1. Lelaa di yé le di tégbaha ngéda ni Yéhôva?

 DI YÉ maséé ngandak i ngéda di yé ni bôt di ngwés. Babiina ba yé maséé iloo hihéga i ngéda ba yé ntôñ. Boñge ba wanda ba ngwés ngéda ba yé ni mawanda map. Bésbobasôna di yé maséé i ngeñ di yé ni lôk kéé yés i bôda ni i bôlôm. Ndi di yé di lôôha ba maséé ngeñ di yé ni Yéhôva Nyambe. I ngeñ di nsoohe Yéhôva, di añak Bañga yé, di ôdôk pék mu mam a mbôn bés ni bilem gwé, wee di yé tégbaha ngéda ni nye. Ngéda di ntégbaha ni Yéhôva i yé nseñ ngandak!​—Tjémbi 139:17.

2. Mambe mandutu di yé di mboma?

² Di ngwés di ntégbaha ngéda ni Yéhôva. Ndi di yé di mboma ngim mandutu. Kiki di pégi ngandak, i yé i bane bés ndutu i tjek ngéda yés inyu boñ mam ma nla hôla bés i kôôge Yéhôva bebee. Bôlô yés, lihaa jés ni mana mam mape ma niñ yés ma nla boñ le di bana ha bé ngéda i soohe, i nigil Bibel, ni i ôt pék mu.

3. Limbe jam lipe li yé le li je bés ngéda?

³ Jam lipe li yé, li li yé le li je bés ngéda. Ibale di nyoñ bé yihe, di yé le di nwas le ngim mam i i ta bé béba i je bés ngéda di bak le di gwélél inyu kôôge Yéhôva bebee. Kiki hihéga, di nyi le mintuk mi yé nseñ. Ndi ibale di nlôôha lôôs ngéda i mintuk, to mi yé minlam, mi nla je  bés ngéda di bak le di gwélél inyu bégés Yéhôva. Di nlama yi le mintuk mi ta bé nseñ iloo maada més ni Yéhôva.​—Bingéngén 25:27; 1 Timôtéô 4:8.

4. Kii di ntehe hanano?

⁴ Munu yigil ini, di ga tehe inyuki di nlama yi i mam ma nlôôha ba nseñ i niñ yés. Di ga tehe ki kii i yé le i hôla bés i tégbaha ngéda ni Yéhôva, ni bisai di ga kôs ibale di mboñ hala.

5. Lelaa maéba ma yé i kaat Éfésô 5:15-17 ma nla hôla mañge wanda i yoñ makidik ma ma ga lémés niñ yé?

⁵ Yoñ makidik ma ma ga lémés niñ yoñ. Boñge ba wanda ba mbéna badba kii ba nla boñ mu niñ yap. Balét bap ni bôt bap ba lihaa ba nla ti bo maéba le ba kee bisuklu bikeñi inyu boñ le ba kôhna loñge bôlô ni ngandak moni. Ndi bisuklu bi bi nla yoñ bo ngandak ngéda. Ki le lôk kéé i bôda ni i bôlôm i likoda ni bagwal ba yé ba nti boñge ba wanda maéba le ba ti ngéda yap yosôna i nson u Yéhôva. Kii i nla hôla mañge wanda nu a ngwés Yéhôva i yoñ makidik malam? Ibale a ñañ kaat Éfésô 5:15-17, a ôt ki pék mu, a ga yoñ makidik malam. (Añ.) I ngéda mañge wanda a mal añ minlôñ mini, a nla badba le: ‘Kii i yé “sômbôl i Yéhôva”? Mambe makidik me nla yoñ inyu lémél nye? Kii me nla boñ inyu tibil gwélél ngéda yem?’ Di hôya bañ le “dilo di yé dibe,” ni le ndék ngéda wee lisuk li nkoñ ’isi u Satan li nkola. I yé loñge le di gwélél ngéda yés inyu boñ mam ma ma ga kônha Yéhôva maséé.

6. Mambe makidik Maria a bi yoñ, inyuki ma bé makidik malam?

⁶ Téé mam ma nlôôha ba nseñ. Ngim mangéda, inyu tibil gwélél ngéda yés, di nlama pohol jam jada di ga boñ ikété mam ima ma yé malam. I yom i bi tagbe i ngéda Yésu a bi ke i yuuga Maria bo Marta yon i nhôla bés i tibil nok i jam li. Marta a bé muda likap jon a bé maséé i leege Yésu, inyu hala nyen a bi yoñ ngéda i lamb bijek. Ndi manyañ Maria a bi leege Yésu, a yén nye bebee, a kahal emble nye. Ibabé pééna, Marta a bééna mahoñol malam, ndi Maria nyen ‘a bi pohol ngaba i nlôôha ilam.’ (Lukas 10:38-42, buk i si lipep.) I mbus ngéda, bebek le Maria a bi hôya bijek bi bi lémba yokel, ndi a bé bé le a hôya mam Yésu a bi niiga nye. Ndik kiki Maria a bé maséé i emble Yésu, yak bés di yé maséé i kwel ni Yéhôva. Kii i yé le i hôla bés i tégbaha ngéda ni Yéhôva?

7. Inyuki di nlama yoñ ngéda i soohe, i nigil Bibel, ni i ôt pék mu?

⁷ Yi le i ngeñ u nsoohe, u niglak Bibel, u ôdôk pék mu, wee u yé bégés Yéhôva. I ngeñ di nsoohe, di nkwel ni Tata wés nu a yé ngii le Yéhôva, nu a ngwés bés ngandak. (Tjémbi 5:8) Yigil Bibel i nhôla bés i bana “yi i Nyambe” nu a yé Lingen li pék. (Bingéngén 2:1-5) I ngéda di ñôt pék mu mam di nigil, di ntehe bilem bi Yéhôva bi mbuma ñañ, di mbigda ki mam malam a mbôn bés. Jam jo ki jo li tane bé bés nseñ iloo i mam mana. Ndi lelaa di yé le di tibil gwélél i ndék ngéda di gwé?

8. I ngéda di ntehe lelaa Yésu a bi tégbaha ngéda yé i ñoñ, kii hala a niiga bés?

 ⁸ Noode yéñ homa a yé nwee. Di pôdôl le ndémbél i Yésu. Ilole a mbôdôl nson wé hana ’isi, a bi tégbaha 40 dilo i ñoñ. (Lukas 4:1, 2) Kiki mbok yosôna i bé nwee nyoo ñoñ, Yésu a bé le a soohe Yéhôva, a ôt ki pék mu nson a bi bééga nye. Ibabé pééna, hala a bi hôla Yésu i kôôba inyu manoodana ma bé nye bisu. Lelaa di yé le di nigle Yésu? Ibale u yé ikété lihaa li li gwé ngandak bôt, bebek le hala a ta bé jam li ntomb le u léba homa a yé nwee mu ndap. Ibale hala, u yé le u ke homa numpe het mbok yosôna i yé nwee. Hala nyen Julie a yé a boñ ngéda a nsômbôl soohe Yéhôva. Bo nlôm ba nyééne i hibagaa hi ndap i loñ Pulasi, jon i yé nye ndutu ngandak le a ba nyetama ibabé le mut a tééñga nye. A nkal le: “Hiki kel, me yé me ke i park, ngéda me yé nyoo, me yé metama, to mut a ntééñga bé me, me nsoohe Yéhôva loñge loñge.”

9. Tolakii Yésu a bé a pégi ngandak, lelaa a bi éba le maada mé ni Yéhôva ma bé nseñ?

⁹ Yésu a bé a pégi ngandak. I ngéda a bé sal nson wé hana ’isi, mamut ma bé noñ nye ngandak bahoma, hala a bé yoñ nye ngandak ngéda. Lisañ jada, ‘tison yosôna i bi kodba i bisu bi likôga’ inyu tehe nye. Ndi to hala, Yésu a bi yoñ ngéda i lédés maada mé ni Yéhôva. Kegla tutu, a bi ke “i ñoñ” inyu tégbaha ngéda ni Yéhôva.​—Markô 1:32-35.

10-11. Inoñnaga ni kaat Matéô 26:40, 41, kii Yésu a bi kal banigil bé le ba boñ i wom Gétsémané, kii ba bi boñ?

¹⁰ U wé u nsôk hana ’isi, i ngéda nson wé u bé bebee ni mamélél, Yésu a bi témb a yéñ homa a yé nwee inyu ôt pék ni soohe. A bi ke i wom Gétsémané. (Matéô 26:36) Yokel, Yésu a bi ti banigil bé maéba inyu jam li masoohe.

¹¹ Di béñge i jam li bi bôña. I ngéda ba bi bol i wom Gétsémané, u u bé u ma sude ngandak, bebek kosi juu i bé yak i ma tagbe. Yésu a bi kal baôma bé le ba ‘yén péé,’ nye a ke i soohe. (Matéô 26:37-39) Yésu a bé a soohege, bo ba kenek ’ilo. Ngeñ Yésu a bi koba bo ba nke ’ilo, a bi témb a kal bo le: “Yéna péé ibabé waa, ni waa bañ to soohe.” (Añ Matéô 26:40, 41.) A bi léba le ba bééna nduña ikeñi, ba bé ki nwaak. Yésu a bi kônôl bo ngoo, a kal le: “Minsôn mi mbomb.” To hala, Yésu a bi témb a ke masoohe ngélé iba, i ngéda a bi témb, a  bi lo a koba le banigil bé ba yé ’ilo iloole ba soohe.​—Matéô 26:42-45.

12. Kii di nla boñ ibale di mpam bé i soohe inyule nduña i nai, yak waa i nai?

¹² Tep loñge ngéda. Ngim mangéda i yé le i pam le di laa bé soohe inyule nduña i nai, yak waa i nai. Ibale hala a ma pémél we, u ta bé wetama. Kii i nla hôla we? Lôk kéé ihogi i bé béna soohe ni juu, ndi ba bi léba le i yé loñge le ba soohe kôkôa ngéda ba ta bé nwaak ngandak. Bape ba bi léba le ba nsoohe loñge ngéda ba ñôm maboñ isi, tole ngéda ba yii. Ndi ibale u mpam bé i soohe inyule nduña i nai, yak ndutu i nai, kii i nla hôla we? Kal Yéhôva i jam li ntééñga we. Ibabé pééna, Tata wés nu konangoo a ga timbhe we.​—Tjémbi 139:4.

13. Lelaa bikei gwés bi nla sôña bés i kôôge bebee ni Yéhôva?

¹³ U nwas bañ le yom yo ki yo i yoña we i ngéda u nigil. Ndik masoohe motama bé mon ma nla hôla bés i lédés maada més ni Yéhôva. Yak i ngéda di nigil Bibel, di kenek makoda, di nkônde kôôge bebee ni Yéhôva. Kii i yé le i hôla we i tibil gwélél ngéda yoñ ngeñ u nigil tole ngeñ u yé makoda? Badba le: ‘Kii i mbéna yoña me i ngéda me yé makoda tole i ngéda me nsômbôl nigil?’ Baa bôt ba yé ba nsébél me, ba tilnaga me mu téléfôn yem tole i kei ipe? I len ini, ngandak bôt i gwé bikei bi. Bayimam bahogi ba nkal le, ngéda di nigil téléfôn i bak bés ha ipañ, hala a yé le a tééñga bés. Wada wap a nkal le: “I ngeñ téléfôn i yé we ipañ, ñem u ta bé we mu yom u yé boñ, mahoñol ma yé we mbok ipe.” Ilole di mbôdôl makoda més ma makiiña ni ma ndôn, ba yé ba kal bés le di boñ le bikei gwés bi tééñga bañ bôt bape. Baa yak bés di yé le di boñ hala i ngéda di yé bés botama inyu boñ le bikei gwés bi tééñga bañ bés i ngéda di nsômbôl kôôge bebee ni Yéhôva?

14. Inoñnaga ni kaat Filipi 4:6, 7, lelaa Yéhôva a nla hôla bés le di hoñol bañ mam mape ngéda di ntégbaha ngéda ni nye?

¹⁴ Soohe Yéhôva le mahoñol moñ ma ke bañ mbok ipe. I ngéda u nléba le u  nhoñol mam mape ngéda u yé nigil tole ngéda u yé makoda, bat Yéhôva mahôla. Ibale ngim jam i ntééñga we, hala a ga ba bé jam li ntomb le mahoñol moñ momasôna ma ba mu yom u yé nigil, ndi joo sañ. Soohe Yéhôva le a ti we nsañ u w’a tééda ñem woñ ni “mahoñol” moñ.​—Añ Filipi 4:6, 7.

15. Kii di nkôhna i ngéda di ntégbaha ngéda ni Yéhôva?

¹⁵ Ibale di nyoñ ngéda i pôdôs Yéhôva, i emble nye ni i hoñol mam a mboñ, di ga kôs ngandak bisai. Bimbe? Pog, di ga yoñ makidik malam. Bibel i nkal le: “Nu a nhiôm lôñni bôt ba pék nyen a’ bana pék.” (Bingéngén 13:20) Jon, ibale di ntégbaha ngéda ni Yéhôva nu a yé Lingen li pék, d’a kônde bana pék. D’a pam i tehe lelaa di yé le di lémél nye ni lelaa di yé le di keñgle mam a ñoo.

16. Inyuki di nkônde yi niiga ibale di ntégbaha ngéda ni Yéhôva?

¹⁶ Iba, di ga kônde yi niiga. I ngéda di niiga mut Bibel, ngôñ yés i yé le di hôla nye i kôôge Yéhôva bebee. I ngéda di nkwel ni Yéhôva, di nkônde gwés nye, di nkônde ki bana makeñge inyu niiga bôt i gwés nye. Hala nyen Yésu a bé boñ. Kiki a bé pôdôl Yéhôva ni ñem wé wonsôna, hala a bi tinde banigil bé i gwés Yéhôva ngandak.​—Yôhanes 17:25, 26.

17. Lelaa masoohe ni yigil bi nlédés hémle yés?

¹⁷ Aa, hémle yoñ y’a kônde let. Kii di mbéna nôgda i ngéda di mbat Yéhôva le a éga bés, a hôgbaha bés, tole a hôla bés? Hiki ngéda Yéhôva a ntimbhe masoohe més, hémle yés i nkônde let. (1 Yôhanes 5:15) Kii ipe i nla lédés hémle yés? Yigil yés bésbomede. Di hôya bañ le “hémle i nlôl i mam mut a nok.” (Rôma 10:17) Ndi, inyu lédés hémle yés, yi yotama i kôli bé. Kii ipe di nlama boñ?

18. Ti hihéga hi hi ñéba inyuki i yé loñge i ôt pék mu mam di nigil.

¹⁸ Di nlama ôt pék mu mam di nigil. Di pôdôl le i nwet a bi tila kaat Tjémbi 77. A bé tôñ inyule a bi hoñol le Yéhôva a nkôm nye mbus, nye ni ini Lôk Israel ipe. A bé ke bé ’ilo juu inyule a bé hoñol i jam li. (Minlôñ 3-9) Kii a bi boñ? A bi kal Yéhôva le: “M’a hoñol ki nson woñ wonsôna, me toñol bibôñôl gwoñ.” (Nlôñ 13) A bé yi loñge loñge i mam Yéhôva a bi bôñôl bôt bé ngéda kôba, ndi to hala a  bi badba le: “Baa Nyambe a bi hôya i unda karis? Baa a mal nwas konangoo yé ikété hiun?” (Nlôñ 10) Ntôp tjémbi nunu a bi ôt pék mu minson mi Yéhôva ni konangoo Yéhôva a bi éba i ngéda kôba. (Nlôñ 12) Mam ma bi sôk lelaa? Ntôp tjémbi a bi sôk nok le Yéhôva a nla bé kôm bôt bé mbus. (Nlôñ 16) Yak bés, hémle yés y’a kônde let ibale di ñôt pék mu mam Yéhôva a ma boñ inyu bagwélél bé, ni mam a ma bôñôl bés.

19. Kii ipe di nkôs ibale di ntégbaha ngéda ni Yéhôva?

¹⁹ Jam li nyônôs ina, li li yé nseñ iloo mana mam momasôna, li yé le d’a kônde gwés Yéhôva. Gwéha i nlel bilem bilam gwobisôna, yon i nhôla bés i nôgôl Yéhôva, i boñ bisesema inyu lémél nye, ni i nihbe manoodana. (Matéô 22:37-39; 1 Korintô 13:4, 7; 1 Yôhanes 5:3) Jam jo ki jo li ta bé nseñ kiki maada més ni Yéhôva!​—Tjémbi 63:2-9.

20. Lelaa u nla ôt nseñ mu ngéda u ntégbaha ni Yéhôva?

²⁰ Di hôya bañ le i ngéda di nsoohe, di niglak Bibel, di ôdôk pék mu, wee di yé bégés Yéhôva. Kiki Yésu, di yéñ homa a yé nwee inyu tégbaha ngéda ni Yéhôva. Di nwas bañ le jam jo ki jo li yoña bés. Di soohe Yéhôva le mahoñol més ma ba bañ mbok ipe i ngéda di yé i bégés nye. Ibale di ntibil gwélél ngéda yés nano, Yéhôva a’ ti bés niñ boga i mbok yondo.​—Markô 4:24.