BÉS bobasôna di nyi le Yéhôva nyen a ñéga bagwélél bé munu “dilo di nsôk” dini, nyen a nti ki bo bijek bi mbuu. (2 Timôtéô 3:1) Ndi hiki wada wés nyen a nlama neebe le Yéhôva a éga nye. Di yé kiki Lôk Israel i ngéda ba bé ñoñ. Hiki ngéda ba bé hem sép, ba bé lama boñ ngim jam.

Yéhôva a bi kal Môsi le a bañ sép iba i silba ‘inyu kot litén, ni inyu yis jo le ngéda i nkola le ba jôp i njel.’ (Ñanga bôt 10:2) Biprisi bi bé lama hem sép inoñnaga ni nwin ba bé sômbôl legel litén. (Ñanga bôt 10:3-8) I len ini, bagwélél ba Djob ba nkôs biniigana ni ngandak manjel. Di béñge manjel maa mu, ma ma nhôñlaha bés i sép ba bé hem ngéda kôba. Bagwélél ba Djob ba nke makoda makeñi, mimañ mi gwé bisuklu, makoda ma mbéna kôs biniigana bi mondo.

Ngéda Yéhôva a bé gwés le ‘litén jolisôna’ li kodba i pes likôl i majubul ma lap, biprisi bi bé hem sép yo iba. (Ñanga bôt 10:3) Matén momasôna ma ma bé ma yii makas ma-na ma lap, ma bé yi nsébla u. I bet ba bé bebee ni majubul ma lap, ba bé lo mu manut ma. Inyu matén ma bé haa, i bé béda mo ngéda ni ngui inyu pam i lap. To kii leñek, Yéhôva a bé gwés le bobasôna ba kodba, ba ôt ki nseñ mu boma i.

I len ini, di nkodba ha bé i lap, ndi Djob a ngi kodok bagwélél bé. A yé a naña bo makoda ma ndôn, makoda ma tôbôtôbô mape i het di nkôs biniigana. Ikété biloñ bi nkoñ ’isi wonsôna, bagwélél ba Yéhôva ba nkôs minlélém mi biniigana. Ba bobasôna ba neebe nsébla u, ba yé maséé i ba ikété soso ntôñ u bagwélél ba Djob. Bahogi ba yé bebee ni homa likoda, ki le bape ba nlôl haa. Ndi to hala, bobasôna ba nyi le biliya ba mboñ inyu ba ha bi ta bé yañga.

Baa yak i bet ba yé haa ngandak ba ñôt nseñ ni makoda ma? Ñ, ni mahôla ma bisélél bi internet, i yé i ba wee ba kôdi homa wada ni bana bape, inyu kôs minlélém mi biniigana. Kiki hihéga, lisañ jada, ngéda hikuu hikeñi hi bi ep mankéé wada i yuuga Bétel i Bénin, bitelbene bi bi yôña inyu boñ le lôk kéé tison i Arlit, i Niger, ni i Ñoñ u Sahara, i emble  minkwel mi bé tiba. Môm ima ma bilôk bikéé ni wada, bôlôm ni bôda, ni banigil Bibel ba bi kodba ngim homa. To hala kiki ba bé haa ngandak, ba bi nôgda wee ba bé lôñni 44 131 lôk kéé ipe. Mankéé wada a tila le: “Di nlôôha ti mayéga inyu biniigana di nkôs munu boma ini. Hala a ñunda bés le, ni nhôya bé bés.”

Ngéda biprisi bi Israel bi bé hem sép ngélé yada ndigi, ‘baane ba litén, ni baane ba dikôô di bôt,’ bon ba bé lo i lap. (Ñanga bôt 10:4) Ni i njel i nyen, ba bé le ba kôs biniigana Môsi a bé sômbôl ti bo. Hala a bé hôla bo i tibil gwel nson wap. Ibale u ba wada mu ikété yap, baa ki u bi boñ bé kii yosôna u bé la, inyu ba ha i boma i?

I yé mbale le i len ini, mimañ mi ta bé ‘baane’; ba ntét bé to i bet Nyambe a nti bo i tééda. (1 Pétrô 5:1-3) Ndi ba mboñ kii yosôna ba nla inyu tibil tééda bémba i Nyambe. Jon ba ntôl bé bisuklu ngéda ntôñ u naña bo, kiki bo Suklu i mimañ. Mu bisuklu bi, mimañ mi nigil kii mi nla boñ inyu yoñ ndun ni mam ma likoda. Hala a nhôla ki bo i yila minhôôlak i pes mbuu. To ibale u mah ke bé mu bisuklu bi, bebek yak we u ma ôt nseñ ni nson u bet ba bé mu.

Biprisi bi Lôk Israel bi bé hem sép ngandak mintén. Ba bé legel le Yéhôva a nkal le ba jôp i njel. (Ñanga bôt 10:5, 6) Litén li bé nyodi bé tolaa tolaa, li bé ntjegek loñge, ndi bôlô, u bat bé. Maké ma, ma bé tééñga ngim bon ba Israel. Inyuki?

I nene le bahogi ba bé tehe le ba nlôôha puhe bo ni ngandak maké. ‘Jôga li ngéda, ond i bé bedep ndigi ibôdôl kôkôa letee ni kegla.’ Mangéda mape, ‘i bé nom i ngii lap dilo diba, ngim sôñ, tole ngim nwii.’ (Ñanga bôt 9:21, 22) Ngélé yañen ba bi nyodi? Ñanga bôt pes 33 i nsima 40 ma bahoma Lôk Israel i bi ke.

Ngim mangéda, bahogi ba bé léba loñge lisolbene. I nya homa i i bé loñge ngandak mu “soso ñoñ . . . a nkônha woñi.” (Ndiimba Mbén 1:19) Jon, ba bé le ba tehe maké kiki ngok baagene.

Ngéda ngeñ i bé kola inyu maké, ngim matén i bé lama bem ngandak ilole ba njôp i njel. Bobasôna ba bé emble nhema u sép, ndi ba bé bé le ba ke nlélém ngéda. I sép i, i bé legel le matén ma ma bé i pes likôl, hala wee Yuda, Isakar, ni Zébulôn ma nlama jôp i njel. (Ñanga bôt 2:3-7; 10:5, 6) I mbus, biprisi bi bé hem sép inyu ngélé yônhe iba inyu boñ le yak matén maa ma yé i nwelmbok ma jôp i njel. Biprisi bi bé ke ni bisu i hem letee matén momasôna ma jôp i njel.

Bebek u ma nok ndutu inyu ngim mahéñha ba nlona ikété ntôñ. U yé le u kal le ntôñ u nlôôha héñha mam. Tole u ngwés ngim bitelbene ngandak kayéle u gwé bé ngôñ le ba héñha gwo. I mam ma ni mape ki, ma nla bane bés manoodana, hala a nla ki bat bés ngandak ngéda inyu meya. Ndi to hala, ibale di mboñ kii yosôna di nla inyu nit mahéñha ma, di yé le di sôk tehe le ma yé inyu loñge yés.

I dilo di Môsi, Yéhôva a bi éga didun di bôlôm, bôda, ni boñge i ñoñ. Ibale Yéhôva a tat bé bo, to éga bo, ki ba bi pei bé. Yak i len ini, Yéhôva nyen a ñéga bés a tadak ki bés i pes mbuu. A nhôla bés i kôôge nye bebee ni i lédés hémle yés. Jon, hiki wada wés a yoñ makidik i emble nsébla kiki Lôk Israel i bé boñ i ngéda ba bé hem sép!