1, 2. Limbe jam l’a lôôha at bôt ni nkoñ isi wonsôna i nwii 2018, ni inyuki? (Béñge titii i bibôdle.)

HILO 31 hi sôñ Matumb, i nwii 2018, litén li Djob ni ngandak yap mawanda ipe, b’a kodba inyu tégbaha Bilôp bi Nwet kiki lem hiki nwii. Mu kii hisi hi nkiiña, didun di bôt ikété nkoñ isi di ga kodba bana mbus bape i manañle ma hiañgaa, inyu lôôs Mbigda nyemb Kristô. Hiki nwii, mbigda nyemb Yésu ini i yé i ba ngim jam li tôbôtôbô li li ñat ngandak bôt ’isi hiosôna!

² Di nla ndigi hégda lelaa Yéhôva bo Yésu ba nlama nok maséé ngéda ba ntehe didun di bôt ikété nkoñ isi, di nke ngeñ mbus ngeñ i lôôs Mbigda nyemb Yésu i u u wonsôna. Bibel i bi bôk kal le: “Limut li bôt likeñi li mut nye ki nye a bé bé le a la añ, ba lôlak biloñ gwobisôna, ni mahaa momasôna, ni matén momasôna, ni dilémp tjodisôna” li bé lama lond makeñi le: “Tohi i ba ni Nyambe wés, nu a yii mu yééne ane, yak ni Man Ntômba ki.” (Masoola 7:9, 10) Kinje  hélha jam le Yéhôva bo Yésu ba nkôs lipém i nya i, ni njel Mbigda nyemb Yésu hiki nwii!

3. Mambe mambadga i yigil ini i ga timbhe?

³ Yigil ini, i ga timbhe mambadga bôt ba bi bat inyu Mbigda nyemb Yésu. (1) Lelaa hiki wada wés a nla kôôba Mbigda nyemb Yésu, ni ôt nseñ ni yo ibale di mba ha yokel? (2) Ni mambe manjel Mbigda nyemb Yésu i ntihba adna i litén li Djob? (3) Lelaa hiki wada wés a nla unda le a nit i adna i? (4) Baa Mbigda nyemb Yésu i nsôk i ga ba? Ibale ñ, kekii?

4. Inyuki i yé nseñ inyu yés i boñ biliya gwobisôna i ba i Mbigda nyemb Yésu?

⁴ Ôt pék ni nseñ u, u gwé i ba i Mbigda nyemb Yésu. Bigda le, makoda ma yé njel yada ikété bibégés di nti Djob. Di yé nkwoog nkaa le, Yéhôva bo Yésu ba nyimbe nu ni nu a mboñ biliya i ke likoda li tôbôtôbô li nwii. I pot maliga, di gwé ngôñ le ba tehe bés i Mbigda nyemb Yésu hilo hi, u héya le njom ikeñi i kéñ bés i ba ha. Ngéda di ñunda ni maboñok més le makoda ma bibégés ma, ma yéne bés nseñ, di nti Yéhôva njom ipe i tééda jôl jés i “kaat mbigda”—i “kaat niñ”—i i gwé môl ma bôt, ba Yéhôva a gwé ngôñ i ti niñ boga.—Malaki 3:16; Masoola 20:15.

5. Bisu bi ngéda ilole Mbigda nyemb Yésu i mba, lelaa di nla tibil wan inyu yi ‘too hémle yés i yé bañga’?

⁵ Bisu bi ngéda ilole Mbigda nyemb Yésu i mba, di nla tjek ngéda inyu soohe ni i tibil wan maada més ni Yéhôva. (Añ 2 Korintô 13:5.) Lelaa ni di nla pam i boñ hala? Di tibil wan inyu yi ‘too hémle yés i yé bañga.’ Inyu boñ hala, i yé loñge i badba le: ‘Baa me nhémle toi le me yé mpom ntôñ, u Yéhôva a ngwélél i len ini inyu boñ sômbôl yé? Baa me mboñ kii yosôna me nla inyu téé likalô, ni niiga bôt? Baa maboñok mem ma ñunda toi le, me nhémle ntiik le di niñil dilo di nsôk, ni le lisuk li énél i Satan li yé bebee? Baa me ngi bôdlak Yéhôva bo Yésu ñem kii ngéda bisu, ngeñ me bi ti memede nkikip yak Yéhôva Djob?’ (Matéô 24:14; 2 Timôtéô 3:1; Lôk Héber 3:14) I yoñ ngéda i ôt pék mu nya mambadga i, i ga hôla bés i ke ni bisu i unda umbe ntén mut di yé.

6. (a) Kii i yé mpom njel i nkena i niñ? (b) Lelaa mañ wada u nkôôba Mbigda nyemb Yésu hiki nwii, lelaa yak we u nla boñ nlélém?

⁶ Añ, u soñda ki minkwel mi Bibel mi mi ntoñol kii i yé Mbigda nyemb Yésu. (Añ Yôhanes 3:16; 17:3.) Mpom njel u u nkena i niñ boga wo unu le ‘di pam i yi’ njee a yé Yéhôva, di ‘sélés [ki] hémle’ yés ipañ Yésu, nu a yé pombe Yé Man. Inyu kôôba Mbigda nyemb Yésu, inyuki u ta bé le u pohol i nigil ngim mam i i ga hôla we i kôôge bebee ni Yéhôva bo Yésu? Béñge jam nhôôlak mañ unu u gwé lem i boñ ibôdôl behee. Kiki nwii mi bé tagbege, a bi tééda gwigil bi Nkum Ntat bi bé pôdôl Mbigda nyemb Yésu, ni gwéha Yéhôva bo Yésu ba bi éba bés. I sonde i mbôk ilole Mbigda nyemb Yésu i ntagbe, a ntiimba añ gwigil bi, a soñdaga ki mu nseñ di gwé i bigda nyemb i. Ngim mangéda, a yé a kônde biniigana bi mondo bi bi ntip pam. Mañ u, u bi yimbe le ngéda u ntiimba boñ hala hiki nwii, u añak ki lisoñgol li Bibel inyu Bilôp, u nléba biniigana bi mondo. Jam li nlôôha ba nseñ li yé le, a nôgda le gwéha yé inyu  Yéhôva bo Yésu i nkônde nañ hiki nwii. Ngéda di nigil hala, gwéha yés ipañ Yéhôva ni Yésu i nkônde hol, hol ni hol, kayéle ni laa pam i ôt bañga nseñ ni Mbigda nyemb Yésu.

7. (a) Inyu limbe jam Yésu a bi soohe i u a bi tégbaha Bilôp bi Nwet bi bisu? (b) Kii ñéba le Yéhôva a bi emble masoohe ma Yésu?

⁷ I u Yésu a bi tégbaha Bilôp bi Nwet bi bisu, a bi soohe le banigil bé ba bana maada, nlélém kiki ma a gwé ni Isañ. (Añ Yôhanes 17:20, 21.) Yéhôva a bi emble masoohe ma Man wé nu gwéha, i len ini didun di bôt di nhémle le Yéhôva a bi om toi Man wé. Likoda li Mbigda nyemb Yésu, iloo mana mape momasôna, li ñunda ibabé pééna yo ki yo le Mbôgi Yéhôva i édi. Bôt ba ba nlôl i ngandak matén, ba ban-ga bé kôgôô nyuu yada, ba nkodba i nkoñ isi wonsôna. Ngim bahoma ba nkoñ isi, ba mbéna bé tehe bôt ba matén nya ndi nya, ba nkodba inyu bégés Djob ntôñ, tole ba nyan jam li. Ndi i nya adna i, i nlôôha nlémél Yéhôva bo Yésu!

8. Umbe nwin Yéhôva a bi ti Ezékiel inyu adna i litén?

⁸ Kiki di yé bagwélél ba Djob, adna yés i nhélés bé bés. Ndi, Yéhôva a bôk pot jam li behee. Di wan nwin a bi ti mpôdôl Ezékiel u u bé pôdôl miñadak mi bikék ima, kék yada “inyu Yuda” ni ipe ki “inyu Yôsep.” (Añ Ezékiel 37:15-17.) Yigil i “Mambadga ma basoñgol” i i bé pémél i Nkum Ntat nu sôñ Njéba, i nwii 2016 i bé toñol le: “Yéhôva a bi ti Ezékiel nwin u hogbe, a bôn adna i litén li Israel mbus matémb map i Hisi hi Likak. Nwin unu, u bi pot ki i bisu bi ngéda inyu adna litén li Djob li ga témb li bana i dilo di nsôk.”

9. Lelaa di ntehe biyônôl bi mbañ Ezékiel hiki nwii i Mbigda nyemb Yésu?

⁹ Ibôdôl ha i nwii 1919 i ke ni bisu, Yéhôva a bi témb a bôdôl tjek ni kot minhook ndék ni ndék, nwon mi bé yimbne i kék “inyu Yuda.” Mbus ngéda, ngandak bôt ipe i i bééna botñem i niñ hana isi —i i bé yimbne i kék “inyu Yôsep”—i bi lo adba ni minhook, mintôñ mi nwo ima, mi bi sôk mi yila “bémba yada.” (Yôhanes 10:16; Sakaria 8:23) Yéhôva a bôn le a ga at bikék bi gwobiba, a yilha gwo kék yada i woo wé. (Ezékiel 37:19) Ha nyen mintôñ mi nwo ima mi bé lama ba i si énél i Kiñe yada—hala wee Yésu Kristô ñeñgbak ni lipém jé, nwet ba mpôdôl mu mbañ i, kiki “nkol wem le David.” (Ezékiel 37:24, 25) I adna ilam i, Ezékiel a mpôdôl, i ntibil nene hiki nwii i ngéda minyégla mi minhook ni “mintômba mimpe” mi nkodba inyu lôôs Mbigda nyemb i Kristô! Kii hiki wada wés a nla boñ inyu tééda ni hôñôs i adna i?

10. Lelaa di nla hôñôs adna ipôla bagwélél ba Djob?

¹⁰ Lem i i nhôla bés i hôñôs adna ipôla yés i yé le di sal inyu ba suhulnyu. Ngéda a bé hana isi, Yésu a bi béhe banigil bé le ba suhus bomede. (Matéô 23:12) Ibale di gwé ñem nsôhga, di ga nwas bé le mahoñol ma ngôk ma nkoñ isi ma yoña bés. Maselna ni hala, suhulnyu i ga hôla bés i suhus bésbomede i si ba ba ñéga bés, i nya libak li manôgla i, i yé nseñ inyu adna i likoda. I ngii mam momasôna, suhulnyu yés i ga lémél Nyambe, nu “a nkolba bôt ba  nhumbul nyuu, ndi a nti ba ba nsuhus nyuu karis.”—1 Pétrô 5:5.

11. Lelaa i hek pék mu ngobol i bret ni wai i nhôla bés i hôñôs adna?

¹¹ Njel i nyônôs iba di nla gwélél inyu hôñôs i adna i, i yé i hek pék mu ngobol i bret ni wai ba ngwélél yokela. Di nlama boñ hala ilole u, u Mbigda nyemb Yésu u nkola—i kôkôa i yomede—di yoñ ngéda i tibil soñda mu ngobol i bret i ngi séñha ni wai. (1 Korintô 11:23-25) Bret i yé yimbne i nyuu ngi béba yo ki yo, i Yésu a bi ti kiki sesema, ni wai yimbne i matjél mé ma bi kuba. Di nlama ndik bé yi ngobol i bret ni wai. Bigda ki le, binoñ bi Kristô bi ñunda le bôt iba ba bi lôôha gwés bés—gwéha Yéhôva a bi unda bés ngéda a bi ti Man wé inyu tohol bés, ni gwéha Yésu a bi unda mu kii a ba bebee i ti niñ yé kiki sesema inyu yés. I bigda gwéha ba bi unda, i nlama tinde yak bés i gwés bo. Ni le kiki bés ni lôk kéé yés, di ngwés Yéhôva, i gwéha i i yé kiki nkôô u u ñat bés, u lédhak ki adna yés.

12. Ikété hihéga hié hi kiñe i i bi nwéhél nkol wada pil, lelaa Yésu a bi tibil éba le Yéhôva a mbem le di nwéhél?

¹² Njel i nyônôs aa di nla gwélél inyu hôñôs adna i yé le, di ba bebee i nwéhél. Ngéda di nwéhél i bet ba mbabaa bés, di ñunda le di nti mayéga inyu nwéhél Djob a nwéhél bibéba gwés ni njel binoñ bi Kristô. Di yoñ dihéga di Yésu di nléba i kaat Matéô 18:23-34. Badba le: ‘Baa ñem u ntinde me i noñ biniigana bi Yésu? Baa me nhônba lôk kéé yem i mbuu, ni nok ki bo? Baa me yé bebee i nwéhél i bet ba mboñ me béba?’ I yé ntiik le, bibéba bi nloa, kayéle i nla ba bés ndutu i nwéhél bibéba bihogi inyule di yé bikwéha. Ndi, hihéga hini hi niiga bés kii Yéhôva a ngwés le di boñ. (Añ Matéô 18:35.) Yésu a ntibil éba le Yéhôva a ga nwéhél bé bés ibale yak bés di nwéhél bé lôk kéé yés ngéda di kôli boñ hala. Kinje jam li ntinde bés i wanba! Di nsôñ, di téédaga ki adna yés ilam, ngéda di nwéhél bape kiki Yésu a bi niiga bés.

13. Lelaa di nla hôñôs adna ngéda di yé bakôp nsañ?

 ¹³ Ngéda di nwéhél bôt bape, di ñunda le di yé bakôp nsañ. Bigda maéba ma ñôma Paul nu a kal le di ‘nyamnda yaga i tééda adna mbuu, le nsañ u at bés.’ (Efésô 4:3) Munu ngéda Mbigda nyemb Yésu ini, ni téntén i u u, tibil hoñol lelaa u niñ ni bôt bape. Badba le: ‘Baa me ñéba le me yé mut nu a ntéédana bé bôt bape hiun? Baa me nyiba kiki mut a nhôñôs nsañ ni adna ipôla bôt?’ Di nlama yoñ ngéda i hek pék mu mambadga ma i ngéda Mbigda nyemb Yésu.

14. Lelaa di nla unda le di ‘nhônbana bés ni bés ikété gwéha’?

¹⁴ Njel i nyônôs ina inyu hôñôs adna i yé le di unda gwéha kiki Yéhôva, Nyambe nu gwéha. (1 Yôhanes 4:8) Di kalak bañ kekikel inyu lôk kéé yés le: “Me nlama gwés bo inyule ba yé bilôk bikéé, ndi i pot maliga, ba nlémél bé me”! Mahoñol ma, ma nkolba maéba ma Paul mana le: “Ni hônbanaga bé ni bé ikété gwéha.” (Efésô 4:2) Yimbe le, a nkal ndik bé le di ‘hônbanaga bés ni bés.’ Ndi a bi kônde le, di nlama boñ hala “ikété gwéha.” Ikété makoda més, ba nléba mintén mi bôt nwominsôna mi Yéhôva a bi ôt. (Yôhanes 6:44) Kiki Yéhôva nyen a bi ôt bo, a nlama gwés bo. Jon, ibale nye a ngwés bo, inyuki bés di nhoñol le, ba kôli bé ni gwéha yés? Di nlama bé tjél unda gwéha, i Yéhôva a ngwés le di bambal!—1 Yôhanes 4:20, 21.

15. Kii i nyis bés le Mbigda nyemb Yésu i nsôk y’a ba?

¹⁵ Kel yada, Mbigda nyemb Yésu i nsôk i ga ba. Lelaa di nyi hala? I kaat bisu a tilna bôt ba Korintô, Paul a tilna lôk kéé i i bé minhook, le ngéda di mbigda nyemb Yésu hiki nwii, di nke ni bisu i ‘añal nyemb Nwet letee a lo.’ (1 Korintô 11:26) I buk ini le “a lo” ba ngwélél hana i gwé nlélém ngobol ni i Yésu a bi gwélél i mbañ yé i dilo di nsôk ngéda a kal le “a nlôl” ngii. Inyu pôdôl njiiha keñi i i yé bebee, a kal le: “Yimbne Man mut y’a nene ngii; ngéda i matén ma ’isi momasôna m’a ee, m’a tehe Man mut a nlôl ngii ond ngii ni lipémba ni lipém likeñi. [Yésu] a’ om añgel yé ni mbimba keñi i sép, y’a kot mintebek nwé mi lôlak mbebi ina, ibôdôl lisuk li ngii jada letee ni lii.” (Matéô 24:29-31) I kot a’ ‘kot mintebek nwé’ hana, li ga bôña ngéda minhook nwominsôna mi mi ngi yii hana isi, mi ga kôhna bom yap i ngii. Hala a’ bôña ngéda pes bisu i njiiha keñi i mba i ma mal, ilole gwét bi Armagédôn bi mbôô. Ha nyen 144 000 minhook nwominsôna, mi ga ba lôñ yada ni Yésu inyu jôs bikiñe bi nkoñ isi. (Masoola 17:12-14) Mbigda nyemb Yésu i i ga tagbe ilole Yésu a nlo i kot minhook mi mi ngi yii hana isi inyu ke i ngii, i ga ba i nsôk, inyule Yésu a mba a ma ‘lo.’

16. Baa u nyoñ makidik ma ngui i ba ha Mbigda nyemb Yésu i i nlo?

¹⁶ Di yoñ makidik ma ngui i ba ha i Mbigda nyemb Yésu, i i ga ba hilo 31 i sôñ Matumb, i nwii 2018. Di soohe ki Yéhôva le a hôla bés i ke ni bisu i sal inyu adna i bagwélél bé! (Añ Tjémbi 133:1.) Ni bigda le kel yada, di ga tégbaha Mbigda nyemb Yésu i nsôk. Jon mu kii di mbem, di boñ kii yosôna di nla inyu ba ipôla baemble yokel, di undga ha ngéda i le di ndiihe adna ilam di mbéna bana hiki nwii i Mbigda nyemb Yésu.