1. Kii u bi nigil i ngéda u bé bôdlak yigil yoñ?

 BAA u ngi bigdaga i mam momasôna u bi nigil i ngéda u bé bôdlak yigil yoñ Bibel? Bebek le u bi yôm i ngéda u bi yi le Nyambe a gwé jôl. Bebek le hala a bi hélés we i yi le Nyambe a nkép bé bôt mbai i bee hié. Ibabé pééna, u bé le u wo maséé i ngéda u bi yi le u ntiimba tehe bôt boñ ba ba bi wo, ni le we ni bo ni ga niñ hana ’isi hi ma yila paradis.

2. U héya yigil Bibel, mambe mahéñha mape u bi boñ? (Éfésô 5:1, 2)

² Kiki u bé nigil Bibel, hala nyen gwéha yoñ inyu Yéhôva i bé nañ, nañ ni nañ. I gwéha i yon i bi tinde we i gwélél matiñ ma Bibel, i hôla ki we i yoñ makidik malam. U bi nigil i bana mahoñol malam ni i boñ mam ma téé sép inyule u gwé ngôñ i lémél Nyambe. Kiki man a nkôna isañ nu gwéha, hala nyen yak we u nkôna Tata woñ Nungingii.​—Añ Éfésô 5:1, 2.

3. Kii di nla badba?

³ Di nla badba le: ‘Baa me nkônde gwés Yéhôva iloo kiki me bé gwés nye i ngéda me bi yila kristen? Ibôdôl nu me bi sôblana, baa me nhoñol tole me mboñ mam kiki Yéhôva​—téntén ibale i mpam le me gwés lôk kéé i bôlôm ni i bôda?’ Ibale u nôgda le gwéha yoñ inyu Yéhôva ni bôt bape i gwé ha bé ngui kiki “gwéha u bééna i bibôdle,” u tomb bañ. Bikristen bi hiai hi bisu bi bi boma nlélém jam. Yésu a bi tjôô bé bo, to bés a ga tjôô bé bés. (Masoola 2:4, 7) A nyi le u nla tiimba bana gwéha u bééna i ngéda u bi tip yi maliga.

4. Kii di ga tehe munu yigil ini?

 ⁴ Munu yigil ini, di ga tehe lelaa di nla kônde ke ni bisu i gwés Yéhôva, ni bôt bape. I mbus di ga pôdôl bisai hala a nlona i ngéda di nkônde gwés Yéhôva ni lôk kéé yés.

5-6. Mambe mandutu ñôma Paul a bi boma mu nson wé, ndi kii i bi ti nye makénd i ke ni bisu i gwélél Yéhôva?

⁵ Ñôma Paul a bé maséé i gwélél Yéhôva, ndi a bi boma ngandak mandutu a bé lama yémbél. Paul a bé béna ke bahoma ba bé haa ngandak, ndi ha ngéda i, i ke liké i bé bé bun. Mu maké mé, ngim mangéda Paul a bééna “mandutu i yap balom,” ni “mandutu ma nlôl ni bôt ba wip.” Ngim mangéda baoo bé ba bé bép nye. (2 Korintô 11:23-27) Ni le lôk kéé ihogi ha ngéda i, i bé diihe bé biliya Paul a bé boñ inyu hôla bo.​—2 Korintô 10:10; Filipi 4:15.

⁶ Kii i bi hôla Paul le a waa bañ gwélél Yéhôva? Ikété Bitilna, Paul a bi nigil bilem bi Yéhôva, a nigil ki ngandak mu mam a bi boma. Paul a bé nkwoog nkaa le Yéhôva a bé gwés nye ngandak. (Rôma 8:38, 39; Éfésô 2:4, 5) Yak Paul a bé gwés Yéhôva ngandak. Paul a bi unda le a ngwés Yéhôva kiki a bé “gwélél bapubhaga minson, [a] ke ki ni bisu i gwélél bo nson.”​—Lôk Héber 6:10.

7. Kii i nla hôla bés i kônde gwés Yéhôva?

⁷ Di nla kônde gwés Yéhôva i ngéda di ntibil nigil Bañga yé. I ngéda u ñañ Bibel, ôt pék inyu yi kii hiki nlôñ u niiga we inyu Yéhôva. Badba le: ‘Lelaa ñañ unu u ñunda le Yéhôva a ngwés me? Mambe manjom u nti me i gwés Yéhôva?’

8. Lelaa masoohe ma nla hôla bés i kônde gwés Nyambe?

⁸ Jam lipe di nla boñ inyu kônde gwés Yéhôva, li yé le di soohe nye hiki ngéda, di kalak nye i yom di nôgda toi. (Tjémbi 25:4, 5) Yéhôva, a ga timbhe masoohe més. (1 Yôhanes 3:21, 22) Khanh, sita yada i i yé i Asia, a nkal le: “Me bé gwés ndugi Yéhôva inyule me bi nigil i yi njee a yé, ndi i ngéda me bi kônde tehe lelaa a ntimbhe masoohe mem, me bi kônde gwés nye. Hala a bi tinde me i boñ mam ma nlémél nye.” b

9. Lelaa Timôtéô a bi unda le gwéha yé inyu lôk kéé i nkônde nañ?

⁹ Ndék nwii i mbus le a bi yila kristen, Paul a bi boma loñge mañge wanda le Timôtéô. Timôtéô a bé gwés Yéhôva, a gwéhék bôt bape. Paul a kal bôt ba Filipi le: “Me gwé bé mut numpe nye ki nye nu a gwé mahoñol kiki [Timôtéô], nu a ntôñ yaga inyu nan.” (Filipi 2:20) Hana, Paul a ta bé i ti Timôtéô bibégés inyule a nyi tjek mam, ni le a nyi ti minkwel, ndi inyule a ntehe le Timôtéô a ngwés toi lôk kéé i bôlôm ni i bôda. Ibabé pééna, i makoda Timôtéô a bé yuuga ma bé nyamnda ni ngôñ i tehe nye.​—1 Korintô 4:17.

10. Lelaa Anna bo nlôm ba bi unda le ba ngwés lôk kéé?

¹⁰ Yak bés di nyéñ hôla lôk kéé yés i bôlôm ni i bôda. (Lôk Héber 13:16) Di wan le hihéga hi Anna, nu di bi bôk di pôdôl i yigil i bi tagbe. I mbus le mbuk mbebi ikeñi a bi hôñ, nye ni nlôm ba bi yuuga lihaa jada li Mbôgi Yéhôva, ba ada le buk  mbebi a bi ôbôs nyôl u ndap lihaa li. Hala a bi boñ le lihaa li, li bééna bé mbot i mpôp. Anna a nkal le: “Di bi yoñ mbot yap, di jôwa yo, di témbna bo yo nsiiga, di ma hôt yo loñge. Inyu yés, hala a bé ndigi man jam, ndi hala a bi boñ le di yila bañga mawanda letee ni len.” I gwéha Anna bo nlôm ba gwé inyu lôk kéé, i ntinde bo i lôl bo mahôla.​—1 Yôhanes 3:17, 18.

11. (a) Kii bôt bape ba mbéna nôgda i ngéda di ñunda bo le di ngwés bo? (b) Inoñnaga ni Bingéngén 19:17, lelaa Yéhôva a ga timbhe gwéha di ñunda bôt bape?

¹¹ I ngéda di ñunda bôt bape loñgeñem ni gwéha, ba nla tehe le di mboñ biliya i kôna Yéhôva. Ba nla ki ti mayéga inyu loñge yés ñem i nya di ma bé tehe. Khanh nu di mbôk di pôdôl, a mbigda i bôt ba bi hôla nye ni maséé momasôna, a nkal le: “Me nlôôha ti lôk kéé i bôda i i bé i yoñ me inyu kena me likalô mayéga. Ba bé ba yoñ me ba kena me, tole ba bé ba naña me i homa ba nuñle bijek, di kabna ndék yom, i mbus ba témbna me i ndap. I len ini, me nsôk nok le hala a bé bat bo biliya bi ngui. Ba bé boñ hala ni gwéha.” Ndi bôt bobasôna bé bon ba nti mayéga inyu mam di mbôñôl bo. Inyu pôdôl i bôt ba bi hôla nye, Khanh a nkal le: “Me gwé yaga ngôñ i ti bo mayéga inyu loñge yosôna ba bi bôñôl me, ndi me nyi bé i het bobasôna ba nyééne. Ndi Yéhôva nye a nyi, jon me nsoohe le a bom bo inyu jam ba bi bôñôl me.” Khanh a mpot maliga. Yéhôva a nyi mam malam momasôna di mbôñôl bôt bape. To li yé yaga hisiina a ntehe i jam di mboñ kiki sesema i mahee, kiki pil a nlama saa.​—Añ Bingéngén 19:17.

12. Lelaa lôk kéé i bôlôm i nla unda le i ngwés likoda? (Béñge yak bititii.)

 ¹² Ibale u yé mankéé nu munlôm, lelaa u nla unda le u ngwés bôt bape u boñok ki mam inyu hôla bo? Njohok mankéé yada le Jordan, a bi bat mañ u likoda le, kii a nla boñ inyu kônde hôla likoda. Mañ u likoda u bi ti nye bibégés inyu mahol a bé a ma boñ, i mbus a ti nye maéba ma ma nla hôla nye i boñ iloo ha. Kiki hihéga, a bi kal Jordan le a nla hoo lo i makoda inyu boñ le a yéga bôt bape, a nla timbhe i makoda, a bana lem i téé likalô ni juu jé li likalô, a ôt ki pék inyu yi kii ipe a nla boñ inyu hôla bôt bape. I ngéda Jordan a bi noñ maéba ma, a bi nigil ndigi bé makeñge ma mondo, ndi gwéha yé inyu lôk kéé i bi kônde nañ. Jordan a bi nigil le i ngéda mankéé a nyila nhôla nson, ha bé nyen a mbôdôl hôla bôt bape, ndi a nke ni bisu i hôla bo.​—1 Timôtéô 3:8-10, 13.

13. Lelaa gwéha i bi tinde mankéé Christian i tiimba yila mañ u likoda?

¹³ Mam ma yé lelaa ibale u bé nhôla nson tole u bé mañ likoda? Yéhôva a mbigda nson u bi boñ behee, ni i gwéha i bi tinde we i gwel i nson u. (1 Korintô 15:58) A ntehe ki i gwéha u ñunda i len ini. Mankéé wada le Christian, i ngéda ba bi héya nye mañ, hala a bi tééñga nye ngandak. A nkal le: “Me bi kit le me mboñ kii yosôna me nla inyule me ngwés Yéhôva​—ibabé i bem jam jo ki jo tole nson wo ki wo.” I mbus ba bi tiimba téé nye mañ u likoda, Christian a nkal le: “Me bé kon woñi i tiimba gwel nson u. Ndi me bi neebe wo, inyule ni konangoo i Yéhôva nyen me bi témb me bana pôla i gwel nson u mañ u likoda,  me neebe nson u inyule me ngwés nye, me ngwés ki lôk kéé yem.”

14. Kii di nigil mu i yom sita yada i loñ i Georgia i nkal?

¹⁴ Bagwélél ba Yéhôva ba ngwés ki mut wap libôk. (Matéô 22:37-39) Kiki hihéga, Elena, sita yada i loñ Georgia, a nkal le: “Jam li bisu, li li bi tinde toi me i añal ñañ nlam, li yé gwéha me ngwés Yéhôva. Ndi kiki gwéha inyu Tata wem nu ngii i bé nañ, nlélém ngéda yak gwéha yem inyu bôt i bé nañ. Me bé me noode hoñol mambe mandutu ba mboma, ni mimbe miño mi minkwel mi nla tihba miñem nwap. Kiki me bé kenek ni bisu i hoñol bo, hala nyen me bé lôôha bana ngôñ i hôla bo.”​—Rôma 10:13-15.

15-16. Kiki bititii bi ñunda, bimbe bisai di nkôhna i ngéda di ngwés bôt bape?

¹⁵ I ngéda di ngwés lôk kéé, botama bé bon ba nkôhna bisai. Ndék ngéda i mbus le himala hi COVID-19 hi bi bôdôl, mankéé wés Paolo bo nwaa ba bi hôla mimañ mi bisita, i yi gwélél bikei gwap hala wee téléfôn, tafel tole ordinater inyu añal ñañ nlam. Sita yada i bikei bi bé tééñga ngandak, i bi sôk pamba. A bi la naña bôt bé ba lihaa i Mbigda nyemb Yésu. Môm masamal ma bôt ba bé i Mbigda nyemb Yésu ni njel Zoom! I sita ini ni bôt bé ba lihaa ba bi ôt nseñ ni biliya bi Paolo bo nwaa. I mbus ngéda  sita i i tilna Paolo, i kal le: “Me nyéga we ngandak, mu kiki u niiga mimañ mi bôt. Kekikel me ga hôya bé lelaa Yéhôva a ntôñ bés, ni biliya bi ngui u bi boñ inyu hôla bés.”

¹⁶ I nya mam ini i bi hôla Paolo i ôt biniigana bi mahee. Hala a bi hôla nye i tééda le, gwéha i nlôôha ba nseñ iloo yi tole ngap di gwé i gwel ngim minson. A mbigda le: “Me bé ngwélél makiiña. Ndi i len ini me nsôk nôgda le, to ibale lôk kéé i nhoñol ha bé minkwel me bé tinak, ba ngi hoñlak i mam me bi bôñôl bo.”

17. Njee numpe a nkôhna bisai i ngéda di ngwés bôt bape?

¹⁷ I ngéda di ngwés bôt bape, bésbomede di nkôhna bisai i nya di bemek bé. Jonathan, nu a yé i Siland Yondo, a bi tehe i jam li. Kôkôa yada i ngwa jôn, hiañgaa hi bayak ngandak, a bi tehe nsañal wada a ntéé likalô nyetama. Jonathan a bi kit le hiki ngwa jôn i mbus kosi, a ga añal ñañ nlam ni nsañal nu. Ha i ngéda i, a bi yimbe bé bisai i jam li li bé le li lona nye. Jonathan a nkal le: “Me bé gwés bé ñañ nlam ha ngéda i, ndi me bi tehe lelaa i nsañal nu a bé niiga bôt, me tehe ki matam nson wé u bé num. Me bôdôl gwés nson u ñañ nlam. I mankéé nu a yila yak me liwanda li ñem nyuu, a bi hôla ki me i hol i pes mbuu, i gwés likalô, ni i kôôge bebee ni Yéhôva.”

18. Kii Yéhôva a nsômbôl le di boñ?

¹⁸ Yéhôva a nsômbôl le, bésbobasôna di kônde gwés nye, di kônde ki gwés bôt bape. Kiki di nigil munu yigil ini, di nla ke ni bisu i gwés Yéhôva i ngéda di ñañ Bañga yé, di ôdôk pék mu, ni i ngéda di nsoohe nye hiki ngéda. Gwéha inyu lôk kéé i nla ki nañ i ngéda di nlôl bo mahôla. Kiki gwéha yés i nkeñep, hala nyen di nkônde kôôge bebee ni Yéhôva, yak ni lôk kéé yés i bôlôm ni i bôda. Di ga kon maséé ni mawanda ma i boga ni boga!