1. Lelaa kaat 2 Korintô 3:1-3 i nhôla bés i diihe nsima di gwé i niiga bôt Bibel ikepam i sôble? (Béñge titii i lipep li bisu.)

KII u nôgda ngéda u ntehe nnigil Bibel nu likoda joñ a nsôblana? Ibabé nkaa u yé u nôgda maséé kiyaga! (Matéô 28:19) Ibale wen u nigil ni mut a ntip sôblana, kinje maséé i tehe nye a nkôs sôble! (1 Tésalônika 2:19, 20) I bôt ba ntip sôblana ba yé bikaat bi mbôgi he ndik bé inyu i bet ba nigil ni bo, ndi yak inyu likoda jolisôna.​—Añ 2 Korintô 3:1-3.

2. (a) Imbe mbadga di nlama timbhe, ni inyuki? (b) Kii i yé yigil Bibel? (Béñge buk isi lipep.)

² Kinje loñge jam i tehe le munu nwii mina mi ntip tagbe, batéé likalô ba ntégbaha jam kiki bo 10 000 000 gwigil * bi Bibel hiki sôñ ikété nkoñ ’isi wonsôna. Mu nwii mi, jam kiki bo 280 000 bôt i bé sôblana hiki nwii, i yilga ki banigil ba Yésu Kristô. Lelaa di nla hôla dini didun bôô dipe i sôblana? Ntel ngéda wonsôna Yéhôva a ngi tinak bôt ngéda ni pôla i yila banigil ba Kristô, di nlama boñ kii yosôna di nla i hôla bo i ke ni bisu i hol letee ni i sôble. Ngéda i yii i yé nhubuk!​—1 Korintô 7:29a; 1 Pétrô 4:7.

3. Kii di ga tehe munu yigil ini inyu gwigil bi Bibel di ntégbaha?

 ³ Kiki i nlôôha ba nseñ i boñ banigil nano, Juu li bakena ntôñ li bi bat dikuu di biloñ kii i nla bôña inyu hôla banigil Bibel i pala hol letee ni i sôble. Munu yigil ini, ni i i noñ, di ga tehe kii di nla nigil mu ndémbél i basañal, basañal ba ba nsal biloñ bipe ni bagwélél ba makiiña. * (Bingéngén 11:14; 15:22) I gwigil bini bi ga toñol kii nnigil Bibel ni ntéé likalô ba nla boñ inyu mahol ma nnigil Bibel. Munu yigil ini, di ga tehe mam matan nnigil Bibel a nla boñ inyu hol ikepam i sôble.

4. Kii di nyimbe inyu gwigil di ntégbaha bôt ba nleege bés i kula nwemel?

⁴ Ngandak lôk kéé i bôda ni i bôlôm i nigil ni bôt ba nleege bo i kula nwemel tole i mbédgé. Tolakii hala a nla ba bibôdle bilam inyu yi Bibel, minkwel mi, mi tah mi nomok bé, i yé i pam ki le mi tagbe bé hiki sonde. Inyu kônde ti bo ngôñ i nigil Bibel, ngim batéé likalô i yé i bat mut bo nye ba nigil le a ti bo nomba yé nsiñga inyu boñ le a sébél nye, tole a ômle nye nlôñ kaat u Bibel. I nya minkwel i kula nwemel i nla nom ibabé le di tek yigil Bibel. Ndi baa nnigil Bibel nu a nla hol ipam i sôble ibale ngéda yosô a nla ti inyu yigil Bibel, ni biliya gwobisô a nla boñ gwo bi? Heni.

5. Kii Yésu a bi kal i kaat Lukas 14:27-33 i i nla hôla bés mu kii di nigil ni bôt?

⁵ Lisañ jada, Yésu a bi ti hihéga hi hi bé unda i sesema mut a nlama boñ inyu yila nnigil. A bi pôdôl mut a nsômbôl oñ nkum ndap, ni kiñe i i nsômbôl ke i gwét. Yésu a bi kal le mut nu ‘a nlama ndugi yén isi, a ôt nsoñgi’ inyu tehe too a nla mélés nkum ndap u, ni le kiñe ‘i nlama yén isi, i bat batipék maéba’ inyu tehe too ntôñ wé gwét u nla jôs baoo bap. (Añ Lukas 14:27-33.) Yésu a bé yi le i mut a nsômbôl yila nnigil wé, a nlama tibil yi kii hala a nkobla. Inyu hala nyen, di nlama ti i bet ba nigil Bibel ni bés makénd i nigil hiki sonde. Lelaa di nla pam i boñ hala?

6. Kii di nla boñ inyu bana yigil Bibel i i nhol?

 ⁶ Inyu bôdôl, nômôs minkwel minan i kula nwemel ndék ni ndék. Hiki ngéda u nyuuga nye, u nla kônde nlôñ Bibel wada tole ima mu nkwel nan. Ibale nwet ndap a meya minkwel mi nom, bat nye ibale ni nla yén homa inyu kena nkwel nan ni bisu. Ha ngéda i, ndimbhe i nwet ndap i ga unda bés ibale yigil Bibel i yéne nye mahee. I mbus, u nla bat nye ibale ni nla nigil ngélé iba hiki sonde inyu boñ le a pala hol. Ndi, i nigil ngélé yada tole iba hiki sonde i kôli bé.

7. Lelaa ntéé likalô a nla tibil kôôba hiki yigil a nke i tégbaha?

⁷ I we nu u yé nniiga, u nlama tibil kôôba hiki ngéda u nke i tégbaha yigil. Inyu bôdôl, soñgol maben, u wan minlôñ mi Bibel, u tééda balôm ba matode. Mu kiki u nkôôba, hoñol ño nkwel u yigil, bon ba miño mi minkwel, mambadga ma yigil, minlôñ mi Bibel ba nti le ni “soñgol,” bititii ni bividéô. U hoñlak ki lelaa u nla kena nkwel inyu boñ le nnigil Bibel a tibil nok i yom a nigil, a gwélél ki yo mu niñ yé.​—Néhémia 8:8; Bingéngén 15:28a.

8. Kii bibuk bi Paul i kaat Kôlôsé 1:9, 10, bi niiga bés inyu nseñ u masoohe i ngéda di nkôôba yigil?

⁸ I ngéda u nkôôba, soohe inyu nnigil Bibel, bat Yéhôva le a hôla we i tihba ñem wé. (Añ Kôlôsé 1:9, 10.) Badba le: Baa ngim jam i yé munu yigil ini nnigil wem a ga nok bé loñge, tole i nla lédél nye i neebe? U hôya bañ le njômbi yoñ i yé le u hôla nye i hol ikepam i sôble.

9. Lelaa ntéé likalô a nla hôla i mut bo nye ba nigil i kôôba yigil? Toñol.

⁹ Ngôñ yoñ i yé le i mut we ni nye ni nigil Bibel hiki ngéda, a ti Yéhôva bo Yésu mayéga inyu mam ba mboñ, a bana ki ngôñ i kônde nigil mam inyu yap. (Matéô 5:3, 6) Inyu ôt nseñ ni yigil i nya i yôni, nnigil Bibel a nlama bok mahoñol mé momasô mu mam a nigil. Hôla nye i nok le i yé nseñ i kôôba bisu bi ngéda, ni i tehe lelaa a nla bii i yom a nigil bibôñôl.  Lelaa u nla ni hôla nye? Kôôba yigil yada ni nye inyu unda nye lelaa hala a mbôña. * Toñle nye lelaa ba nléba mandimbhe, u unda ki nye lelaa ba ntand balôm ba bibuk tole minlôñ mi mi ga hôla nye i bigda ndimbhe. I mbus, bat nye le a timbhe ni bibuk gwé nyemede. Ngéda a ntimbhe, hala a nhôla we i yi too a nok i yom a nigil. U héya i mam di ntip pôdôl, u nla ki tinde i mut a nigil Bibel ni we i boñ jam lipe.

10. Inyuki i yé nseñ i añ Bibel hiki kel, ni kii nnigil Bibel a nlama boñ inyu boñ le lisoñgol jé li Bibel li bane nye nseñ?

¹⁰ U héya i yigil a mboñ ni nwet a niiga nye Bibel hiki sonde, nnigil Bibel a nlama boñ ngim mam nyetama hiki kel. A nlama kwel ni Yéhôva. Lelaa a nla boñ hala? I yé nseñ le a emble Yéhôva, a kwel ki ni nye. A nla emble Djob ngéda a ñañ Bibel hiki kel. (Yôsua 1:8; Tjémbi 1:1-3) Unda nye lelaa a nla gwélél “ntjega u lisoñgol li Bibel” ba nléba i jw.org. * Inyu hôla nye i ôt nseñ ni lisoñgol jé li Bibel, kal nye le a badba le: Kii i jam lini me ñañ ikété Bibel li niiga me inyu Yéhôva? Ni lelaa me nla gwélél jo i niñ yem?​—Minson mi baôma 17:11; Yakôbô 1:25.

11. Lelaa nnigil Bibel a nla nigil i tibil soohe, ni inyuki i yé nseñ le a bana lem i soohe Yéhôva?

¹¹ Ti nnigil Bibel makénd i soohe Yéhôva hiki kel. I bibôdle ni i mamélél ma yigil, soohe we ni nye u simga jôl jé masoohe moñ. I ngéda a ñemble we u nsoohe, a ga nigil i yible Yéhôva ñem ikété masoohe ni i soohe nye i jôl li Yésu Kristô. (Matéô 6:9; Yôhanes 15:16) Hoñol ki, i ngéda nnigil Bibel a nke ni bisu i soñgol Bibel hiki kel, hala wee i emble Yéhôva, ni i soohe nye hala wee i kwélés nye, a nkônde kôôge nye bebee! (Yakôbô 4:8) Bilem bi, bi ga hôla nnigil Bibel i bana ngim jam i i ga tinde nye i hol letee a ti nyemede nkikip a sôblana ki. Limbe li jam?

12. Lelaa ntéé likalô a nla hôla nnigil Bibel i yila liwanda li Yéhôva?

¹² I mam nnigil Bibel a nigil ma nlama ndik bé yén mahoñol mé, ndi ma nlama yak tihba ñem wé. Inyuki? Inyule ñem wés hala wee mahoñol més ma kétékété, ni i yom di nôgda won u ntinde bés i yoñ makidik. Kiki Yésu a bé yi niiga, bôt ba bé gwés ba ñemble nye. Ba bé noñ ki nye inyule a bé yi tihba miñem nwap. (Lukas 24:15, 27, 32) I mut we ni nye ni nigil a nlama tehe Yéhôva kiki mut bo nye ba nla bana maada, a yoñ nye kiki Isañ, kiki Djob jé, ni kiki Liwanda jé. (Tjémbi 25:4, 5) I ngéda ni nigil, hôla nye i yimbe bilem bi Djob. (Manyodi 34:5, 6; 1 Pétrô 5:6, 7) I ngéda ni nwan ngim pes, hôla nye i tehe umbe ntén mut Yéhôva a yé. Hôla nye i ti Yéhôva mayéga inyu bilem gwé kii bo gwéha, loñgeñem, ni ñem ngôô. Yésu a kal le i ‘mbén i nloo mabén momasôna’ i i yé ki mbén i bisu i yé le: “Gwés Yéhôva Nyambe woñ.” (Matéô 22:37, 38) Boñ biliya le gwéha i Yéhôva i o i ñem wé.

13. Ti hihéga hi hi ñunda lelaa di nla hôla nnigil Bibel i nigil bilem bi Yéhôva.

¹³ I ngéda u nkwel ni nnigil Bibel, toñle nye inyuki u ngwés Yéhôva. Hala a ga hôla nye i nok le a nlama yéñ i yila liwanda li Yéhôva ni i gwés ki nye. (Tjémbi 73:28) Kiki hihéga, baa ngim homa a yé i het ni yé nigil nu a nlôôha tihba we inyule a mpôdôl gwéha Yéhôva, pék yé, telepsép yé, tole ngui yé? Sima yo mu nkwel nan, u yis nye le njom yada i yon i ntinde we i gwés Yéhôva Tata wés Nungingii. Inyu boñ le a hol ipam i sôble, hiki nnigil Bibel a nlama ki boñ jam lipe di ga tehe hanano.

14. Inoñnaga ni kaat Lôk Héber 10:24, 25, lelaa makoda ma nla hôla nnigil Bibel i hol?

¹⁴ Bés bobasôna di ngwés le i bôt bés ni bo di nigil ba hol ipam i sôble. Inyu hôla bo i boñ hala, di nlama ti bo makénd i lo makoda. Batéé likalô ba makeñge ba nkal le i ngéda nnigil Bibel a nlo makoda hala a nhôla nye i pala hol. (Tjémbi 111:1) Batéé likalô bape ba yé ba toñle nnigil Bibel le,  yigil yé Bibel i ga hôla nye i kôhna yi, ndi yak makoda ma nla hôla nye i yi mam mape. Añ Lôk Héber 10:24, 25 ni nnigil Bibel, u toñle nye i nseñ a nla kôs ibale a mbôdôl lo makoda. Ni béñge vidéô ini le Kii i ntagbe i ndap Ane? * Hôla nye i bana lem i ke makoda momasôna.

15. Lelaa u nla ti nnigil Bibel makénd i lo makoda momasôna?

¹⁵ Kii u nla boñ ibale mut we ni nye ni nigil a yé ngi bôdôl lo makoda, tole a nlo ndik makoda ngim mangéda? Ni makénd momasôna añle nye ngim jam u bi nigil likoda li ntip tagbe. I ngéda a ntehe maséé u gwé i ngéda u nke makoda, hala a nkônde ti nye ngôñ i ke mo. Ti nye Nkum Ntat tole Kaat likoda li ñem sonde di nigil i sôñ i. Unda nye minkwel mi ga tagbe i likoda li noñ ha, u bat nye umbe u nlôôha lémél nye. I mam nnigil Bibel a ga tehe a nok ki i likoda jé li bisu, li nlôôha ba mahéñha ni i mam momasô a ma nok ni tehe i bibase bipe. (1 Korintô 14:24, 25) A ga boma ki lôk kéé ipe i i gwé maboñok malam ma ma ga tinde nye i hol ikepam i sôble.

16. (a) Kii di nla boñ inyu tégbaha bôt gwigil bi bi nhôla bo i hol ikepam i sôble? (b) Kii di ga tehe i yigil i noñ?

¹⁶ Kii di nla boñ inyu tégbaha bôt gwigil bi bi nhôla bo i hol ikepam i sôble? Di nhôla hiki nnigil Bibel i diihe yigil yé i ngéda di nti nye makénd i nigil hiki sonde ni i kôôba yigil yé hiki ngéda ilole di tégbaha yo. Di nlama ki ti nye makénd i soohe Yéhôva hiki kel ni i bana maada malam ni nye. Di nlama ti nnigil Bibel makénd i lo makoda. (Béñge minkéñék mi matila le: “ I mam nnigil Bibel a nlama boñ inyu hol ikepam i sôble.”) Ndi kiki yigil i noñ i ga toñol, batéé likalô ba nlama boñ mam malam mape inyu hôla banigil Bibel i hol ikepam i sôble.