1. Kii Yéhôva a bi bôñôl we?

LELAA u bi yila Mbôgi Yéhôva? Bebek bagwal boñ bon ba bi niiga we maliga, liwanda joñ li suklu tole solôñ yoñ i bôlô yon i bi añle we “ñañ nlam,” i nla ki ba le likalô li mandap ni mandap jon li bi hôla we i yi maliga. (Markô 13:10) Mbus, mut a tégbaha ngandak ngéda i nigil Bibel ni we. I yigil i, i bi hôla we i gwés Yéhôva ni i yi le a ngwés we ngandak. Yéhôva a bi ôt we maliga, u yila nigil Yésu Kristô, ni botñem le u ga niñ i boga ni boga. (Yôhanes 6:44) Ibabé nkaa, u nti Yéhôva mayéga inyule nyen a bi tinde mut i niiga we maliga, a neebe ki le u yila ngwélél wé.

2. Kii di ga tehe munu yigil ini?

² Nano nu u nyi maliga, u nkon maséé i yoñ ngaba likalô li mandap ni mandap, ndi bebek hala a nlédél we i tégbaha gwigil bi Bibel. Ibale hala, maéba u ga léba munu yigil ini ma nla bane we nseñ. Di ga tehe i yom i ntinde bés i hôla bôt i yila banigil. Di ga tehe ki lelaa di nla yémbél mandutu ma ma nla boñ le i bane bés ndutu i tégbaha gwigil bi Bibel. Di bôk ndugi di tehe inyuki di nlama ndik bé añle bôt ñañ nlam, ndi di niiga yak bo.

3. Inyuki di ñañal ñañ nlam?

³ Ngéda Yésu a bé hana ’isi, a bi ti banigil bé oda le ba boñ mam ima. Li bisu, ba bé lama añal ñañ nlam u Ane,  a unda ki bo lelaa ba boñ hala. (Matéô 10:7; Lukas 8:1) A bi kal banigil bé le bôt bahogi ba ga neebe ñañ nlam, bape ba tjél. (Lukas 9:2-5) A kal ki le ba ga tjam ñañ nlam ni nkoñ ’isi wonsôna, i ba “biloñ gwobisôna mbôgi.” (Matéô 24:14; Minson mi baôma 1:8) Yésu a bi ti banigil bé oda le ba añle bôt ñañ nlam inyu Ane Djob ni inyu mam i Ane i, i ga boñ, too bôt ba neebe, too ba neebe bé.

4. Inoñnaga ni kaat Matéô 28:18-20, u héya le di nlama añal ñañ nlam u Ane, kii ipe di nlama boñ?

⁴ Kii i yé jam li nyônôs iba Yésu a ti banigil bé oda le ba boñ? A bi kal banigil bé le ba niiga bôt i mam momasôna a bi ti bo oda le ba boñ. I len ini, ngandak bôt i nkal le nson Yésu a bi ti banigil bé u bé lama ndik bôña i hiai hi bisu, baa maliga ma? Heni, Yésu a bi kal le nson u u bé lama gwéla letee ni dilo tjés, hala wee, “letee i mamélél ma nkoñ ’isi.” (Añ Matéô 28:18-20.) Yésu a bi ti i oda i, i ngéda a bi pémél iloo 500 banigil bé. (1 Korintô 15:6) Yak mu i yiinda Yésu a ti Yôhanes, Yésu a bi unda le banigil bé bobasôna ba nlama hôla bôt bape i yi Yéhôva.​—Masoola 22:17.

5. Himbe hihéga Paul a ngwélél i kaat 1 Korintô 3:6-9 inyu unda maada ma yé ipôla i añal ñañ nlam ni niiga bôt?

⁵ Ñôma Paul a bi hégha nson i yilha bôt banigil ni nson u wom, inyu unda le ngéda di mal bel mbôô, hala a kôli bé. A bi hôñlaha lôk kéé i Korintô le: “Me bi bel, Apôlô a kôp malép . . . Ni yé wom u Nyambe, u a ngi salak.” (Añ 1 Korintô 3:6-9.) I bés ba di nsal mu “wom u Nyambe,” di mbel ndik bé mbôô, ndi di nkôp yak malép, di béñgege hiki ngéda lelaa bibebela bi nhol. (Yôhanes 4:35) I nlélém ngéda, di nyi le Nyambe nyen a mboñ le i nañ.

6. Ngéda di niiga bôt, kii di nlama hôla bo i boñ?

⁶ Di nyéñ i bôt ba gwé “libak lilam inyu kôhna niñ boga.” (Minson mi baôma 13:48) Inyu boñ le i nya bôt i i yila banigil, di nlama hôla bo i tibil (1) nok, (2) neebe, ni (3) ha bibôñôl i yom ba nigil ikété Bibel. (Yôhanes 17:3; Kôlôsé 2:6, 7; 1 Tésalônika 2:13) Bésbobasôna di nlama ti banigil Bibel ndémbél ilam, di unda bo gwéha, di leege ki bo loñge ngéda ba nlo makoda. (Yôhanes 13:35) Nwet a ntégbaha yigil Bibel a nlama yoñ ngéda, a boñ ki biliya bi ngui inyu hôla nnigil Bibel i yémbél bikwéha bi biniigana ni maboñok mabe ma ma bi o minkañ ikété yé kiki “minkum mi mandap” tole dikôa. (2 Korintô 10:4, 5) Hala a nla yoñ mut ngandak sôñ inyu lona mahéñha mu niñ yé ni inyu hol letee ni i sôble. Ndi, biliya bi bi nlôôha ba nseñ.

7. Kii i ntinde bés i yoñ ngaba i nson u añal ñañ nlam ni boñ banigil?

⁷ Inyuki di ñañal ñañ nlam di hôlga bôt i yila banigil? Pog, inyule di ngwés Yéhôva. Ngéda di mboñ kii yosôna di nla inyu noñ oda i añal ñañ nlam ni yilha bôt banigil, di ñunda le di ngwés Yéhôva. (1 Yôhanes 5:3) Hoñol ki: Gwéha inyu Yéhôva yon i bi tinde we i añal ñañ nlam mandap ni mandap. Ndi baa hala a yé bun? Heni. Ngéda u bi kôôge i nwemel bisu inyu añal ñañ nlam, baa hala a bi kônha we woñi? Ibabé pééna u bi kon woñi! Ndi u bé yi le nson u won Yésu a gwé ngôñ le u boñ, u bé ki bebee i nôgôl  nye. Ngéda i bé tagbe bañ, u kahal kon maséé i yoñ ngaba mu nson u. Nano, mam ma yé lelaa inyu yigil i Bibel? Baa i tégbaha yigil i Bibel i nkônha we woñi? Bebek. Ndi ibale u nsoohe Yéhôva, u bat nye le a hôla we i bana ñem ngui, mbus u yéñ yigil Bibel, a ga hôla toi we i yilha bôt banigil.

8. Inoñnaga ni kaat Markô 6:34, kii ipe i ntinde bés i niiga bôt?

⁸ Iba, gwéha di gwé inyu bôt ba libôk yon i ntinde bés i niiga bo maliga. Lisañ jada, Yésu ni banigil bé ba bi huu likalô nwaak kiyaga. Ba bi yéñ homa inyu noi, ndi limut likeñi li bi lo li koba bo. Yésu a kon bo ngoo, a bôdôl niiga bo “ngandak mam.” (Añ Markô 6:34.) A bi ke ni bisu i sal ni ngui, tolakii a bé nwaak. Inyuki? Yésu a bi noode hégda i yom limut li bôt li li bé nôgda. A bé gwés hôla bo, inyule a bi tehe le ba bé nok ndutu ngandak, ba bééna ki ngôñ ni botñem. Nlélém jam won bôt ba nôgda i len ini, tolakii i nene wee ba yé loñge tole ba nkon maséé ni libak jap. Ba yé kiki mintômba mi mi yé nnimlak, ngi ntat inyu éga bo. Ñôma Paul a kal le i nya bôt i i nyi bé Nyambe, i gwé bé to botñem. (Éfésô 2:12) Ba nkil i “njel i nkena tjiba”! (Matéô 7:13) Ngéda di ntehe le bôt ba libôga jés ba nyi bé Nyambe, hala a nkônha bés ngoo, gwéha di gwé inyu yap i ntinde bés i hôla bo. I nigil Bibel ni bo i yé njel i nlôôha ba ilam inyu hôla bo.

9. Inoñnaga ni kaat Filipi 2:13, lelaa Yéhôva a yé le a hôla we?

⁹ Bebek le u nkon woñi i bôdôl yigil Bibel inyule u nyi le hala a ga bat we ngandak ngéda inyu kôôba yo ni inyu tégbaha yo. Ibale hala, soohe Yéhôva. Bat nye le a hôla we i bôdôl yigil Bibel ni i tégbaha yo. (Añ Filipi 2:13.) Ñôma Yôhanes a kal le Nyambe a ntimbhe masoohe ma ma nkiha ni sômbôl yé. (1 Yôhanes 5:14, 15) Jon di nla ba nkwoog nkaa le Yéhôva a ga hôla we i bana ngôñ i yilha bôt banigil.

10-11. Kii i nla boñ le di kon woñi i nigil Bibel ni mut?

¹⁰ Di nyi le i nlôôha ba nseñ i niiga bôt ni i yilha bo banigil, tolakii di mboma mandutu ma ma yé le ma boñ le di pam bé i boñ hala kiki di ngwés. Di noode le tehe ngim mandutu di mboma, ni lelaa di nla yémbél mo.

¹¹ I nla pam le di nla bé yoñ ngaba i nson ñañ nlam kiki di ngwés. Kiki hihéga, ngim batéé likalô i ñun tole i nkon ngandak. Baa yak we u yé mu nsoñgi u? Ibale hala, bigda i mam di nigil munu himala hi COVID-19 masañ mana. I len ini, di nyi le di nla tégbaha gwigil bi Bibel ni téléfôn, ni ordinater tole ni bisélél bipe! Jon u nla bôdôl yigil Bibel tole u nla tégbaha yigil Bibel u bak i mbai yoñ. Likalô li, li nhôla ki bés ni njel ipe. Ngim bôt i nla bé nigil Bibel mangeñ bilôk bikéé gwés bi mbéna tagbe i ndap yap. Ndi bebek ba nla bana ngéda kegla tutu tole kôkôa ngéda u u nsude inyu nigil Bibel. Baa u yé le u léba ngéda inyu nigil ni bo ha ngéda i? Yésu a bi niiga Nikôdémô ni juu, inyule ngéda i yon Nikôdémô a bi pohol.​—Yôhanes 3:1, 2.

12. Kii i nkwés bés nkaa le di nla ba bañga baniiga?

¹² I nla pam le di hoñol le di ta bé le di yi tégbaha yigil i Bibel. Bebek di nhoñol le di nlama yi ngandak mam tole di nlama  ba bañga baniiga inyu pam i niiga mut Bibel. Ibale hala nyen u nhoñol, béñge mam maa ma ma nla hôla we i nôgda le to hala u nla niiga mut Bibel. Pog, Yéhôva a ntehe le u nla niiga bôt bape Bibel. (2 Korintô 3:5) Iba, Yésu nu a bi kôs ‘kunde yosôna i ngii ni hana ’isi,’ a bi ti we oda le u niiga bôt. (Matéô 28:18) Aa, u nla bat lôk kéé ipe mahôla. Yésu a bi niiga, a kal ki i mam Isañ a bi niiga nye. Yak we u nla boñ nlélém. (Yôhanes 8:28; 12:49) U nla bat mañ u u ñéga juu joñ li likalô, nsañal nu makeñge, tole nhôôlak ntéé likalô le a hôla we i bôdôl ni i tégbaha gwigil bi Bibel. U nla ki nôgla ni wada wap le a naña we i tégbaha yigil yé Bibel yada.

13. Inyuki di nlama ba bebee i héñha makeñge més i niiga?

¹³ I nla bane bés ndutu i héñha makeñge i niiga tole i gwélél bisélél bi mondo. Di ntégbaha ha bé gwigil bi Bibel kiki di bé boñ kôba. I kaat mondo ini le Niñ ilam i boga ni boga! i mbat le di kôôba loñge iloo kiki di ba boñ kôba inyu ke i tégbaha yigil. Ni yo di ñañ ndik ndék maben, ndi di nkwel ngandak ni nnigil Bibel. Di ngwélél ngandak bividéô ni bisélél bipe kiki JW Library^®. Ibale u meya bé gwélél bisélél bi, u nla bat mankéé nu a nyi gwélél gwo le a hôla we. Ngén yada i nkal le ngéda e i mal nañ, i nheñ ha bé maboñ. Hala a nsômbôl kal le i ngeñ di mal meya ngim bilem, i ta bé bun le di héñha gwo. Ndi ni mahôla ma Yéhôva ni ma lôk kéé ipe, di nla héñha bilem bi kayéle i ba bés jam li ntomb i nigil Bibel ni bôt. Kiki nsañal wada a bi kal, i gwélél kaat ini “i nlôôha ba loñge inyu nnigil Bibel ni inyu nwet a niiga nye.”

14. Kii di nlama bigda ngéda di nsal libôga het bôt ba neebe bé ñañ nlam, mambe makénd di nléba i kaat 1 Korintô 3:6, 7?

¹⁴ I nla ba le di niñ libôga het i ta bé jam li ntomb i bôdôl yigil Bibel. I nla ba le bôt ba neebe bé likalô jés tole ba nkolba yaga bés. Ha ngéda i, kii i nla hôla bés i tééda maséé més? Bigda le kiki di niñ i béba nkoñ ’isi ini, niñ i mut i nla pala héñha, kayéle i nwet a ta bé bebee i neebe maliga nano, a nla sôk a nôgda le a gwé ngôñ le Nyambe nyen a éga nye. (Matéô 5:3) Bôt bahogi ba ba bé neebe bé bikaat gwés kôba, ba bi sôk ba neebe yigil Bibel. Di nyi ki le Yéhôva nyen a yé Nwet libumbul. (Matéô 9:38) A gwé ngôñ le di kee ni bisu i bel ni i kôp malép, ndi nyemede nyen a mboñ le i nañ. (1 Korintô 3:6, 7) Kinje maséé i yi le Yéhôva a ga bom bés inyu biliya di mboñ i hôla bôt, he bé inyu nsoñgi u bikaat di ntjam tole nsoñgi u gwigil bi Bibel di ñéga! *

15. Kii Yéhôva a nôgda ngéda mut a neebe yigil i Bibel, a ha ki yom a nigil bibôñôl?

¹⁵ Yéhôva a nlôôha kon maséé ngéda mut a neebe yigil Bibel, yak nye a kahal añle bôt bape i mam a nigil. (Bingéngén 23:15, 16) Yéhôva a yé maséé kiyaga ngéda a ntehe yom i ntagbe len! Kiki hihéga, tolakii himala hi COVID-19 hi bak nayak i nwii nson u ntagbe, hala wee nwii 2020, Mbôgi Yéhôva i ntégbaha 7 705 765 gwigil bi Bibel, hala a bi boñ le 241 994 bôt ba bi ti bomede nkikip yak Yéhôva, ba sôblana ki. Ngéda bôt bana ba ntip  sôblana, ba yé maséé i tégbaha bôt bape gwigil bi Bibel ni i hôla bo i yila banigil. (Lukas 6:40) Ibabé nkaa, di ga kônha Yéhôva maséé ibale di nyoñ ngaba mu nson i yilha bôt banigil.

16. Imbe njômbi di nlama bana?

¹⁶ I yilha bôt banigil i ta bé jam li ntomb, ndi ni mahôla ma Yéhôva, di nla niiga bôt ba nigil ni bés i gwés Tata wés nungingii. Baa di yé le di yoñ makidik i bôdôl yigil i Bibel ni i ke ni bisu i éga yo? Ibale njômbi yés i, ndi di boñ biliya i bat hiki mut di mboma le di gwé ngôñ i nigil Bibel ni nye, di ga ba nhelek i tehe i nsoñgi bôt w’a sôk neebe i nigil Bibel ni bés. Di yé nkwoog nkaa le Yéhôva a ga sayap biliya gwés.

17. Kii di ga nôgda ibale di nsôk bana yigil i Bibel?

¹⁷ Kinje nsima di gwé i tééne bôt bape likalô ni i niiga bo! Nson u u nkônha toi bés maséé. Ñôma Paul, nu a bi hôla ngandak bôt i Tésalônika i yila banigil, a bi yelel i yom a bé nôgda ni bini bibuk le: “Bonjee ba yé botñem yés, tole maséé més, tole ntut wés u mahak i bisu bi Nwet le Yésu ngéda a mba ha? Baa bé yaga bé? Ibabé pééna, bé bon ni yé lipém jés ni maséé més.” (1 Tésalônika 2:19, 20; Minson mi baôma 17:1-4) Ngandak lôk kéé i nôgda nlélém i len ini. Sita Stéphanie nu bo nlôm ba bi hôla ngandak bôt i hol ikepam i sôble a nkal le: “Maséé mape ma nloo bé mana le di hôla bôt i ti bomede nkikip yak Yéhôva.”