1, 2. Lelaa Yéhôva a ñunda lem i likap inyu yés?

YÉHÔVA a yé Djob li likap. Gwom gwobisôna bi yé gwé. Yéhôva nyen a gwé gôl ni silba yosôna, ni ligwañ lipe li hisi. A ngwélél gwo inyu hôla bés i niñ. (Tjémbi 104:13-15; Hagai 2:8) Bibel i yé nyonok ni miñañ mi mi ntoñol lelaa Yéhôva a bi gwélél tik yé gwom i nya i nhélhana inyu hôla litén jé.

² Yéhôva a bi ti bon ba Israel Mana ni malép letee ni 40 nwii, ngéda ba bé i ñoñ. (Manyodi 16:35) Jon, “yom yo ki yo i héñél bé bo.” (Néhémia 9:20, 21) Ni njel Elisa, Yéhôva a bi boñ manyaga le a bulus ndék môô i yik muda. Likébla li Djob li bi hôla nye i saa mapil mé, ni i bana jôga li moni inyu niñis nyemede ni bon bé bôlôm bobasôna. (2 Bikiñe 4:1-7) Ni mahôla ma Yéhôva, Yésu a bi ti bôt bijek ni moni ni njel manyaga.—Matéô 15:35-38; 17:27.

3. Kii di ga nigil munu yigil ini?

³ Yéhôva a nla gwélél to kii inyu nit bihégél gwé hana isi. Ndi, a nke ni bisu i naña bagwélél bé i gwélél  bigwel moo ba gwé, inyu nit ntôñ wé. (Manyodi 36:3-7; añ Bingéngén 3:9.) Inyuki Yéhôva a mbem le di tiimba ti nye tik yés gwom? Lelaa bagwélél bé ba kôba, ba bé nit i bet Yéhôva a bé a om, ni moni? Lelaa ntôñ u ngwélél moni makébla i len ini? Di ga timbhe mambadga mana munu yigil ini.

4. Ngéda di nit nson u Yéhôva, kii hala a ñunda?

⁴ Di nti Yéhôva makébla inyule di ngwés nye, ni le di diihe ki nye. Di yé nhelek ngéda di ntehe mam momasôna Yéhôva a ma boñ inyu yés. Ngéda a bé toñle bo mam ma bé béda inyu maoñ ma témpel, Kiñe David a bi kal le i gwom gwobisôna di nkôs bi nlôl ni Yéhôva, ni le to kii di nti nye i nlôl ni gwom a mbôk a ti bés.—Añ 1 Miñañ 29:11-14.

5. Lelaa Bitilna bi ñéba le makébla ma njômbi ñem ma yé litode li mahee li bañga bibégés?

⁵ Makébla di nti Yéhôva, ma yé ngim njel i bibégés di nti nye. Ni njel yiinda yada, ñôma Yôhanes a bi nok bagwélél ba Yéhôva ba ba yé i ngii, ba nkal le: “We, a Nwet wés ni Nyambe wés, wen u kôli ni lipém ni bibégés, ni lipémba; inyule wen u hek gwom gwobisôna, inyu sômbôl yoñ ki nyen bi bane, bi héga ki.” (Masoola 4:11) Baa i ta bé ntiik le Yéhôva a kôli ni lipém ni bibégés bi di nla ti nye, ngéda di nti nye tik yés gwom? Yéhôva a bat litén li Israel ni njel Môsi, le li kodba bisu gwé ngélé iaa hiki nwii inyu tégbaha mangand. Mu mangéda ma, bibégés bon ba Israel ba bé ti, bi bé sôña bo i ‘pam bisu bi Yéhôva moo nso.’ (Ndiimba Mbén 16:16) Nlélém i len ini, i ti makébla ni ñem maséé inyu nit ntôñ u Yéhôva hana isi, i yé jam li mahee ikété bibégés di nti nye.

6. Inyuki likap li yé loñge inyu yés? (Béñge titii i bibôdle.)

⁶ I ti makébla i yé loñge inyu yés. I yé bés loñge i ba bôt ba likap, he bé i bôt ba mbem ndik le ba ti bo. (Añ Bingéngén 29:21.) Di nla yoñ hihéga hi mañge a nti bagwal bé likébla mu ndék moni a bi tééda i moni ba bé ti nye. Kinje maséé bagwal bé, ba nla nok! Tole hégda mañge munlôm, tole nu muda nu a niñ ni bagwal bé, a bak nsañal, a nla ti bo ndék moni inyu nit mam ma mbéda i ndap. Tolakii i nla ba le bagwal ba gwé bé ngôñ ni mahôla ma, ba nla neebe likébla li inyule, hala a yé ngim njel inyu man wap i ti mayéga inyu mam momasôna ba mbôñôl nye. Nlélém ni bés, Yéhôva a nyi le i yéne bés loñge i ti nye tik yés gwom.

7, 8. Lelaa bagwélél ba Djob, ba ba bé niñ ngéda ba bé tila Bibel, ba bi yigle bés ndémbél (a) inyu jam li nit bitééne bi tôbôtôbô? (b) inyu jam li nit nson Djob?

⁷ I ti makébla i yé ntéak jam ikété Bitilna. Ngim mangéda, bagwélél ba Yéhôva ba bé ti makébla inyu nit ngim nson u tôbôtôbô. Kiki hihéga, Môsi a bi naña Lôk Israel i ti makébla inyu maoñ ma lap Nyambe, yak Kiñe David a bi boñ nlélém inyu maoñ ma témpel. (Manyodi 35:5; 1 Miñañ 29:5-9) I ngéda Kiñe Yéhôas, biprisi bi bé gwélél moni mi litén li bi ti, inyu tibil ndap i Yéhôva. (2 Bikiñe 12:4, 5) I hiai bisu, ngéda lôk kéé i bi yi le njal i nai i Yudéa, “hi mut kii la yé, ba [bi]  mélés le ba ñômle lôktata i nyén i Yudéa mahôla.”—Minson mi baôma 11:27-30.

⁸ Masañ mape, bagwélél ba Yéhôva ba bi ti moni inyu nit babôgna nson mahôla. I si Mbén Môsi, Lôk Lévi i bi kôs bé ngababum kiki mana matén mape. Iloo hala, bon ba Israel ba bé ti bo jôga jada jolisôna ikété jôm mu libumbul jap, li li bé hôla bon ba Lôk Lévi i bok mis map i nson u lap Nyambe. (Ñañga Bôt 18:21) Nlélém jam inyu Yésu ni banigil bé mbus ngéda, ba bôda ba likap ‘ba ba nit ni nkus wap.’—Lukas 8:1-3.

9. I ngéda kôba, makébla ma bé lôl hee?

⁹ I yé ntiik le makébla ma, ma nlôl bahoma bahoma. Ngéda ba bi bat le makébla ma tiba inyu bañ lap Nyambe i ñoñ, mu gwom bon ba Lôk Israel ba bi ti, i nene le yak gwom ba lona Égiptô bi bé mu. (Manyodi 3:21, 22; 35:22-24) I hiai bisu, lôk kéé ihogi i bi nuñul gwom i bééna, kiki bo nwom, mandap, ba kena moni mi bisu bi baôma. Mbus, baôma ba kébél nwo lôk kéé i i bééna ngôñ ni mahôla. (Minson mi baôma 4:34, 35) Bape ba bé kôhle moni mu yom ba bé kôs, inyu ti makébla ma njômbi ñem hiki ngéda, inyu nit nson. (1 Korintô 16:2) Jon, mintén mi bôt nwominsôna—ibôdôl i bet ba bé ngwañ ikepam diyeyeba —mi bi la ti makébla.—Lukas 21:1-4.

10, 11. (a) Lelaa di nla kôna bagwélél ba Yéhôva, ba ba bé niñ ngéda Bibel i bé tilba? (b) Ngéda u nhoñol nsima u gwé i nit nson Ane, kii u nôgda?

¹⁰ I len ini, yak bés di nlama ti makébla inyu nson tôbôtôbô. Kiki hihéga, baa ba nsômbôl oñ ndap Ane i mondo inyu likoda linan? Tole baa ba nsômbôl bôñgôl ndap nan Ane? Di hôya bañ tole moni mi mbéda inyu bôñgôl hikuu hi loñ hiés, inyu boñ le likoda li ndôn jés li tagbe, tole inyu nit bilôk bikéé bi bi niñ het bikuu bi nkwo. Di nti ki makébla inyu nit i bet ba nsal i hikuu hiés hikeñi i Amérika, ni bon ba dikuu bape ikété nkoñ isi. Makébla di nti ma nit ki basañal ba ba nsal i loñ ipe, basañal ba tôbôtôbô, ni bagwélél ba makiiña. Ibabé pééna, likoda joñ li bi yoñ bitelbene i ti moni inyu nit nson maoñ ma mandap ma Ane. Moni mi di nti hiki ngéda, mi nhôla i ôñôl bilôk bikéé bi nkoñ isi wonsôna mandap ma Ane.

¹¹ Bés bobasôna di nla yoñ ngaba i nit nson u Yéhôva munu dilo di nsôk tini. Libim li bôt li nti makébla li ngwés bé le môl map ma yiba. Inyule ba nleñ makébla map i dikukuu di yé mandap ma Ane ibabé le mut a tehe bo, tole ba nti nwo ni njel internet i jw.org. Di nla hoñol le, ndék yés makébla i ta bé to yom. Ndi, libim li moni li ntiba i len ini, li nlôl ni ngandak bon ba makébla bôt ba nti, iloo mbôm. Lôk kéé yés, yak i bet ba niñ ikété liyep, i yé kiki bilôk bikéé bi hiai bisu bi bi bé niñ i Makédônia, ‘bi bi bé lôôha yep,’ ndi bi bi nai ndik le bi nti makébla.—2 Korintô 8:1-4.

12. Lelaa ntôñ u mboñ biliya inyu tibil gwélél moni ba nti?

¹² Ni njel masoohe, Juu li bakena ntôñ li mboñ biliya i gwélél moni mi ni maliga, ni pék. (Matéô 24:45) Ilole ba ngwélél moni, ba ntibil wan inyu yi kii ba mbôñôl nwo. (Lukas 14:28) Ngéda Bibel i bé tilba, ba bi téé ngim bôt i  maliga inyu béñge too makébla ma bé gwéélana loñge. Kiki hihéga, Esra a bi témb i Yérusalem ni makébla ma Kiñe Persia a bi ti—gôl, silba, ni tik gwom ipe i i nla pam iloo $100 didun (moni mi Amérika) i len ini. Esra a bé tehe moni nu kiki makébla ma njômbi ñem ma ba nti Yéhôva, jon a bi yoñ bitelbene bi ngui inyu tat le baoo bap ba kadal bañ gwo mu liké jap. (Esra 8:24-34). Ñôma Paul a bi kot moni inyu lôl lôk kéé i Yudéa i mahôla. Yak nye a bi yoñ bitelbene i yi le bôt ba ba nkap nwo, ba ‘kôôba le mam momasôna ma telep loñge, ha bisu bi Yéhôva nyetama bé, ndi yak bisu bi bôt ki.’ (Añ 2 Korintô 8:18-21.) Mu kii di noñ ndémbél i Esra ni Paul, ntôñ wés i len ini, u njôha bé to ndék ngéda i mpam le u gwélél tole u pémés moni.

13. Lelaa di ntehe mahéñha ntôñ u bi lona masañ mana?

¹³ I nla pam le ngim lihaa i yoñ bitelbene i héñha bilem gwé inyu mam ma moni, kayéle moni mi njôp, ni mi lihaa li mpémés mi kihga. I nla ki pam le ba wan mam ba nla boñ inyu suhus likala jap li niñ, inyu kéñbaha ngaba ba nyoñ i nson u Yéhôva. Nlélém jam won ntôñ u Yéhôva u mboñ. I nwii mini, ngandak bibôlô i mbôña. Ngim mangéda, hala a mbat ngandak moni iloo yak mi mi njôp. Jon, Ntôñ u nyéñ manjel inyu suhus lipémhak jap li moni, kayéle ba laa sal inoñnaga ni moni ba nkôs ni njel makébla ma njômbi ñem.

14-16. (a) Mambe mam makébla ma nhôla i boñ? (b) Lelaa wemede u bi ôt nseñ ni bitelbene bini?

¹⁴ Ngandak bôt i i bi nom i ntôñ u Yéhôva i len ini, i nkal le i mah tehe bé ngéda kiki ini i ntôñ wé, ni ngandak bijek bi mbuu. Ni hoñol ki! Nano di gwé jw.org ni JW Nkuu biliñgeliñge. Ngobol yés Bibel i Pulasi le Les Saintes Écritures. Traduction du monde nouveau i nke ni bisu i pam ikété ngandak dilémb. I nwii 2014/2015, nwom mi bol minkeñi ikété bitison 14 ntjamak ni nkoñ isi wonsôna, mi bi leege makoda ma ndôn ma dilo diaa ma ma bé kot bôt ba bé lôl i ngandak bahoma ba nkoñ isi, likoda li ndôn li li bééna ño nkwel ni hop Pulasi le “Continuez à chercher d’abord le Royaume de Dieu !” I bet ba bé mu makoda ma ndôn ma, ba bé nyonok ni maséé.

¹⁵ Ngandak i nti mayéga inyu minsima mi tôbôtôbô i nkôs i ntôñ  u Yéhôva. Kiki hihéga, inyu pôdôl nseñ ba bi kôs i béñge JW Nkuu biliñgeliñge, babiina ba ba nsal i loñ Asia yada, ba bi tila le: “Ba bi om bés i man tison. Hala a bé boñ bés le, di nôgda wengoñle di yé bés botama, kayéle di bé hôya bikeñi bi nson u Yéhôva u u mbôña i nkoñ isi wonsôna. Ndi, ngéda di mbéñge JW Nkuu biliñgeliñge, di mbigda le di yé ikété lihaa likeñi li bilôk bikéé ni nkoñ isi wonsôna. Bilôk bikéé bi bôda ni bi bôlôm bi likoda jés bi ngwés JW Nkuu biliñgeliñge ngandak. Di mbéna nok bo ba nkal i mbus ba béñge JW Nkuu biliñgeliñge le, ba nlôôha ba bebee nano ni bilôk bikéé bi Juu li bakena ntôñ. Ba yé maséé kiyaga i ba i ntôñ u Djob.”

¹⁶ Ikété nkoñ isi wonsôna, bebee le 2 500 mandap ma Ane ma yé ôña, ba bôñglak mape ma ma ñun. Mbus ba bi bôdôl gwélél ndap Ane yap i mondo, lôk kéé i likoda jada i loñ Oñduras, i bi tila le: “Di yé maséé kiyaga i ba ikété lihaa likeñi li Yéhôva ntjamak ni nkoñ isi wonsôna, di ôdôk ki nseñ ni maada més malam ni bilôk bikéé bi nkoñ isi wonsôna. Gwom bi gwobiba gwon bi nyilha eem yés maliga, i bana ndap Ane.” Ngandak bilôk bikéé ipe i ma bana minlélém mi mahoñol mbus ba bi kôs Bibel ni bikaat bipe ikété hop wap, tole mbus ba bi kôs mahôla ngéda bikuu, ni mbus ba bi tehe lelaa likalô li mbamba ni li tafel i libôga jap li bi num matam malam.

17. Ngéda di ntehe lelaa ntôñ u nsal i len ini, lelaa hala a ñunda le Yéhôva nyen a nit wo?

¹⁷ I bôt ba ta bé Mbôgi Yéhôva, ba nla bé nok lelaa di mboñ i bôlô ini yosôna, ni njel makébla ma njômbi ñem ndigi. Mbus mayuuga mé ma hikuu hiés hiada hi hi mpémés bikaat, mut nkeñi wada a kal le, a bé nhelek i nok le i bôlô i yosôna i mbôña ni bôt ba nsal yañga, ni moni a nlôl makébla ma njômbi ñem ndigi, ibabé i nuñul yom yo ki yo i i njubus moni. A kal le hala a nla bé bôña. Mbale i! Di nyi le, hala a nla ndik bôña ni mahôla ma Yéhôva.—Hiôb 42:2.

18. (a) Bimbe bisai di nkôs ngéda di nti makébla inyu nit nson Ane? (b) Lelaa di nla niiga bon bés ni bôt ba nigil ni bés i boñ nlélém?

¹⁸ Yéhôva a nti bés lipém ngéda a nti bés pôla i nit nson wé nkeñi u mbôña len. A mbôn ntiik le d’a kôs bisai ibale di nit nson Ane. (Malaki 3:10) Yéhôva a mbôn ki bés le mut likap a’ nuuhana. (Añ Bingéngén 11:24, 25.) U héya hala, likap li nti bés maséé, inyule ‘maséé ma nlôôha ba i ti iloo i kôs.’ (Minson mi baôma 20:35) Ni njel bipôdôl ni maboñok més, di gwé nsima i niiga bon bés ni bôt ba nigil ni bés lelaa ba nla yoñ ngaba i ti makébla, ni bisai bikeñi b’a kôs ni njel i.

19. Lelaa yigil ini i nti we makénd?

¹⁹ Hiki yom di gwé i nlôl ni Yéhôva. Ngéda di ntiimba ti nye, hala a ñunda le di ngwés nye, di diihege ki mam momasôna a mboñ inyu yés. (1 Miñañ 29:17) Ngéda bon ba Israel ba bé ti makébla inyu maoñ ma témpel, “ha nyen loñ i hak, inyule ba ti makébla ni ngôñ yap ñem, lakii ba ti Yéhôva makébla ni miñem nwap ngim.” (1 Miñañ 29:9) Di ke ni bisu i kôhna maséé ni mahak ma ma nlôl i tiimba ti Yéhôva mu gwom a nti bés.