I ngéda Yéhôva a bi ti bôt ba binam oda le: “Ni yônôs hisi, ni ane ki hio,” a bi unda le hisi hiosôna hi nlama yila paradis. (Bibôdle 1:28). I bôt ba ga niñ i boga ni boga, ba nlama nôgôl nlélém mbén. Hisi hi ga ba bé paradis i bibôdle inyule wom Éden u ta ha bé. I mbus Armagédôn, di ga bana ngandak bôlô inyu pubus bahoma ba ba bi tjiba. Hala a ga ba ngandak bôlô kiyaga!

Hala a nhôñlaha bés bôlô bon ba Israel ba bi lama sal i ngéda ba bi nyodi i Babilôn. Mut nye ki nye a bi niñ bé mu loñ yap 70 ma nwii. Ndi Yésaya a bi kal le, ni mahôla ma Yéhôva, ba ga témb ba lémés loñ. Mbañ i bé kal le: “A ga boñ le ñoñ wé u yila kiki Éden, a ga boñ ki le nkoñ wé u u yé nnumuk u yila kiki wom u Yéhôva.” (Yésaya 51:3) Yéhôva a bi hôla bon ba Israel le ba yilha loñ yap loñge homa. Nlélém, i bôt ba ga kôdôl hisi, ba ga yilha  hio loñge paradis. Ngim mam i yé le u nla boñ nano inyu unda le u ngwés sal i bôlô i.

Jam jada u nla boñ li yé le, u boñ biliya le ndap yoñ i ba mapubi, i bana ki oda. U nla boñ hala to ibale i bôt ba yé we ipañ ba ta bé mapubi. U nla ki hôla i pubus ni i lémés ndap Ane ni ndap makoda makeñi. Ibale u gwé pôla, u nla yoñ ngaba inyu sôñ bôt i ngéda bikuu bi nkwo. Hala a ga unda le u ngwés hôla bilôk bisoñ bi bôda ni bi bôlôm ibale ngôñ i yé. Badba le: ‘Baa me nla nigil ngim makeñge ma bôlô me ga gwélél ibale Yéhôva a mboñ le me niñ i boga ni boga hana ’isi?’

I ngéda ngond Yairus i bi tuge, Yésu a bi kal le ba ti nye bijek. (Markô 5:42, 43) Bebek le i yoñ ngéda ni mañge 12 nwii i bi ba bé jam li nlet. Ndi, hoñol i bôlô yosôna i ga ba i ngéda Yésu a ga yônôs mbônga wé le “bôt bobasôna ba yé ikété soñ b’a nok kiñ yé, ba pam.” (Yôhanes 5:28, 29) Tolakii Bibel i ntoñle bé bés mam momasôna, ndi di nla hégda le i bôt ba ga tuge, ba ga bana ngôñ ni bijek, liyééne, ni mambot. U nla unda ibôdôl nano le u yé bebee i ti mahôla. I nya mambadga ini yon u nla badba.

Baa i ngéda ba nlegel le ngwélél makiiña a nlo i yuuga likoda linan, u yé u ti jôl joñ inyu naña nye i je i mbai yoñ? I ngéda ba nhéya bagwélél ba tôbôtôbô ba ba salak i Bétel, ba ep bo i likoda linan, tole i ngéda ngwélél makiiña a ntéé nson wé u makiiña, baa u nla hôla nye i kôhna ndap? Ibale likoda li ndôn tole likoda li tôbôtôbô li yé i nkoñ nan, baa u nla hôla i leege bôt ba ga lo mu likoda?

Inoñnaga ni Minson mi baôma 24:15, di mbem didun di bôt i bitugne. Ngandak ikété yap i bi yi bé Yéhôva ilole i bé wo. Ba ga kôhna i minsima mi i mbus bitugne. a Bagwélél ba Yéhôva ba ba nyi niiga, ba téñbege ki ni nye, ba ga ti mahôla inyu niiga i bôt ba ga tuge. (Yésaya 11:9) Charlotte nu a bi téé likalô i Érôpa, i Amérika Nwelmbok, ni i Afrika, a mbem i jam li ni makénd. Ni maséé a nkal le: “Me nyamnda ni ngôñ i niiga i bôt ba ga tuge. I ngéda me ñañ ñañ u mut nu a bi niñ i ngéda kôba, me yé me hoñol le: ‘Ibale i mut nu a bé yi Yéhôva, bebek le ki niñ yé i bi héñha.’ Me nyamnda ni ngôñ i añle i bôt ba ga tuge njee a yé Yéhôva, me añle ki bo lelaa niñ yap i ga ba loñge, ibale ba ngwélél Yéhôva.”

Yak bagwélél ba Yéhôva ba ba bi niñ ilole Yésu a nlo hana ’isi, ba ga bana ngandak mam i nigil. Hégda maséé ni minsima di ga bana i toñle Daniel lelaa mbañ a bi tila i bi yon, ndi ha i ngéda yé, a bé nok bé yo. (Daniel 12:8) Tole lelaa di ga hôla Ruth bo Naômi i nok le Mésia a bi lôl mu mbôda yap. Kinje maséé di ga bana i niiga bôt ni nkoñ ’isi wonsôna, ibabé le yom yo ki yo i tééñga bés, tole mam ma béba nkoñ ’isi ini ma yoña bés kiki i len ini!

Kii u nla boñ nano inyu ba nkôôbaga i niiga i bôt ba ga tuge? Njel yada i yé le u boñ biliya le u nigil niiga loñge, u kenek i likalô hiki ngéda. (Matéô 24:14) To ibale biuni, ni mam mape, bi nkéñ we i sal kiki u bé sal, u nla unda le u ngwés niiga i bôt ba ga tuge i ngéda u mboñ kiki la yon i nson likalô i len ini.

Hala a yé nseñ le u badba i mambadga mana: Baa me nyamnda ni ngôñ i kôdôl ’isi? Baa me nyamnda ni ngôñ i yilha hisi paradis, i leege ni i niiga i bôt ba ga tuge? U ñunda le u yé nkôôbaga i niñ i boga ni boga i ngéda u ngwel minson mi mi mpôna minson u ga gwel i ngéda u ga kôdôl ’isi!