Inyuki ilole a nwo, Yésu a bi tiimba bibuk bi David di nléba i kaat Tjémbi 22:2?

Bibuk bi nsôk Yésu a bi gwélél ilole a nwo, bi di nléba i kaat Matéô 27:46 bi nkal le: “A Nyambe wem, a Nyambe wem, inyuki u ntjôô me?” Ngéda Yésu a kal bibuk bi, a bi yônôs yom David, ntôp tjémbi a bi kal i kaat Tjémbi 22:2. (Markô 15:34) Di ta bé le di kal le Yésu a bi pahal bibuk bini inyule Yéhôva a bi tjôô nye ni toi tole inyule hémle yé i bi hoi. Yésu a bi tibil nok inyuki a nlama wo, a bé ki bebee i boñ hala. (Matéô 16:21; 20:28) A bé yi ki le, ngéda ngeñ nyemb yé i nkola, Yéhôva a ga “sôñ” bé nye. (Hiôb 1:10) Yéhôva a bi nwas le Yésu a son njonok letee ni nyemb inyu unda le a nla téñbe ni nye to a mboma imbe ndutu.​—Markô 14:35, 36.

Inyuki ni Yésu a bi sima bibañga bini di nléba i kaat Tjémbi? Tolakii di nyi bé loñge loñge inyuki a bi pot bibuk bi, di noode wan ngim mam ma bé le ma tinde nye i pot hala. *

Ngéda Yésu a bi pahal bibuk bini, bebek a bé yigye le Yéhôva a bé lama bé sôñ nye i bisu bi nyemb. Yésu a bé lama ti binoñ ngi mahôla ma Yéhôva. Kiki a bé mut binam, a bé lama ki wo “inyu noode nyemb inyu bôt bobasôna.”​—Lôk Héber 2:9.

Ngéda a bi pahal bibuk bini, bebek Yésu a bé gwés le bôt ba hoñol kaat Tjémbi 22. Ha ngéda i, bon ba Lôk Yuda ba  bééna lem i tééda ngandak minlôñ mi kaat Tjémbi ni ño. Ngéda mut a bé a sima nlôñ kaat u hiémbi wada, i bôt ba bé ha, ba bé ba bigda i hiémbi hi hiosôna. Ibale mahoñol ma mon Yésu a bééna, ki a bé lama hôla banigil bé i bigda ngandak mbañ i kaat Tjémbi i i bé pôdôl mam ma bé lama bôña ilole a nwo. (Tjémbi 22:8, 9, 16, 17, 19, 25) Ni ki le, minlôñ mi nsôk mi hiémbi hi mi ntoñol le, Yéhôva a ñane hisi hiosôna.​—Tjémbi 22:28-32.

Ngéda Yésu a bé pot bibuk bini, bebek a bé sômbôl unda le a mboñ bé jam li kôli ni nyemb. Ilole a nwo, ntôñ u bakéés bakeñi u Lôk Yuda u bi ôm nye nsohi yañga le a ñôbôs jôl li Djob. (Matéô 26:65, 66) Bakéés bakeñi ba bi pala kodba i ñem mau tolakii hala a bé kiha bé ni mambén ma Lôk Yuda. (Matéô 26:59; Markô 14:56-59) Ngéda Yésu a bé bat mbadga ini le: “A Nyambe wem, a Nyambe wem, inyuki u ntjôô me?” bebek a bé sômbôl unda le a mboñ bé jam libe jo ki jo li li kôli ni kogse.

Ngéda Yésu a bi bat mbadga ini, bebek le a bé sômbôl hôñlaha bôt le a bé a ngi téédaga maada mé malam ni Yéhôva kiki David ngéda a bé tila Tjémbi 22? Mbadga i David i nsômbôl bé kal le a bi nimis hémle. Mbus a bat mbadga i, minlôñ mi noñ ha mi ñunda le David a bi ke ni bisu i unda le a bééna bôdôl le Yéhôva a ga péyés bagwélél bé. Yéhôva a bi sayap ki nye. (Tjémbi 22:24, 25, 28) Nlélém ni Yésu, “Man David,” tolakii a bi son njonok i kék njiiha, hala a nsômbôl bé kal le a bé lémél ha bé Yéhôva.​—Matéô 21:9.

Bebek le ni i mbadga i, Yésu a bé sômbôl unda le, a bé a tiñi tas tas ni Yéhôva, tolakii a bi waa sôñ nye. Sômbôl i Yéhôva i bé bé le Man wé a son njonok mbus a wo. Bitelbene bi, bi bi yôña ndik i mbus le Adam bo Éva ba bi boñ béba. Yésu a bi boñ bé béba yo ki yo, ndi a bé lama son njonok, a wo ki inyu timbhe mambadga Satan a bi bat ni inyu saa binoñ. (Markô 8:31; 1 Pétrô 2:21-24) Hala a bé ndik le a bôña ibale Yéhôva a waa tat Yésu inyu ngélé bisu.

Bebek le Yésu a bé sômbôl hôla banigil bé i nok inyuki Yéhôva a bi nwas le a wo i kék njiiha. * Yésu a bé yi le nyemb yé kiki ntonba i kék njiiha i ga boñ le ngandak i baage. (1 Korintô 1:23) Ibale banigil bé ba bigda njom i nyemb yé, ki ba bi tibil nok inyuki a bi wo. (Galatia 3:13, 14) Ha ngéda i, ba bé bé le ba tehe nye kiki ntonba, ndi kiki Ntohol wap.

To imbe njom Yésu a bééna i pahal bibuk bi, a bé yi le nyemb yé i bé yônôs sômbôl i Yéhôva. Ndék ngéda i mbus le Yésu a bi pot bibuk bini, a kal le: “Hala a mal yon!” (Yôhanes 19:30; Lukas 22:37) Ñ, mu kii Yéhôva a bi waa sôñ Yésu inyu ndék manut, hala a bi boñ le Yésu a yônôs sômbôl i Yéhôva. Hala a bi hôla ki nye i yônôs i mam momasôna ma bé ntilga inyu yé “ikété mbén Môsi ni bapôdôl ni Tjémbi.”​—Lukas 24:44.