Baa u nhémle le bôt ba binam ba nla mélés mandutu ma ma nsôña bés i niñ ikété nsañ ni nwee, ma yubdaga ki bilôl gwés? Ibale di nyéñ toi mélés mandutu més, di nlama ndugi bôdle i nkañ wap.

Di yoñ le hihéga hi Tom nu a bé kon, i mbus a wo. Inyuki a bi wo? I dokta a bé noñ kon wé ilole Tom a nwo a bi tila le: “Ngéda kon wé u bi bôdôl, to mut a bi yéñ bé i yi kii a bé kon.” I mpôôna le i bidokta bi bé noñ kon u Tom i bibôdle, bi bé ti ndigi nye bee inyu hôgbaha nye.

Baa bôt ba binam ba mboñ nlélém ni mandutu ma nkoñ isi? Kiki hihéga, inyu jôs manola, biane bi nkoñ isi bi ntéé mambén, bi gwéélak bividéô ni bisônda i tat bôt. Ndi bitelbene bi, to ibale bi nhôla, bi nhéya bé manjom ma ma nlona mandutu ma. Ndi iloo hala, maboñog ma bôt, ma ñéba ndigi libak jap, mahoñol map ni ngôñ yap.

Daniel nu a niñ i loñ yada i i yé liyep i Amérika nwelmbok, a nkal le: “Di bé niñ loñge. Di bé kon bé to wip ni mangaa woñi. Ndi i len ini, mbai to tison yo ki yo i ta ha bé nwee. Liyep li loñ yés li ñéba toi libak li hiki mut kiki bo wim ni i tjél diihe niñ ni i mam bôt bape ba gwé.”

Mut nu di ga sébél le Élias, a bé niñ i pes hiôñk i Asia ndi a bi ke gwét ngwéé, i mbus a bôdôl yigil Bibel. A ntoñol le: “Mahaa ma ngandak boñge ba wanda ba tison het me bé lôl yak bôt ba m’bô ni ba bibase ba bé tinde bo i yoñ ngaba mu gwét inyu boñ le môl map ma yiba. Ba bé lama kal nlélém jam inyu bakolba bo! Hala a bi hôla i tehe le hala a yé ngoo ngandak i bôdôl baane ba nkoñ isi ñem.”

Nlômbi kaat u pék u nkal le:

• “Inyule hégda i ñem mut i yé béba ibôdôl nye mañge wanda.”​—Bibôdle 8:21.

• “Ñem u yé malôga iloo mam momasôna u yé ñôbak nya i nlôôha. Njee a yé le a yi wo?”​—Yérémia 17:9.

• “Inyule mu ñem nyen bo mahoñol mabe ma nlôl, bo manola, bo ndéñg, . . . bo wip, bo mbôgi bitembee.”​—Matéô 15:19.

Bôt ba binam ba bi la bé léba bee bi bi nla tibil tole mélés maboñog mabe ma ma yé bés ikété. Maliga ma yé le maboñog ma, ma mbôl ndigi, bôl ni bôl, ndik kiki di mbôk di toñol i yigil i i ntagbe. (2 Timôtéô 3:1-5) Ngandak bisélél di gwé inyu ep manwin, ni ngap yés i kwel ni bôt bi nla bé héñha mam! Jon, inyuki ni di nla bé lona nsañ ni nwee ikété nkoñ isi? Baa di mbédél bé bésbomede i yom di nla bé boñ? Baa di ta bé i tulul mañ i liboo?

To ibale di bak le di boñ manyaga inyu mélés maboñog mabe ikété nkoñ isi, di ga la bé boñ le nsañ ni nwee bi ba. Inyuki? Inyule bôt ba binam ba gwé minwaa.

Bibel i nyigye maliga mana le: “Njel mut i ta bé ni nyemede . . . ngéda a nke.” (Yérémia 10:23) Ñ, di bi héga bé ni ngap i éga bésbomede. Ngo di bi  héga bé inyu énél i ngii bôt bape, kiki di bi héga bé to inyu niñ ikété malép kiki tjobi ni i mbébi kiki dinuni!

Hoñol ki le: Baa bôt ba mbéna neebe le biséga gwap bi kal bo lelaa ba nlama niñ, tole bimbe bilem bilam ba nlama bana? Baa bôt ba mbéna gwés le bape ba niiga bo lelaa ba nlama tehe lisôh mém tole i péni mut tole i kodol boñge? Ha a yé ndigi dinyo malép di ndék mam i i mboñ le bôt ba nôgla bañ. Jon i yom Bibel i nkal i téé sép to ibale i nla ba bés ndutu i neebe hala. Di gwé bé ngap tole kunde i énél bôt ba binam. Hee ni di nla lébna mahôla?

Yom di nlama boñ i yé le di sédne Nhek wés maôô. To i ba yaa lelaa, nyen a hek bés! Maselna ni i yom bôt bape ba nla hoñol, a bi hôya bé bés. Ngo Bibel i nyelene bés nduña yé yosôna inyu yés. Ngéda di nigil i yi yom Bibel i nkal, hala a nhôla bés i nok bonjee di yé. Ni hala, di nla tibil nok inyuki bôt ba binam ba niñil bé ikété nsañ ni nwee. Di nla ki tibil tehe inyuki nyimam wada i loñ Jaman a bi tila le: “Matén ni baane bobasôna ba mah yaga bé nigil i nok niñ i bôt ba binam, ndi to i boñ mam inoñnaga ni i yi i.”

Mut pék wada a kal kel yada le: “Pék i nkéla le i téé sép inyu bon bé bobasôna,” hala wee inyu minson nwé. (Lukas 7:35) Ikété kaat Yésaya 2:22, Bibel i nti bés maéba ma pék ngéda i nkal le: “Ni bôdôl ha bañ mut binam ñem.” Maéba ma pék ma, ma nla hôla bés i waa bôdôl gwañga bi mam ñem. Kenneth nu a niñ i tison yada i Amérika ñombok het bôt ba ngwés njôô, a nkal le: “Mut m’bô wada i mbus numpe a mbôn mahéñha makeñi, ndi ki le a nla bé boñ to yom. Dihôha ba mboñ di nhôñlaha bés hiki ngéda pék i i yé ikété Bibel.”

Daniel nu di mbôk di sima, a ntila le: “Hiki kel i i ntagbe i nkwés me nkaa le bôt ba binam ba nla bé tibil énél. . . . I biine botñem yés i moni di gwé i bank tole i moni di ntééda inyu biuuni i nhee bé to jam. Me mah tehe bôt ba nson njonok inyu jam li.”

Bibel i nhôla bés le di boñ i lel yak i waa bôdôl gwañga bi mam ñem. Ndi, kiki di ga tehe i bisu, Bibel i nti ki bés botñem.