I LEN INI, ngandak bôt i nlama sal ni ngui inyu kôhna ndék moni i i nhôla bo i jés lihaa jap. Ngandak bilôk bikéé i ntégbaha ntandaa ngéda i sal inyu yoñ ndun ni mahaa map. Libim lipe li nlôôs ngandak ngéda i ndiyô hiki kel inyu ke ni lo i bôlô. Ngandak i nlama sal ni ngui inyu boñ le ba bana yom i je. Inyu hala nyen i mamélél ma kel, bilôk bikéé gwés bi, bi yé bi ba nwaak kiyaga! Jon i ta bé bo bun i nigil.

2. Lelaa u nléba ngéda inyu nigil?

² Maliga ma yé le di nlama léba ngéda inyu nigil​—i nigil bañga liniglak​—Bañga i Djob ni bikaat bi ntôñ. Di nlama boñ hala inyu tééda maada malam ni Yéhôva, ni inyu bana niñ boga! (1 Timôtéô 4:15) Lôk kéé ihogi i mpule tôde hiki kel inyu nigil ngéda mbok i ngi yii nwee, boña wap a kôblege inyule ba noi loñge juu. Ki le bape ba ntehe nseñ i yoñ ndék manut i mamélél ma kel, i nigil ni i soñda mu mam ba nsoñgol i Bibel tole bikaat bi ntôñ.

3-4. Mambe mahéñha ba bi lona inyu nsoñgi u bikaat u mpam hiki nwii, inyuki?

³ Ibabé pééna yak we u neebe le i yé nseñ i léba ngéda i nigil. Ndi kii di nlama nigil? U nla timbhe le: ‘Bikaat bi nlôôha ba ngandak i añ. Me nla bé soñgol gwobisôna.’ Ndék ikété yés i mboñ biliya i añ bikaat gwobisôna di nkôs ni i béñge bividéô, ki le hala a ta bé bun inyu bape. Juu li bakena ntôñ li nyi ndutu di mboma. Inyu hala nyen ngim bitelbene i ntip yôña inyu hubus nsoñgi u bikaat ni mam ma ma mpam internet.

 ⁴ Kiki hihéga, Kaat nwii i Mbôgi Yéhôva i mpam ha bé, inyule ngandak miñañ mi mpam i site yés jw.org^® ni i JW Nkuu biliñgeliñge^® hiki sôñ. Nkum Ntat nu mbamba ni Tôde ’ilo! ba mpam ndigi ngélé aa hiki nwii. Mahéñha ma, ma bi bôña bé inyu hôla bés i bana ngandak ngéda i lôôs i mam mape. Ndi ma bi bôña inyu ti bés pôla i bok mis “i mam ma nlôôha ba nseñ.” (Filipi 1:10, MN.) Nano di béñge lelaa u nla pohol i mam ma nlôôha ba nseñ, ni lelaa yigil yoñ i Bibel i nla lôôha bane we nseñ.

5-6. Bimbe bikaat bi nla bane bés nseñ i nigil?

⁵ Mambe mam u ga pohol le u mbôk u nigil? Di nlama tégbaha ngéda hiki kel i nigil Bañga i Djob. Ba bi suhus nsoñgi u minlôñ mi Bibel di nlama soñgol inyu likoda li ñem sonde, inyu boñ le di bana ngandak ngéda inyu soñda mam di añ, ni inyu boñ nyiña. Njômbi yés i nlama ndik bé ba le di soñgol minlôñ mi nwominsôna, ndi le di nwas le nwin u Bibel u tihba ñem wés​—kayéle di pam i kôôge bebee ni Yéhôva.​—Tjémbi 19:15.

⁶ Kii ipe di nlama yoñ ngéda nigil? I yé maliga le, di nlama kôôba yigil i Nkum Ntat, yigil i Bibel i likoda ni mam mape di ga tehe likoda li ñem sonde. Di nlama ki soñgol hiki Nkum Ntat ni Tôde ’ilo! nu a mpam.

7. Baa di nlama tomb ibale di nla bé añ gwom gwobisôna bi mpam i site internet yés ni i JW Nkuu biliñgeliñge?

⁷ Ni nla timbhe le: ‘Mbale i! Ndi di boñ ni lelaa ni biniigana gwobisôna bi bi mpam i site yés jw.org, tole bi bi mpam i JW Nkuu biliñgeliñge? Bi nlôôha ba jôga!’ Di yoñ hihéga: Bijek bi nla ba i homa linuñlene li bijek nya ndi nya. I bet ba nlo i je ha, ba nla bé noode bijek gwobisôna bi nlémba. Jon ba mpohol ndigi ndék bijek ba nje. Nlélém ni we, ibale u nla bé añ biniigana gwobisôna bi mpam i internet, hala a tééñga bañ we. Soñgol tole béñge bi u nla. Nano, di tehe kii i yé yigil, ni lelaa di nla ôt nseñ ni yo.

8. Mambe manjel u nla gwélél inyu nigil Nkum Ntat, lelaa hala a nla bane we nseñ?

⁸ Yigil i yé i yoñ ngéda i tibil añ, i bok mahoñol mu i yom u ñañ, ni njômbi i ôt biniigana. Yigil i ta ndik bé i hoo soñgol ni tand mandimbhe. Kiki hihéga, ngéda u nkôôba yigil yoñ i Nkum Ntat, añ ndugi dinyo malép i bibôdle bi yigil. Mbus, wan ño nkwel u yigil, boñ nlélém inyu bon ba miño mi minkwel ni mambadga ma mbigda. Mbus, yoñ ngéda i soñgol maben mbeñel mbeñel. Yimbe minlôñ mi mi ñunda we yom i ga pôda mu maben, mi mbéna ba minlôñ mi bisu mi hiki liben. Nlôñ u u mbéna unda we i yom liben li ga pôdôl. Mu kiki u ba u ñañ, ôt pék inyu tehe lelaa hiki liben li nit man ño nkwel, ni maada ma yé ipôla liben li ni ño nkwel u yigil womede. Yimbe bibuk bi nlet, ni biniigana u yik bé, ni bi u gwé ngôñ i tibil nok ni njel nyiña.

9. (a) Inyuki ni lelaa di nlama tibil wan minlôñ mi Bibel ngéda di nkôôba yigil i Nkum Ntat? (b) Inoñnaga ni kaat Yôsua 1:8, kii ipe di nlama boñ mbus di ñañ minlôñ mi Bibel?

⁹ Yigil i Nkum Ntat i nhôla bés i tibil  nok Bibel. Jon bok mis mu minlôñ mi Bibel mi ntiba, téntén mi mi ga éña ngéda yigil i mba i ntagbe. Yoñ ngéda i tehe lelaa balôm ba bibuk mu minlôñ mi, ba nit biniigana liben li nsômbôl pémés. Ni ki le, yoñ ngéda i soñda minlôñ mi bikaat u ñañ, ni lelaa u nla bii nwo bisélél i niñ yoñ.​—Añ Yôsua 1:8.

10. Inoñnaga ni kaat Lôk Héber 5:14, inyuki bagwal ba nlama gwélél bibégés bi ndap lihaa inyu niiga bon bap lelaa ba nigil ni lelaa ba mboñ nyiña?

¹⁰ I yé maliga le bagwal ba gwé ngôñ le bon bap ba ba maséé i yoñ ngaba bibégés bi ndap lihaa. Ndi, tolakii bagwal ba nlama yi yom i ga pôda mu bibégés bi, ba gwé bé ngôñ i hoñol le ba nlama kôôba mam ma tôbôtôbô hiki sonde. Tolakii ba nla yoñ ngéda inyu béñge JW Nkuu biliñgeliñge, tole inyu kôôba ngim jam i tôbôtôbô kiki bo i bañ nkuu u Nôa, i yé ki loñge le ba niiga boñge lelaa ba nigil. Ba gwé ngôñ i yi lelaa ba nkôôba makoda, tole lelaa ba nla boñ nyiña inyu timbhe ngim mbadga ba mbat bo i suklu. (Añ Lôk Héber 5:14.) Ibale ba gwé lem i nigil i ndap, i ga ba bo jam li ntomb i ba péé makoda, makoda makeñi, ni makoda ma ndôn, to ngéda bividéô bi ta bé. Ñ, ngéda di ntégbaha bibégés bi ndap lihaa i nlama kiha ni nwii mi boñge, yak ni libak jap.

11. Inyuki i yé nseñ i niiga i bôt ba nigil Bibel ni bés lelaa ba nla bana bañga yigil Bibel?

¹¹ Yak i bôt bés ni bo di nigil Bibel ba gwé ngôñ i yi lelaa ba nigil. Ngéda ba ntip bôdôl nigil, di yé di ba maséé i tehe bo ba ntand mandimbhe ngéda ba nkôôba yigil yap, tole makoda. Ndi di nlama niiga bo lelaa ba boñ nyiña ni lelaa ba nla bana bañga yigil i Bibel. Hala a mboñ le, ngéda ba mboma ndutu, iloole ba pala bat bilôk bikéé bipe mahôla, b’a yi hee ba nla léba maéba malam ni njel nyiña ikété bikaat bi ntôñ.

12. Mambe mam u nla bana ngôñ i yônôs i ngéda u nigil?

¹² Ibale u ngwés bé yigil, u nla hoñol le yigil y’a lémél bé we kekikel. Ndi ki le i nla lémél we. Bôdôl nigil ndék, mbus u kéñbaha ngéda u ntégbaha i yigil ndék ni ndék. U hôya bañ inyuki u nigil. I yé ntiik le njômbi yés i bisu  bisu i nlama ba le di kôôge Yéhôva bebee. Ipe i nla ba le, di yéñ timbhe ngim mbadga mut a mbat bés, tole di mboñ nyiña inyu ngim ndutu di mboma.

13. (a) Toñol lelaa mañge wanda a nla boñ inyu toñle solôñ yé i suklu i mam a nhémle. (b) Lelaa u nla gwélél maéba ma yé i kaat Kôlôsé 4:6?

¹³ Kiki hihéga, baa u ngi kenek i suklu? Baa solôñ yoñ i suklu yosôna i nhoñol le mam momasôna ma bi nyek? Bebek u ngwés yis bo i yom Bibel i niiga mu i jam li, ndi u nôgda wengoñle u nla bé kwés bo nkaa. Hala a mbat le u bana ntjegek ngéda inyu yigil! Manjom ima ma nla tinde we i boñ hala: (1) Inyu lédés hémle yoñ le Djob nyen a bi hek mam momasôna ni (2) inyu nigil lelaa u nla tibil toñle mut numpe i mam u nhémle. (Rôma 1:20; 1 Pétrô 3:15) U nla ndugi badba le: ‘Kii solôñ yem i suklu i mbéna kal inyu nit bini biniigana le gwom gwobisôna bi bi nyek?’ I mbus, tibil boñ nyiña ikété bikaat gwés. I nla ba jam li ntomb i toñle bôt i mam u nhémle. Ngandak bôt i nhémle le mam ma bi nyek, ndik inyule mut wada ba ndiihe a bi kal bo le hala nyen mam ma bi bôña. Ibale u nléba jam jada tole ima u nla kal bo, u nla ti mut nu a nyéñ toi maliga ndimbhe ilam i i ga lémél nye.​—Añ Kôlôsé 4:6.

14-16. (a) Kii u nla boñ inyu tibil yi ngim kaat i Bibel u nyi bé loñge? (b) Toñol lelaa minlôñ mi Bibel mi ntiba mi nla hôla we i tibil nok kaat Amôs. (Béñge yak minkéñék mi matila mi mi gwé ño nkwel le “ Boñ wee u yé mu ñañ u Bibel!”)

¹⁴ Hégda le, i likoda jada li ñem sonde, di ga nigil man kaat wada mu bon ba bikaat ba yé ipôla Hôséa ni Malaki, bebek u nyi bé man kaat nu loñge. Jam li bisu u nla boñ li yé le, u hôlôs ngôñ ikeñi i yi mam mpôdôl nu a bi tila. Lelaa u nla pam i boñ hala?

¹⁵ Badba ndugi le: ‘Kii me nyi inyu nwet a bi tila kaat ini? Njee a bé, hee a bé niñ, imbe ntén bôlô a bé sal?’ Binéñél gwé bi nla unda inyuki a bi gwélél ngim bibuk tole ngim dihéga. Mu kii u mba u ñañ Bibel, yéñ minlôñ mi mi nhôla we i hégda umbe ntén mut ntila Bibel nu a bé?

¹⁶ I mbus, u nla tehe nseñ i tand ngim nlôñ u nwii, u yéñ yi imbe ngéda a bi tila kaat yé inoñnaga ni mangéda ma yé mu nlôñ u. Inyu pam i boñ hala, kee i La Bible. Traduction du monde nouveau i mbus kaat Masoola, w’a léba “minkéñék mi matila mi mi gwé bikaat bi Bibel.” U nla yak béñge Appendice A6 i het ba ñunda bapôdôl ni bikiñe ba ba bi niñ i nlélém ngéda. Ibale i kaat i Bibel u nigil i mpôdôl mbañ, i yé loñge le u yéñ yi lelaa mam ma bé ha ngéda i. Mambe maboñok ni bilem bibe mpôdôl a bé kal litén le li tjôô? Bonjee ba bé niñ ha ngéda yé? Inyu tibil nok mam, i nla ba nseñ i wan bikaat bi Bibel bipe. Kiki hihéga, inyu tibil nok kii i bé tagbe ngéda mpôdôl Amôs a bé niñ, u nla nigil ngandak mu lisoñgol li minlôñ mi bikaat mi 2 Bikiñe ni 2 Miñañ, mi mi ntiba i Amôs 1:1, ni mi ba nléba i ñemkété lipep. U nla ki tiimba soñgol kaat Hôséa, nu a bi mlama niñ i nlélém ngéda ni Amôs. Bikaat bi Bibel bi gwobisôna bi nhôla bés i tibil nok lelaa niñ i bé dilo di Amôs. ​—2 Bikiñe 14:25-28; 2 Miñañ 26:1-15; Hôséa 1:1-11; Amôs 1:1.

17-18. Gwélél dihéga di maben tole hihéga hioñ wemede inyu unda le i wan disii di mam, i nla lémés yigil yoñ i Bibel.

¹⁷ Ngéda u ñañ Bibel, i yé loñge i badba ngim mambadga. Hégda le u yé añ mbañ i Sakaria pes 12, i i bi bôk i legel nyemb Mésia. (Sakaria 12:10) Ngéda u mpam i nlôñ 12, ba mpôdôl “lihaa li ndap Natan” li li ga ee ngandak ngéda Mésia a’ wo. Iloole u pala tagbe mu disii di mam di, u nla téé lisoñgol joñ, u badba le: ‘Mambe maada ma yé ipôla ndap Natan ni Mésia? Baa pôla i yé i kôhna biniigana bipe?’ Noode boñ ndék “minyiña.” Mu minlôñ ba nti ñemkété lipep, wada u yé 2 Samuel 5:13, 14, i het ba nkal le Natan a bé man munlôm wada ikété bon ba Kiñe David. Nlôñ u noñ u yé Lukas 3:23, 31, u u ñunda le Yésu a bi pémél i mbôda i Natan ni njel Maria. (Béñge “Yôsep man Eli” mu biniigana inyu yigil i kaat Lukas 3:23.) Kunda yada, boña a nyibla we! U yik le ba bi legel le David a bé lama ba sôgôlsôgôl nu Yésu. (Matéô 22:42) Ndi David a bi bana iloo 20 ma bon bôlôm. Baa hala a nhélés bé bés i tehe le Sakaria a bi kal le ndap Natan i bé lama bana ngim njom i tôbôtôbô i ee i nyemb Yésu?

¹⁸ Di yoñ hihéga hipe. I pes bisu i kaat Lukas, di ñañ le añgel Gabriel a bi yuuga Maria, a legel nye inyu man a bé lama nembee le: “A’ ba  mbiñ mut, a séblaga le Man Nungingi, Nwet le Yéhôva Nyambe a’ ti nye yééne ane i isañ wé David, a’ ane ndap Yakôb mba ni mba.” (Lukas 1:32, 33) I nla pam le di telbene bibuk bi bisu bi nwin u Gabriel, i het a kal le Yésu a’ séblana le “Man Nungingi.” Ndi Gabriel a bi kônde ki le, Yésu a’ “ane.” Jon di nla badba le, kii bi bibuk bi Gabriel bi bé le bi kobla inyu Maria? Baa a bi nok bibuk bi kiki bo le Yésu nyen a bé lama yiha kiñe Hérôdé​—tole baa a bé lama ba mut wada ikété ba ba bé lama yiha nye kiki ñane Israel? Ibale Yésu a yila kiñe, ki Maria a bé lama ba nyañ kiñe, yak lihaa jé jolisôna li bé lama yééne i yale i kiñe. Ndi homa to wada ikété Bibel a ñunda bé le Maria bo Gabriel ba bi pôdôl ngim jam hala; to nok di mah nok bé le Maria a bi bat tel ikeñi mu Ane, kiki banigil iba ba Yésu ba bi boñ. (Matéô 20:20-23) Disii di mam di, di nkwés bés nkaa le Maria a bé lôôha ba muda suhulnyuu!

19-20. Inoñnaga ni kaat Yakôbô 1:22-25 ni 4:8, imbe njômbi di nlama bana ngéda di nigil?

¹⁹ Di bigda le njômbi i bisu i i ntinde bés i nigil Bañga i Djob ni bikaat bi ntôñ i yé le di kôôge bebee ni Yéhôva. Di gwé ki ngôñ i tibil yi ‘umbe ntén mut’ di yé, ni mambe mahéñha di nlama boñ inyu lémél Nyambe. (Añ Yakôbô 1:22-25; 4:8.) Ilole di mbôdôl yigil, di bana lem i bat Yéhôva mbuu mpubi ni njel masoohe. Di bat nye le a hôla bés i ôt nseñ ni yigil i nya i yôni, ni le a hôla bés i tehe mambe mahéñha di gwé ngôñ i boñ.

²⁰ Bés bobasôna di nlama ba kiki ngwélél Djob nu ntôp tjémbi a mpôdôl ngéda a nkal le: “Ndi maséé mé ma yé i mbén Yéhôva, a nhoñol ki mbén Yé njamuha ni juu. . . . To kinje a mboñ i ntoo.”​—Tjémbi 1:2, 3.