I matila ma yé ipañ nlôñ kaat unu ma ñunda le ñôma Paul a bé pôdôl ñwin, tole su jam wada ikété bitééne bi Djob, kiki Bibel i ntoñle bés gwo.

Di mbéna gwélél kaat Lôk Héber 4:12 ikété bikaat gwés inyu unda le Bibel i gwé ngui i héñha biniñ bi bôt, di kôli ki gwélél nlôñ kaat u hala. Ndi i nla ba loñge i toñol kaat Lôk Héber 4:12 lôñni mam ma yé ntilga i bisu ni i mbus nlôñ u. Paul a bé ti bikristen bi Lôk Héber makénd le ba sal lôñ yada ni Djob inyu yônôs bitééne gwé. Bitilna bipubi bi ntoñol kii yé bitééne bi. Kiki héga, Paul a bi gwélél ñañ u bon ba Israél, ba Djob a bi péyés i loñ Égiptô. Ba bééna mbônga i jôp ikété hisi hi likak, hi hi ‘nkuli ni milik ni wéi,’ het ba bé le ba kôhna bañga noi.​—Manyodi 3:8; Ndiimba Mbén 12:9, 10.

Hala nyen bitééne bi Djob bi bé inyu yap. Ndi mbus ngéda, bon ba Lôk Israél ba bi lédés miñem nwap, ba unda bé le ba nhémle, jon ngandak ikété yap i bi nimis bisai i jôp mu noi i. (Ñanga Bôt 14:30; Yôsua 14:6-10) Ndi Paul a bi kal le “likak li ngi yii le di jôp i noi [i Djob]” (Lôk Héber 3:16-19; 4:1) “Likak” li, li yé jam jada ikété bitééne bi Djob. Kiki bikristen bi Lôk Héber bi bi boñ, yak bés di nla añ bitééne bi, di nit ki gwo. Inyu yigye le likak li, li nlôl ikété Bitilna, Paul a bi sima minlôñ mi kaat Bibôdle 2:2 ni kaat Tjémbi 95:11.

I yé mbale le hala a ntihba bés miñem i yi le “likak li ngi yii le di jôp i noi [i Djob].” Di nhémle le likak li nlôl ikété Bibel, le di ga jôp i noi i Djob, li ga yon; di bi yoñ ki bitelbene i jôp mu. Di bi boñ bé hala inyule di bi liya i tééda mbén Môsé, tole i lémél Djob ni njel minson mimpe. Ndi, ikété hémle ni maséé, di bi nit, di ngi nidik ki bitééne bi Djob bi Bibel i nyelene bés. Jam lipe li yé le, kiki di mbôk di kal, dikôô di bôt di mbôdôl nigil Bibel ni nkoñ isi wonsôna, ba nigil ki i yi kii i yé bitééne bi Djob. Hala a bi tinde ngandak ikété yap i héñha niñ yap, i unda le ba gwé hémle, ni i yila bikristen ni njel sôble. Mahéñha ma mbôña i niñ yap, ma ñunda ntiik le “Bañga i Nyambe i yé yômi ni ngui.” Bitééne bi Djob, kiki Bibel i ntoñle bés gwo, bi bi lona mahéñha i niñ yés, bi ga ke ki ni bisu i lona mahéñha mape.