1. Kii i yé i kon Djob woñi, inyuki i bet ba ngwés nye ba nlama kon nye woñi?

BIKRISTEN bi ngwés Djob, i nlélém ngéda, bi konok nye woñi. Ngim bôt i nla badba le, lelaa hala a nla bôña? Ndi i woñi di mpôdôl hana u ta bé béba woñi. Di ga pôdôl ngim woñi i tôbôtôbô. I bôt ba gwé i woñi unu ba nlôôha ti Djob lipém. Ba nkon woñi i boñ jam li li nlémél bé Isañ wap inyule ba nsômbôl bé ôbôs maada map ni nye.​—Tjémbi 111:10; Bingéngén 8:13.

2. Mambe mam ima ma yé kaat Tjémbi 86:11 di ga pôdôl?

² Añ Tjémbi 86:11. I ngéda u ñôt pék munu bibañga bini, u nléba le Kiñe David a bi nok le i kon Djob woñi i yé nseñ. Di béñge lelaa di nla bii bibañga bi David bini bisélél. Pog, di ga wan ngim mam i i nlama tinde bés i kon jôl li Djob woñi. Iba, di ga tehe lelaa di nla unda le di nkon jôl li Djob woñi mu niñ yés.

3. Limbe jam li bi lama boñ le Môsi a kon Yéhôva woñi?

³ Hégda le jam Môsi a bi nôgda i ngéda a bé ikété hôk liaa, a tehe lipémba li Yéhôva li ntagbe nye bisu ikété yiinda. I kaat ini le Étude perspicace des Écritures i nkal le, i jam li “li bé jam li nlôôha kônha woñi mut binam a bé ngi tehe ibôdôl ha ngéda i, letee ni ngéda Yésu Kristô a bi lo hana ’isi.” Môsi a bi nok bini bibañga  añgel i bi pot le: “Yéhôva, Yéhôva, Nyambe nu konangoo, ni nu karis, nu a mpala bé unup, ndi a nyaaba ni loñgeñem ni maliga, a ntéédana dikôô ni dikôô di bôt loñgeñem, a nwéhlak liboñok libe, ni litjañk, ni béba.” (Manyodi 33:17-23; 34:5-7) Môsi a bé lama hoñol i jam li hiki ngéda a bé gwélél jôl li Yéhôva. Jon hala a nhélés bé bés le Môsi a béhe litén li Israel le li “kon i jôl li lipém lini ni li li nkônha woñi, woñi.”​—Ndiimba Mbén 28:58.

4. Bimbe bilem bi Yéhôva bi nla tinde bés i kon nye woñi?

⁴ I ngéda di ñôt pék mu jôl li Yéhôva, di nlama yak bigda umbe ntén mut a yé. Di nlama bigda bilem gwé kiki bo lipémba, pék, telepsép ni gwéha. Ibale di ñôt pék mu bilem bi Yéhôva bi ni bipe ki, hala a ga tinde bés i kon nye woñi.​—Tjémbi 77:12-16.

5-6. (a) Jôl li Djob li nkobla le kii? (b) Inoñnaga ni Manyodi 3:13, 14 ni Yésaya 64:8, lelaa Yéhôva a nyilha?

⁵ Jôl li Yéhôva li nkobla le kii? Ngandak bayimam i nkal le i nene le jôl li Yéhôva li kobla le “A nyilha.” I ngobol jôl jé i, i mbigdaha bés le yom yo ki yo i nla bé kéñ nye i boñ sômbôl yé, ni ki le a nla boñ mam momasôna. Lelaa?

⁶ Yéhôva a nyilha, ni ini njel le, a nyila kii yosôna i mbéda inyu yônôs sômbôl yé. (Añ Manyodi 3:13, 14.) Ntôñ Yéhôva u mbéna ti bés makénd i ôt pék mu jam li. Yéhôva a nla ki boñ le bagwélél bé ba yila kii yosôna i mbéda inyu boñ le ba yônôs sômbôl yé. (Añ Yésaya 64:8.) Manjel mana mo ima mon Yéhôva a ngwélél inyu yônôs sômbôl yé. Jam jo ki jo li nla bé kéñ nye i yônôs sômbôl yé.​—Yésaya 46:10, 11.

7. Kii i nla tinde bés i kônde ti Yéhôva mayéga?

 ⁷ Ibale di ñôt pék mu mam Yéhôva a mboñ, ni ma a nti bés ngap i boñ, hala a ga tinde bés i kônde ti nye mayéga. Kiki hihéga, ngéda di memle bihégél, di nlôôha ti Yéhôva lipém inyule ni njel yé nyen gwobisôna bi bi héga. (Tjémbi 8:4, 5) Ngeñ di nyoñ ki ngéda i hoñol i mam Yéhôva a bi yilha bés inyu boñ sômbôl yé, hala a ntinde bés i ti nye njôôñ lipém. Jôl li Yéhôva li yé toi hélha jam! Li gwé maada ni libak jé, ni i mam momasôna a ma boñ, ni ma a ga boñ dilo di nlo.​—Tjémbi 89:8, 9.

8. Inoñnaga ni kaat Ndiimba Mbén 32:2, 3, lelaa Yéhôva a nsômbôl le bagwélél bé ba tehe jôl jé?

⁸ Ndék ngéda ilole Lôk Israel i njôp i Hisi hi Likak, Yéhôva a bi niiga Môsi ngim hiémbi. (Ndiimba Mbén 31:19) Yak Môsi a bé lama niiga Lôk Israel i hiémbi hi. (Añ Ndiimba Mbén 32:2, 3.) Ngéda di ñôt pék i minlôñ 2 ni 3, di nok le Yéhôva a nsômbôl bé le jôl jé li solop. A nsômbôl bé ki to le bôt ba kon woñi i pahal jo. A nsômbôl le bôt ba binam ni biañgel ba yi jôl jé! Lôk Israel i bé maséé ngandak ngéda Môsi a bé niiga bo mam inyu Yéhôva ni jôl jé. I mam Môsi a bi niiga bo, ma bi lédés bo, ma hôgbaha ki bo, ndik kiki nop a nhôlôs bibebela. Lelaa yak bés di nla kôna ndémbél i Môsi i ngéda di niiga?

9. Lelaa di nla pubus jôl li Yéhôva?

⁹ I ngéda di yé likalô li mandap ni mandap, tole likalô li mbamba, di nla gwélél Bibel inyu unda bôt le jôl li Djop le Yéhôva. Di nla ti bo bikaat, bividéô bilam, ni bisélél bipe mu sit yés internet, bi bi mpôdôl Yéhôva. I ngéda di yé i bôlô, i suklu tole i ngéda di nke liké, di nla pôdôl Yéhôva ni bilem gwé. I ngéda di nyis i bôt di mboma njee a yé Yéhôva, ni sômbôl yé inyu bôt ba binam ni hisi, di nhôla bo i tehe Yéhôva kiki ba bé ngi tehe nye. Kiki di nke ni bisu i kal bôt maliga inyu Tata wés nu gwéha, hala nyen di nkônde pubus jôl jé. Ha ngéda i, di ñunda le minsohi ba ñôm Yéhôva mi téé bé. Di nti bôt biniigana bi bi nhôgbaha bo, bi lédhak ki bo.​—Yésaya 65:13, 14.

10. I ngéda di ntégbaha gwigil bi Bibel, inyuki di nlama ndik bé niiga bôt mambén ni matiñ ma téé sép ma Djob?

¹⁰ Ngéda di ntégbaha gwigil bi Bibel, di nhôla bôt i yi jôl li Yéhôva, ni i gwélél jo. Di nyéñ ki hôla bo i yi Yéhôva loñge loñge. Baa di yé le di pam i boñ hala ibale di niiga ndik bo mambén ni matiñ ma Bibel? I yé mbale le nnigil a nlama yi mambén ma Djob, a gwés ki mo. Ndi, baa nnigil Bibel a nôgôl Yéhôva inyule a ngwés nye? Di bigda le, Éva a bé yi mbén i Nyambe, ndi a bééna bé bañga gwéha inyu Nwet a bi ti nye yo; to Adam a bééna bé i gwéha i. (Bibôdle 3:1-6) Jon di nlama ndik bé niiga bôt mambén ni matiñ ma téé sép ma Djob.

11. Ngéda di niiga bôt mambén ni matiñ ma Djob, lelaa di nla hôla bo i gwés nye?

¹¹ Mambén ni matiñ ma Yéhôva ma nlôôha malam. (Tjémbi 119:97, 111, 112) Ndi i bôt ba nigil Bibel ni bés ba nla bé pam i bana litehge li, ibale ba nyi bé le gwéha yon i bi tinde Yéhôva i ti bés mambén ma. Jon di nla bat nnigil Bibel le: “U nhoñol le inyuki Nyambe a  mbat bagwélél bé le ba boñ i jam lini, tole ba boñ bañ? Kii hala a niiga bés inyu libak jé?” Ibale di nhôla banigil Bibel i bana bañga gwéha inyu Yéhôva ni jôl jé, di nla pam i tihba miñem nwap. Ni i njel i, ba ga gwés ndik bé mambén ma Nyambe, ndi b’a gwés yak nyemede. (Tjémbi 119:68) Hala a ga boñ le hémle yap i kônde let, kayéle ba pam i hônba mandutu.​—1 Korintô 3:12-15.

12. Kii i bi boñ le ñem u David u ba nkabak, hala a bi tinde nye i boñ kii?

¹² Kaat Tjémbi 86:11 i gwé bini bibuk bi ngui le: “At ñem wem.” Kiñe David nyen mbuu mpubi u bi tinde i tila bibuk bi. Mu niñ yé, a bi yimbe le ñem mut u mbéna ba nkabak. Lisañ jada, a bé hiôm i ngii ndap yé, a tehe wañan nwaa a nogop. Ha ngéda i, baa David a bééna ñem wada tole miñem ima? A bé yi mbén Yéhôva i i bé kal le: “U tamak bañ nwaa mut woñ libôk.” (Manyodi 20:17) Ndi, hala a bi sôña bé le a kee ni bisu i memle nye. Ñem wé u bé nkabak, a bééna ngôñ ni Batséba, a ban-ga ki ngôñ i lémél Yéhôva. To hala kiki David a bi gwélél Yéhôva ntandaa ngéda, a konok ki nye woñi, a bi boñ béba ikeñi. Ha ngéda i, ngôñ ibe i bi yuu David, a kwo i béba. A bi hindis jôl li Yéhôva, a lona yak bôt bape ba ba bi boñ bé béba ndutu ikeñi, yak bôt bé ba lihaa.​—2 Samuel 11:1-5, 14-17; 12:7-12.

13. Kii i ñunda le David a bi témb a bana ñem wada?

¹³ Yéhôva a bi kodol David, David a témbna ki maada mé malam ni nye. (2 Samuel 12:13; Tjémbi 51:4-6, 19) David a bi bigda mandutu a bi kôs i ngéda ñem wé u bi ba nkabak. Bibañga gwé bi bi yé kaat Tjémbi 86:11 bi nla ki nôga le: “Ti me ñem u u ta bé nkabak.” Baa Yéhôva a bi hôla David i bana ñem wada, hala wee u u ta bé nkabak? Ñ, inyule i mbus ngéda Bibel i bi pôdôl David kiki mut nu “ñem u ba . . . ngim ni Yéhôva Nyambe wé.”​—1 Bikiñe 11:4; 15:3.

14. Imbe mbadga di nlama badba, inyuki?

¹⁴ Ndémbél i David i nti bés makénd, i mbéhe ki bés. Kiki a bi kwo i béba ikeñi, hala a ntinde bagwélél ba Djob i yoñ yihe i len ini. Too di ntip  bôdôl gwélél Yéhôva, too di ngwélél nye nano a yé ngandak nwii, di nlama badba le: ‘Baa me nkolba Satan i ngéda a nsômbôl boñ le ñem wem u ba nkabak?’

15. Lelaa i kon Djob woñi i nhôla bés i ngéda di mboma bititii bi nyuñguu ngôñ malal?

¹⁵ Kiki hihéga, i ngéda u ntehe bititii bi nyuñguu ngôñ malal i nkuu biliñgeliñge tole i internet, lelaa u yé u mboñ? Di yé le di kal le, bititii bi malal bé bi. Ndi baa Satan a nla bé gwélél bititii bi inyu tinde bés i bana miñem ima? (2 Korintô 2:11) Bititii bi, bi nla ba kiki man kei nu mut a ngwélél inyu kan soso hié. A mbôk ndugi a ha i kei i homa wada, kiki a ntômôl yo, hié hi mbôdôl kéni mbeñel mbeñel. Ngéda kei yosôna i njôp, hié hi nkéni. Nlélém inyu bititii di ntehe, i bibôdle di nla hoñol le bi ga boñ bé bés to jam, ndi ndék ni ndék, bi nla kap ñem wés, bi tinde bés i kwo i béba ikeñi. Jon di nlama yoñ yihe le yom ibe yo ki yo i jôp bañ i ñem wés! Ni i njel i, di ñunda le di nkon jôl li Yéhôva woñi ni ñem wés wonsôna!

16. I ngéda di mboma manoodana, mambe mambadga di nlama badba?

¹⁶ U héya bititii bi nyuñguu ngôñ malal, Satan a ngwélél manjel mape inyu noode bés. Kii di nlama boñ? Di yé le di kal le béba jam i ta bé ha. Kiki hihéga di nla kal le: ‘Ibale béba ikeñi i, inyuki ba nhéya bé bôt ba mboñ yo i ntôñ?’ Ndi mahoñol ma, ma yé mabe ngandak. Di nlama badba mana mambadga: ‘Baa Satan a ta bé gwélél i jam lini inyu boñ le ñem wem u ba nkabak? Ibale me mboñ jam li, baa me  ga hoo bé jôl li Yéhôva mahindi? Baa makidik mem ma ga boñ le me kôôge bebee ni Djob, tole ma ga boñ le me kee haa ni nye?’ Yoñ ngéda i ôt pék mu mambadga ma. Bat Yéhôva le a ti we pék inyu timbhe mo ni ñem maliga. (Yakôbô 1:5) Ibale u mboñ hala, u ga kwo bé i ngéda w’a boma manoodana. U ga nigle Yésu nu a bi kal Satan i ngéda a bé noode nye le: “Nyodi me ha, a Satan!”​—Matéô 4:10.

17. Inyuki i ta bé loñge le ñem u ba nkabak? Ti hihéga.

¹⁷ I ngéda ñem u yé nkabak, kinje béba jam! Hégda le, ikété ngim hikip hi bol, bôt ba nôgla bé. Ngim batuk bol mu hikip hi, ba nyéñ ndik lipém, bape ba noñ bé mambén, bape ki ba nyan nkena wap. I nya hikip i, bun bé le i bép. Ndi, hikip i het bôt ba nôgla, hi nla bép. Ñem woñ u yé kiki hikip hi hi nôgla ibale mahoñol moñ ni mam ma nkon we ngôñ ma nkiha ni sômbôl i Yéhôva. U hôya bañ le, Satan a ngwés le ñem woñ u ba nkabak. Ngôñ yé i yé le, mahoñol moñ ma kolba matiñ ma Yéhôva. Ndi ibale u nsômbôl gwélél Yéhôva, u nlama gwés nye ni ñem woñ wonsôna. (Matéô 22:36-38) Kekikel, u neebege bañ le Satan a boñ le ñem woñ u ba nkabak!

18. Mambe makidik u nyoñ inoñnaga ni Mika 4:5?

¹⁸ Kiki David, soohe Yéhôva le: “At ñem wem i kon jôl joñ woñi.” Boñ biliya le niñ yoñ i kiha ni masoohe ma. Hiki kel, makidik moñ momasôna ma nlama unda le u nlôôha kon jôl lipubi li Yéhôva woñi. Ibale u mboñ hala, w’a unda le u kôli toi sébla le Mbôgi Yéhôva. (Bingéngén 27:11) Ha ngéda i, bés bobasôna di ga kal kiki mpôdôl Mika le: “D’a kil i jôl li Yéhôva Nyambe wés i boga ni boga.”​—Mika 4:5, MN.