1-2. Kii i yé binoñ, inyuki di gwé ngôñ ni gwo?

I NGÉDA Adam a bi boñ béba, a bi nimis pôla i niñ i boga ni boga, yak bon bé ba nimis yo. Adam a bé bé a kôli ni nwéhél, inyule a bi kôôba boñ béba. Ndi kii i bi pémél ni bon bé? Ba bi boñ bé yom ibe yo ki yo. (Rôma 5:12, 14) Baa Yéhôva a bé le a boñ jam inyu kobol bon ba Adam i mok mi nyemb ba bi kôdôl? Ñ! I mbus le Adam a boñ béba, Yéhôva a bi yelel ndék ni ndék lelaa a bé lama kobol mbôda yé i mok mi béba ni nyemb. (Bibôdle 3:15) I ntéak ngéda, Yéhôva a bé lama ep Man wé inyu “ti . . . niñ yé kiki binoñ inyu ngandak bôt.”​—Markô 10:45; Yôhanes 6:51.

² Kii i yé binoñ? Ikété Bitilna bi Lôk Grikia, binoñ bi yé ndamba Yésu a bi ti inyu témbna i yom Adam a bi nimis. (1 Korintô 15:22) Inyuki di gwé ngôñ ni binoñ? Inyule litiñ li telepsép li ba bé léba mu mbén Môsi li bé kal le ba bé lama saa niñ ni niñ. (Manyodi 21:23, 24) Adam a bi nimis libak jé li peles. Jon inyu yônôs telepsép i Nyambe, Yésu a bi ti niñ yé i i bé peles. (Rôma 5:17) Ni i njel i nyen a bi yila “Isañ nu mba ni mba” inyu bôt bobasôna ba ba nhémle binoñ.​—Yésaya 9:6; Rôma 3:23, 24.

3. Inoñnaga ni kaat Yôhanes 14:31 ni 15:13, inyuki Yésu a bi neebe ti niñ yé i peles kiki sesema?

³ Yésu a bi neebe ti niñ yé kiki sesema inyule a bé lôôha gwés Tata wé nungingii, a gwéhék yak bés. (Añ Yôhanes 14:31; 15:13.) I gwéha i yon i bi tinde nye  i téñbe ni Isañ letee ni lisuk, ni i yônôs sômbôl yé. Sesema yé yon i ga boñ le sômbôl i Yéhôva inyu hisi ni bôt ba binam i yon. Munu yigil ini, di ga tehe inyuki Djob a bi neebe le Yésu a son njonok ilole a nwo. Di ga pôdôl yak ndémbél i ntila Bibel wada nu a bi éba le a nlôôha diihe binoñ. Sôk i nsôk di ga tehe lelaa di nla unda le di nti mayéga inyu binoñ, ni lelaa di nla unda le di nlôôha ba maséé inyu mam Yéhôva bo Yésu ba bi boñ inyu yés.

4. Lelaa Yésu a bi wo?

⁴ Hégda le hilo hi nsôk hi Yésu hana ’isi, a bé le a sébél ngandak biañgel inyu sôñ nye, ndi a bi nwas le bisônda bi Rôma bi gwel nye, bi bép ki nye. (Matéô 26:52-54; Yôhanes 18:3; 19:1) Ba bi bép nye ni hisôô hi hi bé was nye minsôn. I mbus, ba nyégsa nye i begee soso mbiñ i i bé yét mu mbus yé i i bééna mambaaba. Yésu a bi noode ôt i kék i letee ni i homa ba nlama nol nye, ndi bisônda bi bi nyégsa mut numpe i begee yo. (Matéô 27:32) Ngéda Yésu a bi bol i homa ba nlama nol nye, bisônda bi bi tômôl nye moo ni makôô i kék. Kiki a bé yét, batone ba bi bôdôl pat nye minsôn mu bahoma ba bi tôp nye. Mawanda ma Yésu ni nyañ ba bé ee, ndi baane ba Lôk Yuda ba bé nol nye. (Lukas 23:32-38; Yôhanes 19:25) Hiki ngeñ i bé tagbe, i bé tiigaha nye ni nyemb. Mu kii a bé a péni, ñem wé ni bisaha gwé bi bé sal bé loñge, kayéle i bé nye ndutu i hép. A bi gwélél i ndék nhébék i bé i ngi yii nye, inyu soohe Yéhôva inyu ngélé nsôk. Ha nyen, a bi ue ño, a wo. (Markô 15:37; Lukas 23:46; Yôhanes 10:17, 18; 19:30) Kinje béba nyemb!

5. Inyu Yésu, kii i bi lôôha tééñga nye mu kiki ba bi nol nye?

⁵ Ntén nyemb Yésu a bi wo bé won u bi lôôha tééñga nye. Ndi nsohi ba bi ôm nye won u bi tééñga nye. Ba bi kal le a ñôbôs jôl li Djob, hala wee a nti bé Nyambe lipém, to jôl jé. (Matéô 26:64-66) I jam li li bi lôôha tééñga Yésu kayéle a bat Isañ le i wonyuu i i kee nye haa. (Matéô 26:38, 39, 42) Inyuki Yéhôva a bi nwas le Man wé nu gwéha a nok ndutu, a wo? Di tehe manjom maa.

6. Inyuki Yésu a bé lama wo i kék njiiha?

⁶ Pog, Yésu a bi nôla inyu begee njiihe i bon ba Lôk Yuda. (Galatia 3:10, 13) I bibôdle, ba bé noñ mbén Djob, ndi i mbus, ba bi ke ha bé ni bisu i noñ yo. Jon, i njiihe i, i bi kôndba mu i kogse ba bi kôdôl ni béba i Adam. (Rôma 5:12) I mbén Djob a bi ti bon ba Israel i bé kal le ibale mut a mboñ béba i i kôli ni nyemb, a nlama nôla. I mbus ba bé ba péni mim wé i kék. * (Ndiimba Mbén 21:22, 23; 27:26) Kiki a bi wo i kék, Yésu a bi ti litén li Lôk Yuda li li bi tjél nye, pôla i kôs bisai ni njel sesema yé.

7. Imbe njom i nyônôs iba i bi tinde Nyambe i nwas le Man wé a nok ndutu?

⁷ Di béñge njom i nyônôs iba i i bi tinde Nyambe i neebe le Man wé a nok ndutu. A bé kôôba Yésu i yila Prisi yés ikeñi. Yésu a bi nôgda i ndutu mut a nla  bana i nôgôl Djob i ngéda a yé bisu bi manoodana makeñi. A bi nok njôghe kayéle a soohe “ni minlondok mi ngui lôñni gwiiha.” Ibabé nkaa, kiki Yésu a bi nôgda njôghe ikeñi, a nyi i mam di gwé ngôñ, a “nla ki hôla bés” ngéda di “nkôhna manoodana.” Di nti Yéhôva mayéga kiyaga inyule a bi téé Prisi keñi i i “nla nok bibomb gwés”!​—Lôk Héber 2:17, 18; 4:14-16; 5:7-10.

8. Njom i nyônôs aa i i bi tinde Nyambe i nwas le Yésu a noodana i nya i nloo hihéga i yé le kii?

⁸ Aa, Yéhôva a bi nwas le Yésu a noodana i nya i nloo hihéga inyu timbhe ini mbadga ikeñi le: Baa bôt ba binam ba nla téñbe ni Nyambe i ngéda ba mboma manoodana makeñi? Ndimbhe i Satan i yé le, heni! Inyu yé, bôt ba binam ba ngwélél Djob ni minsoñgi. A nkal le, kiki sôgôlsôgôl wap Adam, ba ngwés bé Yéhôva. (Hiôb 1:9-11; 2:4, 5) Yéhôva a bi nwas le Yésu a noodana i nya i nloo hihéga inyule a bé bôdôl nye ñem. Yésu a bi téñbe ni Djob, a unda ki le Satan a yé mut bitembee.

9. Imbe ndémbél ñôma Yôhanes a bi yigle bés?

⁹ Biniigana inyu binoñ bi bi lédés hémle i ngandak bikristen. Ba bi ke ni bisu i téé likalô to ikété ngolba, ba hônba ki mintén mi mandutu nwominsôna mu i niñ yap. Di yoñ hihéga hi ñôma Yôhanes. A bi téñbe i añal ñañ nlam inyu Kristô ni inyu binoñ, jam kiki bo 60 ma nwii. A bé loo 90 ma nwii i ngéda énél i Rôma i bi om nye minkôm i ôn i Patmôs. Imbe kuu a bi kand? ‘A bé añle bôt njee a yé Nyambe, a bogok mbôgi inyu Yésu.’ (Masoola 1:9) Kinje ndémbél ilam i hémle ni i hônba!

10. Lelaa bikaat Yôhanes a bi tila bi bé unda le a bé ti mayéga inyu binoñ?

¹⁰ Mu bikaat Yôhanes a bi tila, a bi unda le a ngwés Yésu, ni le a nti mayéga inyu sesema yé. Mu bikaat bi, a mpôdôl binoñ ni bisai di nkôs ni njel binoñ bebee le 100 ngélé. Kiki hihéga, Yôhanes a tila le: “Ibale mut a mboñ toi béba, di gwé nhôla yak Tata, mut a téé sép le Yésu Kristô.” (1 Yôhanes 2:1, 2) Bikaat bi Yôhanes bi nyigye ki nseñ i “bok mbôgi inyu Yésu.” (Masoola 19:10) Ñ, Yôhanes a bé toi maséé inyu binoñ. Lelaa yak bés di nla unda le di yé maséé inyu bitelbene bi?

11. Kii i nla hôla bés i yémbél manoodana?

¹¹ Yémbél ngôñ i boñ béba. Ibale di yé toi maséé ni binoñ, di ga kal bé le: ‘Kii me me nwo hana, me nla boñ béba, m’a yik bat nwéhél i mbus.’ Maselna ni hala, di ga kal le: ‘To jam! Lelaa me nla boñ i nya béba i, i ngéda me nhoñol i mam Yéhôva bo Yésu ba bi boñ inyu yem?’ Inyu pam i boñ hala, di nla bat Yéhôva ngui, di kal nye ikété masoohe le: ‘U nwas bañ le me kwo ikété manoodana.’​—Matéô 6:13.

12. Lelaa di nla bii maéba ma kaat 1 Yôhanes 3:16-18 bibôñôl?

¹² Gwés lôk kéé yoñ i bôda ni i bôlôm. Ngéda di ngwés bo, di ñunda le di nti mayéga inyu binoñ. Inyuki? Inyule Yésu a bi wo yak inyu yap, ibale  a bi neebe wo inyu yap, wee ba gwé mahee ngandak i mis mé. (Añ 1 Yôhanes 3:16-18.) Di ñunda le di ngwés lôk kéé yés i bôda ni i bôlôm i ngéda di gwé maboñok malam ipañ yap. (Éfésô 4:29, 31–5:2) Kiki hihéga, di nlôl bo mahôla ngéda ba nkon tole ngéda ba mboma mandutu makeñi, téntén i ngéda bikuu bi nkwél bo. Ndi kii di nlama boñ ibale wada a mboñ tole a nkal ngim jam i i ñunbaha bés?

13. Inyuki di nlama nwéhél?

¹³ Baa hala a yé a nlédél we ngim mangéda i nwéhél manyuñ nu mbuu? (Lôk Lévi 19:18) Ibale hala, wee noñ maéba mana: “Kena ni bisu i hônbana bé ni bé, ni nwéhlaga ki bé ni bé ni ñem wonsôna, to ibale wada nan a gwé njom i tjelel inyu numpe. Nlélém kiki Yéhôva a bi nwéhél bé ni ñem wé wonsôna, yak bé ni nlama boñ nlélém.” (Kôlôsé 3:13) Hiki ngéda di nwéhél mankéé nu muda tole nu munlôm, di ñunda Tata wés Nungingii le di yé maséé inyu binoñ. Lelaa di nla ke ni bisu i kéñbaha maséé més inyu likébla li Djob li?

14. Imbe njel di nla gwélél inyu unda le di nlôôha ba maséé inyu binoñ?

¹⁴ Ti Yéhôva mayéga inyu binoñ. Sita Joanna nu a yé India, ni nu a gwé 83 nwii a nkal le: “I yé nseñ le me soohe Yéhôva inyu binoñ hiki kel, me ti ki nye mayéga inyu bitelbene bi.” Ngéda u nsoohe Yéhôva i mamélél ma kel, u nla sima ngim mam mabe ma tôbôtôbô u mboñ, u bat ki Yéhôva le a nwéhél we. Maliga ma yé le, ibale u mbigda le u mboñ béba ikeñi, bat mahôla ma mimañ. Ba ga ba bebee i emble we ni i ti we maéba ma nlôl i Bañga i Djob. Ba ga soohe ni we, ba bat Yéhôva le a nwéhél we ni njel sesema i Yésu “inyu boñ le u mbôôp [i pes mbuu].”​—Yakôbô 5:14-16.

15. Inyuki di nlama yoñ ngéda i añ ni i ôt pék mu binoñ?

¹⁵ Yôñ ngéda i ôt pék mu binoñ. Sita yada le Rajamani nu a gwé 73 nwii a nkal le: “Hiki ngéda me ñañ mandutu Yésu a bi boma, mis ma nyon me ni gwiiha.” Yak we u nla nôgda nlélém njôghe ngéda u nhoñol kiki Man Djob  a bi nok njôghe. Kiki u nke ni bisu i ôt pék mu sesema i Yésu, hala nyen gwéha yoñ inyu yé ni inyu Isañ i ga kônde keñep. Inyu hôla we i pam ha likala li, yoñ ngéda i nigil bikaat gwobisôna bi mpôdôl binoñ?

16. Umbe nseñ di nkôs i niiga bôt bape kii i yé binoñ? (Béñge titii i lipep li bisu.)

¹⁶ Niiga bôt bape kii i yé binoñ. Hiki ngéda di ntoñle bôt bape kii i yé binoñ, ñem wés u nkônde yon ni maséé inyu bitelbene bi. Di gwé bisélél bilam bi bi nla hôla bés i toñle bôt bape inyuki Yésu a bi wo inyu yés. Kiki hihéga, di nla gwélél yigil 4 i man kaat nunu le Miñañ minlam mi nlôl ni Djob! Mukété, di ga léba yigil i gwé ño le “Njee a yé Yésu Kristô?” Tole di nla gwélél pes 5 munu kaat ini le Kii Bibel i niiga bés? I pes i, i gwé ño le: “Binoñ​—Likébla likeñi li Djob.” Miñem nwés mi nkônde yon ni maséé ngéda di nke i Mbigda nyemb Yésu hiki nwii, ni ngéda di naña bôt i tégbaha yo ni bés. Kinje nsima Yéhôva a bi ti bés i niiga bôt bape njee a yé Man wé!

17. Inyuki binoñ bi yé likébla likeñi Nyambe a bi ti bôt ba binam?

¹⁷ Ibabé nkaa, i nlôôha ba nseñ i ba maséé inyu binoñ. Binoñ bi nhôla bés i yila mawanda ma Yéhôva tolakii di yé bikwéha bi bôt. Ni njel binoñ, minson mi Nsohop mi ga tjiba. (1 Yôhanes 3:8) Binoñ bi ga boñ ki le mahoñol Yéhôva a bééna i bibôdle inyu hisi ma yon. Hisi hiosôna hi ga yila paradis. I bôt bobasôna ba ga ba nyoo ba ga gwés Yéhôva, ba gwéélak ki nye. Jon, hiki kel, di kee ni bisu i yéñ manjel inyu unda le di yé maséé ni binoñ​—Likébla likeñi Nyambe a bi ti bôt ba binam!