1-2. (a) Kii Yéhôva a ntehe ngéda didun di bôt di nkodba inyu Bilôp bi Nwet? (Béñge lipep li bisu li Nkum Ntat nunu.) (b) Kii di ga wan munu yigil ini?

HÉGDA jam Yéhôva a ntehe ngéda didun di bôt di nkodba inyu lôôs Bilôp bi Nwet ikété nkoñ isi wonsôna. A nhéléé ndik bé i béñge nsoñgi wap nkeñi, ndi a ntehe yak hiki mut nu a mba ha yokela. Kiki hihéga a mbéñge i bet ba nlo i Bilôp hiki nwii. Mu nsoñgi wap, di nla sima i bet ba nlama yémbél ndééñga i nloo héga inyu ba ha. Bape ba nlo bé makoda més hiki ngéda, ndi inyu yap, i ba i Mbigda nyemb Yésu i nlôôha ba mahee. Yéhôva a ntehe ki i bet ba nlo i Mbigda nyemb Yésu inyu ngélé yap bisu, bebek ndigi inyu tehe kii i ntagbe.

² I yé ntiik le, Yéhôva a yé maséé i tehe le ngandak bôt i nlo i Mbigda nyemb Yésu. (Lukas 22:19) Ndi, nsoñgi bôt bé won u nlôôha nseñ i mis ma Yéhôva. Jam li nlôôha mahee i mis mé; li yé njom i ntinde bo i lo. Munu yigil ini, di ga timbhe ngim mbagda i nlôôha nseñ, yon i yé le: Inyuki di nke ndigi bé i Mbigda nyemb Yésu, ndi di nke ki makoda momasôna ma sonde ma Yéhôva a nti bôt a ngwés?

3-4. (a) Inyuki di nke makoda? (b) Kii i ke makoda més ma sonde i nyis bôt inyu yés? (c) Inoñnaga ni 1 Korintô 11:23-26, inyuki di nlama bé tôl i Mbigda nyemb Yésu?

³ Njom i bisu bisu i i ntinde bés i ke makoda i yé le, hala a njôp bibégés di nti Nyambe. Di nke ki makoda inyu kôhna biniigana bi Yéhôva. Bôt ba ngôk ba gwé bé ngôñ le mut a niiga bo. (3 Yôhanes 9) Maselna ni hala, bés di  nyamnda ni ngôñ i kôs biniigana bi Yéhôva, ni bi ntôñ wé.​—Yésaya 30:20; Yôhanes 6:45.

⁴ Ngéda di nke makoda hala a ñunda le di yé suhulnyuu, di bak bebee i kôs biniigana, di gwéhék ki gwo. Di nke ndik bé i Mbigda nyemb Yésu inyule di yé nyégsaga, ndi téntén inyule ni suhulnyuu di noñ ini oda i Yésu le: “Kena ni bisu i boñ hala, ni hoñlege me mu.” (Añ 1 Korintô 11:23-26, MN.) Likoda li li nlédés botñem yés inyu bilôl, li nhôñlaha ki bés le Yéhôva a nlôôha gwés bés. Ndi, Yéhôva a nyi le likoda jada i ngim nwii li kôli bé inyu lédés bés ni ti bés makénd. Jon a nti bés makoda ma hiki sonde, a gwé ki ngôñ le di kenek mo. Suhulnyuu yon i ntinde bés i nôgôl i oda i. Di ntégbaha ngandak ngéda hiki sonde i kôôba ni i tégbaha makoda ma.

5. Inyuki bôt ba suhulnyuu ba nleege nsébla u Yéhôva?

⁵ Hiki nwii, ngandak bôt i suhulnyuu i neebe i lo le Yéhôva a niiga bo. (Yésaya 50:4) Ba nkon maséé i lo i Mbigda nyemb Yésu, mbus ba nke ni bisu i lo makoda més mape. (Sakaria 8:20-23) Bés ni bo di nkon maséé i kôs biniigana ni maéba ma Yéhôva, nu a yé ‘nhôla wés ni nsôñ wés.’ (Tjémbi 40:18) Ntiik, kii i nla kônha maséé​—tole i nlôôha ba nseñ​—iloo i neebe nsébla u Yéhôva bo Yésu, Man wé nu a nlôôha gwés, le ba niiga bés?​—Matéô 17:5; 18:20; 28:20.

6. Lelaa suhulnyuu i bi hôla mut wada i lo i Mbigda nyemb Yésu?

⁶ Hiki nwii, di mboñ biliya i naña libim li bôt i lo i Mbigda nyemb Yésu. Ngandak bôt i suhulnyuu i bi ôt nseñ i neebe nsébla wés. Di wan hihéga hiada. Nano a yé ngandak nwii le, mut wada a bi kôs lipep li nsébla li Mbigda nyemb Yésu, ndi a bi kal mankéé a ti nye jo le, a’ ba bé ha. Ndi, i kôkôa i, mankéé a bé nhelek i tehe mut nu a njôp i ndap Ane. Maleege malam a bi kôhna, ma bi tihba nye ngandak, kayéle a bôdôl lo makoda més ma sonde. Hélha jam le, a bi tôl ndigi makoda maa mu nwii wonsôna u bé noñ ha. Kii i bi hôla nye i yoñ bitelbene bilam bi? A bé lôôha ba suhulnyuu kayéle a bé bé le a boñ nya ipe. Mankéé a bi naña nye a bi kal mbus ngéda le: “A yé mut a nlôôha ba suhulnyuu.” Ibabé pééna, Yéhôva nyemede nyen a bi ôt mut nu inyu lo i bégés Nye, i len ini a yé nsôblege mankéé.​—2 Samuel 22:28; Yôhanes 6:44.

7. Lelaa mam di nigil makoda ni ma di ñañ i Bibel ma nla hôla bés i ba suhulnyuu?

⁷ Mam di nigil makoda, ni ma di ñañ i Bibel, ma nla hôla bés i ba bôt ba suhulnyuu. Ndék sonde ilole Mbigda nyemb Yésu i ntagbe, makoda més ma mbéna pôdôl ndémbél i Yésu, ni suhulnyuu a bi unda mu kii a bi ti niñ yé kiki sesema i binoñ. Ndék dilo ilole Mbigda nyemb Yésu i ntagbe, ba yé ba ti bés makénd i añ miñañ mi mam ma nkéña nyemb Yésu ni bitugne gwé ikété Bibel. Mam di nigil mu makoda ma, ni ma di ñañ mu miñañ mi, ma ntinde bés i lôôha ti mayéga inyu sesema i Yésu. Hala a ntinde bés i kôna libak jé li suhulnyuu, ni i boñ sômbôl i Yéhôva yak ngéda hala a yé nledek.​—Lukas 22:41, 42.

8. Lelaa Yésu a bi unda ñem ngui?

⁸ Di noode ki kôna Yésu ngéda di ñunda ñem ngui. Hoñol ñem ngui a bi  unda ndék dilo ilole a nwo. A bé yi le baoo bé ba bé bebee i wéha nye nyuu, i bép nye ni i nol nye. (Matéô 20:17-19) Nyemede a bi neebe wo. Ngéda ngeñ i bi kola, a bi kal baôma bé ba ba bi téñbe ni nye i Gétsémané le: “Telbana, di kenek. Nuna-ki! Nu a nliibana me a gwé ni moo.” (Matéô 26:36, 46) Ngéda ntôñ bôt u u bééna bijôl bi gwét u bi lo gwel nye, a bi telep bisu, a kal bo le nyen ba nyéñ, ba nwas baôma bé ba ke. (Yôhanes 18:3-8) Kinje ñem ngui u mbuma ñañ Yésu a bi unda! I len ini, minhook mi bikristen ni mintômba mimpe mi mboñ biliya i kôna ñem ngui u Yésu. Lelaa ba mboñ hala?

9. (a) Inyuki di gwé ngôñ ni ñem ngui inyu ke makoda hiki ngéda? (b) Lelaa ndémbél yés ilam i nla lédés lôk kéé yés i i yé i mok inyu hémle yap?

⁹ Inyu ke makoda hiki ngéda, i mbéda bés ñem ngui inyu yémbél mandutu di mboma. Lôk kéé yés ihogi i bôlôm ni i bôda i nke makoda to ngeñ ba nok njôghe i ñem, to ngeñ ba yé ntombok, tole ngeñ ba nkon. Ni ñem ngui, bape ba nyémbél ngolba i bôt bap ba lihaa tole i baane inyu lo makoda. Hoñol lelaa ndémbél yés i ñem ngui i nlédés lôk kéé yés i i yé i mok inyu hémle yap. (Lôk Héber 13:3) Ngéda ba nok le di nke ni bisu i bégés Yéhôva tolakii di mboma ndééñga, hala a nti bo makénd i ke ni bisu i tééda hémle, ñem ngui ni ndéñbe yap. Hala a bi pémél yak ñôma Paul. Ngéda a bé i mok i Rôma, a bé maséé i nok le lôkisañ i mbuu i bé téñbe i gwélél Nyambe. (Filipi 1:3-5, 12-14) Ndék ngéda ilole ba mpémés nye i mok, tole mbus le ba bi pémés nye, nyen a bi tila kaat i Lôk Héber. Mu kaat i a bi ti bikristen makénd le bi ‘téñbe ni gwéha yap lisañ li bôt,’ ni le bi waa bañ ke makoda.​—Lôk Héber 10:24, 25; 13:1.

10-11. (a) Bonjee di nlama naña i Mbigda nyemb Yésu? (b) Imbe njom kaat Éfésô 1:7 i ti bés i boñ hala?

¹⁰ Di ñunda ñem ngui ngéda di naña bôt bés ba lihaa, solôñ yés i bôlô ni bôt bés ba libôk i Mbigda nyemb Yésu. Inyuki di naña bo? Inyule di nlôôha ba maséé ni jam Yéhôva bo Yésu ba bi bôñôl bés kayéle di nla bé tjél naña bape i tégbaha Bilôp bi Nwet ni bés. Di gwé ki ngôñ le ba yi lelaa ba yé le ba ôt nseñ ni ‘konangoo i mbuma ñañ’ i Yéhôva, i i nene mu binoñ.​—Añ Éfésô 1:7, MN; Masoola 22:17.

¹¹ Mu kiki di nkodba ntôñ, di ñunda ñem ngui, di ñunda ki lem lam ipe, i Nyambe bo Man wé ba bi unda i nya hélha.

12. (a) Lelaa makoda ma nkéñbaha gwéha yés inyu Yéhôva bo Yésu? (b) Lelaa 2 Korintô 5:14, 15 i ntinde bés i kôna Yésu?

¹² Gwéha yés inyu Yéhôva bo Yésu, i nyégsa bés i ke makoda. Mbus, mam di  nigil makoda ma nkéñbaha gwéha yés inyu Yéhôva ni Man wé. Hiki ngéda i makoda, ba nhôñlaha bés i mam ba bi boñ inyu yés. (Rôma 5:8) Téntén Mbigda nyemb Yésu i nhôñlaha bés gwéha yap ikeñi inyu yés, yak inyu i bet ba yé ngi nok mahee ma binoñ. Ñem nyonok ni mayéga, di noode kôna Yésu mu niñ yés i hiki kel. (Añ 2 Korintô 5:14, 15.) Jam lipe li yé le, miñem nwés mi ntinde bés i bégés Yéhôva inyu binoñ a bi ti inyu yés. Njel yada di nla gwélél inyu bégés nye i yé mandimbhe ma ma nlôl bés i ñem di nti makoda.

13. Lelaa di nla unda le di gwé njôôñ gwéha inyu Yéhôva bo Man wé? Toñol.

¹³ Di nla ki unda njôôñ gwéha inyu Yéhôva bo Man wé ngéda di yé bebee i tjôô ngandak mam inyu yap. Jon, ngim mangéda i yé i pam le di tjôô ngandak mam inyu ba makoda. Ngandak makoda i mbomna mamélél ma kel, mbus di ma huu i bôlô, di bak nwaak. Likoda lipe li yé li ba mamélél ma sonde, ngéda bôt bape ba yé i noi. Baa Yéhôva a nyimbe ngéda di nlo makoda, yak ngeñ di yé nwaak? Ñ! Biliya bi ngui gwobisôna di mboñ inyu i lo makoda, bi ñunda Yéhôva ikepam limbe likala di ngwés nye.​—Markô 12:41-44.

14. Lelaa Yésu a bi yigle bés loñge ndémbél i mut a bé bebee i ti nyemede sesema inyu unda gwéha?

¹⁴ Yésu a bi yigle bés loñge ndémbél i mut a bé bebee i ti nyemede sesema inyu unda gwéha. Jon a bi neebe ndik bé i wo inyu banigil bé, ndi a bé yak bebee i niñ inyu bii yéñe yap bisu bi yéñe yé hiki kel. Kiki hihéga, a bé tégbaha ngéda ni bo yak ngéda a bé nwaak, ni ngéda a bé ikété nduña i nlôôha. (Lukas 22:39-46) A bi bok ki mis mé i mam a bé la ti bôt bape, he bé i mam ba bé le ba ti nye. (Matéô 20:28) Ngéda gwéha yés inyu Yéhôva ni inyu lôk kéé yés i gwé ngui, di ga boñ kii yosôna di nla inyu ba i Bilôp bi Nwet, yak ni makoda mape.

15. Bonjee di nlôôha bana ngôñ i ti mahôla?

¹⁵ Di yé ikété lihaa likeñi li bilôk bikéé i nkoñ isi wonsôna, di ntégbaha ki ngandak ngéda kiki la yés i naña bôt  bape i kodba ni bés. Ndi di nlôôha ti ngéda i hôla i bet “ba ba yé [bés] lihaa li hémle,” ba ba bi waa téé likalô ni lo makoda. (Galatia 6:10) Di ñunda bo gwéha ngéda di nti bo makénd i lo makoda, téntén i Mbigda nyemb Yésu. Kiki Yéhôva bo Yésu, di nlôôha ba maséé ngéda bahogi ikété yap ba ntémb yak Yéhôva, Tata wés nu gwéha ni Ntat wés.​—Matéô 18:14.

16. (a) Lelaa di nla tina makénd, umbe nseñ makoda ma yéne bés? (b) Inyuki nano a yé loñge ngéda inyu bigda bibuk bi Yésu bi bi nlébna i kaat Yôhanes 3:16?

¹⁶ Dilo di mba di noñ, naña libim li bôt u nla i tégbaha Mbigda nyemb Yésu i kôkôa i ngwa koo, hilo 19 hi sôñ Matôp, 2019. (Béñge minkéñék mi matila mi mi gwé ño nkwel le “Baa w’a naña bo?”) Mu nwii wonsôna u noñ, di boñ kii yosôna di nla inyu tina makénd mu kiki di ba di nlo makoda momasôna Yéhôva a nkôôbana bés. Kiki lisuk li hiai hini li yé bebee, makoda més ma ga hôla bés i tééda libak jés li suhulnyuu, ñem ngui ni gwéha. (1 Tésalônika 5:8-11) Ni ñem wés wonsôna, di unda le di nlôôha gwés Yéhôva bo Man wé!​—Añ Yôhanes 3:16.