BOÑA mut binam i nyét ndik 1,4 kilô (bebee le kilô yada ni pes), ndi ba bi pôdôl yo kiki “jam li nlôôha let i toñol ikété mam momasôna ba nléba i ngiiñda yosôna.” I yé toi yom i tôbôtôbô. Kiki di nke ni bisu i nigil boña, hala a ntinde bés i kônde diihe bihélha bi minson mi Yéhôva. (Tjémbi 139:14) Ikété mam momasô boña wés a gwé ngap i boñ, di béñge jada​—ngap i hégda mam.

Kii i yé ngap i hégda mam? Kaat ndoñi bibuk yada i nkobol yo lana le: “I yé ngap i boña woñ a gwé i bañ ngim bititii tole ngim mahoñol mu boña woñ ma ma yé we nkén, ma bak hélha, tole mam u mah ngi boma i niñ yoñ.” Ni i ndoñi ini, baa u neebe bé le u ngwélél ngap yoñ i hégda mam hiki ngéda? Kiki héga, baa u mah bé añ tole emble ngim ñañ u ntoñol ngim homa le u mah ngi yuuga? Baa inyule u yé ngi ke i nya homa, hala a ga sôña we i ôt ngim titii ikété mahoñol moñ? Ntiik, hiki ngéda le di nhoñol mam di yé ngi tehe, emble, noode, tihba, tole numbe, ngap yés i hégda mam yon i yé i sal.

Bibel i nhôla bés i nok le bôt ba binam ba bi héga i pôna i Djob. (Bibôdle 1:26, 27) Baa hala a nkobla bé le, yak Yéhôva nyemede a gwé ngap i? Kiki a bi gwés heg bés ni ngap i, a kôli bem le di gwélél yo inyu tibil nok sômbôl yé. (Ñañal 3:11) Lelaa di nla gwélél ngap yés i hégda mam ni pék? Imbe béba ligwélak li ngap i hégda mam di nlama tjél?

(1) Emel bitétéé i ngéda i kôli bé tole i hégda mam mabe.

Emel yomede i ta bé béba. Ni maliga, bés bobasô di ntehe le emel i nla bane bés nseñ. Ndi, kaat Ñañal 3:1 i nhôla bés ni mana mahoñol le, “hiki jam li gwé ntéak wé kék.” I nla pam le di boñ ngim mam i ngéda di ntéé inyu boñ mam mape. Kiki héga, ibale di mbôdôl nhoñol mam mape i ngéda di yé i likoda, tole ngéda di yé nigil Bibel bésbotama, baa ha ngéda i, ngap yés i hégda mam i ga bane bés nhôla tole ngok baagene? Yésu nyemede a bi ti mabéhna ma pék inyu béba i nla pémél bés ibale di neebe le boña wés a kahal sal i hégda mam mabe, kiki bo emel mu mahoñol més le di yé ke ndéñg. (Matéô 5:28) Ngim mam mahogi ma di nla neebe le mahoñol més ma hégda, ma nla ba mam ma nlôôha bébél Yéhôva. Ibale u mbéna hégda wemede u yé ke i ndéñg, hala a nla kena we i kwo toi i ndéñg. Yoñ makidik ma ngui le u neebege bañ kekikel le ngap yoñ i hégda mam i boñ le u kôm Yéhôva mbus!

(2) Hégda ikété mahoñol moñ le nkus u yéne we kiki lipénd likeñi.

Nkus u gwé ngim nseñ. Ndi hala a ga wéha bés nyuu ibale di mbôdôl hégda le nkus won u yé toi ben yés ni maséé més. Salômô, nu a bé mut pék, a tila le: “Lihat li ngwañ mut jon  li yé nkoñ wé ngui, ni kikii lipént likeñi ikété mahoñol ma ño wé.” (Bingéngén 18:11) Di yoñ héga hi jam li bi bôña i Manila, tison yada i Filipin. Nop nunkeñi a bi kwo nyoo i sôñ Dipos 2009, kayéle malép ma bi bet, ma hô bebee le tison yosô. Baa i bet ba bé ba gwé ngandak nkus, ba bi pei? Ngwañ mut wada, nu a bi nimis ngandak nkus, a kal le: “Ntida u, u bi boñ le mingwañ mi bôt ni diyeyeba bi ba i likala jada.” I nla ba jam li ntomb i hégda le nkus wés u yé kiki ben yés, ni lipént jés likeñi ngéda bikuu bi ga kwél bés. Ndi, maliga ma yé le, hala a yé ndik eem.

(3) Nduña i nlôôha inyu mam le bebeg di ga boma bé kekikel.

Yésu a bi ti bés maéba le di lôôha bañ bana “nduña.” (Matéô 6:34) I lôôha tôñ hiki ngéda i mbat le ngap yés i hégda mam i salak ngandak. Di nla nimis ngui ngandak ibale di nlôôha tôñ inyu mandutu ma di nhégda nhégdaga le ma ga pémél bés, ki le ma yé ngi nene, tole bebeg ma ga pémél bé bés kekikel. Bitilna bi ñunda le u ntén nduña u nla tômbôs bés, u ti ki bés kon u mahoñol. (Bingéngén 12:25) Kinje loñge jam i bii maéba ma Yésu i bisélél, ma ma ñunda bés le di bana bañ nduña i nlôôha, ndi di nlama yoñ mandutu ma hiki kel kiki ma nlo.

(1) Bôk tehe mam mabe ma nlo, mbus keñgle mo.

Bitilna bi ntinde bés i ba bôt ba pék, ni ba ba ntehe mam haa. (Bingéngén 22:3) Ibale di ngwélél ngap yés i hégda mam, di nla tehe mam ma ga pémél bés iloo di nyoñ makidik. Kiki héga, ibale ba naña we ngim ngand, lelaa ngap yoñ i hégda mam i yé le i hôla we i yoñ makidik ma pék, hala wee i tehe too u nlama ke mu, tole heni? Bôdôl ndugi wan mam kiki bo: Njee ba naña mu ngand i? Bôt bañen ba ga ba mu ngand i? Hee homa ni ngéda mbe ngand i y’a ba? I mbus, badba le: ‘Kii i yé le i tagbe nyoo?’ Mu titii u yé hégda mu mahoñol moñ, baa u yé tehe ngand ilam i i nkiha ni matiñ ma Bibel? I boñ hala, i nla hôla we i tehe ikété mahoñol moñ lelaa ngand i i ga ba. Mu kiki u mba u ngwélél ngap yoñ i hégda mam inyu yoñ makidik ma pék, hala a ga hôla we i keñgle mam ma nla ôbôs maada moñ ni Djob.

(2) Hégda ikété mahoñol lelaa u nla yémbél mandutu.

Ngap i hégda mam i gwé yak maada ni “ngap i kolba ni i yémbél mandutu.” Di yoñ héga le we ni mankéé wada i likoda ni gwé ndañ. Baa lelaa u ga kôôge nye bebee inyu kôp nsañ? U nlama wan ngandak mam. Laa a mbéna pôdôs bôt? Imbe ngéda i yé lam ngandak  inyu kwélés nye mu jam li? Bimbe bibuk ni imbe kiñ hop bi ga ba loñge i gwélél? Mu kiki u mba u ngwélél ngap yoñ i hégda mam, u nla tehe ngandak manjel u nla gwélél inyu mélés ndañ. Mbus, u pohol njel yada u nôgda le i nlôôha ba ilam ni i i ga boñ le a leege we loñge. (Bingéngén 15:28) I boñ hala inyu sañgal ndañ, li ga hôla bés i tééda nsañ ikété likoda. Hala a yé toi ligwéélak lilam li ngap yés i hégda mam.

(3) Lémés lisoñgol joñ ni yigil yoñ i Bibel.

Lisoñgol li Bibel hiki kel li yé nseñ. Ndi, u nlama ndik bé soñgol ngandak mapep hiki kel. Di gwé ki ngôñ i tibil wan biniigana bi Bibel di nla gwélél i niñ yés. I maliga, i diihe di ndiihe manjel ma Yéhôva i ga kônde keñep ni njel lisoñgol jés li Bibel. Mu kiki u mba u ngwélél ngap yoñ i hégda mam, hala a ga hôla we i kônde diihe manjel ma Yéhôva. Lelaa? Di yoñ héga ni ini kaat ni hop pulasi le Imitez leur foi. Lisoñgol li miñañ mu ikété kaat i li nlôñôs ngap yés i hégda mam kayéle di ñôt titii ikété boña wés i mam ma bé tagbe ha ngéda i, ni i bahoma i bôt ba ba bi néñél. I nhôla ki bés i tehe mambok ma ngéda i, i nok makiñ ma bôt, njiñ ilam, ni i nôgda kiki i bôt ba, ba bé nôgda. Sôk i nsôk, di ga la yimbe biloñge bi biniigana, ni mahoñol malam ma nlôl mu miñañ mi di bé hoñlak le di nyi loñge. Mu kiki di mba di ngwélél ngap yés i hégda mam hala, lisoñgol ni yigil yés i Bibel, bi ga kônde lama.

(4) Noode hégda i yom bôt bape ba nôgda, unda ki hala.

Nôgda i yom bôt bape ba nôgda, i yé lem lam i ba yé ba nkobol le, nôgda ikété ñem wés njôghe i mut numpe a gwé. Kiki Yéhôva bo Yésu ba ñunda le ba ngwé i lem i, di nlama kôna bo. (Manyodi 3:7; Tjémbi 72:13) Lelaa di nla bana lem i? Ngim njel i nlôôha ba ilam di nla gwélél inyu noode hégda i yom bôt bape ba nôgda, i yé le di gwélél ngap yés i hégda mam. I nla ba le di mah kôs bé ndutu mankéé wés nu muda tole nu munlôm a yé kôs. Ndi, u nla badba le: ‘Ibale i jam li li mpémél me, ki me nôgda lelaa? Kii me bak le me bana ngôñ ha ngéda i?’ Mu kiki di mba di ngwélél ngap yés i hégda mam inyu timbhe mambadga ma, hala a ga hôla bés i kônde nôgda i yom bôt bape ba nôgda. Ntiik, ibale di nôgda i yom bôt bape ba nôgda, hala a ga ba bés nseñ ngandak i ngéda di yé i likalô, ikété maada més ni bikristen bipe, ni ikété mam mape ma mbéñge niñ yés i bikristen.

(5) Hégda lelaa niñ i ga ba i mbok yondo.

Bitilna bi yôni ni mam ma ntoñol lelaa niñ i ga ba ikété mbok yondo Djob a mbôn bés. (Yésaya 35:5-7; 65:21-25; Masoola 21:3, 4) Bikaat gwés bi yé nyonok ni bititii bilam bi mbok yondo i. Inyuki? Bititii bi nlôñôs ngap yés i hégda mam, bi nhôla ki bés i hégda bésbomede le di yé niñ ikété bisai bi Yéhôva a mbôn bés. Yéhôva nu a yé Nheg i ngap yés i hégda mam, a nyi iloo bôt bobasôna le i ngap i, i nlôôha ba bés nseñ. I gwélél yo inyu hégda mimbônga nwé, i nla nyônôs bés ni botñem le mi ga yon. I ga hôla ki bés i ke ni bisu i téñbe ni Djob, yak ngéda di ntégbaha mangéda mabe i niñ yés.

Yéhôva ikété gwéha yé yosôna, a bi ti bés loñge ngap kiyaga i hégda mam. I nla toi hôla bés i gwélél nye loñge i niñ yés i hiki kel. I ngap i, i yé likébla li nlôôha lilam. Di ñunda le di ndiihe i Nwet a nti bés jo i ngéda di ngwélél jo hiki kel ni pék.