1-2. (a) Lelaa nwin di nléba i kaat Yésaya 41:10 u bi hôla sita Yôshikô? (b) Yéhôva a bat le ba tééda nwin u inyu yen?

YÔSHIKÔ, sita yada i i tiñi ni Djob, i bi kôhna béba nwin. Dokta jé li bi kal nye le, i ngi yii ndik nye ndék sôñ i niñ. Lelaa a bi leege nwin u? Yôshikô a bi bigda nlôñ Bibel a bé lôôha gwés, hala wee Yésaya 41:10. (Añ.) Ni nwee nyensôna, a bi kal dokta jé le hala a bé kônha bé nye woñi, inyule Yéhôva a bé a gwé nye i woo. * Nwin u nlôñ Bibel unu u u nhôgbaha, u bi hôla sita yés i bôdôl Yéhôva ñem ni ñem wé wonsôna. Nlélém pes kaat u nla hôla bés i ba nwee ngéda di mboma mandutu makeñi. Inyu nok lelaa hala a nla bôña, di wan ndugi inyuki Nyambe a bi ti mpôdôl wé Yésaya nwin u.

² Yéhôva a bat Yésaya le a tila bibuk bini inyu lédés Lôk Yuda i ba bé lama kena minkôm i Babilôn. Yéhôva a boñ le ba tééda nwin u ha ndik bé inyu yap, ndi yak inyu bagwélél bé bobasôna ibôdôl ha ngéda i, letee ni len. (Yésaya 40:8; Rôma 15:4) I len ini, di niñil ‘dilo di nsôk [i het] ngéda i yé nledek kiyaga,’ jon di gwé ngôñ ni makénd ma ma nlôl i kaat Yésaya. ​—2 Timôtéô 3:1.

3. (a) Mimbe mimbônga di nléba i kaat Yésaya 41:10, i i yé pes kaat i nwii 2019? (b) Inyuki di gwé ngôñ ni mimbônga mi?

³ Munu yigil ini, di ga pôdôl mimbônga maa mi mi nla lédés hémle yés, mi di nléba i kaat Yésaya 41:10: (1) Yéhôva a’ ba ni bés, (2) a yé Nyambe wés, ni (3) a ga hôla bés.  Di gwé toi ngôñ ni mimbônga mini * inyule, kiki Yôshikô, di mboma mandutu. Mandutu mape ma nkwél bés inyule mam mabe ma yé nayak i nkoñ isi. Bahogi ikété yés ba nhônba ndééñga i i nlôl bo ni biénél bi nkoñ isi. Di wan mimbônga maa mi wada i mbus wada.

4. (a) Umbe mbônga u bisu di ga wan? (Béñge yak matila i si lipep.) (b) Lelaa Yéhôva a ñunda i jam a nôgda inyu yés? (c) Lelaa bibuk Djob a ngwélél bi ntihba we?

⁴ Yéhôva a nlédés ndugi bés ni bibuk bini le: “U kon bañ woñi, inyule me yé ni we.” * Yéhôva a ñunda le a yé ni bés mu kiki a ntôñ bés, a gwéhék ki bés. Di yimbe kiki a mpôdôl nduña a gwé inyu yés ni lelaa a nlôôha diihe bés. Yéhôva a nkal le: “U yé tik i mis mem, ni mut a mal tina lipém, ni nu me ngwés.” (Yésaya 43:4) To yom yo ki yo i nla bé boñ le Yéhôva a waa gwés bagwélél bé; ndéñbe yé i gwés bés i ta bé le i mal. (Yésaya 54:10) Kiki a ngwés bés, a bak ki liwanda jés, hala a nlôôha ti bés makénd. A ga tééda bés len kiki a bi tééda liwanda jé Abram (Abraham). Yéhôva a bi kal nye le: “A Abram, u kon bañ woñi. Me yé ben yoñ.”​—Bibôdle 15:1.

5-6. (a) Lelaa di nyi le Yéhôva a gwé ngôñ i hôla bés i ngéda di mboma mandutu? (b) Kii ndémbél i Yôshikô i niiga bés?

⁵ Di nyi le Yéhôva a gwé ngôñ i hôla bés mu mandutu di mboma inyule a mbôn bagwélél bé le: “Ngéda w’a ba u nlôô malép, me yé ni we; to balom yaga, b’a milba bé we. Ngéda u ntagbene hié, w’a lighana bé, to lindômbôô li hié l’a toñbene bé we.” (Yésaya 43:2) Kii bini bibuk bi nkobla?

⁶ Yéhôva a mbôn bé bés le a mélés mandutu més, ndi le a’ neebe bé le “balom” ba mandutu ba kulna bés, tole “lindômbôô” li mandutu li yigle bés ndôndôô i mba ni mba. A mbôn bés le a ga ba ni bés, a ga hôla bés i ‘yémbél’ mandutu ma. Kii Yéhôva a ga boñ? A ga hôla bés i ba nwee inyu boñ le di  laa tééda ndéñbe yés ipañ yé, to bisu bi nyemb. (Yésaya 41:13) Yôshikô, nu di mbôk sima, a bi nôgda maliga ma. Ngond yé i nkal le: “Di bé nhelek i tehe lelaa m’ma a bé nwee. Di bi nôgda le Yéhôva a bé ti toi nye nsañ u kété kété. Letee ni nyemb yé, m’ma a bi pôdôs bahôla bidôkta ni bakokon bape inyu Yéhôva ni mimbônga nwé.” Kii ndémbél i Yôshikô i niiga bés? Ngéda di gwé bôdôl munu mbônga Djob unu le: “Me yé ni we,” yak bés di ga bana ñem ngui i bisu bi mandutu.

7-8. (a) Umbe mbônga u yônôs iba di ga tehe munu yigil ini, u nkobla le kii? (b) Inyuki Yéhôva a kal bon ba Lôk Yuda ba ba bé minkôm le: “U nwaa bañ mis homa ni homa”? (c) Bimbe bibuk bi kaat Yésaya 46:3, 4, bi bi lama lédés bagwélél ba Djob ha ngéda i?

⁷ Yimbe mbônga u yônôs iba Yésaya a bi pôdôl: “U nwaa bañ mis homa ni homa, inyule men me yé Nyambe woñ.” Kii bibuk bini bi mpôdôl nduña bi nkobla? Buk i hop Lôk Héber ba bi gwélél hana inyu kal le mut a “nwaa mis homa ni homa,” i nkobla le “i hielba inyu béñge too jam libe li yé lo” tole “i béñge mbus inyu tehe lelaa u nla boñ ibale béba jam i nsômbôl pémél we.”

⁸ Inyuki Yéhôva a kal bon ba Lôk Yuda ba ba bé lama ke minkôm i Babilôn le ba “nwaa bañ mis homa ni homa”? A kal hala inyule a bé yi le bayén mu loñ ba bé lama kon woñi. Kii i bé lama kônha bo woñi? Bebee ni mamélél ma 70 nwii minkôm, mimpémba mi mintôñ mi gwét mi Média ni Persia mi bé lama leñ Babilôn gwét. Yéhôva a bé lama gwélél ntôñ gwét u inyu kobol litén jé minkôm i Babilôn. (Yésaya 41:2-4) Ngéda bon ba Babilôn ni bôt ba matén mape ba ba bé niñ ha ngéda i, ba bi nôgda le baoo bap ba bé kôôge bebee, ba bi yéñ le ba tééda ñem ngui, jon ba bé kalna le: “Lédés yaga ñem.” Ba bé bañ ki bisat, ba hoñlak le bi ga sôñ bo. (Yésaya 41:5-7) Mu mangéda ma nyen, Yéhôva a bi mômôs miñem mi bon ba Lôk Yuda ba ba bé minkôm ni bini bibuk le: “Ndi we, a Israel [maselna ni bôt ba nkéña bé] nkol wem . . . U nwaa bañ mis homa ni homa, inyule men me yé Nyambe woñ.” (Yésaya 41:8-10) Yimbe le, Yéhôva a kal le: “Me yé Nyambe woñ.” Ni bini bibuk, Yéhôva a bé yis bagwélél bé le a nhôya bé bo​—a bé a ngi yii Djob jap, yak bo ba bé ba ngi yii litén jé. A bi kal bo le: “M’a begee ki bé . . . me sôñ ki bé.” Ibabé pééna, bibuk bini bi bi lédés bon ba Lôk Yuda ba ba bé minkôm.​—Añ Yésaya 46:3, 4.

9-10. Inyuki di nlama bé kon woñi? Ti hihéga.

⁹ I len ini, bôt ba nkéña bés ba yé nyonok ni nduña inyule, mam ma nkoñ isi ma mbep ndigi bep ni bep. Ni maliga, minlélém mi mam mi ntihba yak bés. Ndi inyu yés nseñ i ta bé le di kon woñi. Yéhôva a nkal bés le: “Me yé Nyambe woñ.” Inyuki bibañga bini bi yé toi bañga njom i i ntinde bés i yén nwee?

¹⁰ Di yoñ hihéga hini: Hégda le bôt iba, Jim bo Ben, ba yé liké ikété avioñ, ndi mbebi i kahal pôgôs nye. Mu kiki avioñ a nke ini pes ni ii, kiñ i nôga i i nkal le: “Ni tééda ngôli nan ntéñék. Ndék ngéda wee di ntagbe homa mbe.” Woñi u nsômbôl nol Jim. Ndi nkis avioñ a kônde le: “Ni nwaa bañ mis homa ni homa. Me nkis avioñ, men me mpôdôs bé.” Ha nyen, Jim a peghe ño, a kal le: “Kii we u nkal bôt mu?” Ndi a yimbe le  hala a ntééñga bé Ben [a nwaa bé mis homa ni homa]. Jim a bat nye le: “Inyuki u yé nwee hala?” Ben a nwemla, a kal le: “Inyule me nyi nkis avioñ nu loñge loñge. Pua yem nu!” Mbus Ben a kal nye le: “Nwas le me añle we njee a yé pua yem. Me yé nkwoog nkaa le, ngéda w’a yi njee mut a yé ni likeñge a gwé, w’a kon ha bé woñi.”

11. Bimbe biniigana di nla ôt mu hihéga hi bôt iba ba yé liké?

¹¹ Bimbe biniigana di nla ôt munu hihéga hini? Kiki Ben, di yé nwee inyule di nyi Tata wés nungingii, le Yéhôva loñge loñge. Di nyi le a ga hiômna bés munu dilo di nsôk dini, i het mandutu ma mpôgôs bés kiki béba mbebi, ibabé le jam libe li pémél bés. (Yésaya 35:4) Di mbôdôl Yéhôva ñem, jon di yé nwee to ibale woñi u nlo nol bôt ba nkoñ isi. (Yésaya 30:15) Kiki Ben, di ñañle bôt bés ba libôk inyuki di mbôdôl Djob ñem. Ni njel i nyen yak bo ba nla pam i bana botñem le Yéhôva a’ nit bo, to ba mboma imbe ndutu.

12. (a) Umbe mbônga u yônôs aa di ga wan? (b) Kii i buk ini le “woo” u Yéhôva i mbigdaha bés?

¹² Di wan mbônga u yônôs aa di nléba i kaat Yésaya: “M’a ba me nti we ngui. Hodo, m’a hôla [we].” Mpôdôl Yésaya a bi bôk a unda lelaa Yéhôva a bé lama ti litén jé ngui, tole lelaa a bé lama lédés jo, ni bibuk bini le: “Yéhôva a nlo, a bak mpémba, woo wé ki w’a kahap.” (Yésaya 40:10) Bibel i mbéna gwélél i buk ini le “woo” inyu pôdôl ngui. Jon ngéda ba nkal le “woo [u Yéhôva] w’a kahap,” hala a nhôñlaha bés le Yéhôva a yé Kiñe i nlôôha bana ngui. A bi gwélél ngui yé i i gwé bé héga inyu nit ni inyu sôñ bagwélél  bé ba kôba, yak i len ini a ngi gwéélak yo inyu lédés ni inyu sôñ bet ba mbôdôl nye ñem.​—Ndiimba Mbén 1:30, 31; Yésaya 43:10.

13. (a) Imbe ngéda téntén Yéhôva a nyônôs mbônga wé i lédés bés? (b) Umbe mbônga u nlôôha ti bés ngui ni bôdôl?

¹³ Yéhôva a nyônôs mbônga unu téntén ngéda baoo bés ba ntééñga bés, a nkal le: “M’a ba me nti we ngui.” Ngim bahoma i nkoñ isi, baoo bés ba mboñ biliya bi ngui inyu téé nson wés likalô, tole inyu boñ le di jôp lisol. Ndi to hala, di nlôôha bé kon woñi. Mbônga Yéhôva a bi ti bés, u nlôôha ti bés ngui ni bôdôl. A mbôn bés le: “Jôl gwét yo ki yo i ñua inyu jôs we, i ta bé le i nyo we.” (Yésaya 54:17) Hala a nhôñlaha bés mam maa ma ma nlôôha nseñ.

14. Inyuki hala a nhélés bé bés le baoo ba Nyambe ba njôs bés?

¹⁴ Pog, di nyi le kiki di yé banigil ba Yésu, b’a oo bés. (Matéô 10:22) Yésu a bi legel bisu bi ngéda le, ba bé lama tééñga banigil bé dilo di nsôk. (Matéô 24:9; Yôhanes 15:20) Iba, mbañ Yésaya i bi béhe bés bisu bi ngéda le baoo bés b’a oo ndik bé bés; ndi b’a gwélél ngandak mintén mi bijôl bi gwét inyu jôs bés. Ikété dipa tjé di nla sima malôga, b’a tembee i ngii yés, tole b’a tééñga bés ngandak. (Matéô 5:11) Yéhôva a ga sôña bé baoo bé i gwélél bijôl bi gwét bi inyu jôs bés. (Éfésô 6:12; Masoola 12:17) Ndi di nkon bé woñi. Inyuki?

15-16. (a) Kii i yé jam li yônôs aa di nlama bigda, ni lelaa Yésaya 25:4, 5 a nit jam li? (b) Lelaa Yésaya 41:11, 12 a ntoñle bés i jam li ga pémél i bet ba njôs bés?

¹⁵ Di wan jam li yônôs aa di nlama bigda. Yéhôva a kal le, “jôl gwét yo ki yo” i i ñua inyu jôs bés, i “ta bé le i nyo” bés. Kiki mabap ma ndap ma nkéñ le ôôm nop i nôl bañ bés, hala nyen Yéhôva a nsôñ bés ni ‘nhébék u ba ba mbôôha bés  ñem matjél.’ (Añ Yésaya 25:4, 5.) Baoo bés b’a pam yaga bé i boñ bés béba i i nom mba ni mba.​—Yésaya 65:17.

¹⁶ Yéhôva a nlédés ki botñem di gwé inyu yé mu kiki a ntoñol jam li ga pémél ba bobasôna “ba nlegda ni hiun ikolba” bés. (Añ Yésaya 41:11, 12.) To ibale sañ ba njôs bés i nlôôha bana ngui lelaa, lisuk li ga ba ndigi nlélém: Baoo ba litén li Djob bobasôna “b’a ba wengoñle yom i ta ha bé [i nséha], ba tjiba ki.”

17-18.(a) Lelaa lisoñgol li Bibel li nla kéñbaha i bôdôl di gwé ipañ Djob? Ti hihéga. (b) Lelaa i soñda pes kaat ba mpohol inyu nwii 2019, i nla hôla bés?

¹⁷ Di nkéñbaha bôdôl di gwé ipañ Yéhôva ngéda di nigil i yi nye loñge. Mpom njel wada di nla gwélél inyu tibil yi Nyambe i yé i soñgol Bibel, ni soñda mam di ñañ. Bibel i gwé miñañ mi mi ñunda lelaa Yéhôva a bi sôñ bagwélél bé ba kôba. Miñañ mi mi nkwés bés nkaa le a ga yoñ ndun ni bés.

¹⁸ Di yoñ hihéga hi buk lam ini Yésaya a ngwélél inyu hégha lelaa Yéhôva a nyoñ ndun ni bés. A nkal le Yéhôva a yé ntééda mintômba, bés di bak bon ba mintômba. Yésaya a nkal inyu Yéhôva le: ‘A nkôhle bon ba mintômba i woo wé, a beegak ki bo i tôl yé.’ (Yésaya 40:11) Di nôgda le di yé nhôk ni nwee, ngéda di nôgda wengoñle di yé nkéñaga ni mimpémba mi moo mi Yéhôva. Inyu hôla bés i ba nwee to ibale di mboma mandutu, nkol maliga ni u pék u mpohol kaat Yésaya 41:10 kiki pes kaat i nwii 2019, i i nkal le: “U kon bañ woñi, inyule men me yé Nyambe woñ.” Yoñ ngéda i soñda bibuk bini bi nlédhana. Bi ga lédés we ngéda w’a boma mandutu dilo di nlo.