Hala a bé ndik jam jada ikété ngandak mam ipe baoo ba Yésu ba bé yiñil nye ni banigil bé mindañ. Mbén Môsé i bé ti ngandak mambén inyu ba mapubi i bisu bi Djob. Mbén i bé pôdôl mam kiki bo gwom bi mbôô bi bi nyoo, mut nu a nkon lô, mim mi mut binam ni mi binuga. I bé ti ki biniigana bi bi bé toñol lelaa ba bé lama boñ inyu héa libak li nyega. Ba bé lama nwes ngim jam, ti ngim sesema, tole nogop inyu ba mapubi.​—Lôk Lévi bipes 11-15; Ñanga bôt pes 19.

Balét ba Lôk Yuda ba bé yéñ téé bikila yak inyu disii di mam. Kaat bayi mam yada i nkal le, inyu hiki jam li nla boñ mut le a yila nyega, ba bé bat mambadga kiki bo: ‘Kii i nla boñ le a yila nyega? Lelaa a nla lôôs mut numpe libak li? Ikepam limbe likala a nla lôôs mut numpe libak li? Bimbe bigwélél, ni mambe mam mape ma nla boñ le mut a bana libak li? Mambe manjel, ni bimbe bilem bi mbok bi nlama gwélana inyu témb ba mapubi?’

Baoo ba Yésu ba bi bat nye le: ‘Inyuki banigil boñ ba noñ bé bilem bi mimañ mi bôt, ndi ba jek ya koga ni moo ma mahindi?’ (Markô 7:5) Baoo ba Yésu ba bé pôdôl bé lijôa moo inyu keñgle makon. Balét ba Mbén ba bé bat le mut a kôp moo mé malép ilole a nje; hala a bé bo lem i mbok. I kaat di mbôk di sima i nkônde kal le: “Ba bééna yak pééna inyu yi imbe ébél malép ba nlama gwélél, mambe malép ba nlama gwélél, njee a nlama kôp malép ma, ni i pam hee ba nlama jôa moo.”

I ndimbhe Yésu a bi ti bo inyu bikila gwap, i bé let bé i nok. A bi kal baéga base Lôk Yuda i hiai bisu le: “A bé bôt ba bihéñba, Yésaya a tibil yaga pot bindéé inyu nan, kiki i yé ntilbaga le: ‘Bôt bana ba nti me lipém ni bibép gwap, ndi miñem nwap mi mal hiamba nonok ni me. Ba mbégés me yañga, ba niigaga matiñ ma bôt kiki maéba map.’ Bé ni nyék litiñ li Nyambe, ni adbege ni lem i bôt.”​—Markô 7:6-8.