1. Limbe jam di nla boma, ndi di yé nkwoog nkaa ni kii?

 DI NYI le di nla boma ngolba i ngéda di ñañal ñañ nlam. I ngolba i, i nla kônde ki nai i dilo di nlo. (Daniel 11:44; 2 Timôtéô 3:12; Masoola 16:21) Ndi di yé nkwoog nkaa le Yéhôva a ga hôla bés. Inyuki? Inyule Yéhôva a nhôla bagwélél bé ngéda yosôna i boñ mam a mbat bo le ba boñ to ba mboma imbe ndutu. Di yoñ hihéga, ngim mam i bi pémél mpôdôl Ézékiel nu a bé añle Lôk Yuda i i bé i minkôm i Babilôn Bañga i Nyambe.

2. (a) Mimbe mintén mi bôt Ézékiel a bé añle Bañga i Nyambe? (b) Kii di ga tehe munu yigil ini? (Ézékiel 2:3-6)

² Mimbe mintén mi bôt Ézékiel a bé añle Bañga i Nyambe? Yéhôva a bi kal le ba bé bôt ba “ndok” ni ba “minledek mi miñem.” Ba bé ba ñôma kiki biloo, ba koogaga kiki diéé di nyoo. Inyu hala nyen Yéhôva a bi kal Ézékiel ngandak ngélé le: ‘U kon bañ woñi’! (Añ Ézékiel 2:3-6.) Ézékiel a bi pam i gwel nson wé likalô loñge inyule: (1) Yéhôva nyen a bi ep nye, (2) mbuu u Nyambe u bi ti nye ngui, (3) Bañga i Nyambe i bi lédés hémle yé. Lelaa i mam ma mo maa ma bi hôla Ézékiel? Lelaa ki ma nla hôla bés i len ini?

3. (a) Bimbe bibañga bi bi lama lédés Ézékiel? (b) Lelaa Yéhôva a bi kwés nye nkaa le a nhôla nye?

³ Yéhôva a bi kal Ézékiel le: “Me yé i ep we.” (Ézékiel 2:3, 4) I bibañga bi, bi bi lédés Ézékiel. Inyuki? Inyule Ézékiel a bi lama bigda le Yéhôva a bi kal Môsi bo Yésaya nlélém jam i ngéda a bi pohol bo le ba ba bapôdôl bé. (Manyodi 3:10; Yésaya 6:8) Ézékiel a bé yi lelaa Yéhôva a bi hôla i bapôdôl ba bo iba i yônôs  nson wap. Jon i ngéda Yéhôva a bi kal Ézékiel ngélé i nyônôs iba le: “Me yé i ep we,” i mpôdôl nu a bé a kôli bot ñem le Yéhôva a ga hôla nye. Handugi hala, mu kaat yé, Ézékiel a bi tila ngandak ngélé le: “Yéhôva a pôdôs me.” (Ézékiel 3:16) Handugi hala, i bibañga bini le: “Yéhôva a pôdôs ki me,” bi yé mu ngandak ngélé. (Ézékiel 6:1) Ibabé pééna, Ézékiel a bé nkwoog nkaa le Yéhôva nyen a bi ep nye. Jam lipe li yé le isañ Ézékiel a bé prisi, a bi lama niiga Ézékiel le Yéhôva a bé béna kal bapôdôl bé le a ga hôla bo. Kiki hihéga, Yéhôva a bi kal Isak, Yakôb ni Yérémia le: “Me yé lôñni we.”​—Bibôdle 26:24; 28:15; Yérémia 1:8.

4. Bimbe bibañga bi bi lédés Ézékiel?

⁴ Lelaa ngandak bon ba Israel i bé tehe likalô Ézékiel a bé legel? Yéhôva a bi kal le: “Bôt ba litén li Israel ba ga tjél emble we inyule ba ntop bé emble me.” (Ézékiel 3:7) Kiki ba bi tjél emble Ézékiel, Yéhôva nyen bôt ba litén ba bi tjél emble. I bibañga bi, bi bi kwés Ézékiel nkaa le to ibale bôt ba litén ba ntjél emble nye, hala a nsômbôl bé kal le a ngwel bé nson wé u mpôdôl loñge. Yéhôva a bi yis ki Ézékiel le i ngéda i mam a nlegel ma ga yon, bôt ba litén “ba ga yi yaa le mpôdôl a bé ipôla yap.” (Ézékiel 2:5; 33:33) Ibabé pééna, i bibañga bi, bi bi hôgbaha Ézékiel, bi lédés ki nye kayéle a yônôs nson wé.

5. Inoñnaga ni Yésaya 44:8, kii i ga ti bés makénd?

⁵ Yak bés di gwé makénd inyule di nyi le Yéhôva nyen a bi ep bés i legel ñañ  nlam. A nti bés lipém i ngéda a nsébél bés le ‘mbôgi yé.’ (Yésaya 43:10) Kinje nsima nkeñi! Ndik kiki Yéhôva a bi kal Ézékiel le: ‘U kon bañ woñi,’ a nkal yak bés le: “Ni sehla bañ.” Inyuki di nlama bé kon bakolba bés woñi? Inyule kiki Ézékiel, Yéhôva nyen a bi ep bés, a nhôla ki bés.​—Añ Yésaya 44:8.

6. (a) Lelaa Yéhôva a mbôn le a ga hôla bés? (b) Kii i nhôgbaha bés?

⁶ Yéhôva a mbôn le a ga hôla bés. Kiki hihéga, ilole a bé kal le: “Ni yé mbôgi, yem,” a bi bôk ndugi a kal le: “I ngéda u mba u nyap malép, me ga ba ni we, i ngéda u mba u nyap balom, ba ga mil bé we. I ngéda u mba u ntagbene i hié, hi ga ligis bé we, to lindômbôô li hié li ga tihba bé we.” (Yésaya 43:2) I ngéda di ñañal ñañ nlam, di mboma ngandak ngolba i i yé kiki malép le ma nyon homa nyensôna, di mboma ki mandutu ma ma yé kiki hié hi hi nligis homa nyensôna. Ndi to hala, Yéhôva a nhôla bés i kena nson wés u likalô ni bisu. (Yésaya 41:13) Kiki i dilo di Ézékiel, ngandak bôt i ntjél emble ñañ nlam. Ndi di nyi le hala a nsômbôl bé kal le di ñañal bé ñañ nlam loñge. I yi hala i nhôgbaha bés, hala a nlédés ki bés inyule Yéhôva a yé maséé i ngéda di ntéñbe i añal ñañ nlam. Ñôma Paul a bi kal le: “Hiki mut a’ kôhna gwé bibom inoñnaga ni nson wé nyemede.” (1 Korintô 3:8; 4:1, 2) Sita yada nu a ma gwel nson u nsañal ntandaa ngéda, i nkal le: “Hala a nkônha me maséé inyule me nyi le Yéhôva a ga bom me inyu biliya gwem.”

7. Hiki ngéda Ézékiel a bé a hoñol i yiinda a bi tehe, a bé a ba nkwoog nkaa ni kii? (Béñge titii lipep li bisu.)

⁷ Ézékiel a bi tehe lelaa mbuu u Nyambe u gwé ngui. Ikété yiinda, a bi tehe lelaa mbuu u Nyambe u bé hôla mimpémba mi biañgel, u boñok le basoso ba makôô ma kak ba kee. (Ézékiel 1:20, 21) Kii Ézékiel a bi boñ? A bi tila i jam li bi tagbe, a kal le: “I ngéda me bi tehe [i mam ma], me ôôp, me ôm mbom ’isi.” Ézékiel a bé nyômôk ni woñi kayéle a bi kwo ’isi. (Ézékiel 1:28) I mbus, hiki ngéda Ézékiel a bé a hoñol i yiinda i, i bé i kônde kwés nye nkaa le mbuu u Nyambe u nla hôla nye i yônôs nson wé.

8-9. (a) Kii i bi pémél Ézékiel i ngéda Yéhôva a bi ti nye oda le a “telep”? (b) Lelaa Yéhôva a bi kônde lédés Ézékiel kiki a bé téé likalô i het bôt ba gwé minledek mi miñem?

⁸ Yéhôva a bi kal Ézékiel le: “A man mut, telep, le ndi me pôdôs we.” Yéhôva a bi kal Ézékiel le a telep, a ti ki nye mbuu mpubi, hala a bi hôla Ézékiel i kôhna ngui i telep. Ézékiel a bi tila le: “Mbuu u Nyambe u jôp ikété yem, u téé ki me.” (Ézékiel 2:1, 2) I mbus ngéda, “woo” u Nyambe, hala wee mbuu mpubi u Nyambe won u bi éga nye mu nson wé. (Ézékiel 3:22; 8:1; 33:22; 37:1; 40:1) Mbuu u Nyambe u bi lédés Ézékiel mu nson a bi kôhna, hala wee i añal Bañga i Nyambe i bisu bi bôt ba litén jé ba ba bééna “nledek ño ni nledek ñem.” (Ézékiel 3:7) Yéhôva a bi kal Ézékiel le: “Me mboñ le u bana nledek su nlélém kiki bomede, me mboñ ki le mbom yoñ i let nlélém kiki mbom yap. Me mboñ le mbom yoñ i let kiki diamañ, i let yaga iloo ngok. Ba yé litén li  li yé ndok, ndi u kon bañ bo woñi, to masu map ma boñ bañ we le u sehla.” (Ézékiel 3:8, 9) A bé wengoñle Yéhôva a bé kal Ézékiel le: ‘Nledek ñem u bôt ba litén u tômbôs bañ we. Me ga lédés we.’

⁹ I mbus ngéda, mbuu u Nyambe u héya Ézékiel i homa a bé tééne likalô. Ézékiel a bi tila le: “Woo u Yéhôva u bi kahap yaga i ngii yem.” I bi béda mpôdôl sonde yada inyu tibil nok nwin a bé lama legel, le ndi a pam i téé likalô ni makénd. (Ézékiel 3:14, 15) Ha nyen Yéhôva a bi kal nye le a kee i tegep mbok i homa “mbuu u Nyambe u bi jôp [nye] ikété.” (Ézékiel 3:23, 24) Ézékiel a bé nkôôbaga i bôdôl gwel nson wé.

10. Mambe mahôla di gwé ngôñ inyu añal ñañ nlam, inyuki?

¹⁰ Mambe mahôla di gwé ngôñ inyu añal ñañ nlam? Inyu timbhe i mbadga i, di hoñol mahôla Ézékiel a bi kôhna. Ilole a bé bôdôl añle bôt ñañ nlam, mbuu u Nyambe u bi ti nye ngui. Kiki Ézékiel, i len ini, yak bés di nla añal ñañ nlam inyule mbuu u Nyambe won u nhôla bés. Inyuki? Inyule Satan a njôs bés inyu boñ le di waa añal ñañ nlam. (Masoola 12:17) Ngandak bôt i nhoñol le Satan a gwé ngui kayéle di nla bé yémbél nye. Ndi di nyémbél nye ni ñañ nlam u di ñañal! (Masoola 12:9-11) I nya laa? I ngéda di ñañal ñañ nlam, di ñunda le di nkon bé Satan woñi. Hiki ngéda di ñañal ñañ nlam, di nyémbél Satan. Nano ni, i ngéda di nla tibil gwel nson wés u likalô to ibale di mboma ngolba, kii hala a ñunda toi? Hala a ñunda toi le Yéhôva nyen a nti bés ngui i mbuu wé mpubi, hala a ñunda le di nlémél nye.​—Matéô 5:10-12; 1 Pétrô 4:14.

11. Lelaa mbuu mpubi u nla hôla bés, ni lelaa di nla boñ inyu bana wo hiki ngéda?

¹¹ Bimbe biniigana di nla kônde ôt i ngéda di nhoñol lelaa Yéhôva a bi ti  Ézékiel ngui a bééna ngôñ inyu téé likalô? Mbuu u Nyambe u nti bés ngui di gwé ngôñ inyu yémbél mandutu di mboma mu nson wés u likalô. (2 Korintô 4:7-9) Kii di nla boñ inyu ba nkwoog nkaa le di ga bana mbuu u Nyambe hiki ngéda? Di nlama téñbe ni masoohe, di ban-ga botñem le Yéhôva a ñemble masoohe més. Yésu a bi niiga banigil bé le: “Ni bat ibabé waa, . . . ni yéñ ibabé waa, . . . ni koode ibabé waa.” Ni i njel i nyen “i bôt ba mbat [Yéhôva] mbuu mpubi, yak nye a’ ti bo wo.”​—Lukas 11:9, 13; Minson mi baôma 1:14; 2:4.

12. Inoñnaga ni Ézékiel 2:9-3:3, hee nhôôk kaat u bé lôl, kii u bééna?

¹² Mbuu mpubi u bi ti Ézékiel makénd a bééna ngôñ inyu legel Bañga i Nyambe. Ndi ndik wotama bé, yak Bañga i Nyambe i bi kônde lédés hémle i Ézékiel. Ikété yiinda, Ézékiel a bi tehe woo wada u u bé u gwé nhôôk kaat. (Añ Ézékiel 2:9-3:3.) Hee nhôôk kaat u bé lôl? Kii u bééna? Lelaa u bi lédés Ézékiel? Di wan le i jam li. Nhôôk kaat u bé lôl i yééne ane i Nyambe. I nene le añgel yada mukété biañgel bina Ézékiel a bi bôk a tehe yon i bi yoñ nhôôk kaat yak Yéhôva, ndi i ti wo Ézékiel. (Ézékiel 1:8; 10:7, 20) I nhôôk kaat u, u bééna bibañga bi Nyambe, hala wee nwin u bikééhene Ézékiel a bé lama legel bôt ba ndok ba ba bé i minkôm. (Ézékiel 2:7) I nwin u, u bé ntilga i bisu ni i mbus nhôôk kaat.

13. (a) Kii Yéhôva a bi kal mpôdôl wé Ézékiel le a boñ ni nhôôk kaat? (b) Inyuki nhôôk kaat u bé ne?

¹³ Yéhôva a bi kal mpôdôl wé le a je nhôôk kaat ni le a “yônôs libum [jé] ni wo.” Ézékiel a bi nôgôl nye, a je nhôôk kaat wonsôna. I yiinda ini i nkobla le kii? Ézékiel a bé lama tibil nok i nwin wonsôna a bé ke i legel. A bé lama toi hémle i nwin u, inyu boñ le a kôhna makénd i legel wo. Ndi hélha jam i bi bôña. Ézékiel a bi nôgda le nhôôk kaat u ‘bé ne mu nyo kiki wéi.’ (Ézékiel 3:3) Inyuki? Inyule Ézékiel a bé tehe le, i ba ngwélél Nyambe i yé yom lipém, hala wee yom i ne, i bak ilam. (Tjémbi 19:8-11) A bé ti Yéhôva mayéga le a bi pohol nye le a ba mpôdôl wé.

14. Kii i bi hôla Ézékiel le a ba nkôôbaga inyu gwel nson wé?

¹⁴ I mbus ngéda, Yéhôva a kal Ézékiel le: “Emble mam momasôna me nkal we, u tééda ki mo mu ñem woñ.” (Ézékiel 3:10) Ni i biniigana bi, Yéhôva a bé kal Ézékiel le a noode bigda i mam ma bé i nhôôk kaat, a ôt ki mahoñol mu. I ngéda Ézékiel a bi boñ hala, hémle yé i bi kônde let. Hala a boñ ki le a bana nwin u ngui i legel bôt ba litén. (Ézékiel 3:11) I ngéda Ézékiel a bi nok, a hémle ki nwin u Nyambe, hala a bi boñ le a ba nkôôbaga i bôdôl legel Bañga i Nyambe, a kena ki wo ni bisu letee ni i lisuk.​—Hégha ni Tjémbi 19:14.

15. Inyu téñbe ni nson wés, kii di nlama ‘tééda mu ñem’?

¹⁵ Inyu téñbe ni nson wés, yak bés di nlama nwas le Bañga i Nyambe i lédés hémle yés. I mam momasôna Yéhôva a nkal bés, di nlama “tééda mo mu ñem.” I len ini, Yéhôva a mpôdôs bés ni njel Bañga yé le Bibel. Kii di nlama boñ le  ndi Bañga i Nyambe i kônde tihba mahoñol més ni miñem nwés?

16. (a) Kii di nlama boñ ni Bañga i Nyambe? (b) Lelaa di nla boñ le Bañga i Nyambe i tihba miñem nwés?

¹⁶ I ngéda di nje, di nkôhna ngui, nlélém jam i pes mbuu, i ngéda di nigil Bañga i Nyambe, di ôdôk mahoñol mu, hémle yés i nkônde let. Nlélém kiki Yéhôva a bi bat Ézékiel le a je nhôôk kaat, hala yak nyen Yéhôva a ngwés le di yônôs libum jés ni Bañga yé, hala wee di tibil nok Bañga yé. Di nla boñ hala i ngéda di nsoohe, di ñañ, di ôdôk ki mahoñol mu. Pog, di nsoohe inyu kôôba ñem wés i leege mahoñol ma Nyambe. Iba, di ñañ Bibel. Aa, di nsoñda yo, hala wee di ñôt mahoñol mu mam di ñañ. Kii hala a ga lona bés? Kiki di mba di nkônde nok Bañga i Nyambe, hala nyen yak hémle yés i ga kônde let.

17. Inyuki di nlama ôt mahoñol mu mam di ñañ ikété Bibel?

¹⁷ Inyuki i yé nseñ i añ Bibel ni ôt mahoñol mu? Inyule hala a nti bés ngui i añal ñañ nlam u Ane nano, ni i legel bôt nwin u mbagi, u di ga tjam i dilo di nlo. Ni le i ngéda di ñôt mahoñol mu bilem bi Yéhôva, maada més ni nye ma nkônde lama. Ñ, di ga bana yom i i ne, tole i i yé ilam ngandak, hala wee nsañ ni maséé.​—Tjémbi 119:103.

18. Kii bôt ba libôga jés ba ga ba nyégsaga i neebe, inyuki?

¹⁸ Maselna ni Ézékiel nu a bé mpôdôl, bés di ta bé bapôdôl. Ndi di nyoñ makidik le di ga téñbe i legel nwin u Yéhôva, u u yé ikété Bañga yé, letee nson u añal ñañ nlam u mal. I ngéda hilo hi bikééhene hi ga lo, bôt ba libôga jés ba ga la bé kal le ba bi nok bé mabéhna, to le Nyambe a bi yôi bo. (Ézékiel 3:19; 18:23) Ndi ba ga ba nyégsaga i neebe le i nwin di ñañal u nlôl yak Nyambe.

19. Kii i ga ti bés ngui i yônôs nson wés?

¹⁹ Kii i ga ti bés ngui i yônôs nson wés? I mam mo maa ma ma bi lédés Ézékiel. Di nke ni bisu i añal ñañ nlam inyule di nyi le Yéhôva nyen a ñep bés, mbuu mpubi u Nyambe u nti bés ngui, yak Bañga i Nyambe i nlédés hémle yés. Ni mahôla ma Yéhôva, di gwé makénd inyu tibil gwel nson u añal ñañ nlam, ni i téñbe “letee ni lisuk.”​—Matéô 24:13.