1. Kii bagwélél ba Djob bobasôna ba nlama boñ, inyuki? (Béñge titii i lipep li bisu.)

YÉSU KRISTÔ a bi ti banigil bé oda le: “Kenana, yilhana biloñ gwobisôna banigil.” (Matéô 28:19) Bagwélél ba Djob bobasôna ba ba tiñi ni nye, ba gwé ngôñ i yi lelaa ba nla yônôs nson u “i nya i yôni.” (2 Timôtéô 4:5) Nson u u nlôôha ba tik, u bak mahee kiyaga, kayéle ikété mam momasôna di gwé i boñ won u nlama ba jam li bisu. Ndi i nla ba jam li nlet i tégbaha ngandak ngéda likalô kiki di ngwés.

2. Mambe mandutu di mboma mu kiki di nyônôs nson wés?

² Minson mimpe mi mi yé nseñ, mi mbat le di ti ngéda ni ngui yés. I nla pam le di ntégbaha ntandaa ngéda hiki kel i bôlô inyu jés bôt bés ba lihaa, i ha bo mambot, ni ti bo homa liyééne. Bebek mbegee i lihaa jés i nkahal yidil bés, tole i nla ba le di nkon, le di gwé kon i mahoñol, tole di nkahal nôgda njôghe i biuni. Lelaa di nla gwel nson wés i nya yôni, nlélém ngéda di jobga i yémbél i nya mandutu i?

3. Kii bibuk bi Yésu bi bi nlébna i kaat Matéô 13:23 bi niiga bés?

³ Ibale ngim mam i niñ yés i nkéñ bés i lôôs ngandak ngéda nson u Yéhôva kiki di ngwés, di nlama bé tomb. Yésu a bé yi le bés bobasôna di nla bé numus litam li Ane nya yada. (Añ Matéô 13:23.) Yéhôva a nlôôha diihe biliya gwobisôna di mboñ i nson wé. (Lôk Héber 6:10-12) Ni ki le, di nla nôgda wee di yé le di bana pôla i boñ iloo kii di mboñ nano. Munu yigil ini, di ga tehe lelaa di nla boñ  le nson wés u ba jam li bisu i niñ yés, le mintuk mi yuu bañ bés, ni lelaa di nla ke ni bisu i lémés makeñge més i añal ñañ nlam ni niiga bôt. Pog, kii i yé i gwel nson i nya i yôni?

4. Kii i yé i gwel nson i nya i yôni?

⁴ I sem kwep, inyu yônôs nson wés i nya i yôni, di nlama tégbaha libim li ngéda i téé likalô ni i niiga. Ndi i yônôs nson wés i nya i yôni i ta ndik bé jam li ngéda. I nsômbla ki le di bana mahoñol malam, inyule hala a nlémél Yéhôva. Di ngwel nson wés bikristen ni ngui yés yosôna inyule di ngwés Yéhôva ni mut wés libôk. * (Markô 12:30, 31; Kôlôsé 3:23) I gwélél Djob ni ñem wés wonsôna i nkobla le di ti bésbomede, di gwélél ngui yés ni ngap yés kiki la yés inyu nson u Djob. Ngéda di ndiihe nsima di gwé i téé likalô, di mboñ biliya i añle libim li bôt di nla miñañ minlam.

5-6. Ti hihéga hi hi ñunda lelaa mut a gwé bé ngandak ngéda a nla bii nson likalô kiki jam li bisu i niñ yé?

⁵ Hégda mañge wanda a ngwés a nkôt hiluñ. A yé maséé i kôt hiluñ hiki ngéda pôla i nene. I mbus ba nyoñ nye kiki nkôt hiluñ i homa linuñlene li bijek, a nsal nyoo mamélél ma sonde. Ndi i moni a nkôs mi nkola bé nye. Jon a mbéna sal i soso sabe ibôdôl i ngwa njañgumba letee ni i ngwa koo. Tolakii a ntégbaha ngandak ngéda i sabe, ñem wé wonsôna u yéne i nsik. A gwé ngôñ i kéñbaha likeñge jé li nsik ni i léba homa a mba a nkôt nsik hiki kel. Ndi tolakii a yé ngi kôhna i nya bôlô i, a ntégbaha i ndék ngéda a gwé i kôt hiluñ.

⁶ Nlélém inyu yoñ, i nla ba le u gwé bé pôla i yoñ ngaba kiki u ngwés i nson likalô. Ki le, nson u won u nlôôha gwés. U mboñ biliya i hôlôs likeñge joñ i niiga i nya i ntihba ñem. Kiki u gwé ngandak mam i boñ, u nla badba lelaa w’a boñ inyu bii nson woñ likalô kiki yom i bisu i niñ yoñ.

7-8. Lelaa di nla kôna litehge li Yésu inyu nson u ñañ nlam?

⁷ Yésu a bi yigle bés loñge ndémbél inyu litehge di nlama bana inyu likalô. Añal ñañ nlam u Ane i bé jam li bé lôôha ba nseñ i niñ yé. (Yôhanes 4:34, 35) A bi ke jôga li liké inyu añle libim li bôt miñañ minlam. A bi gwélél manjel momasôna inyu pôdôs bôt mandap ni i mbamba. Niñ i Yésu yosôna i bé ndigi likalô ni likalô.

⁸ Di nla kôna Kristô mu kii di nyéñ manjel i añle bôt ñañ nlam to hee ba yé, ni to imbe ngéda. Di yé bebee i tjôô niñ i mbomboo inyu yoñ ngaba i nson likalô. (Markô 6:31-34; 1 Pétrô 2:21) Lôk kéé ihogi ikété likoda i nla sal kiki basañal ba tôbôtôbô, ipe kiki basañal ba ngéda yosôna tole ba pes ngéda. Bape ba bi nigil hilémb hi mondo, tole ba bi yoñ makidik i ke i sal i het ba bééna ngôñ ni batéé likalô. Ndi libim li bôlô li mbôña ni batéé likalô, ba ba nla ndik boñ kiki la yap. To kii leñek, Yéhôva a mbat bé bés iloo kiki la yés. Djob a gwé ngôñ le bés bobasôna di kon maséé ni nson wés u añal “miñañ minlam mi lipém li Nyambe nu masoda.”​—1 Timôtéô 1:11; Ndiimba Mbén 30:11.

9. (a) Lelaa Paul a bé bugus nson likalô yak ngéda a bééna bôlô i nti nye moni? (b) Kii Minson mi baôma 28:16, 30, 31 a ñunda inyu litehge li Paul li nson wé likalô?

⁹ Ñôma Paul a bi yigle bés loñge ndémbél inyu jam li bii nson likalô kiki yom i bisu i niñ yés. Ngéda a bé i Korintô, maké mé ma yônôs ima kiki nsañal nu tôbôtôbô, a bééna bé ngandak moni inyu niñ, kayéle a bi lama tégbaha ngéda i kôñôl mandap ma mabadô. Ndi, nson u bé won u bé lôôha ba nseñ i mis ma Paul. A bi sal i bôlô i inyu bana moni mi mi bé lama hôla nye mu nson wé likalô, kayéle a bé le a añle bôt ba Korintô ñañ nlam “yañga.” (2 Korintô 11:7) Tolakii a bééna ngim bôlô i moo i boñ, a bi ke ni bisu i bii nson likalô kiki jam li bisu i niñ yé, a téak likalô hiki ngwa noi. Ngéda mam ma bi yik héñha, Paul a bi bana pôla i kéñbaha i ngaba a bé yoñ i nson likalô. A “bôdôl gwélél ngéda yé yosôna inyu añal bañga i Nyambe, a bogok mbôgi inyu unda Lôk Yuda mbôgi le Yésu nyen a yé Kristô.” (Minson mi baôma 18:3-5, MN; 2 Korintô 11:9) Mbus, ngeñ a bé yén i ndap a bi lend nwii ima i Rôma, ba tadak nye, Paul a bé tééne i bet ba bé yuuga nye likalô, a bi tila ki bikaat ha ngéda i. (Añ Minson mi baôma 28:16, 30, 31.) Makidik ma Paul ma bé le yom yo ki yo i kéñ bañ nye i yônôs nson wé. A tila le: “Lakii di gwé ndôñ nson ini . . . , wee di nwaa bé.” (2 Korintô 4:1) Kiki Paul, to ibale bôlô yés i nyoñ bés ngandak ngéda, di nla ke ni bisu i bii nson Ane kiki yom i bisu i niñ.

10-11. Lelaa di nla gwel nson wés i nya i yôni to ibale kon u nkéñ bés i boñ kii yôha?

¹⁰ Ibale biuni tole kon bi mboñ le di lah bé yoñ ngaba likalô li mandap ni mandap, di nla gwélél manjel mape inyu téé likalô. Bikristen bi hiai hi bisu bi bé tééne bôt likalô to hee homa ba bé koba bo. Ba bé gwélél pôla yosôna i bé nene inyu niiga​—mandap ni mandap, i mbamba, yak ni mu kii ba bé boñ mam map ma hiki kel​—bôt ba ‘bé boma.’ (Minson mi baôma 17:17; 20:20) Ibale di nla  bé ngandak liké, di nla yén i homa bôt ba mbéna tagbe inyu tééne bo likalô. Tole di nla tééne bôt di mboma ngéda di mboñ mam mape ma niñ, di nla tilna bo, tole di nla gwélél téléfôn inyu añal ñañ nlam. Ngandak batéé likalô i i nla bé pam inyule i nkon, tole i mboma mandutu mape, i bi nok maséé i gwélél manjel ma inyu téé likalô.

¹¹ To ibale u nkon, u nla gwel nson i nya i yôni. Di témb di yoñ hihéga hi ñôma Paul. A kal le: “Me gwé ngui i boñ mam momasôna inyu nu a nlédés me.” (Filipi 4:13) Paul a bééna ngôñ ni ngui i ngéda a bi kwo kon mu liké jé jada kiki nsañal nu tôbôtôbô. A bi toñle bôt ba Galatia le: “Ni nyi le inyu kon wem i pes minsôn nyen me bi bana pôla inyu ngélé bisu i añle bé ñañ nlam.” (Galatia 4:13, MN.) Nlélém ni we, kon woñ u nla ti we pôla i añle bôt bape miñañ minlam, kiki bo bidokta, bahôla dokta ni bape ki. Ngandak ikété yap i yé i ba i bôlô ngéda batéé likalô ba ntagbe mambai map.

12. Bibuk bini le “jis joñ li yé mbôô” bi nkobla le kii?

¹² Yésu a kal le: “Jis li yé tungeñ i nyuu. Jon ibale jis joñ li yé mbôô [tole “li mbéñge ndigi jam jada”] wee nyuu yoñ yosôna i nyon ni mapubi.” (Matéô 6:22) Hala a bé kobla le kii? A bé sômbôl kal le, di nlama bok mis més i ngii jam jada, tole njômbi yada, ibabé i ba nkabak. Yésu nyemede a bi ti ndémbél mu jam li, niñ yé yosôna i bé i umne ndigi likalô, a bi niiga ki banigil bé i  ke ni bisu i gwélél Yéhôva ni Ane Yé. Di nkôna Yésu ngéda niñ yés yosôna i nkiiña ndigi i nson wés likalô, hala wee ngéda ‘di nyéñ ndugi Ane ni telepsép i Djob.’​—Matéô 6:33.

13. Kii i nla hôla bés i bok mis més i nson likalô?

¹³ Njel yada inyu bok mis més i nson likalô, i yé le di suhus likala jés li niñ, inyu boñ le di tégbaha libim li ngéda yés i hôla bôt bape i yi ni i gwés Yéhôva. * Kiki hihéga, baa di nla boñ le bôlô yés i ti bés ngéda inyu boñ le di yoñ ngaba keñi nson likalô hiki sonde? Baa di yé le di tjél yoñ ngaba i ngim mintuk i i nlôôha yoñ ngéda yés?

14. Mambe mahéñha babiina ba bi boñ inyu lôôs ngandak ngéda likalô?

¹⁴ Jam li jon Élias bo nwaa ba bi boñ. A nkal le: “Di bé la bé yoñ nson nsañal kunda yada. Jon di bi yoñ ngim bitelbene inyu kéñbaha ngéda di bé tégbaha nson likalô. Kiki hihéga, di bé pémés ha bé moni ngandak, di bi hubus ngéda di bé tégbaha mintuk, di bi bat ki bikiñe gwés i homa wés bôlô le ba suhus ngeñ yés bôlô. Hala a bi boñ le di lah yoñ ngaba likalô li kôkôa, le di tégbaha gwigil bi Bibel, ni le di pam likalô ni lôk kéé i ñem sonde ngélé iba hiki sôñ. Kinje maséé!”

15-16. Inoñnaga ni 1 Timôtéô 4:13, 15, lelaa di nla ke ni bisu i hôlôs likeñge jés inyu likalô? (Béñge minkéñék mi matila mi mi gwé ño le: “ Mam ma ga hôla me i gwel nson wem i nya i yôni.”)

¹⁵ Njel ipe inyu boñ le di gwel nson wés i nya i yôni, i yé le di hôlôs likeñge jés i añal ñañ nlam. Inyu ngim bibôlô, ba  mbéna bat bôt bahogi le ba témb i suklu inyu kéñbaha yi yap, ni hôlôs likeñge jap. Hala a yé ki maliga inyu baañal ñañ nlam u Ane. Di nlama ke ni bisu i hôlôs likeñge jés i añal ñañ nlam.​—Bingéngén 1:5; añ 1 Timôtéô 4:13, 15.

¹⁶ Lelaa di nla ni boñ, inyu ke ni bisu i hol mu nson wés likalô? Ngéda di ntibil tééda biniigana di nkôs i likoda jés li ñem sonde le, Niñ yés ni nson wés u bikristen. Likoda li, li nti bés biniigana bilam bi bi nhôla bés i hôlôs likeñge jés ndék ni ndék nson likalô. Kiki hihéga, ngéda nkena likoda a nti baudu ba ba ntégbaha minkwel maéba, di nla yimbe mam ma mahee ma ga hôla bés i hôlôs likeñge jés li likalô. Di nla gwélél maéba ma ngéda di mba likalô. Di nla bat nkena juu jés li likalô mahôla, tole di pam ni nye, tole ni nhôôlak ntéé likalô numpe, nsañal, tole ni ngwélél makiiña. Kiki di nke ni bisu i hôlôs ligwéélak jés li hiki sélél i i yé mu Nkuu wés bisélél, di ga ba maséé i téé likalô ni i niiga.

17. Kii u ga kôhna ngéda u ngwel nson woñ i nya i yôni?

¹⁷ Kinje nsima di gwé i yi le Yéhôva a neebe le di ba “bagwelson lôñ yada” ni nye! (1 Korintô 3:9) Ngéda u ‘nwan mam ma nlôôha ba nseñ,’ ndi u bogok mis moñ i nson likalô, u ga ‘gwélél Yéhôva ni maséé.’ (Filipi 1:10; Tjémbi 100:2) U nla ba nkwoog nkaa le Djob a ga ti we ngui inyu gwel nson woñ i nya i yôni, to ibale u mboma to imbe ndutu tole kon. (2 Korintô 4:1, 7; 6:4) Too u gwé pôla i yoñ ngaba keñi i nson likalô tole heni, u nla ‘kon maséé inyu nson woñ’ ngéda u nti wensôna i nson likalô. (Galatia 6:4) Ngéda u nyônôs nson woñ i nya i yôni, u ñunda gwéha yoñ inyu Yéhôva ni inyu mut woñ libôk. “Inyule boñ u mboñ hala w’a tohol wemede, ni ba ba ñemble we.”​—1 Timôtéô 4:16.