1-2. (a) Ngéda imbe di mbéna hoñol mut wés nu a bi wo? (b) Kii Yésu a bi boñ i u wé u nsôk ilole a nwo?

 TO IBALE bôt bés ba bi wo behee, di nwaa bé hoñol bo. Di mbéna hoñol bo téntén i kel nyemb yap.

² Hiki nwii, di nkodba ni didun di lôk kéé ipe i nkoñ ’isi wonsôna inyu bigda nyemb Yésu Kristô nu di ngwés ngandak. (1 Pétrô 1:8) Di nkodba inyu bigda i nwet a bi ti niñ yé kiki binoñ inyu kobol bés i mok mi béba ni nyemb. (Matéô 20:28) Yésu a bé sômbôl le banigil bé ba bigda nyemb yé. U u nsôk nwaa le a nwo, a bi jéla ni baôma bé, a kal ki bo le: “Kena ni bisu i boñ hala, ni hoñlege me mu.”​—Lukas 22:19.

3. Kii di ga tehe munu yigil ini?

³ Ndék bôt mu i bet ba yé ba nke i Mbigda nyemb Kristô i gwé botñem i ke niñ i ngii. Ndi yak dini didun di bôt dipe di di gwé botñem i niñ hana ’isi di yé di ba ha. Munu yigil ini, d’a tehe inyuki mintôñ mi bôt mini nwo ima mi yé mi ba ha i Mbigda nyemb Yésu hiki nwii. Di ga tehe ki bisai di nkôs ngeñ di yé ha. Di béñge ndugi inyuki minhook mi yé mi ba ha i Mbigda nyemb Yésu.

4. Inyuki minhook mi nje bret mi nyok wai i Mbigda nyemb Yésu?

⁴ Hiki nwii, minhook mi nke i Mbigda nyemb Yésu mi  nje bret mi nyok wai. Inyuki ba nje bret ba nyok wai? Inyu tibil nok i jam li, di bigda i jam li bi bôña u u nsôk ilole Yésu a nwo. I ngéda ba bi mal je Pasa, Yésu a bi téé i yom di nsébél len le Bilôp bi Nwet. A bi lôôs 11 baôma ba ba bi téñbe ni nye bret ni wai, a kal bo le ba je ba nyo. Yésu a bi pôdôl malômbla ima ni bo, malômbla ma yondo ni malômbla inyu ngim Ane. * (Lukas 22:19, 20, 28-30) Malômbla ma mon ma bi néhne baôma ni ndék banigil ipe njel i yila bikiñe ni biprisi i ngii. (Masoola 5:10; 14:1) Ndik i ndék minhook i ngi yii hana ’isi, i i yé mu malômbla ma mo ima, yon i nje bret i nyok wai i Mbigda nyemb Yésu.

5. Lelaa minhook mi ntehe i botñem ba gwé?

⁵ Jam lipe li li mboñ le minhook mi kon maséé i ke i Mbigda nyemb Yésu li yé le i ngéda ba yé nyoo, ba nhoñol bisai Djob a bi bôn bo. Yéhôva a bi bôn bo bisai bi mbuma ñañ. Ba ga niñ nyoo i ngii ibabé i wo to i boñ béba. Ba ga sal ni Yésu Kristô nu a bi tuge, ni mini minhook mimpe mi yé mu 144 000, ndi bisai bi nloo bini gwobisôna bi yé le ba ga ba i bisu bi Yéhôva Nyambe nyemede. (1 Korintô 15:51-53; 1 Yôhanes 3:2) Minhook mi nyi le bisai bi mbem bo nyoo ngii bi mbuma ñañ. Ndi inyu boñ le ba kee i niñ nyoo ngii, i mbéda le ba téñbe ni Nyambe letee ni nyemb yap. (2 Timôtéô 4:7, 8) Minhook mi yé maséé ngandak i ngéda mi nhoñol bisai bi mbem bo nyoo ngii. (Titô 2:13) Ndi mam ma yé lelaa inyu “mintômba mimpe”? (Yôhanes 10:16) Inyuki ba nke i Mbigda nyemb Yésu?

6. Inyuki mintômba mimpe mi nke i Mbigda nyemb Yésu hiki nwii?

⁶ Mintômba mimpe mi nke i Mbigda nyemb Yésu, mi nje bé bret, mi nyo bé to wai, ndi mi yé maséé i ba ha. I nwii 1938 inyu ngélé bisu, ba bi kal le i bôt ba gwé botñem i niñ hana ’isi ba kee i Mbigda nyemb Yésu. Nkum Ntat nu hilo 1 hi sôñ Matumb nwii 1938 a bi kal le: “Y’a ba loñge le mintômba mimpe mi ba mu likoda li inyu tehe kiki mam ma ntagbe. . . . Yak nwo mi nlama ba ha inyu boñ le mi kon maséé.” Kiki i bôt ba yé ba naña libii ba yé maséé i ba ha i ngand libii, hala nyen yak mintômba mimpe mi yé maséé i ba ha i Mbigda nyemb Yésu.

7. Inyuki mintômba mimpe mi yé maséé i emble nkwel u Mbigda nyemb Yésu?

⁷ Yak mintômba mimpe mi nhoñol bisai Djob a bi bôn bo. Ba yé maséé i emble nkwel u Mbigda nyemb Yésu inyule u nlôôha pôdôl mam Kristô ni 144 000 bôt ba ga ane ni nye ba ga boñ inyu bôt ba binam ba ba ga niñ hana ’isi i Ane i hikôô hi nwii. Isi énél i Yésu Kristô, baane ba, ba ga yilha hisi paradis, ba hôla ki bôt ba binam ba ba nôgôl Djob i yila peles. I bôt ba yé mu mintômba mimpe ba ba nlo i Mbigda nyemb Yésu ba yé maséé i hoñol bisai Bibel i mpôdôl, kiki bo bi bi yé i kaat Yésaya 35:5, 6; 65:21-23; ni i kaat  Masoola 21:3, 4. Ngéda ba nhoñol le ba ga niñ i mbok yondo ni bôt bap, ba nkônde bana botñem, ba nkônde ki téñbe i gwélél Yéhôva.​—Matéô 24:13; Galatia 6:9.

8. Limbe jam lipe li ntinde mintômba mimpe i ke i Mbigda nyemb Yésu?

⁸ Di béñge jam lipe li li ntinde mintômba mimpe i ke i Mbigda nyemb Yésu. Ba nsômbôl éba minhook le ba ngwés bo ni le ba yé ni bo. Bibel i ñéba le maada ma nlama ba ipôla minhook ni mintômba mimpe. Lelaa? Di wan le ndék dihéga.

9. Inoñnaga ni i mbañ i yé kaat Sakaria 8:23, lelaa mintômba mimpe mi ntehe minhook?

⁹ Añ Sakaria 8:23. I mbañ ini i ntibil toñol lelaa mintômba mimpe mi ntehe lôk kéé i bôlôm ni i bôda i i yé minhook. Bibañga bini le “man Lôk Yuda” ni “bé” bi mpôdôl minlélém mi bôt, hala wee minhook. (Rôma 2:28, 29) ‘Jôm li bôlôm li li nlôl biloñ bi dilémb tjodisôna’ li yé mintômba mimpe. Ba ‘nkôbda’ lôk kéé i i yé minhook, hala wee ba ntéñbe ni bo ikété adna inyu bégés Djob. Inyu hala nyen i ngeñ mintômba mimpe mi yé ha i Mbigda nyemb Yésu, mi ñéba toi le mi tiñi ni minhook.

10. Kii Yéhôva a bi boñ inyu yônôs mbañ i yé kaat Ézékiel 37:15-19, 24, 25?

¹⁰ Añ Ézékiel 37:15-19, 24, 25. Yéhôva a bi yônôs i mbañ ini ngéda a bi boñ le minhook mi bana maada ma bas bas ni mintômba mimpe. I mbañ i i mpôdôl bikék biba. I bôt ba gwé botñem i ke i ngii ba yé kiki kék “inyu Yuda” (litén het Yéhôva a bé pohle bikeñi bi Israel), i bôt ba gwé botñem i niñ hana ’isi ba yé kiki kék i “Éfraim.” * Yéhôva a bé lama at i môga ma bôt ma mo ima inyu boñ le ba yila “kék yada.” Hala a nkobla le ba nsal ntôñ isi énél i Kiñe yap le Yésu Kristô. Hiki nwii, minhook ni mintômba mimpe mi nke i Mbigda nyemb Yésu ha kiki mintôñ ima bé, ndi kiki “bémba yada” isi “ntééda mintômba wada.”​—Yôhanes 10:16.

11. Inoñnaga ni kaat Matéô 25:31-36, 40, jam li bisu “mintômba” mi mboñ inyu nit lôktata i Kristô li yé le kii?

¹¹ Añ Matéô 25:31-36, 40. “Mintômba” Yésu a mpôdôl munu hihéga hini, mi yé bôt ba téé sép ba ba niñ munu dilo di nsôk, ba ban-ga botñem i niñ hana ’isi, hala wee mintômba mimpe. Jam li bisu ba mboñ inyu éba le ba nit lôktata i Kristô li yé le ba nhôla bo i añal ñañ nlam u Ane ni i yilha bôt banigil ni nkoñ ’isi wonsôna.​—Matéô 24:14; 28:19, 20.

12-13. Mambe mam mape mintômba mimpe mi mboñ inyu nit lôktata i Kristô?

¹² Hiki nwii, i ngeñ Mbigda nyemb Yésu i nkahal kôôge bebee, lôk kéé i i yé mintômba mimpe i nit lôktata i Kristô i ngéda ba naña bôt i Mbigda nyemb Yésu. (Béñge minkéñék mi matila mini le: “ Baa u yé kôôba Mbigda nyemb Yésu?”) Ba mboñ ki kii yosôna i mbéda inyu boñ le Mbigda nyemb Yésu i tagbe i makoda momasôna i nkoñ ’isi, to hala kiki ngandak lôk kéé mu makoda ma i nje bé bret, i nyo bé to wai. Mintômba mimpe mi yé maséé i boñ i mam ma inyu nit lôktata  i Kristô. I lôk kéé i i nyi le i mam ba mbôñôl lôktata i Kristô, Yésu a ntehe le nyen ba mbôñôl mo.​—Matéô 25:37-40.

¹³ Mambe mam mape ma ntinde bés i ke i Mbigda nyemb Yésu to di yé minhook to di yé mintômba mimpe?

14. Lelaa Yéhôva bo Yésu ba bi éba bés bañga gwéha?

¹⁴ Di yé maséé ngandak inyu gwéha Yéhôva bo Yésu ba bi éba bés. Yéhôva a bi boñ ngandak mam inyu éba bés gwéha yé, ndi jam jada a bi boñ li nlel mana momasôna. Yéhôva a bi éba bés bañga gwéha i ngeñ a bi ep Man wé le a loo a nok ndutu, a wo ki inyu yés. (Yôhanes 3:16) Yak Yésu a bi unda bés bañga gwéha i ngéda a bi neebe le a nwo inyu yés. (Yôhanes 15:13) Di gwé bé yom yo ki yo di nla timbhe Yéhôva bo Yésu inyu gwéha ba bi unda bés. Ndi hiki kel, di nla éba ni maboñok més le di nti bo mayéga. (Kôlôsé 3:15) Di nke ki i Mbigda nyemb Yésu inyu boñ le di hoñol gwéha ba bi unda bés, di éba ki bo le di ngwés bo.

15. Inyuki binoñ bi yé nseñ ngandak inyu minhook ni mintômba mimpe?

¹⁵ Binoñ bi yé nseñ ngandak inyu yés. (Matéô 20:28) Binoñ bi yé nseñ ngandak inyu minhook inyule gwon bi mboñ le ba kôs bisai Djob a bi bôn bo. Kiki ba bi hémle sesema i Kristô, Yéhôva a bi tehe le ba téé sép, a yoñ ki bo kiki boñ bé. (Rôma 5:1; 8:15-17, 23) Yak mintômba mimpe mi yé maséé inyu binoñ. Kiki ba nhémle sesema i Kristô, ba yé bapubhaga i bisu bi Nyambe, ba ngwélél nye i nya i nlémél nye, ba gwé ki botñem le ba ga pei “njiiha ikeñi.” (Masoola 7:13-15) Jam jada minhook ni mintômba mimpe ba mboñ inyu éba le ba yé maséé inyu binoñ li yé le ba nlo i Mbigda nyemb Yésu hiki nwii.

16. Limbe jam lipe li ntinde bés i ke i Mbigda nyemb Yésu?

¹⁶ Jam lipe li ntinde bés i ke i Mbigda nyemb Yésu li yé le di nsômbôl nôgôl Yésu. Too di gwé botñem i niñ i ngii too hana ’isi, bésbobasôna di noñ i oda i Yésu ini a bi ti ngeñ a bi téé Bilôp bi Nwet. A bi kal le: “Kena ni bisu i boñ hala, ni hoñlege me mu.”​—1 Korintô 11:23, 24.

17. Lelaa Mbigda nyemb Yésu i nhôla bés i kôôge Yéhôva bebee?

¹⁷ Di nkônde kôôge Yéhôva bebee. (Yakôbô 4:8) Kiki di ntehe, Mbigda nyemb Yésu i nhôla bés i ôt pék mu bisai Yéhôva a bi bôn bés, ni i hoñol bañga gwéha a bi éba bés. (Yérémia 29:11; 1 Yôhanes 4:8-10) I ngeñ di ñôt pék mu bisai bi mbuma ñañ Yéhôva a bi bôn bés, ni gwéha ikeñi a unda bés, di nkônde gwés nye, di nkônde ki kôôge nye bebee.​—Rôma 8:38, 39.

18. I ngéda di ñôt pék mu ndémbél i Yésu, hala a ntinde bés i boñ kii?

¹⁸ Di nigle ndémbél i Yésu. (1 Pétrô 2:21) I ngéda Mbigda nyemb Yésu i nkahal kôôge bebee, di yé di ñañ miñañ mi mpôdôl sonde i nsôk i Yésu hana ’isi, nyemb yé, ni bitugne gwé. I mbus, i kel Mbigda nyemb Yésu, nkwel u yé u bigdaha bés gwéha Yésu a bi éba bés.  (Éfésô 5:2; 1 Yôhanes 3:16) I ngéda di ñañ miñañ mi mpôdôl ndémbél i Yésu di ôdôk pék mu, hala a ntinde bés “i kônde hiôm nlélém kiki yak nye a bi hiôm.”​—1 Yôhanes 2:6.

19. Lelaa di nla kônde yila mawanda ma Nyambe?

¹⁹ Di nkônde yila mawanda ma Nyambe. (Yuda 20, 21) I ngéda di mboñ kii yosôna di nla inyu nôgôl Yéhôva, i pubus jôl jé ni i kônha nye maséé, di nkônde yila mawanda mé. (Bingéngén 27:11; Matéô 6:9; 1 Yôhanes 5:3) Mbigda nyemb Yésu i nhôla bés i kal Yéhôva hiki kel mu niñ yés le: ‘Di nsômbôl ba mawanda moñ i boga ni boga!’

20. Mambe mam ma ntinde bés i ke i Mbigda nyemb Yésu?

²⁰ To di gwé botñem i niñ i ngii to hana ’isi, di gwé ngandak mam malam ma ma ntinde bés i ke i Mbigda nyemb Yésu. Hiki nwii, i ngéda di nke i Mbigda nyemb Yésu, di hoñol nyemb i Yésu Kristô nu di ngwés. Ndi i jam li yé nseñ iloo mana momasôna li yé le, di nhoñol gwéha ikeñi Yéhôva a bi éba bés i ngéda a bi ti Man wé kiki sesema. I nwii unu, Mbigda nyemb Yésu y’a ba i ngwa koo hilo 15 hi sôñ Matôp nwii 2022. Di ngwés Yéhôva ni Man wé Yésu, jon i kel Mbigda nyemb Yésu, jam jo ki jo li nla bé sôña bés i ba ha.