Suklu yada i bi kena baudu bé i nhiômôk; i yokela nu, boñge bôlôm bahogi ba bi gwel numpe ni ngui, ba lalna ki nye. Bobasôna ba bé baudu ba suklu i loñ Kanada. I mbus béba jam ini, mut wada le Leonard Stern a bi tila i lipep li manwin ba nsébél le Ottawa Citizen le: “I biniigana gwobisôna ba niiga i suklu bi nkéñ bé boñge ba wanda njel i boñ mam mabe.”

A nkônde ki kal le: “Di nla hoñol le njômbi i bisu i bagwal i yé le bon bap ba hôlôl ikété maboñog map tole bilem bilam gwap. Ndi maliga ma yé le ngandak bagwal i nlôôha pagap ndugi i tinde bon bap i boñ bisuklu tole i yéñ nkus.”

I pot maliga, suklu i yé nseñ. Ndi to ibale mut a mboñ suklu lelaa, i nla bé hôla nye i jôs mahoñol mabe tole minheña. Hee di nla ni kuhul biniigana inyu mam ma​—bi bi ga hôla bés i kil i njel i téé sép?

Bibel i yé kiki léman. Ngéda di nwan yo, di ntibil tehe minwaa nwés ni bibom gwés. (Yakôbô 1:23-25) Ndi, Bibel i mboñ ki iloo ha. I nhôla bés i mboñ mahéñha ma ma mbéda, i hôlôs bilem bi bi nlona nsañ ni adna. Bilem bi, bi nla ba loñgeñem, liyômba, wongut, hôtnyu ni gwéha. Gwéha i yé lem i “i ñat toi bôt bobasôna i nya i yôni.” (Kôlôsé 3:14) Inyuki gwéha i yé lem i yé tôbôtôbô? Béñge ki i yom Bibel i nkal inyu lem ilam i.

• “Gwéha i nwéha ngut, i gwé ki longeñem; gwéha i nkila bé njôñ, to kadba i nkadba bé; i nhumbul bé nyuu; to nyeege i nyeege bé jam. Gwéha i nyiñil bé ndigi yomede, i ñagla bé, to éñél mut numpe béba; i nkon bé maséé inyu ngitelepsép, ndi i nkon ya maséé lôñni maliga. Gwéha i mil matjél inyu mam momasôna, . . . i nhônba ki mam momasôna. Gwéha i malba bé.”​—1 Korintô 13:4-8.

• “Gwéha i mboñ bé mut wé libôk béba.”​—Rôma 13:10.

• “Jam li nloo momasôna li yé le, ni lôôhaga gwéhna bé ni bé, inyule gwéha i nhô ngandak bibéba.”​—1 Pétrô 4:8.

Kii u yé u nôgda ngéda u yé ni bôt ba ba ngwés we? Nsañ? Nwee? Maséé? Ñ, inyule u nyi le ba nyéñ ndigi loñge yoñ, ba nla bé ki to kôôba boñ we béba.

Gwéha i nla ki tinde bôt i boñ bisesema, ni i héñha ntén niñ ba niñ, inyu loñge i bape. Kiki hihéga, ngéda mut wada di ga sébél le Georges a bi yila sôgôl, a bé gwés a ntégbaha ngéda ngandak ni nlal wé. Ndi a bééna lem ibe yada.  Georges a bé ôt siga ngandak, ndi nkil wé a bé gwés bé ngéda a ñôt siga ipañ man. Kii Georges a bi boñ? To hala kii i bé boñ yom kiki bo 50 ma nwii le a bé ôt siga, a bi sôk a tjôô lem i ôt siga ndigi inyu nlal wé. Ñ, kinje ngui gwéha i gwé!

Di nigil ndigi niglak i bana lem i gwéha. Bagwal bon ba gwé mbegee inyu niiga bon bap lelaa ba nla unda le ba gwé gwéha. Ba njés bon bap, ba tadak bo, ba tiblak ki bo ibale ba mbabaa tole ba nkon. Biloñge bi bagwal bi nkwel ni bon bap, bi niigaga ki bo. Bi nkodol bon bap, bi niigaga ki bo i yi bagal kii i yé loñge ni kii i yé béba. Di nla ki kônde le, biloñge bi bagwal bi nti bon bap ndémbél ilam.

Ndi hala a yé ngoo i tehe le ngim bagwal i nsal yaga bé nson wap. Baa hala a nkobla le bon bap ba nla ha bé boñ yom yo ki yo? To jam! Yak minhôôlak mi bôt mi mi bi néñél ikété mahaa ma ma bééna yubda, mi bi la boñ mahéñha makeñi mu niñ yap, letee le mi bi yila biloñge bi bôt ni ba ba nla bôdôl ñem. Kiki di ga tehe mu yigil i i noñ, hala a mbéñge yak i bôt ba bé pôôna wengoñle ba yé minimlak.