1-2. Inyuki Yésu a bééna nduña keñi?

HILO hié hi nsôk hana isi, Yésu a bééna nduña keñi. I bé i yii nye ndék ngéda le a wo béba nyemb i moo ma bibéba bi bôt. Ndi Yésu a bé tôñ ndigi bé inyule nyemb yé i bé bebee. A bé lôôha gwés Isañ, a gwéhék ki boñ i yom i nlémél nye. Yésu a bé yi le ibale a ntéñbe ni Djob mu mandutu a nke boma, a ga unda le a nit kahap i Yéhôva i ngii bihégél gwé. Yésu a bé gwés yak bôt, a bé yi le ba nla bana botñem i niñ boga ibale a ntéñbe ipam i nyemb.

² Tolakii Yésu a bé lôôha nok ndutu, a bé nwee. Jon a kal baôma bé le: “Me nti bé nsañ wem.” (Yôhanes 14:27) A bééna “nsañ Nyambe,” hala wee ñem nwee u u nlôl ni maada malam mut a gwé ni Yéhôva. Nsañ u, won u bé boñ le ñem ni mahoñol ma Yésu ma ba nwee.​—Filipi 4:6, 7.

3. Kii di ga wan munu i yigil ini?

³ Mut to wada ikété yés a ga boma bé mahiha Yésu a bi hônba, ndi i bés bobasôna ba di noñ Yésu, di ga kôs ndééñga. (Matéô 16:24, 25; Yôhanes 15:20) I nla pam ngim mangéda le, kiki Yésu yak bés di bana nduña keñi. Lelaa di nla boñ le nduña i i yoña bañ bés kayéle di nimis ñem nwee? Nano di béñge mam maa Yésu a bi boñ ngéda a bé téé likalô hana isi, ni lelaa di nla kôna nye ngéda di mboma ndééñga.

4. Inoñnaga ni kaat 1 Tésalônika 5:17, ti dihéga di ñunda le Yésu a bi soohe ngandak ngélé hilo hi nsôk hi niñ yé hana isi?

⁴ Añ 1 Tésalônika 5:17. Yésu a bi soohe ngandak mu hilo hié hi nsôk hana isi. Ngéda a bi téé mbigda nyemb yé, a bi soohe inyu bret ni wai. (1 Korintô 11:23-25) Ilole ba nyodi i homa ba bi tégbaha Pasa, a bi soohe ngandak ni banigil bé. (Yôhanes 17:1-26) Ngéda nye ni banigil bé ba bi pam Hikôa hi Ôlivé i u u, a bi waa bé soohe. (Matéô 26:36-39, 42, 44) Ñ, bibuk bi nsôk bi Yésu ilole a nwo bi bé masoohe. (Lukas 23:46) Yésu a bi soohe Yéhôva inyu mam momasôna ma bi pémél nye hilo hi nsôk hi niñ yé hana isi.

5. Inyuki ñem ngui u baôma u bi hoi?

⁵ Jam jada li li bi hôla Yésu i hônba ndééñga li yé le, a bé bat Isañ mahôla ikété masoohe. Ndi i u u, baôma ba bi téñbe bé masoohe. Jon ngéda manoodana ma bi lo, ba bi bana ha bé ñem ngui. (Matéô 26:40, 41, 43, 45, 56) Ngéda di mboma manoodana, di ga téñbe ndigi ibale di nkôna ndémbél Yésu, di ‘soohege ibabé nwaa.’ Kii di nla kal mu nya masoohe i?

6. Lelaa hémle i ga hôla bés i tééda libak jés li nwee?

⁶ Di nla soohe Yéhôva le a “kéñbaha hémle yés.” (Lukas 17:5; Yôhanes 14:1) Di gwé ngôñ ni hémle inyule Satan a ga noode ba bobasôna ba noñ Yésu. (Lukas 22:31) Lelaa hémle i ga hôla bés i tééda libak jés li nwee yak ngéda di  mboma ngandak mandutu? Ngéda di mboñ kii yosôna di nla inyu yémbél ndééñga, hémle i ga hôla bés i nwas mam i moo ma Yéhôva. Kiki di nyi ntiik le a nyi yom i nlama bôña iloo bés, miñem nwés ni mahoñol més nw’a ba nwee.​—1 Pétrô 5:6, 7.

7. Bimbe biniigana u ñôt mu bibañga bi Robert?

⁷ Masoohe ma nhôla bés i bana ñem nwee to ibale di mboma to imbe ndutu. Di yoñ hihéga hi Robert mañ wada u u gwé 80 nwii i len ini. A nkal le: “Maéba ma mpémél i kaat i Filipi 4:6, 7 ma bi hôla me i yémbél ndééñga i niñ yem. Me bé lama hônba liyep li moni. Me bi nimis nson wem u mañ u likoda.” Kii i bi hôla Robert i tééda ñem nwee? A nkal le: “Hiki ngéda me gwé nduña ñem, me nsoohe. Kiki me bé ke ni bisu i soohe, soohe ni soohe, hala nyen me bé nôgda le me yé nwee.”

8. Inoñnaga ni Yôhanes 8:29, limbe jam lipe li bé tinde Yésu i bana ñem nwee?

⁸ Añ Yôhanes 8:29. Yésu a bééna ñem nwee to ngéda a bé boma ndééñga, inyule a bé yi le hala a nlémél Isañ. A bi tééda libak jé li manôgla, to ngéda hala a bé tomb bé. A bi gwés Isañ, niñ yé yosôna i bé i umne nson u Yéhôva. Ilole a nlo hana isi, a bi sal kiki “nwet ngwelnson” nu Nyambe. (Bingéngén 8:30) Yak ngéda a bé hana isi, ni makénd, a bi niiga bôt njee a yé Isañ. (Matéô  6:9; Yôhanes 5:17) I bôlô i i bi ti Yésu ngandak maséé.​—Yôhanes 4:34-36.

9. Lelaa i yoñ ngaba ikeñi i nson likalô i nhôla bés i tééda ñem nwee?

⁹ Di nla kôna Yésu ngéda di nôgôl Yéhôva mu kiki a nkal bés le di ‘ligip ni nson Nwet ngéda yosôna.’ (1 Korintô 15:58) Ngéda di ‘pégi’ yaga i téé likalô, di ga bana litehge lilam li mandutu més. (Minson mi baôma 18:5) Kiki hihéga, i bôt di mboma likalô, ba mbéna bana mandutu ma nloo més. Ndi ngéda ba nigil i gwés Yéhôva ni i bii maéba mé bisélél, niñ yap i nlama, ba ba ki maséé. Hiki ngéda di ntehe hala a mbôña, di nkônde bana bôdôl le Yéhôva a ga hôla bés. I bôdôl i, i nhôla bés i tééda libak jés li nwee. Sita yada i i bé hoñol le i gwé bé mahee, ni i i bééna kon mahoñol i bi nôgda ngui i bibañga bi. I nkal le: “Ngéda me pégi nson likalô, mahoñol mem ma nlôôha ba nwee, me bak maséé. Me nhoñol le hala a mbôña inyule ngéda me yé likalô, me nôgda le me nlôôha ba bebee ni Yéhôva.”

10. Bimbe biniigana di ñôt mu ñañ u Brenda?

¹⁰ Di béñge ki hihéga hi sita Brenda. Nye ni ngond yé ba bé kon ngandak. Brenda a yé bôk, a bak i yééne i bibôk bi bôt, a gwé bé to ngui bañga. Ngim mangéda, a nke likalô li mandap ni mandap ngéda nyuu i nti nye, ndi a mbéna añal ñañ nlam ni njel bikaat a ntilna bôt. A nkal le: “Ngéda me bi neebe le kon wem w’a mal bé i hiai hini, me bi pam i bok mahoñol mem i nson likalô. Likalô li mboñ me le, me hôya nduña yem yosôna. Iloo hala, li nyégsa me i bok mahoñol mem mahôla me nla ti bôt ba lituñga jés li likalô. I boñ hala i nhôñlaha me botñem me gwé inyu dilo di nlo.”

11-13. (a) Lelaa baôma ni bôt bape ba unda le ba bé bañga mawanda i Yésu? (b) Lelaa a bi nôgda ngéda mawanda mé ma bi hôla nye?

¹¹ Mu ngéda yosôna Yésu a bi lôôs nson likalô, baôma ba ba bi téñbe ni nye ba bi unda le ba bé bañga mawanda i Yésu. Ba bé ntén liwanda ba mpôdôl i kaat Bingéngén le: “Ndi liwanda lihogi li yé, li li édi iloo manyañ.” (Bingéngén 18:24) Yésu a bé diihe nya mawanda i. Ngéda a bé gwel nson wé, to mut to wada ipôla lôknyañ a bé hémle bé nye. (Yôhanes 7:3-5) Ngim ngéda i bi pam le, bôt ba lihaa jé ba bi hoñol le a nkônd njék. (Markô 3:21) Maselna ni hala, i u ilole a nwo, Yésu a kal inyu baôma ba ba bi téñbe ni nye le: “Bé bon ni yé ba ba bi téñbe ni me ikété manoodana mem.”​—Lukas 22:28.

¹² I bé i pam ngim mangéda le baôma ba wéha Yésu nyuu, ndi a bé bok bé mis i ngii mahôha map, a tehge i hémle ba bééna ipañ yé. (Matéô 26:40; Markô 10:13, 14; Yôhanes 6:66-69) I u u nsôk a bi tégbaha ni bo ilole a nôla, Yésu a bi kal bôlôm ba ba bi téñbe i gwés nye le: “Me bi sébél bé le mawanda, inyule mam momasôna me nok ni Tata me bi yis bé mo.” (Yôhanes 15:15) Ibabé pééna, mawanda ma Yésu ma bi lôôha ti nye makénd. Mahôla ba bi ti nye mu nson wé likalô, ma bi lôôha kônha Yésu maséé.​—Lukas 10:17, 21.

¹³ U héya baôma, Yésu a bééna mawanda mape, bôda kiki bôlôm, ba ba bi  yoñ ngaba i nson likalô ni nye, ba ti ki nye mahôla mape. Bahogi ba bi naña nye i mbai yap, inyu kabna yom i je. (Lukas 10:38-42; Yôhanes 12:1, 2) Bape ba bé éga nye mu maké mé, ba kabnaga i gwom ba bééna. (Lukas 8:3) Yésu a bééna bañga mawanda inyule nyemede a bé bañga liwanda. A bé bôñôl bo biloñge bi mam, a bé bémél bé bo iloo kiki ba bé le ba boñ. Yésu a bé peles, ndi a bé diihe mahôla ma mawanda mé ma ma bé bikwéha. Ñ, di nla ba nkwoog nkaa le ma bi hôla nye i tééda ñem nwee.

14-15. Lelaa di nla bot bañga mawanda, lelaa ma nla hôla bés?

¹⁴ Mawanda malam ma ga hôla bés i téñbe i gwés Yéhôva. Ni ki le, loñge njel inyu bot mawanda malam i yé le, bésbomede di ba biloñge bi mawanda. (Matéô 7:12) Kiki hihéga, Bibel i niiga bés le di nlama ti ngéda ni ngui yés inyu hôla bôt bape, téntén i ‘bet ba gwé bé.’ (Éfésô 4:28) Baa u yé le u bigda ngim mut mu likoda joñ u nla ti mahôla? Baa u nla kil mankéé nu a nkon tole nu a ñun i bôm? Baa u nla ti ngim lihaa li li gwé bé moni bijek? Ibale u nyi gwélél site yés jw.org^® ni JW Library^®, baa u yé le u hôla bilôk bikéé bipe bi likoda joñ i yi lelaa ba nla léba masôô ma nkus ma yé mukété? Ngéda di pégi i hôla bôt bape, di ga ba maséé.​—Minson mi baôma 20:35.

¹⁵ Mawanda més ma ga hôla bés ngéda di nkôs ndééñga, m’a hôla ki bés i  tééda ñem nwee. Kiki Élihu a bé emble Hiôb ngéda a bé añle nye mandutu mé, yak mawanda més ma nlo bés mahôla mu kiki ma ñemble bés di ñañle mo mam ma ntééñga bés. (Hiôb 32:4) Di nlama bé bem le mawanda més ma yôñôl bés makidik, ndi di ñunda le di gwé pék ngéda di ñemble maéba map ma ma nlôl Bibel. (Bingéngén 15:22) Kiki Kiñe David a bi neebe mahôla ma mawanda mé ni suhulnyuu, yak bés di nlama ba bebee i neebe mahôla ma mawanda més ngéda di gwé ngôñ ni mo. (2 Samuel 17:27-29) Ñ, i nya mawanda i, i yé toi likébla li nlôl ni Yéhôva.​—Yakôbô 1:17.

16. Inoñnaga ni Filipi 4:6, 7, umbe mpom njel u nla lona bés nsañ? Toñol.

¹⁶ Añ Filipi 4:6, 7. Inyuki Yéhôva a nkal le, di nla kôs nsañ a nti ni njel “Kristô Yésu”? Inyule di nla bana nsañ i ñem ni mahoñol ibale di nok le Yésu nyen a’ yônôs bitééne bi Djob, di hémlege ki hala. Kiki hihéga, ni njel sesema i binoñ i Yésu nyen bibéba gwés gwobisôna bi nla nwéhlana. (1 Yôhanes 2:12) Kinje hogbe di nôgda i yi hala! Kiki Kiñe i Ane Djob, Yésu a ga mélés mandutu momasôna Satan ni nkoñ isi wé ba nlona bés. (Yésaya 65:17; 1 Yôhanes 3:8; Masoola 21:3, 4) Kinje botñem ilam inyu yés! To hala kiki Yésu a bi yigle bés nson u u ntomb bé, a yé ni bés, a nit ki bés munu dilo di nsôk di hiai hini. (Matéô 28:19, 20) Kinje ñem ngui hala a nti bés! Hogbe, botñem ni ñem ngui​—bi yé ndék ngok i i yé hikuu hi ñem nwee di gwé.

17. (a) Lelaa kristen i nla tééda ñem nwee? (b) Kiki kaat Yôhanes 16:33 i bi bôn, kii di ga pam i boñ?

¹⁷ Lelaa u nla tééda ñem nwee ngéda ndééñga i mpôgôs we? U nla pam i boñ hala, ibale u mboñ mam Yésu a bé boñ. Pog, soohe, u téñbe masoohe. Iba, nôgôl Yéhôva, u téé ki likalô ni makénd to ibale hala a nlet. Aa, yéñ mahôla ma mawanda moñ. Ha nyen nsañ u Nyambe u ga tééda ñem woñ ni mahoñol moñ. Kiki Yésu, u ga yémbél to imbe ndééñga.​—Añ Yôhanes 16:33.