémbi 37:3, 5)

¹⁴ Bat Yéhôva mahôla inyu hônba mandutu. Ngandak ikété yés i mboma mandutu kiki bo, makon, kon mahoñol, i nimis mut di ngwés, ndééñga inyule di yé Mbôgi Yéhôva, mandutu ikété mahaa més, ni mandutu mape ki. U nhéya hala, i ngéda mam kiki bo dimala, tole gwét bi nkôndba, mam ma nkônde bep. Ha i ngéda i, di nlama yible Yéhôva i ñem wés. Di añle nye mam momasôna ma nkwél bés kiki di bak le di añle mo liwanda jés li ñem nyuu. Ibabé pééna yo ki yo, Yéhôva “a’ hôla we.”​—Añ Tjémbi 37:3, 5.

15. Kii i nla hôla bés i “hônba ikété njiiha” tole ndééñga? Ti hihéga.

 ¹⁵ I ke ni bisu i téñbe ikété masoohe i ga hôla bés i “hônba ikété njiiha.” (Rôma 12:12) Yéhôva a nyi mandutu bagwélél bé ba mboma, “a ñemble nlondok wap.” (Tjémbi 145:18, 19) Sita yada le Kristie nu a gwé 29 nwii, a bak nsañal a bi nôgda le hala a yé mbale. A bi bep kwo kon kunda yada, hala a bi boñ le, a kahal tôñ ngandak. I mbus ngéda, a nok le ba nléba nyañ ngim kon i ga kena nye i nyemb. Kristie a nkal le: “Me bi yemhe Yéhôva le, a ti me ngui i hônba mandutu ma hiki kel. Me boñ ki biliya i tééda bilem bilam i pes mbuu, kiki bo yigil yem memede ni i ke makoda momasôna. Masoohe ma bi hôla me i hônba mangéda mabe ma. Me bé yi le Yéhôva a ga tjôô bé me kekikel, i hoñol hala i bi hôgbaha me. Tolakii kon wem u bi mal bé kunda yada, Yéhôva a bi timbhe masoohe mem, a nti me ñem nwee ni hogbe.” Ni hôya bañ kekikel le “Yéhôva a nyi sôñ bôt ba ntéñbe i gwés nye ikété manoodana.”​—2 Pétrô 2:9.

16. Inyuki di gwé ngôñ ni mahôla ma Yéhôva inyu yémbél manoodana?

¹⁶ Bat Yéhôva le a nhôla we i yémbél manoodana. Kiki di yé bikwéha bi bôt, di nlama jo hiki ngéda inyu yémbél ngôñ i boñ béba. Satan a nkônde lédés bés mam. Njel yada a ngwélél inyu yumus bés i yé mintuk mi nyega. Mintuk mi, mi nla yônôs boña wés ni mahoñol ma nyega, i mahoñol ma ma nyon ikété yés, kayéle mbeñel mbeñel ma tinde bés i boñ béba keñi.​—Markô 7:21-23; Yakôbô 1:14, 15.

17. I mbus di nsoohe Yéhôva le a hôla bés i yémbél manoodana, kii di nlama boñ? (Béñge yak titii.)

¹⁷ Inyu pam i yémbél ngôñ i boñ béba, di gwé ngôñ ni mahôla ma Yéhôva. I ngéda a bé niiga banigil bé i soohe,  jam jada Yésu a bi bat li bé le: “U nwas bañ le di kwo ikété manooda, ndi tohol bés i moo ma mut mbe.” (Matéô 6:13) Yéhôva a yé bebee i hôla bés, ndi bésbomede di nlama bat nye mahôla. I mbus hala maboñok més ma nlama kiha ni masoohe més. Hala a nkobla le di yoñ makidik ma ngui le di añ bañ, di béñge bañ, to emble mam ma nhôñôs mahoñol ma nkoñ ’isi u Satan. (Tjémbi 97:10) Inyu ba nyonok ni mahoñol malam, di nlama añ Bibel di nigil ki yo. Jam lipe ki li li ga hôla bés i sôñ mahoñol més, li yé i ke makoda ni i yoñ ngaba likalô. Ibale di mboñ i mam ma momasôna, Yéhôva a mbôn le a ga was bé le di kôhna manoodana iloo kiki di nla nihbe.​—1 Korintô 10:12, 13.

18. Mambe makidik hiki wada wés a nlama yoñ inyu jam li masoohe?

¹⁸ Munu minledek mi mangéda ma nsôk mana, hiki wada wés a nlama bana lem i soohe iloo i ngéda kôba inyu téñbe ni Yéhôva. Di tjek ngim ngéda hiki kel inyu yible Yéhôva ñem wés. Yéhôva nyemede a ngwés le di ‘yible nye miñem nwés.’ (Tjémbi:8) Di ti Yéhôva mayéga ni bibégés inyu mam momasôna a mbôñôl bés. Di bat nye le a nhôla bés i ba makénd i nson likalô. Di yemhe nye le a hôla bés i hônba mandutu ni i yémbél manoodana di yé le di boma. Di nwas bañ le mut nye ki nye, tole yom yo ki yo i kéñ bés i soohe Yéhôva hiki ngéda. Ndi lelaa Yéhôva a ntimbhe masoohe més? Di ga tehe i jam li i yigil i noñ.