1. Inoñnaga ni kaat 3 Yôhanes 3, 4, kii i nkônha bés maséé?

BAA u nhégda maséé ñôma Yôhanes a bi nôgda ngeñ a bi nok le i bôt a bi hôla i yi maliga ba bé ke ni bisu i gwélél Yéhôva? Ba bé boma ngandak mandutu, jon Yôhanes a bi boñ biliya bi ngui inyu lédés hémle yap, inyule a bé yoñ bo kiki bon bé. Nlélém ni bés, ngéda bon bés i pes mbuu tole bon di ngwal, ba nti bomede nkikip inyu gwélél Yéhôva, ba téñbege ki ni nye, hala a nkônha bés maséé.​—Añ 3 Yôhanes 3, 4.

2. Inyuki Yôhanes a tila bikaat bini gwo biaa?

² I nwii 98 N.Y., i nene le Yôhanes a bé yén Éfésô tole bebee ni Éfésô. A bi lama ke nyoo ngéda a bi pam i mok i ôn i Patmôs. Ha ngéda i nyen mbuu Yéhôva u bi tinde nye i tila bikaat biaa bi. A bi tila gwo inyu ti bikristen makénd i ke ni bisu i hémle Yésu ni i kil maliga.

3. Mambe mambadga di ga timbhe?

³ Ha ngéda i, Yôhanes nyetama nyen a bé a ngi yii niñ ikété baôma ba Yésu bobasôna, a bé nok ndutu ngandak ngéda a bé tehe baniiga bitembee ikété makoda. * (1 Yôhanes 2:18, 19, 26) Batjañgbene maliga ba, ba bé kal le ba nyi Yéhôva, ndi ba bé nôgôl bé mambén mé. Di wan maéba Yôhanes a bi ti mu jam li. Munu yigil ini, di ga timbhe mambadga maa: I kil maliga wee kii? Kii i nla kéñ bés i kil maliga? Lelaa di nla hôlna wada ni nuu i kil mu njel maliga?

4. Inoñnaga ni 1 Yôhanes 2:3-6 ni 2 Yôhanes 4, 6, i kil maliga wee kii?

⁴ Inyu kil maliga, di nlama yi Bañga i Djob. Di nlama ki ‘nôgôl mambén ma Yéhôva.’ (Añ 1 Yôhanes 2:3-6; 2 Yôhanes 4, 6.) Yésu a bi unda bés ndémbél mu kii a bi nôgôl Yéhôva i nya i yôni. Jon njel yada inyu nôgôl Yéhôva i yé le, di boñ biliya gwobisôna i odop mu mabal ma Yésu.​—Yôhanes 8:29; 1 Pétrô 2:21.

5. Di nlama kwés bésbomede nkaa le kii?

⁵ Inyu ke ni bisu i kil maliga, di nlama kwés bésbomede nkaa le Yéhôva a yé Djob li maliga, ni le mam momasôna Bibel i niiga bés ma yé maliga. Di nlama ki kwés bésbomede nkaa le Yésu a yé Mésia. I len ini, ngandak bôt i mpééna le Yésu a yé Kiñe Ane Djob. Yôhanes a bi kal le, “ngandak bôt ba malôga” ba bé lama yumus i bet ba ta bé nhôôlak i pes mbuu. (2 Yôhanes 7-11) Yôhanes a tila le: “Njee a yé mut bitembee, handugi nu a ntañ le Yésu a yé Kristô?” (1 Yôhanes 2:22) Yigil i Bibel yotama yon i nla boñ le ba yumus bañ bés. Yotama yon i nla hôla bés i yi Yéhôva bo Yésu. (Yôhanes 17:3) Ni i njel i nyen di ga ba nkwoog nkaa le di yé maliga.

6. Imbe ndutu boñge ba wanda ba mboma?

⁶ Bikristen gwobisôna bi nlama yoñ yihe le biniigana bi bôt ba binam bi yumus bañ bo. (1 Yôhanes 2:26) Bikristen bi bi yé boñge ba wanda gwon bi nlama lôôha yoñ yihe ni i hiandi hi. Alexia, * sita yada i loñ Pulasi i i gwé 25 nwii, a nkal le: “Ngéda me bé mañge, biniigana bi nkoñ ’isi kiki bo bini le gwom bi bi héga bé, ni ngandak ipe, bi bé tinde me i badba mambadga. Ngim mangéda, bi bé lémél me. Ndi me bi sôk tehe le, me nlama ndik bé neebe yom ba niiga me i suklu, me nlama yak ti Yéhôva pôla i niiga me.” Alexia a bi yoñ makidik i nigil i kaat ini ni hop Pulasi le: La vie: comment est-elle apparue? Évolution ou  création? Mbus ndék ngéda, a bé badba ha bé mambadga. Alexia a nkal le: “Me bi kwés memede nkaa le Bibel i mpot maliga. Me léba ki le i niñ inoñnaga ni matiñ ma Bibel i nti me maséé ni nsañ.”

7. Kii di nlama bé boñ, inyuki?

⁷ Bikristen gwobisôna, boñge ni mimañ mi bôt, ba nlama bé kal le ba ngwélél Djob, i nlélém ngéda ba boñok mam mabe. Yôhanes a bi kal le di nla bé kil i njel maliga, i nlélém ngéda, di ban-ga niñ i nyega. (1 Yôhanes 1:6) Ibale di nsômbôl lémél Djob nano ni dilo di nlo, di nlama bé hôya le Yéhôva a ntehe hiki jam di mboñ. To ibale bôt ba ntehe bé mam di mboñ bisôsôli, Yéhôva nye a ntehe.​—Lôk Héber 4:13.

8. Kii di nlama keñgle?

⁸ Di nlama keñgle litehge nkoñ ’isi u gwé inyu béba. Ñôma Yôhanes a tila le: “Ibale di nkal le: ‘Di gwé bé béba,’ wee di yé i lôk bésbomede.” (1 Yôhanes 1:8) I dilo di Yôhanes, batjañgbene maliga ba bé kal le mut a nla niñ ikété béba, a ban-ga maada malam ni Djob. I len ini, ngandak bôt i gwé minlélém mi mahoñol. Ngandak bôt i nkadba le i nhémle Djob, ndi ba gwé bé litehge li Yéhôva inyu béba, téntén inyu jam li malal. I yom Yéhôva a nkal le i yé béba, bo ba nkal le hiki mut a nlama boñ kiki a ngwés.

9. Bimbe bisai boñge ba wanda ba nkôs ibale ba ntéñbe i noñ biniigana bi Bibel?

⁹ Bikristen bi bi yé boñge ba wanda, bi nla nôgda wee solôñ yap i suklu tole i bôlô, i nyégsa bo i bana litehge jap inyu jam li malal. I jam li jon li bi pémél Aléksandar. A nkal le: “I suklu boñge bôda ba bé sômbôl nyégsa me i lalna  bo. Ba kalak me le kiki me gwé bé liwanda li muda, wee me mpam ni bôlôm.” Ibale u mboma i nya manoodana ini, bigda le i ngéda u ntéñbe i noñ biniigana bi Bibel, u nkônde bana ét nyuu, w’a keñgle makon, w’a ke ki ni bisu i ba liwanda li Yéhôva. Hiki ngéda u nyémbél manoodana, w’a kônde bana ngui i boñ loñge. Bigda ki le litehge libe nkoñ ’isi u gwé inyu malal, li nlôl ni Satan. Jon ngéda u ntjél malal ma nyega, u ‘nyémbél mut mbe.’​—1 Yôhanes 2:14.

10. Lelaa kaat 1 Yôhanes 1:9 i nhôla bés i gwélél Yéhôva ni kiññem i mpôp?

¹⁰ Di nyi le Yéhôva nyen a kôli kal bés kii i yé loñge ni kii i yé béba. Di mboñ ki kii yosôna di nla inyu keñgle béba. Ndi ibale di mboñ béba, di pahlene yo Yéhôva ikété masoohe. (Añ 1 Yôhanes 1:9.) Ibale i mpam ki le béba ikeñi yon di mboñ, di nlama tehe mimañ mi Yéhôva a bi téé inyu tééda bés, di bat bo mahôla. (Yakôbô 5:14-16) Ndi, di nlama yoñ yihe le kiññem i lôôha bañ kéés bés inyu bibéba di bi boñ behee. Inyuki? Inyule Tata wés nu gwéha a bi ti Man wé sesema inyu nwéhél bibéba gwés. Ngéda mut a ntam béba yé, ndi Yéhôva a kal le a nwéhél nye, wee a nwéhél toi nye. Jon, jam jo ki jo li nlama ha bé kéñ bés i gwélél Yéhôva ni kiññem i mpôp.​—1 Yôhanes 2:1, 2, 12; 3:19, 20.

11. Lelaa di nla sôñ bésbomede ni biniigana bi bi nla tômbôs hémle yés?

¹¹ Di nlama ke biniigana bi batjañgbene maliga ngwéé. Ibôdôl nu likoda li bikristen li bi gwéé, Nsohop a ngwélél ngandak bôt ba bitembee inyu ha pééna i ñem i bagwélél ba Djob. Jon, di nlama yi maselna ipôla maliga ni  bitembee. * Baoo bés ba yé le ba gwélél internet inyu tinde bés i oo lôk kéé yés ni i boñ le di bôdôl ha bañ Yéhôva ñem. Di hôya bañ le Satan nyen a nsal i bôlô i yosôna!​—1 Yôhanes 4:1, 6; Masoola 12:9.

12. Inyuki di nlama sal ni ngui inyu lédés hémle yés inyu mam di bi nigil?

¹² Inyu kolba Satan, di nlama lédés hémle yés inyu Yésu, di neebe ki i tel Yéhôva a bi ti nye inyu yônôs sômbôl yé. Di nlama ki ba nkwoog nkaa le nkol u maliga ni u pék won Yéhôva a ngwélél i len ini. (Matéô 24:45-47) Di mboñ hala ngéda di nigil Bañga i Nyambe hiki ngéda. Ibale di mboñ hala, hémle yés i ga ba kiki e i i ñôm minkañ nwé ’isi. Paul a bi pôdôl i jam li ngéda a bé tilna bikristen bi Kôlôsé. A kal le: “Ndik kiki ni bi neebe Nwet le Kristô Yésu, hala nyen kena ni bisu i hiôm ikété adna ni nye, ôma ki minkañ, ni holok ikété adna lôñni nye, ni bak ni umi siñ siñ ikété hémle.” (Kôlôsé 2:6, 7) Ibale di nsal ni ngui inyu lédés hémle yés, to Satan to i bet ba nit nye, ba nla bé kéñ bés i ke ni bisu i kil i njel maliga.​—2 Yôhanes 8, 9.

13. Kii di nlama yi, inyuki?

¹³ Di nlama yi le nkoñ ’isi u ga oo bés. (1 Yôhanes 3:13) Yôhanes a nhôñlaha bés le “nkoñ ’isi wonsôna u yé isi ane i mut mbe.” (1 Yôhanes 5:19) Kiki lisuk li yé bebee, Satan a nkônde nyai. (Masoola 12:12) A nleñ ndigi bé bés makoñ bisôsôli, kiki bo malal ma nyega ni batjañgbene maliga. A ngwélél yak ndééñga. Satan a nyi le a ngi gwé ndigi ndék ngéda inyu kolba nson likalô, tole inyu noode tômbôs hémle yés. Jon hala a nhélés bé bés ngéda ba nsôña nson wés i ngandak biloñ. Ndi to hala, lôk kéé yés i bôda ni i bôlôm i i yé mu biloñ bi, i ntomb bé. Ndémbél yap i ñunda le to Satan a mboñ lelaa, di nla yémbél!

14. Sima njel yada di nla gwélél inyu hôla lôk kéé yés i yén maliga

¹⁴ Inyu hôla lôk kéé yés i bôda ni i bôlôm i yén maliga, di nlama unda bo ñem ngôô. (1 Yôhanes 3:10, 11, 16-18) Di nlama ndik bé gwéhna i ngéda mam momasô ma nke loñge, ndi yak i ngéda ndutu i nkwo. Kiki hihéga, baa u yé le u lédés mankéé nu a nimis mut a gwéhék? Baa u yé le u hôla bilôk bikéé bi bi nimis ndap yap tole ndap Ane yap i mbus nyeñg disi tole mbuk mbebi? Di ñunda le di gwé njôôñ gwéha ni ñem ngôô inyu lôk kéé yés ha ndik ni bibuk bé, ndi yak ni mam di mbôñôl bo.

15. Kiki kaat 1 Yôhanes 4:7, 8 i ñunda, kii di nlama boñ?

¹⁵ Ngéda di ngwéhna bés ni bés, di nigle Tata wés nu gwéha. (Añ 1 Yôhanes 4:7, 8.) Njel yada inyu unda le di ngwéhna i yé le di nwéhlana bés ni bés. Kiki hihéga, i nla pam le mankéé a babaa bés, i mbus a bat bés nwéhél. Di ñunda gwéha ngéda di nwéhél nye, di hôya ki i jam li. (Kôlôsé 3:13) Aldo a bi boma ndutu i, i ngéda mankéé wada nu a bé ti lipém a bi kal ngim jam i i bé unda le a nyan litén jé. Aldo a nkal le:  “Me bé soohe Yéhôva hiki ngéda le a hôla me le me tééda bañ mahoñol mabe inyu mankéé nu.” Ndi Aldo a bi telbene bé ha. A bi bat i mankéé nu le ba pam i likalô ntôñ. Mu kii ba bé sal, Aldo a bi toñle nye lelaa a bé nôgda inyu jam a bi kal.” A nkal le: “Ngéda mankéé nu a bi nok jam me bé nôgda, a bat me nwéhél. I kiñ a bi gwélél i ngéda a bé pôdôs me, i bi hôla me i nok ipam limbe likala a bi tam béba yé. Di kaana loñge, i mbus di témb di yila biloñge bi mawanda.”

16-17. Mambe makidik di nlama yoñ?

¹⁶ Ñôma Yôhanes a bé lôôha tôñ lôk kéé yé, a gwéhék bo, hala a nene loñge mu maéba a bi ti bo bikaat gwé gwo baa. Hala a ntina makénd i yi le yak lôk kéé i bôda ni i bôlôm i i yé minhook kiki nye, i i ga ane ni Kristô, i ntôñ lôk kéé yap, i gwéhék ki bo!​—1 Yôhanes 2:27.

¹⁷ Di boñ biliya i noñ maéba di nkôs munu yigil ini. Di yoñ makidik i kil i njel maliga, di nôglak Yéhôva mu makas ma niñ yés momasôna. Di nigil Bañga yé le Bibel, di hémle ki yo. Di hôlôs hémle i ngui inyu Yésu. Di kee haa ni biniigana bi bôt ba binam yak ni bi batjañgbene maliga. Di ba bañ bôt ba nkal le ba ngwélél Djob, ndi ba boñok mam mabe. Di niñ inoñnaga ni mambén ma Yéhôva. Di hôla ki lôk kéé yés i tééda hémle i ngui mu kiki di nwéhél bo, ni mu kiki di nlôl bo mahôla i ngéda ndutu i nkwél bo. Ibale di mboñ mam ma, to ibale di mboma mandutu, di ga ke ni bisu i kil i njel maliga.