“ME BÉÉNA 15 ñwii ngéda me bi kôs sôble. Soñ isamal mbus ha, me yila nsañal nu ndék ngéda. Mbus ñwii wada, me tila me yé yila nsañal nu ngéda yosôna. Ngéda me bi kôhna Bacc i suklu, me bi bat le me nyéñ ke homa batéé likalô ba mbéda. Me bé yéñ nyodi mu tison, kayéle me ke haa ni mbômbô yem nu a bé bé Mbôgi Yéhôva. Ndi ngéda gwélél makiiña a bi kal me le homa wem likalô a’ bane mu tison yem i het me bi gwééne, me bé ngoo ngandak! Me bi boñ le a yi bañ le hala nyen me nôgda. Me bi uwe ndik ño wem, me nyodi i bisu gwé inyu ke hek pék mu jam a bi kal. Me kal mankéé nu a bé yéga me i likalô le: ‘Me nhoñol le me yé i boñ kiki Yôna. Ndi i mbus, Yôna a bi sôk a ke i Ninivé. Jon yak me, m’a ke i homa ba ñep me.’

Hala a yé ñwii mina nano le me yé nsañal mu tison yem, me nsôk ki tehe le hala a bé loñge jam le me noñ oda ba bi ti me. Jam li bé tééñga, li bé le me bééna bé litehge lilam. I len ini, me yé maséé ngandak. ikété sôñ yada, me bi bana 24 gwigil bi Bibel. Ni mahôla ma Yéhôva me bi sôk me bôdôl nigil Bibel ni mbômbô yem nu a bé kolba me kôba.”

Nnigil Bibel wada i loñ Fiji, a bé lama pohol ipôla i ke i likoda li ndôn, ni ke bo nlô wé i ngand ligwéé i mut wap lihaa. Nlôm a bi ti nye kunde le a nla ke i likoda li ndôn. A kal nlôm le a nla lo mu ngand yap i mbus likoda li ndôn. Ndi i ngéda a bi témb i ndap i mbus likoda li ndôn, a nôgda le, i yé loñge inyu yé le a keñgle bahoma ba nla ba ngok baagene inyu hemle yé. Jon, a bi ke ha bé nyoo.

I nlélém ngéda, kiki nlô wé a bi kal bôt bé ba lihaa le a nti nwaa kunde i ke i “base i Mbôgi Yéhôva,” ba bi kal nye le: “Nwaa woñ a’ lo bé; Mbôgi Yéhôva i nséé bé mangand ma ligwéé!” *

Mbus ha, nlô wé a bé maséé ngandak i tehe lelaa nwaa a bi yoñ makidik ma ma nkiha ni hémle yé, ma kihga ki ni kiñ yé ñem. Loñge yé ndémbél i bi yible nye njel i tééne nlô wé ni bôt bape likalô. Lisuk li bé lelaa? Nlôm a bi neebe i nigil Bibel, a bôdôl ki ke i makoda ni nwaa wé.